Read south west gbaya Marc 9 Bible Online

Marc 9 - south west gbaya bible

Marc 9

¹Jésus tɔa fin ha mbwa: «Kpasawen mi tɔ ha ɛnɛ, hio ma ha soko ɛnɛ ka dung hakɛ sising lɛm fe na, kanɛ mbwa bezɔk *Kongakandɔ pɛ Sɔ ha tɛa nɛ gasa ziomɔ.»

²Hapata yala mɔrkɔ zanga ndang, Jésus kuo Pierre, Jacques nɛ Jean, nɛnɛ ha zu kuso ngari. Ka mbwa dungɔ gbatɛ, tɛ wa kiforo ha li mbwa.

³La pɛa tɛ bo nɛ bua ndong-ndong nɛ lɛkɛ-lɛkɛ tuka ka ma wan-fal la ndang ha nzan lɛm sasisi yo mɛgi na.

⁴Hio *wan-yambimɔ ndɔng tar zɔka *Elie hinɛ Moïse, ha wolamɔ hinɛ Jésus.

⁵Pierre tɔa ha Jésus: «Wan-osimɔ, yo nɛdedea nde, ɔ dung hakɛ. Mɛgi, ɔ bebɛ gbamsa tar. Ndang hazu mɛ, ndang hazu Moïse nɛ ndang hazu Elie.»

⁶Pierre tɛ ing wen ka wɛnɛ lɛm tɔ na, hazu gasa ke baa mbwa.

⁷Ma buswe hɔa nɛ goka mbwa nɛ zizi wa. Ma gɛl gboa ha soko buswe nɛ tɔa ha mbwa: «Wi kɛ nê bewei pɔm ka mi ngoya gdang, ɛnɛ ze nu wa!»

⁸Ha ndangtɛ ngimɔ ka hio wan-yambimɔ zɔka mɔ zikiri mbwa, mbwa zɔk fin wi ndɔng na, kanɛ Jésus sɔna ha bhɔn hinɛ mbwa.

⁹Nɛ ka mbwa ha zilo ngari, Jésus haa nu ha mbwa: «Ka ɛnɛ atɔ wen mɔ, ka ɛnɛ zɔka, ha ma wi ndang na, kanɛ ngimɔ ka mi, *Bewei pɛ Wi, guotɛ ha soko hio fiowi.»

¹⁰Mbwa pama wen ɛngɛ ha sila mbwa nɛ mbwa ana may: «Gotowen guotɛ ha soko hio fiowi, ɛngɛ tɔ nde ge?»

¹¹Nɛ hio wan-yambimɔ tar ana Jésus: «Hazu ge hio *wan-osi mbonga tɔa nde, dea ka de nde, Elie atɛ sɔngsi nɛ hɔa pɛ *Mesi ge nde?»

¹²Wɛnɛ kiforo wen ha mbwa: «Tɛwen, wɛnɛ betɛ sɔngsi hazu bhɔngiri mɔ fɛt nɛ wala. Ma hazu ge, takarata pɛ Sɔ tɔa fin nde, Bewei pɛ Wi bekpa yimtɛ nɛdɔka, nɛ ɛ bezɔk wɛnɛ tuka ngbundumɔ, ge nde?

¹³Ma, mi tɔ ha ɛnɛ nde, Elie tɛa kari. Nɛ hio wi dea gdangamɔ ha tɛ wa tuka sila mbwa ngoya, gbesi tuka takarata pɛ Sɔ batɔ wena.»

¹⁴Ka Jésus nɛ hio *wan-yambimɔ ndɔng tar zilo ngari, mbwa zɔka dɔka zugiliwi, ka kɛlkata hio olo wan-yambimɔ. Nɛ hio *wan-osi mbonga dungɔ ha siokafɛ hinɛ mbwa.

¹⁵Nɛ ha ndangtɛ ngimɔ, ka giliwi zɔka Jésus, mbwa yaksa nɛdɔka, nɛ mbwa sɔawi tɛ, tɛ fan wɛnɛ.

¹⁶Nɛ wɛnɛ ana hio wan-yambimɔ pɛa: «Ɛngɛ nê nge wen, ka ɛnɛ sikafɛ hinɛ mbwa ge nde?»

¹⁷Wi ndang ha soko gili kɔa nɛ tɔa ha Jésus: «Wan-osimɔ, mi kuo bem pɔm mɔ bewei tɛnɛ ha pɛ mɛ hazu ma gdanga sɔtɛ gdɔka nu wa.

