Read south west gbaya Marc 7 Bible Online

Marc 7 - south west gbaya bible

Marc 7

¹Hio ma *Farizien nɛ hio ma *wan-osi mbonga ka guotɛ ha Jérusalem wesara may hapɛtɛ Jésus.

²Nɛ mbwa zɔka nde, hio ma *wan-yambimɔ pɛ Jésus yɔngamɔ nɛ kɔ nɛ nzing. Ɛngɛ tɔ nde, mbwa tɛ tay kɔ lɛm nɛ ndɔki deamɔ pɛ hio ngbabafa mbwa na.

³Hio Farizien nɛ hio zuife fɛt pama hio ndɔki deamɔ pɛ hio ngbabafa mbwa. Sɔngsi yɔngamɔ, lɛma nde mbwa atay kɔ mbwa nɛ saa.

⁴Ka mbwa hɔa ha bhandi gdongimɔ pe, lɛma nde mbwa azoy li, sɔngsi yɔngamɔ. Mbwa yuo fin dɔka ndɔki deamɔ pɛ ngbabafa mbwa: Tuka wal fala kɔpɔ, lɔngɔ, kpana nɛ mbanzila.

⁵Mɛgi hio Farizien nɛ hio wan-osi mbonga ana Jésus: «Hio wan-yambimɔ pɛ mɛ pam ndɔki deamɔ pɛ hio ngbabafa ɔ na, hazu ge? Mbwa yɔngmɔ nɛ kɔ nɛ nzing hazu ge?»

⁶Jésus kiforo wen ha mbwa: «Ɛnɛ hio wan-dambari, Esaïe tɔa kuliwen hazu ɛnɛ nɛ wala, ka wɛnɛ ngɛraka wen pɛ Sɔ: ‹Kandɔ ɛngɛ lukisi mi nɛ kpatanu sɔna. Ma, sila mbwa yɛa nɛ mi pepepe.

⁷Mbwa lukisi mi nɛgbelea, hazu mbwa osi sɔna mbonga, ka tɛ nɛ wal takaramɔ pɛ wi.›»

⁸Nɛ Jésus tɔa fin: «Ɛnɛ laka mbonga pɛ Sɔ gde, hazu gde ha bhandia ndɔki deamɔ pɛ wi!

⁹Ɛnɛ nɛ zɛng mɛ mul mbonga pɛ Sɔ pi bhɔn hazu ndari ndɔki deamɔ pɛ ɛnɛ.

¹⁰Moïse batɔ: ‹Mɛ ba bafa mɛ nɛ nana mɛ nɛ zioa.› Nɛ a tɔa fin: ‹Wi ka fɛngsi bafa wa mana nana wa, lɛma nde ɛ agbɛ wɛnɛ.›

¹¹Ma, pɛ ɛnɛ, ɛnɛ osi ha hio wi mɛ tɔ nde, mbwa lɛm gbakiri bafa nɛ nana mbwa fin na, hazu mbwa beha mɔ gbakiri mbwa nɛ sadaka ha Sɔ.

¹²Ka ma wi tɔa mɛgi, ɛnɛ gdɔka wal ha wɛnɛ mɛ gbakiri fin bafa nɛ nana wa.

¹³Tuka ɛngi, ɛnɛ kiforo wen pɛ Sɔ ha gbelemɔ. Ɛnɛ tɛ bo ha osa nɛ ndɔki deamɔ pɛ hio ngbabafa ɛnɛ ha bhandia. Nɛ ɛnɛ de fin mɔ nɛdɔka gbesi tuka mɔ ɛngɛ.»

¹⁴Hapata ɛngi, Jésus saa hio giliwi ndɔng fin nɛ wɛnɛ tɔa ha mbwa: «Ɛnɛ fɛt, ɛnɛ lɛngi zala ɛnɛ nɛ ze wen pɔm nɛdedea.

¹⁵Mɔ ka de nde, wi adung nɛ nzing ha li Sɔ, yo bo nê mɔ ka wɛnɛ yɔng nɛ ka le si ha zang wa na. Ma, yo nê mɔ ka gbo ha zang sila wa, ka de nde, wi adung nɛ nzing. [

¹⁶Wi ka bo nɛ zala mɛ ze, wɛnɛ aze.»]

¹⁷Nɛ ka Jésus laka giliwi ndɔng gde, wɛnɛ lea twa. Hio *wan-yambimɔ pɛa ana wɛnɛ nɛ goto wen ɛngɛ.

¹⁸Mɛgi, wɛnɛ ana mbwa: «Ɛnɛ fin, ɛnɛ tɛ ing gotoa na? Mɔ ka wi yɔng nɛ ka le si ha zang wa, yo lɛm de nde, wɛnɛ adung nɛ nzing ha li Sɔ na. Ɛnɛ ing ɛngi na?

