Read south west gbaya Marc 8 Bible Online

Marc 8 - south west gbaya bible

Marc 8

¹Ha ngimɔ ɛngi dɔka giliwi wesara may nɛ mbinga hapɛtɛ Jésus. Mbwa tɛ dung nɛ yɔngamɔ na. Mɛgi Jésus saa hio *wan-yambimɔ pɛa nɛ tɔa ha mbwa:

²«Kobhe tɛ wi ndɔng ha dea mi, hazu tɛ bo mɛsɛ nɛ yala tar ka ɔ dung hinɛ mbwa. Nɛ mbwa bo nɛ ma mɔ mɛ yɔng na.

³Ka mi gde nde mbwa asi ha le nɛ wɔ, mbwa betek ngata ha wal, hazu hio ma gutɛ nɛyɛa tɛnɛ.»

⁴Hio wan-yambimɔ pɛa kiforo wen ha wɛnɛ: «Ɔ hakɛ ha zang bɛlɛ. Ɛ bekpa dɔka yɔngamɔ mɛ ha ha mbwa ha ndo?»

⁵Mɛgi Jésus ana mbwa: «Ɛnɛ nɛ mampa ge?» Nɛ mbwa kiforo wen: «Ɔ nɛ mampa mɔrkɔ zanga bwa.»

⁶Wɛnɛ haa nu ha giliwi nde mbwa adungnu. Nɛ wɛnɛ kaya mampa ndɔng mɔrkɔ zanga bwa. Ka wɛnɛ lukoso Sɔ hazua kari, a gbinɔ yo ha hio wan-yambimɔ pɛa nde, mbwa akapini. Nɛ mbwa kapana yo ha hio giliwi ndɔng.

⁷Mbwa dungɔ fin nɛ hio ma bebe kɔyɔ. Jésus wola dede wen ha zua nɛ wɛnɛ tɔa ha hio wan-yambimɔ pɛa nde, mbwa akapini yo fin ha giliwi.

⁸Nɛ hio wi yɔnga yo, zang mbwa don. Nɛ ɛ ndɛma oloa don gɛsɛ mɔrkɔ zanga bwa.

⁹Nɛ dɔka wi ndɔng lɛma nɛ tomay nar. Hapata, Jésus gdea wal ha mbwa nde mbwa asi.

¹⁰Nɛhasa, wɛnɛ lea sɔngu hinɛ hio wan-yambimɔ pɛa pen si ha kuli tɔ ha kandɔnu Dalmanuta.

¹¹Hio Farizien tɛa ha pɛ Jésus nɛ mbwa angara zanga wen hinɛ wɛnɛ. Mɛgi, hazu we sila wa, mbwa ana wɛnɛ mɛ de ma mɔweka, ka osi nde ziomɔ pɛa tɛ nɛ wal Sɔ.

¹²Jésus pesa ɔmi nɛngaya lɛng-kpɛng, nɛ tɔa: «Wi mɔ ngimɔ ɛngɛ ani mɔweka hazu ge? Kpasawen mi tɔ ha ɛnɛ nde, hio wi mɔ ngimɔ ɛngɛ bekpa ma mɔweka ndang na.»

¹³Hapata a laka hio Farizien ndɔng gde, nɛ wɛnɛ lea sɔngu fin kifiri si ha kuli tɔ.

¹⁴Tazu hio *wan-yambimɔ biso nɛ kuo yɔngamɔ. Mɛgi, mbwa dungɔ sɔna nɛ mampa ndang ha zang sɔngu.

¹⁵Nɛ Jésus mboa mbwa, nɛ tɔa: «Ɛnɛ pangay nɛ yina hasisi mampa pɛ hio Farizien nɛ pɛ Herode.»

¹⁶Hio wan-yambimɔ tɔa ha soko may: «Ɔ bo nɛ yɔngamɔ na.»

¹⁷Jésus zea wena, nɛ wɛnɛ ana mbwa: «Hazu ge ɛnɛ tɔ ha soko ɛnɛ nde, ɔ bo nɛ mampa na, ge nde? Ingɔmɔ nɛ mbaramɔ pɛ ɛnɛ bona nde? Sila ɛnɛ dung gdingbiti hazu ge?

¹⁸Gbali ɛnɛ ang fɛt, ma ɛnɛ zɔk mɔ na? Zala ɛnɛ ang fɛt, ma ɛnɛ ze mɔ na? Tazu ɛnɛ tɛ gba nɛ hio mɔ ka mi dea sɔngsi na nde?

¹⁹Ha ngimɔ ka mi kapana nɛ mampa mɔrkɔ ha soko hio wi tomay mɔrkɔ, ɛnɛ kaya hio titia don gɛsɛ ge?» Mbwa tɔa ha wɛnɛ: «Yo dona gɛsɛ bhukɔ gbala bwa.»

²⁰«Nɛ ngimɔ ka mi kapana nɛ mampa mɔrkɔ zanga bwa ha soko hio wi tomay nar, ɛnɛ kaya titia don gɛsɛ ge?» Mbwa tɔa ha wɛnɛ: «Yo dona gɛsɛ mɔrkɔ zanga bwa.»

