Read south west gbaya Marc 6 Bible Online

Marc 6 - south west gbaya bible

Marc 6

¹Jésus guotɛ haki si ha bhandi ka wɛnɛ kpɔatɛ ang. Hio *wan-yambimɔ pɛa nɛa hinɛ wɛnɛ.

²Ka hɔa ha *swe ɔmtɛ, Jésus angara osamɔ ha hio wi ha *twa gɔ Sɔ. Dɔka wi ka dungɔ ha zea wɛnɛ, yaksa nɛ mbwa tɔa: «Wɛnɛ kpa osamɔ ɛngɛ ha ndo? Mbaramɔ ɛngɛ gutɛ ha ndo tɛ nɛ ge? Nɛ wɛnɛ de mɛng de nɛ hio *mɔkifi ndɔng ge nde?

³Bo nê wɛnɛ nê wan-sɛkte, bewei pɛ Marie na nde? Hio ya wa bo nê Jacques, Yozes, Judée nɛ Simon na nde? Hio ya wa mɔ bhoko de le ha soko ɔ na nde?» Mɛgi, mɔ ndɔng fɛt dolsa mbwa mɛ mɛkiri Jésus.

⁴Nɛ Jésus tɔa ha mbwa: «Hio wi ba *wan-tɔkuliwen nɛ zioa ha bhandi fɛt. Ma, ha le ka wɛnɛ kpɔatɛ ang, ha nugala pɛa, nɛ ha soko hio nam pɛa, ɛ ba wɛnɛ ang nɛ zioa na.»

⁵Jésus tɛ kpa wal mɛ de mɔkifi haki ndang na. Sɔna, wɛnɛ gdea nɛ kɔ ha tɛ hio ma wan-zɛlɛ, nɛ wɛnɛ kpasasa mbwa.

⁶Ma, wɛnɛ yaksa hazu mbwa mɛkiri wɛnɛ na. Hapata, wɛnɛ nɛa ha hio le ka zikoro Nazaret, hazu osimɔ ha hio wi.

⁷Jésus saa hio wan-yambimɔ bhukɔ gbala bwa. Wɛnɛ haa mbwa ziomɔ mɛ gan zu hio gdanga sɔtɛ, nɛ wɛnɛ angara tomsa mbwa bwa, bwa.

⁸A haa nu ha mbwa: «Ɛnɛ aba ma mɔ hazu yali na, kanɛ tongolo sɔna. Ka ɛnɛ aba yɔngamɔ, ngase ngobho, ngase mbɔli na.

⁹Ɛnɛ ayol nakala nɛ la ndang sɔna, ɛnɛ aku ma fin na.»

¹⁰Wɛnɛ tɔa fin ha mbwa: «Ka ɛ baa ɛnɛ ha ma twa, ɛnɛ abhɔn sɔna haki, kanɛ ɛnɛ guotɛ ha le ɛngi pen.

¹¹Nɛ ka hio wi ha ma bhandi ba ɛnɛ nɛ dede kɔ na, nɛ ka mbwa ze ɛnɛ na, ɛnɛ pen ha bhandi ɛngi. Nɛ ɛnɛ ngbɔ ngbabhuki nanga ɛnɛ, ka yo aosi ha mbwa gdanga deamɔ pɛ mbwa.»

¹²Mɛgi, hio wan-yambimɔ pena nɛ ha bulo wen ha hio wi nde, mbwa akifiri sila.

¹³Mbwa yinɔ dɔka gdanga sɔtɛ ha tɛ hio wi gbosisi. Mbwa hɔnga nɔ ha tɛ hio dɔka wan-zɛlɛ, nɛ zɛlɛ pɛ mbwa kara.

¹⁴Kasi tɛ Jésus yambala dam bhandi fɛt, nɛ *kongapora Herode zea yo. Nɛ hio ma wi dungɔ ha tɔa: «Jésus nê Jean wan-gdumsiwi ha gutɛ ha soko hio fiowi. Yo nê ɛngi, ka wɛnɛ nɛ ziomɔ mɛ de *mɔkifi.»

¹⁵Hio ma dungɔ ha tɔa: «Wɛnɛ nê *wan-tɔkuliwen *Elie, ka kiforo tɛ.» Hio ma tɔa: «Yo nê ma wan-tɔkuliwen gbesi ma ha soko ɛ ndɔng, ka badung sɔngsi bhee.»

¹⁶Ma, ka Herode zea wen ndɔng, a tɔa: «Wi kɛ nê Jean ka mi baha nu nde ɛ agɔn zu wa. Yo nê wɛnɛ ka guo fin tɛ nɛ zutunɔ.»

¹⁷Fio pɛ Jean wan-gdumsiwi dungɔ se mɛgɛ: Kongapora Herode basi Herodiade, ko pɛ bebe ya wa Philippe, ngase wɛnɛ bhɔna nɛ zutunɔ. Mɛgi Jean tɔa ha Herode: «Mɛ lɛm si ko pɛ ya mɛ na.» Nɛ Herode haa nu nde, ɛ aba Jean sang, nɛ pi ha zɔbhɔ.

