Read south west gbaya Luc 13 Bible Online

Luc 13 - south west gbaya bible

Luc 13

¹Ha ndangtɛ ngimɔ ɛngi, hio ma wi tɛa ha pɛ Jésus hazu ba kasi tɛ hio wi mɔ Galile, ka Pilate gbɛa ha ngimɔ haa sadaka ha Sɔ.

²Jésus tɔa ha mbwa: «Ɛnɛ takiri nde, wi ndɔng nê *wan-de gdangamɔ pen hio olo wi mɔ Galile, hazu mbwa kpaa fio mɛgi nde?

³Way! Ma, mi tɔ ha ɛnɛ nde, ka ɛnɛ kpali deamɔ pɛ ɛnɛ na, ki ɛnɛ fɛt befe fin tuka wi ndɔng.

⁴Nɛ wi bhukɔ zanga mɔrkɔ gbala tar, ka kuso twa hapɛtɛ bebe tɔ Siloe bagbin gbɛ mbwa, ɛnɛ takiri nde, mbwa nê gasa wan-de gdangamɔ pen olo wi mɔ Jérusalem nde?

⁵Way! Ma, mi tɔ ha ɛnɛ nde, ka ɛnɛ kpali deamɔ pɛ ɛnɛ na, ki ɛnɛ fɛt mburr befe tuka wi ndɔng.»

⁶Hapata Jésus tɔa ma towen ha mbwa: «Ma wi bagun se ma te fige ha fɔ pɛa. Ngimɔ fɛt ka wɛnɛ nɛ hazu bhi wayaa, a kpa ma mɔ ndang na.

⁷Mɛgi a tɔa ha wan-tom pɛa: ‹Zɔk, yo tɛ bo nê kili bɛlɛ tar, ka mi ha tɛa hazu bhi waya ha te fige ɛngɛ. Nɛ mi kpa ma waya ndang na. Gɔm yo yunɛ, hazu a gdangsi nu nɛgbelea.›

⁸Ma, wan-tom kiforo wen: ‹Wan pɔm, gde yo fin ha bɛlɛ ɛngɛ. Mi bemɔksi nu, nɛ mi begde tunu ha gunaa.

⁹Mɛgi ɔ bezɔk mana yo beway. Nɛ ka yo way na, mɛ begɔm yo yunɛ.›»

¹⁰Ha ma swe ɔmtɛ Jésus dungɔ ha osamɔ ha *twa gɔ Sɔ.

¹¹Haki ma bhoko ang ka ma gdanga sɔtɛ hɛla wɛnɛ nɛ zɛlɛ ngundɛng hazu kili bɛlɛ bhukɔ zanga mɔrkɔ gbala tar. A lɛm yafifi gdong wa nzeng fin ndang na.

¹²Ka Jésus zɔka wɛnɛ, a saa wɛnɛ nɛ tɔa: «Bhoko, zɛlɛ pɛ mɛ kara.»

¹³A gdea kɔ bwa ha tɛ wa, nɛ ha ndangtɛ ngimɔ wɛnɛ yafafa gdong wa nzeng nɛ a lukoso Sɔ.

¹⁴Ma, wan-zu twa gɔ Sɔ dea ngambi hazu Jésus karsa zɛlɛ ha swe ɔmtɛ. Wɛnɛ tɔa ha giliwi: «Ha zang dimasi ndang, yala de tom nɛ mɔrkɔ zanga ndang. Yo nê ha yala ndɔng ka ɛnɛ lɛma tɛ tuka nde, ɛ akarsi zɛlɛ pɛ ɛnɛ. Yo bo ha swe ɔmtɛ na.»

¹⁵Ma, *Kongawan tɔa ha wɛnɛ: «Ɛnɛ hio wan-dambari! Ɛnɛ ndang ndang fɛt bul pɛl nday nɛ toyfok pɛ ɛnɛ ha ngalɔ hazu ku mbwa nɛnɛ ha nɔa li ha swe ɔmtɛ, na nde?

¹⁶Nɛ bhoko ɛngɛ nê bezang pɛ Abraham! *Satan sanga wɛnɛ tee tɛ bo nɛ kili bɛlɛ bhukɔ zanga mɔrkɔ gbala tar. Hazu ge ɛ lɛm bul pɛl ɛngɛ ha tɛ wa ha swe ɔmtɛ na, ge?»

¹⁷Nɛ ka Jésus kiforo wen mɛgi, hio wan-sungiri wɛnɛ gɛsa zu nɛ foy. Ma, giliwi fɛt dea totɛ hazu gasa *mɔbhana fɛt ka Jésus ha dea.

¹⁸Jésus tɔa fin: «Wal ka Sɔ bhɔngiri Kongakandɔ pɛa dung mɛng? Mi beweki yo nɛ nge mɔ ge?