²¹Jésus ana mbwa fin: «Gbo kanɛ sising, ɛnɛ tɛ ing ka gotoa na?»

²²Jésus hinɛ hio *wan-yambimɔ pɛa hɔa ha le Betsaida. Nɛ hio wi kuo ma wan-gdɔka li tɛnɛ ha pɛa. Mbwa lokatɛ nde, wɛnɛ andɔ tɛ wa nɛ kpasisi wɛnɛ.

²³Jésus baa kɔ wan-gdɔka li ɛngɛ, nɛ a ngbɔsa wɛnɛ nɛnɛ ha gdong le. Hapata, a aa tafu ha li wa, a gdea kɔ ha zu wa, nɛ a ana wɛnɛ: «Mɛ ha zɔka ma mɔ?»

²⁴Wan-gdɔka li bhaa li nɛ tɔa: «Mi ha zɔka hio wi. Ma, mbwa dung tuka te, ka nɛ nɔ.»

²⁵Hapata Jésus gdea kɔ ha li wa nɛ mbinga. Nɛ wɛnɛ angara zɔka mɔ nɛ saa, li wa bhaa kari. Wɛnɛ tɛ bo ha zɔka mɔ nɛdedea.

²⁶Mɛgi Jésus tɔa ha wɛnɛ: «Mɛ si nzeng ha twa pɛ mɛ, ka mɛ ale ha zang le na!»

²⁷Hapata ɛngi, Jésus hinɛ hio *wan-yambimɔ pɛa baa wal hazu nɛ ha hio le hapɛtɛ gasa le Sezare pɛ Philippe. Nɛ ka mbwa boka ha liwal, a ana hio wan-yambimɔ: «Hio wi tɔ nde, mi nê o?»

²⁸Mbwa kiforo wen ha wɛnɛ: «Hio ma wi tɔ nde, mɛ nê *Jean wan-gdumsiwi. Hio ma nde, mɛ nê *Elie. Nɛ hio ma mbinga tɔ nde, mɛ nê ma wi ndang ha soko hio *wan-tɔkuliwen.»

²⁹Nɛ wɛnɛ anamɔ fin: «Ma, ɛnɛ, ɛnɛ tɔ pɛ ɛnɛ nde, mi nê o?» Pierre kiforo wen ha wɛnɛ: «Mɛ nê Mesi.»

³⁰Mɛgi Jésus mboa nu mbwa nɛngaya nde, mbwa atɔ wen ɛngɛ ha ma wi ndang na.

³¹Hapata ɛngi Jésus angara osamɔ ha hio *wan-yambimɔ pɛa, a tɔa: «Lɛma nde, mi, *Bewei pɛ Wi, akpa yeksamɔ nɛdɔka. Hio kotowi, hio gasa wan-hasadaka nɛ hio *wan-osi mbonga bemul mi pi. Ɛ begbɛ mi, nɛ mi begutɛ hapata yala tar.»

³²Wɛnɛ tɔa wen ndɔng long. Mɛgi, Pierre daka tɛ hinɛ wɛnɛ tikiring nɛ a angara sɛna wen ha wɛnɛ.

³³Ma, Jésus kiforo tɛ zɔk hio wan-yambimɔ, nɛ wɛnɛ gaya Pierre, nɛ tɔa: «Mɛ pen ha li mi, *Satan! Hazu takaramɔ pɛ mɛ tɛ nɛ wal Sɔ na, ma, nɛ wal pɛ wi.»

³⁴Hapata, Jésus saa hio giliwi nɛ hio *wan-yambimɔ pɛa. Nɛ wɛnɛ tɔa ha mbwa: «Ka ma wi ngoy mɛ ndari mi, lɛma nde wɛnɛ akafi wɔ mɔ nzan fɛt. Wɛnɛ agu getakate pɛa gde ha zu bhaka wa, nɛ wɛnɛ andari mi.

³⁵Hazu wi, ka ngoy kpasisi tunɔ pɛa, a beyɔsisi yo. Ma, wi ka yɔsisi tunɔ pɛa hazu wɛnɛ mɛkara mi nɛ *Dede Wen pɛ Sɔ, a bekpasisi yo.

³⁶Ka ma wi kpaa mɔ nzan fɛt, nɛ ka wɛnɛ kɔpa *tunɔ kpoo, kpaamɔ pɛa bede nɛ ge ha wɛnɛ ge nde?

³⁷Wi lɛm hɛ fin tunɔ pɛa nɛ mbinga nɛ nge mɔ ge nde?

³⁸Hio wi mɔ ngimɔ ɛngɛ bo nɛ mboazu na, nɛ mbwa nê *wan-de gdangamɔ. Ka mɛ de foy ha li mbwa hazu ling mi nɛ hazu wen pɔm, mɛgi mi, *Bewei pɛ Wi, mi bede foy fin hazu mɛ, ha ngimɔ ka mi betɛ hinɛ hio nzɔy *telenge ha zang *lɛkɛ-lɛkɛmɔ pɛ Bafa mi.»