Read south west gbaya Luc 11 Bible Online

Luc 11 - south west gbaya bible

Luc 11

¹Ma swe, Jésus dungɔ ha gɔa Sɔ ha ma bhandi. Nɛ ka wɛnɛ karsa, ma wan-yambimɔ pɛa ana wɛnɛ: «*Kongawan, mɛ osi gɔa Sɔ ha ɔ, tuka ka Jean baosi yo ha hio wan-yambimɔ pɛa!»

²Jésus tɔa ha mbwa: «Ka ɛnɛ gɔ Sɔ, ɛnɛ tɔ mɛgɛ: Bafa, ling mɛ adung nɛ nzɔya. Kongakandɔ pɛ mɛ atɛ.

³Ha ɔ yɔngamɔ ka lɛma swe ndang ndang fɛt.

⁴Bisi *sɛmbɔ pɛ ɔ, hazu ɔ ha biso sɛmbɔ pɛ hio *wan-de gdangamɔ ha tɛ ɔ fɛt. Lesisi ɔ ha *sɛbhalamɔ na.»

⁵Jésus tɔa fin ha mbwa nɛ towen: «Wi ndang ha soko ɛnɛ nɛa ha pɛ dede dan wa nɛ gduko ze hazu tɔ ha wɛnɛ: ‹Dan mi, gbakiri mi nɛ mampa tar!

⁶Hazu ma dan mi tɛa gɛnɛ ha pɔm, yɔngamɔ mɛ ha wɛnɛ bo na.›

⁷Nɛ dan wa ha zang twa kiforo wen ha wɛnɛ: ‹Mɛ yeksi mi na! Ɔ gdɔka nutwa nɛ sɔtɛ. Mi nɛ hio bem pɔm ha ɔala bhee. Mi lɛm gutɛ hazu ha mampa ha mɛ na.›»

⁸Jésus tɔa fin: «Mi tɔ ha ɛnɛ nde, wi ɛngɛ begutɛ mɛ ha mɔ fɛt ka kɔpa dan wa. A bede yo bo sɔna hazu wɛnɛ nê dan wa na, ma, a bede yo hazu dan wa bhɔna ha ana wɛnɛ nɛting.

⁹«Mi tɔ ha ɛnɛ nde, ɛnɛ gɔ mɔ, nɛ ɛ beha yo ha ɛnɛ. Ɛnɛ ki mɔ, nɛ ɛnɛ bekpa yo. Ɛnɛ kɔn nutwa, nɛ ɛ begbosisi yo ha ɛnɛ.

¹⁰Hazu wi ndang ndang fɛt ka gɔ mɔ, ɛ beha yo ha wɛnɛ. Nɛ wi ka ki mɔ, a bekpa yo. Nɛ wi ka kɔn nutwa, ɛ begbosisi yo ha wɛnɛ.

¹¹Yo nê nge gdibafa ha soko ɛnɛ ka ha zon ha bem pɛa ka gɔa kɔyɔ ha kɔ wa ge nde?

¹²Mana ka bem gɔa nɛ kwi gɔlɛ, a beha nɛ tolɛ ha wɛnɛ nde?

¹³Ngase ɛnɛ, ka dung nê gdanga wi, ɛnɛ ingɔ haa dedemɔ ha bem pɛ ɛnɛ. Mɛgi, pen fɛt Bafa ɛnɛ ha kuso ngɔn beha *Nzɔy-Sɔtɛ ha wi ndɔng ka gɔ wɛnɛ.»

¹⁴Ma swe, Jésus yinɔ gdanga sɔtɛ, ka gdɔka nu ma wi, gbosisi ha tɛ wa. Ka gdanga sɔtɛ gboa, wi kɛ angara wolamɔ, nɛ giliwi yaksa nɛdɔka.

¹⁵Hio ma wi ha soko mbwa tɔa: «Wɛnɛ yin gdanga sɔtɛ nɛ ngatɛ pɛ *Satan, wan-zu hio gdanga sɔtɛ.»

¹⁶Hio ma mbinga ngoya we wɛnɛ nɛ mbwa tɔa: «Mɛ de ma *mɔkifi ka osi nde, yo nê Sɔ ka tomsi mɛ.»

¹⁷Ma, Jésus ingɔ takaramɔ pɛ wi ndɔng nɛ wɛnɛ tɔa: «Ka hio wi mɔ kandɔ ndang bi tumbɔ sungiri nɛ may, kandɔ ɛngi betukili, nɛ hio twa begbin fɛt.

¹⁸Ɛnɛ ha tɔa nde, mi yin gdanga sɔtɛ nɛ ngatɛ pɛ Satan. Mɛgi, ka Satan sungiri tɛ wa nɛ pɛa tɛ, kongakandɔ pɛa bebhɔn fin mɛng?

¹⁹Nɛ ka bo nê mi yin gdanga sɔtɛ nɛ ngatɛ pɛ Satan, hio wi pɛ ɛnɛ yin pɛ mbwa nɛ ngatɛ pɛ o? Mɛgi yo nê mbwa nɛ tɛ mbwa ka osi nde, ɛnɛ tɔa wen dalo.