¹⁸

¹⁹Herodiade baa ngambi sungiri nɛ Jean. A ngoya mɛ gbɛ wɛnɛ gbɛ. Ma, a kpa wal na,

²⁰hazu Herode dungɔ ha yuo ke Jean. Herode ingɔ nde, Jean nê *nzeng wi nɛ nzɔy wi. Mɛgi wɛnɛ dungɔ ha pama Jean. Nɛ ka wɛnɛ zea wen ka Jean tɔa, sila wa bhunzoko ngase ka wɛnɛ zea Jean nɛ totɛ.

²¹Ma, ha swe yenga bhɛ pɛ Herode, Herodiade kpaa dede ngimɔ mɛ gbɛ Jean. Herode dea fada ha hio gasa wi pɛa, hio kagama-bulo, nɛ hio konga wi mɔ kandɔnu Galile.

²²Bem pɛ Herodiade mɔ bebhoko lea twa fada, nɛ wɛnɛ yɔa yula. Yula ɛngɛ dea totɛ ha sila Herode, nɛ hio wi ndɔng ka wɛnɛ saa ha fada. Mɛgi, kongapora tɔa ha bezunga ɛngɛ: «Mɛ ani mi mɔ fɛt ka mɛ ngoya, nɛ mi beha yo ha mɛ.»

²³Nɛ Herode kanamɔ ha li wa, nɛ tɔa: «Mɔ fɛt ka mɛ beani ha kɔ mi, mi beha yo ha mɛ. Ngase kongakandɔ pɔm mi lɛma gɔn sokoa ha binsila ha mɛ.»

²⁴Bebhoko ɛngɛ gboa ha twa nɛ, nɛ ani nana wa: «Mi beani nɛ nge tɛ mɔ ha kɔ kongapora ge?» Nana wa kiforo wen ha wɛnɛ: «Mɛ ani nɛ zu Jean, wan-gdumsiwi.»

²⁵Nɛ bezunga ɛngɛ sɔawi si ha pɛ kongapora. A tɔa ha wɛnɛ: «Mi ngoya nde, mɛ aha mi zu Jean wan-gdumsiwi ha zang libhang sising-sising.»

²⁶Nɛ ka kongapora zea ɛngɛ, a dea kobhe pentɛ. Ma, a tɛ ngoy kafa wen ha nu bem ɛngɛ na, hazu a kanamɔ ha li wi ndɔng, ka wɛnɛ saa ha fada kari.

²⁷Mɛgi, ha ndangtɛ ngimɔ, wɛnɛ haa nu ha ma wan-bibulo nde, wɛnɛ anɛ nɛ gɔn zu Jean tɛnɛ. Wan-bibulo ɛngɛ nɛa ha twa zɔbhɔ nɛ a gɔna zu Jean.

²⁸A gdea yo ha zang libhang tɛnɛ. A haa yo ha bebhoko, nɛ wɛnɛ kuo yo nɛnɛ ha nana wa.

²⁹Nɛ ka hio *wan-yambimɔ pɛ Jean zea wena, mbwa nɛa nɛ ku wɔl wa nɛ nɛ gun.

³⁰Hio *wan-nɛtom kiforo hapɛtɛ Jésus. Mbwa tɔa ha wɛnɛ kasi mɔ fɛt ka mbwa dea nɛ osa.

³¹Ha ngimɔ ɛngi, hio wi ka dungɔ ha tɛa ha pɛ mbwa, nɛ ɛ ndɔng ka dungɔ ha pena, dɔka pentɛ. Mɛgi Jésus hinɛ hio *wan-yambimɔ pɛa tɛ kpa wal mɛ yɔngmɔ na. Hazu ɛngi, a tɔa ha mbwa: «Ɛnɛ tɛ, ɔ nɛ ha ma bhandi ka wi bo ang na, ka ɛnɛ aɔmtɛ tikiring ing.»

³²Mɛgi, mbwa lea sɔngu nɛ ha ma bhandi ka wi bo ang na.

³³Ma hio wi zɔka mbwa ha pena, nɛ dɔka wi ingɔ mbwa. Mɛgi hio wi mɔ le fɛt sɔawi nɛ nubɛlɛ, nɛ hɔa sɔngsi ha bhandi ka mbwa nɛ ang.

³⁴Ka Jésus gboa ha sɔngu, a zɔka dɔka giliwi ndɔng. Sila wa gdɔya, nɛ kobhe tɛ mbwa dea wɛnɛ, hazu mbwa dung tuka zugili sami ka bo nɛ zaoroa na. Mɛgi wɛnɛ angara osamɔ ha mbwa nɛting.

³⁵Ka swe betɛ le, hio wan-yambimɔ pɛa tiko nɛ hapɛtɛ wa. Mbwa tɔa ha wɛnɛ: «Zɔk, hakɛ nɛ zang bɛlɛ, le bona, nɛ swe betɛ le.

³⁶Mɛ ha nu ha wi ndɔng ka mbwa anɛ ha hio bebe le nɛ hio le ka dung sanga, ka mbwa ahɛ yɔngamɔ.»