¹⁹Hazu yɔngamɔ le ha sila wi na. Ma, yo nɛ sɔna ha zang, hapata yo gboa nɛ wal mbom.» nɛ wal wen ndɔng, Jésus osa nde, wi lɛma yɔng tili yɔngamɔ fɛt.

²⁰Nɛ wɛnɛ tɔa fin: «Yo nê mɔ ka gbo ha zang sila wi ka de nde, wi adung nɛ nzing ha li Sɔ.

²¹Hazu hio gdanga takaramɔ gutɛ ha sila, mɛgi hio wi dea li bhoko, zuo mɔ, gbɛa wi,

²²dea wanza, gola kpaamɔ pɛ ma wi, dea mɔ nɛ nyalɔ, gɔna zang, dea mɔ tum, dea silamɔ, fɛngsa wi, suotɛ, nɛ dea mɔ yera.

²³Hio gdangamɔ ndɔng fɛt, gbo ha zang sila wi, nɛ de nde, wi adung nɛ nzing ha li Sɔ.»

²⁴Jésus guotɛ ha kandɔnu Galile, nɛ ha kandɔnu mɔ le Tir. A lea ha ma twa nɛ a tɛ ngoy nde, ma wi aing na. Ma, ngase ɛngi, a lɛm dung nɛ wuso na.

²⁵Ma bhoko ka zea kasi tɛ Jésus, tɛa tɛ hil ha si wa, hazu gdanga sɔtɛ dungɔ ha yeksa bem pɛa mɔ bebhoko.

²⁶Bhoko ɛngɛ bo nê zuife na. Ɛ bhɛa wɛnɛ ha Fenisi ha kandɔnu Siri. A ana Jésus nde, wɛnɛ ayin gdanga sɔtɛ ɛngɛ gbosisi ha tɛ bem pɛa.

²⁷Mɛgi, Jésus kiforo wen ha wɛnɛ: «Lɛma nde, hio bem ayɔngmɔ sɔngsi, hazu yo bo nɛdedea mɛ pi yɔngamɔ pɛ hio bem ha hio tolo na.»

²⁸Bhoko ɛngɛ kiforo wen ha Jésus: «Kpasawen, *Kongawan. Ma, hio betolo ha si tabolo dung mɛ yɔng mbuli yɔngamɔ pɛ hio bhobem ka gɔy ha nu, na nde?»

²⁹Mɛgi, Jésus tɔa ha wɛnɛ: «Hazu dede kiforo wen pɛ mɛ, gdanga sɔtɛ gboa ha tɛ bem pɛ mɛ kari. Mɛ si nɛdedea.»

³⁰Ka bhoko ɛngɛ kiforo ha zang twa pɛa, a kpaa bem ha ɔa nu ha li yala, gdanga sɔtɛ gboa ha tɛ wa kari.

³¹Hapata, Jésus guotɛ ha kandɔnu mɔ le Tir, wɛnɛ gɔna nɛ wal le Sidon. A hɔa ha binsila kandɔnu ka ɛ sa nde, «Le Bhukɔ», ka dungɔ sanga nɛ tɔ Galile.

³²Nɛ ka wɛnɛ hɔa haki, ɛ kuo ma wan-gdɔka zala, ka wolmɔ nɛdedea na, tɛnɛ ha pɛa. Mbwa lokatɛ ha Jésus nde, wɛnɛ agde kɔ ha tɛ wa mɛ kpasisi wɛnɛ.

³³Jésus baa wi kɛ nɛnɛ ha ma bhandi nɛtɛ yɛ nɛ giliwi. A pio ndɔngkɔ ha zala wa, nɛ aa tafu ha lembe wa.

³⁴Hapata, a guo li ha ngɔn, pesa ɔmi lɛng-kpɛng nɛ tɔa: «Efata!» Ɛngɛ tɔ nde, mɛ gbo long!

³⁵Ha ndangtɛ ngimɔ, zala wa gboa long, lembe wa bulo nɛ wɛnɛ angara wolamɔ nɛdedea.

³⁶Nɛ Jésus mboa nu wi ndɔng fɛt nɛngaya nde, mbwa atɔ yo ha ma wi ndang na. Ma, ngase ka wɛnɛ baa nu mbwa nɛngaya, mbwa yɛbhasa wena nɛdɔka pentɛ.

³⁷Hio wi fɛt yaksa pentɛ nɛ mbwa tɔa: «Wɛnɛ de mɔ fɛt nɛdedea. A de tuka nde hio wan-gdɔka zala aze mɔ, nɛ hio wan-gdɔka nu awol mɔ.»