¹⁸Ha bhandi fɛt ka gdanga sɔtɛ ɛngɛ pi wɛnɛ ha nu, puru nɛ tafu gboa ha nu wa pum-pum. A yɔnga nzata wa nɛ tɛ wa fɛt tɛ bo kik-yili. Mi ana hio wan-yambimɔ pɛ mɛ nde, mbwa ayin gdanga sɔtɛ ɛngɛ gbosisi. Ma, mbwa bo nɛ ngatɛ mɛ yin wɛnɛ na.»

¹⁹Jésus kiforo wen ha mbwa: «Ɛnɛ, hio wan-sikafɛ nɛ Sɔ! Mi beba sila mi mɛ dung hinɛ ɛnɛ kanɛ nge ngimɔ ge? Ɛnɛ ku wɛnɛ tɛnɛ ha mi.»

²⁰Mbwa kuo bem ɛngɛ nɛnɛ ha pɛ Jésus. Nɛ ha ndangtɛ ngimɔ ka gdanga sɔtɛ zɔka Jésus, a fesa bem, nɛ wɛnɛ teka nɛ kinsi tɛ nɛ nu. Puru nɛ tafu gboa ha nu wa, pum-pum.

²¹Jésus ana bafa mɛ bem: «Yo hɔa ha tɛ wa ha nge ngimɔ ge?» Nɛ wɛnɛ kiforo wen: «Yo dea wɛnɛ ka wɛnɛ bhɔna bhobem.

²²Ze nɛdɔka, gdanga sɔtɛ dung mɛ pi wɛnɛ ha we mana ha li hazu gbɛ wɛnɛ. Ma, ka mɛ lɛma de ma mɔ, mɛ ade kobhe tɛ ɔ, nɛ mɛ agbakiri ɔ.»

²³Jésus tɔa ha wɛnɛ: «Hazu ge mɛ tɔ ha mi nde, ka mi lɛma de ma mɔ? Wi kɛ ka mɛkiri Sɔ lɛma de mɔ fɛt.»

²⁴Nɛhasa, bafa mɛ bem ɛngɛ gdɔra nɛ tɔa: «Mi mɛkara Sɔ! Ma, mɛkaramɔ pɔm nɛ bebea. Mɛ gbakiri mi, ka mi amɛkiri Sɔ nɛkpasa.»

²⁵Ka Jésus zɔka nde, hio wi wesara may nɛdɔka pen mɔ sɔngsi, a haa nu nɛngaya ha gdanga sɔtɛ nɛ a tɔa: «Mi haa nu ha mɛ, gdanga sɔtɛ ka gdɔki nu nɛ zala wi, mɛ gbo ha tɛ bem ɛngɛ, nɛ ka mɛ ale ha tɛ wa fin na!»

²⁶Nɛ gdanga sɔtɛ gdɔra, a fesa bem nɛngaya nɛ a gboa ha tɛ wa. Nɛ bem ɛngɛ dungɔ tuka a fea fe. Nɛ hio dɔka wi tɔa nde, a fea kari.

²⁷Ma, Jésus baa kɔ wa, a guo wɛnɛ gde ha ngɔn, nɛ wɛnɛ yola nzeng.

²⁸Ka Jésus lea twa, hio wan-yambimɔ pɛa ana wɛnɛ ha ngimɔ ka mbwa dungɔ gbatɛ, mbwa tɔa: «Ma, ɔ tɛ lɛm yinɔ gdanga sɔtɛ ɛngɛ gbosisi na, hazu ge?»

²⁹Nɛ Jésus kiforo wen ha mbwa: «Kpal gdanga sɔtɛ mɛgi, ɛ lɛma yin wɛnɛ sɔna nɛ wal gɔa Sɔ.»

³⁰Jésus hinɛ hio *wan-yambimɔ pɛa guotɛ haki, nɛ mbwa gɔna kandɔnu Galile. Nɛ Jésus tɛ ngoy nde, wi aing yo na,

³¹hazu wɛnɛ dungɔ ha osamɔ ha hio wan-yambimɔ pɛa. A tɔa ha mbwa: «Ɛ begde mi, *Bewei pɛ Wi, ha kɔ hio wi. Mbwa begbɛ mi. Nɛ hapata yala tar, mi begutɛ ha soko hio fiowi.»