³⁷Jésus kiforo wen ha mbwa: «Ɛnɛ ha yɔngamɔ ha mbwa nɛ pɛ ɛnɛ tɛ.» Mbwa ana wɛnɛ: «Hazu hɛ mampa ka lɛm nɛ hio zugiliwi ndɔng, lɛma nde, ma wi ade tom yala gɔmmay bwa! Mɛ ngoya nde, ɔ ade mɛng?»

³⁸Jésus ana mbwa: «Ɛnɛ nɛ mampa ha kɔ ɛnɛ ge? Ɛnɛ nɛ, nɛ zɔk!» Nɛ ka mbwa nɛa nɛ zɔk yo kari, mbwa kiforo wen ha wɛnɛ: «Ɔ nɛ mampa mɔrkɔ nɛ kɔyɔ bwa.»

³⁹Mɛgi, wɛnɛ haa nu ha hio wan-yambimɔ mɛ tɔ ha giliwi ndɔng nde, mbwa adungnu ha zu ndungulu nɛ bezugili nɛtɛ-nɛtɛ.

⁴⁰Nɛ mbwa dungɔnu. Hio ma gɔmmay, gɔmmay, nɛ hio ma bhukɔa mɔrkɔ, bhukɔa mɔrkɔ.

⁴¹Hapata, Jésus baa mampa ndɔng mɔrkɔ nɛ kɔyɔ bwa. Wɛnɛ guo li ha ngɔn, nɛ wola dede wen ha zua. A gbinɔ mampa ndɔng, nɛ haa yo ha hio wan-yambimɔ nde, mbwa akapini yo ha hio giliwi. Nɛ wɛnɛ kapana fin kɔyɔ ndɔng ha hio wi fɛt.

⁴²Wi fɛt yɔnga yo nɛ zang mbwa dona.

⁴³Hapata, hio wan-yambimɔ wesara olo titi mampa nɛ kɔyɔ ndɔng don gɛsɛ bhukɔ gbala bwa.

⁴⁴Wei ndɔng ka yɔnga yo, dɔka mbwa dungɔ nê tomay mɔrkɔ.

⁴⁵Nɛhasa hapata ɛngi, Jésus nɔsasa hio *wan-yambimɔ pɛa nde, mbwa ale sɔngu, nɛ mbwa apen sɔngsi nɛ wɛnɛ nɛ ha kuli tɔ, ha wal le Betsaida. Ma, Jésus nɛ pɛa tɛ ngoy bhɔn hazu gde wal ha giliwi asi.

⁴⁶Hapata mbwa kɛatɛ, Jésus danga nɛ ha zu ma ngari ha gɔa Sɔ.

⁴⁷Ka tutum ha tɛa, hio wan-yambimɔ tɛ bo nɛ sɔngu ha binsila tɔ. Jésus bhɔna gbatɛ ha nu.

⁴⁸Wɛnɛ zɔka nde, hio wan-yambimɔ pɛa ha kpaa yeksamɔ ha gala sɔngu nɛ kapi, hazu bok yuo nɛngaya sungiri mbwa. Ha nu ngimɔ, Jésus tɛa ha pɛ hio wan-yambimɔ. A nɛa nɔ ha zu li, nɛ a dea tuka a bepen mbwa pen.

⁴⁹Ka mbwa zɔka wɛnɛ ha nɛa nɔ ha zu li, mbwa takara nde yo nê sɔtɛ wi. Mɛgi mbwa gdɔra nɛ ke.

⁵⁰Mbwa fɛt zɔka wɛnɛ nɛ ke dea mbwa nɛdɔka. Nɛhasa a wolamɔ ha mbwa, nɛ tɔa: «Ɛnɛ ba da. Yo nê mi Jésus. Ɛnɛ yu ke na.»

⁵¹Hapata, a lea sɔngu hinɛ mbwa nɛ bok kara. Nɛ hio wan-yambimɔ yaksa pentɛ,

⁵²hazu mbwa tɛ ing goto *mɔkifi ka wɛnɛ dea nɛ mampa na, hazu sila mbwa dungɔ nɛngaya.

⁵³Ka mbwa kuo li kari, mbwa kpoa sɔngu ha nukolo mɔ le Genezaret.

⁵⁴Nɛ ka mbwa boka ha gboa ha sɔngu, hio wi ingɔ Jésus nɛhasa.

⁵⁵Nɛ mbwa sɔawi dam kandɔnu ɛngi fɛt, nɛ mbwa kaya hio wan-zɛlɛ nɛ lang tɛnɛ ha bhandi, ka mbwa zea nde Jésus ang.

⁵⁶Ha hio le ka Jésus yala ang fɛt, mana bebea, mana gasaa, mana nu fɔ, ɛ dungɔ ha gdea hio wan-zɛlɛ ha gbadɛl mɔ lea. Nɛ hio wi dungɔ ha lokatɛ ha Jésus nde, wɛnɛ agde hio wan-zɛlɛ andɔ ngbunzɛ-ngbunzɛ nu la pɛa sɔna. Nɛ wi ndɔng fɛt, ka ndɔa nu la pɛa, kpasa.