²⁰Ma, ka mi yin gdanga sɔtɛ nɛ ngatɛ pɛ Sɔ, yo osi nde, *Kongakandɔ pɛ Sɔ hɔa ha soko ɛnɛ kari.

²¹«Ka ma ngawi pɛm twa pɛa nɛ mɔ bibulo, kpaamɔ pɛa dung sɛɛ.

²²Ma, ka ma ngawi pen wɛnɛ hɔa, a began zu wa. A bekay mɔ bibulo pɛa fɛt ka wɛnɛ gde tazu hazua. Nɛ a bekapini hio mɔ fɛt ka wɛnɛ baa.

²³«Wi ka bo hinɛ mi na, wɛnɛ dung sungiri mi. Nɛ wi ka wesiri sami hinɛ mi na, wɛnɛ ha panzaka mbwa.»

²⁴«Ka ma gdanga sɔtɛ gboa ha tɛ ma wi, a bendoti ha kpɛnu hazu ki bhandi ɔmtɛ. Nɛ ka wɛnɛ kpa bhandi na, a betɔ nde, ɛ bekifiri ha mɔa bhandi pɛa.

²⁵Nɛ ka wɛnɛ kiforo, a kpaa zang twaa nɛ saa, ka ɛ bhɔksa nɛdedea.

²⁶A benɛ nɛ sa hio gdanga sɔtɛ mɔrkɔ zanga bwa, ka dung nɛ gdangaa pen wɛnɛ. Mbwa bekifiri gbesi nɛ de le ha zang tɛ wi kɛ. Hapata, dungɔ pɛ wi ɛngɛ tɛ bo nɛ gdangaa pen mɔ sɔngsi.»

²⁷Ka Jésus ha tɔa wen ɛngɛ, ma bhoko ha soko gili tɔa nɛ ngagɛl: «Totɛ ha bhoko ka bhɛa mɛ, nɛ ka haa bele ha mɛ!»

²⁸Ma, Jésus kiforo wen: «Bo sɔna nê ɛngi na. Totɛ pen fɛt ha wi ndɔng, ka ze wen pɛ Sɔ, nɛ ka de mɔ lɛm nɛ wena!»

²⁹Ka dɔka giliwi wesara may zikiri Jésus, wɛnɛ tɔa: «Hio wi mɔ ngimɔ ɛngɛ nê gdanga wi! Mbwa ha ana ma mɔweka ha kɔ Sɔ. Ma, wɛnɛ lɛm de ma mɔweka ha mbwa fin na, kanɛ mɔweka pɛ *wan-tɔkuliwen Jonas.

³⁰Gbesi tuka Jonas badung se mɔweka ha hio wi mɔ kandɔnu Ninive, mi, *Bewei pɛ Wi, bedung fin mɔweka ha hio wi mɔ ngimɔ ɛngɛ.

³¹Ha swe kita pɛ Sɔ, *kongapora mɔ bhoko mɔ kandɔnu Saba begu bin tɛ, nɛ a bekɛ wen sungiri hio wi mɔ ngimɔ ɛngɛ. Hazu wɛnɛ guotɛ nɛyɛa tɛ ha zea wen mbaramɔ pɛ Salomon. Ma, mi ka dung hakɛ, mi pena Salomon.

³²Nɛ hio wi mɔ Ninive fin begu bin tɛ, nɛ mbwa bekɛ wen sungiri hio wi mɔ ngimɔ ɛngɛ. Hazu hio wi mɔ Ninive kiforo sila mbwa, ka mbwa zea bulowen pɛ Jonas. Ma, mi ka dung hakɛ, mi pena Jonas.»

³³«Ma wi ndang du we ha lamba nɛ wusi yo mana gde yo ha si kpana na. Ma, a beku yo gde ha zu solo lamba, tuka nde hio wi ka le twa azɔk saamɔa.

³⁴Gbali mɛ dung tuka lamba ka ha saamɔ ha tɛ mɛ. Ka gbali mɛ nɛ dedea, tɛ mɛ fɛt dung ha zang saamɔ. Ma, ka gbali mɛ gdanga, tɛ mɛ dung ha zang ngɛ-ngɛ-ngɛ tutum.

³⁵Mɛgi, pangay, tuka nde saamɔ ka dung ha tɛ mɛ, adung tutum na.

³⁶Hazu ka tɛ mɛ don nɛ saamɔ fɛt, nɛ ka ma bhalkɔa ndang bhɔn nɛ tutum na, mɛ bedung nɛ saa fɛt tuka ka lamba ba ha tɛ mɛ nɛ yoloa.»

³⁷Ka Jésus karsa wen, ma Farizien saa wɛnɛ hazu yɔngmɔ ha pɛa. Mɛgi Jésus lea twa nɛ a dungɔnu hapɛtɛ tabolo.