³²Ma, hio wan-yambimɔ ing gotowen ɛngɛ na, nɛ mbwa dungɔ nɛ ke mɛ ani wɛnɛ.

³³Mbwa hɔa ha le Kapernaum. Ka mbwa lea twa kari, Jésus ana mbwa: «Ɛngɛ nê nge wen, ka ɛnɛ zanga ha soko may nɛ wal tɛnɛ ge nde?»

³⁴Ma, mbwa kara sɛm, hazu ha wal mbwa dungɔ ha zanga wen ha soko may hazu ing wi, ka dung nɛ gasaa ha soko mbwa.

³⁵Nɛ Jésus dungɔnu. A saa hio *wan-nɛtom bhukɔ gbala bwa nɛ tɔa ha mbwa: «Wi ka ngoy dung bosia, lɛma nde, wɛnɛ adung kpogio wi ha soko hio mbinga fɛt, nɛ wɛnɛ adung wan-tom pɛ mbwa fɛt.»

³⁶Mɛgi a baa ma bhobem gde ha binsila mbwa. A gdea wɛnɛ ha ngbolokɔ wa nɛ tɔa:

³⁷«Wi ka ba ma bhobem tuka ɛngɛ nɛ dede kɔ hazu ling mi, wɛnɛ baa mi. Nɛ wi ka baa mi, yo bo nê mi ka wɛnɛ ba na, ma, yo nê wi ka tomsa mi.»

³⁸Jean tɔa ha Jésus: «Wan-osimɔ, ɔ zɔka ma wi ndang ha yinɔ gdanga sɔtɛ nɛ ling mɛ gbosisi. Nɛ ɔ dola wɛnɛ hazu wɛnɛ bo nê sɔy-tom ha soko ɔ na.»

³⁹Ma, Jésus tɔa ha mbwa: «Ka ɛnɛ adol wɛnɛ na, hazu wi ka de *mɔkifi nɛ ling mi, a lɛm tɔ gdanga lingtɛ mi nɛhasa hapata na.

⁴⁰Wi ka sungiri ɔ na, wɛnɛ nê pɛ ɔ.

⁴¹Nɛ wi ka ha ɛnɛ kɔpɔ li ndang mɛ nɔ, hazu ɛnɛ nê wi pɛ Christ, kpasawen mi tɔ ha ɛnɛ nde, a bekpa mɔ kɛ wɛnɛ.»

⁴²Ka ma wi dung ta mɔ kɔ nanga hazu ma bebe wi ka mɛkara mi, nɛdedea nde, ɛ akpo gasa ta hɔn mɔ ha gɛl wia nɛ pi wɛnɛ ha nana-litɔng.

⁴³Nɛ ka kɔ mɛ dak mɛ pi ha dea gdangamɔ, mɛ gɔn yo pi. Nɛdedea nde mɛ ale ha *tunɔ kpoo nɛ kumɔ, pen lea nɛ kɔ bwa ha bhandi we ka bisi na. [

⁴⁴Ha bhandi ka hio nginzo fe ang na, nɛ ka we bisi ang na.]

⁴⁵Nɛ ka nanga mɛ dak mɛ pi ha dea gdangamɔ, mɛ gɔn yo pi. Nɛdedea nde mɛ ale ha tunɔ kpoo nɛ kumɔ, pen nde ɛ api mɛ ha bhandi we nɛ nanga bwa. [

⁴⁶Ha bhandi ka hio nginzo fe ang na, nɛ ka we bisi ang na.]

⁴⁷Nɛ ka gbali mɛ dak mɛ pi ha dea gdangamɔ, kɔti yo pi. Hazu nɛdedea nde, mɛ ale nɛ gbali ndang sɔna ha *Kongakandɔ pɛ Sɔ, pen nde ɛ api mɛ ha bhandi we nɛ gbali bwa,

⁴⁸ha bhandi ka hio nginzo fe ang na, nɛ ka we bisi ang na.

⁴⁹Ɛ bebhɔngiri ɛnɛ fɛt nɛ we, gbesi tuka ɛ gi yɔngamɔ nɛ tɔng.

⁵⁰Tɔng nê dedemɔ. Ma, ka yo sabhala kari, ɛ lɛm kifiri yo gde nɛ baa fin na. Mɛgi, ɛnɛ adon nɛ tɔng nɛ ɛnɛ adung nɛ gaamɔ ha soko may.