¹⁹Yo dung tuka bebe gbalamɔ ka ɛ sa nde mutarde. Ma wi pɛa yo ha fɔ pɛa. Nɛ yo suto nɛ kpɔatɛ, nɛ yo tɛ bo nê te. Nɛ hio nɔy dea twa pɛ mbwa ha hio gbakɔa.»

²⁰Jésus tɔa fin: «Mi beweki *Kongakandɔ pɛ Sɔ nɛ nge mɔ ge?

²¹Yo dung tuka yina hasisi mampa, ka ma bhoko kuo tikiring vɔtiki nɛ dɔka fok, kanɛ mbɔrɔa fɛt haa don toy.»

²²Ka Jésus ha wal mɛ nɛ ha Jérusalem, a osamɔ ha hio gasa le nɛ bebe le fɛt ka wɛnɛ pena ang.

²³Ma wi ana wɛnɛ: «*Kongawan, yo nê wi tikiring sɔna ka Sɔ bekpasisi nde?» Nɛ Jésus kiforo wen:

²⁴«Ɛnɛ agbɛngsi tɛ ɛnɛ mɛ le nɛ bho-ngo-ngo nutwa ha *Kongakandɔ pɛ Sɔ. Hazu, mi tɔ yo ha ɛnɛ, hio dɔka wi beki mɛ le haki gan.

²⁵«Hapata ka wan-twa begutɛ gdɔki nutwa nɛ sɔtɛ, mɔ kara kari. Ɛnɛ bebhɔn bin ha dɛl ha kɔna nutwa, nɛ tɔa: ‹Wan pɛ ɔ, mɛ gbosisi ha ɔ!› Ma, a betɔ ha ɛnɛ: ‹Mi ing ɛnɛ na!›

²⁶Tuka ɛngi, ɛnɛ belokitɛ ha wɛnɛ: ‹Yo bo nê ɔ ka bayɔng nɛ nɔ hinɛ mɛ na nde? Nɛ yo bo nê mɛ ka baosi mɔ ha ɔ ha liwal pɛ ɔ na nde?›

²⁷A betɔ fin: ‹Mi ing ɛnɛ ndang na. Ɛnɛ pen ha li mi, hazu ɛnɛ fɛt nɛ hio *wan-de gdangamɔ!›

²⁸Ha zang Kongakandɔ pɛ Sɔ ɛnɛ bezɔk hio ngbabafa ɛnɛ Abraham, Isaac nɛ Jacob nɛ hio *wan-tɔkuliwen fɛt. Ma, pɛ ɛnɛ, ɛnɛ begdɔri nɛ kwa, nɛ ɛnɛ beyɔng nzata nɛ yimtɛ, hazu ɛ beyin ɛnɛ pi ha dɛl.

²⁹Hio wi begutɛ ha wal gutɛ swe, ha wal ɔnu swe, ha wal kala nɛ ha wal gdɔk tɛ ha yɔngamɔ fada ha Kongakandɔ pɛ Sɔ.

³⁰Ɛnɛ ze nɛdedea! Hio ma wi ka dung kpogio sising, bedung bosia. Nɛ hio ma ka dung bosia sising, bedung kpogio.»

³¹Ha ma bebe ngimɔ hapata, hio ma *Farizien tiko tɛ hapɛtɛ Jésus nɛ mbwa tɔa: «Mɛ gutɛ hakɛ pen si ha ma bhandi, hazu *kongapora Herode ha kio wal mɛ gbɛ mɛ.»

³²Nɛ Jésus tɔa ha mbwa: «Ɛnɛ nɛ, nɛ tɔ ha wan-likisi ɛngɛ nde, mi ha yinɔ hio gdanga sɔtɛ, nɛ mi ha karsa hio zɛlɛ swe mɛsɛ nɛ bhisiri, nɛ ha zetar yala mi belɛmsiri tom pɔm.

³³Ma, dea ka de nde, mi aba wal pɔm mɛsɛ nɛ bhisiri nɛ yala hapata. Hazu yo lɛma nde, *wan-tɔkuliwen afe ha ma gele le na, kanɛ ha Jérusalem sɔna.

³⁴«Woo Jérusalem! Woo Jérusalem! Ɛnɛ, hio wi mɔ Jérusalem, ɛnɛ ha gbɛa hio wan-tɔkuliwen, ɛnɛ ha loa nɛ ta hio wan-nɛkasara pɛ Sɔ gbɛ. Mi ngoya mɛ gok ɛnɛ tuka nana gɔlɛ gok nɛ hio bea. Ma, ɛnɛ tɛ ngoy na.

³⁵Mɛgi, Sɔ belak *gasa twa Sɔ pɛ ɛnɛ gde. Nɛ mi tɔ ha ɛnɛ nde, ɛnɛ lɛm zɔk mi fin na, kanɛ ngimɔ ka ɛnɛ betɔ nde, *Kongawan Sɔ awol dede wen ha zu wi ka tɛ nɛ ling wa!»