³⁸Nɛ Farizien ɛngɛ yaksa ka wɛnɛ zɔka nde, sɔngsi yɔngamɔ Jésus tɛ tay kɔ wa lɛm nɛ ndɔki deamɔ pɛ hio *zuife na.

³⁹Ma, *Kongawan tɔa ha wɛnɛ: «Ɛnɛ, hio Farizien, ɛnɛ zɔk deamɔ pɛ ɛnɛ. Ɛnɛ ha sasasa gdong kɔpɔ nɛ gdong tasi. Ma, sila ɛnɛ dona nɛ wɔ zuomɔ nɛ gdangamɔ.

⁴⁰Ɛnɛ hio yera wi! Bo nê ndangtɛ Sɔ ka dea gdonga, ha de zanga fin, na nde?

⁴¹Ɛnɛ ha mɔ ka dung ha zang tasi pɛ ɛnɛ ha hio fabha wi, mɛgi hio mɔ fɛt bedung nɛ saa ha ɛnɛ.

⁴²Ngɔtɛ ha ɛnɛ, hio Farizien! Ɛnɛ ha suotɛ hazu ɛnɛ ha kuo zu bebe mɔ tuka va, salala, nɛ wakpo fɛt ha Sɔ. Ma, ɛnɛ ela mɛ de nzengmɔ ha tɛ wi, nɛ mɛ ngoy Sɔ. Lɛma nde, ɛnɛ ade mɔ ndɔng, nɛ ɛnɛ alak haa zu mɔ fin gde na!

⁴³«Ngɔtɛ ha ɛnɛ, hio Farizien! Hazu ɛnɛ ngoya dungɔ ha hio bosi kiti ha zang *twa gɔ Sɔ. Nɛ ɛnɛ ngoya nde, ɛ afan ɛnɛ tuka konga wi ha liwal.

⁴⁴Ngɔtɛ ha ɛnɛ! Hazu ɛnɛ dung tuka zupisi ka ɛ ing fin na. Nɛ hio wi ha yala ha zua, mbwa ing na.»

⁴⁵Ma wan-osi mbonga tɔa ha Jésus: «Wan-osimɔ, wen ka mɛ tɔa sising yaa ɔ fin wa!»

⁴⁶Ma, Jésus tɔa: «Ngɔtɛ ha ɛnɛ fin, ɛnɛ hio wan-osi mbonga! Hazu hio mbonga pɛ ɛnɛ dung tuka gdingbɛng toy ka ɛnɛ gde ha zu hio wi. Ma, ɛnɛ nɛ tɛ ɛnɛ ndɔ yo ngase nɛ bhanza kɔ ɛnɛ ndang na.

⁴⁷Ngɔtɛ ha ɛnɛ! Hazu ɛnɛ ha bhɔngara dede zupisi ha hio *wan-tɔkuliwen ka hio ngbabafa ɛnɛ bagbɛ.

⁴⁸Yo osi nde, ɛnɛ ha mɛla mbanzi hazu gdangamɔ ka hio ngbabafa ɛnɛ bade. Mbwa gbɛa hio wan-tɔkuliwen, nɛ ɛnɛ bhɔngara zupisia.

⁴⁹Hazu ɛngi Sɔ batɔ se nɛ mbaramɔ: ‹Mi betomsi hio wan-tɔkuliwen nɛ hio *wan-nɛtom ha mbwa. Nɛ mbwa belo hio ma nɛ ta gbɛ, nɛ mbwa benamili hio mbinga.›

⁵⁰Mɛgi, Sɔ bendulsi hio wi mɔ ngimɔ ɛngɛ hazu fio pɛ wan-tɔkuliwen fɛt, ka ɛ gbɛa nisi ha kudom nzan.

⁵¹Yo angara nɛ ngafio pɛ Abel karsi nɛ Zakari, ka ɛ bagbɛ ha dɛl *gasa twa Sɔ, ha soko bhandi ha sadaka nɛ bhandi ka dung nɛ nzɔya fɛt. Ey, mi tɔ ha ɛnɛ nde, wen ngafio ndɔng fɛt betek ha zu hio wi mɔ ngimɔ ɛngɛ.

⁵²«Ngɔtɛ ha ɛnɛ, hio wan-osi mbonga, hazu ɛnɛ gdɔka wal ka nɛ ha pɛ Sɔ. Ɛnɛ nɛ tɛ ɛnɛ ba wal ɛngɛ na, nɛ pen fɛt ɛnɛ ha dola hio wi ka ngoy baa wal ɛngɛ.»

⁵³Angiri ha ngimɔ ka Jésus gboa ha twa pɛ Farizien ɛngɛ, hio wan-osi mbonga nɛ hio Farizien dea ngambi gdang sungiri wɛnɛ. Mɛgi mbwa ana wɛnɛ nɛ dɔka wen,

⁵⁴hazu kpa ma kiforo wen, ka lɛm nde mbwa afundi nɛ wɛnɛ.