Read south west gbaya Luc 14 Bible Online

Luc 14 - south west gbaya bible

Luc 14

¹Ha ma swe ɔmtɛ, Jésus lea twa pɛ ma gasa *Farizien hazu yɔngmɔ. Nɛ ɛ dungɔ ha mbara wɛnɛ nɛkpasa,

²hazu ha li wa ma wei ang ka tɛ wa fɛt haa nɛ zɛlɛ.

³Jésus ana hio Farizien nɛ hio *wan-osi mbonga: «Mbonga pɛ ɔ mɛkara mana kafa mɛ kpasisi wi ha swe ɔmtɛ nde?»

⁴Ma, mbwa fɛt kara selele. Mɛgi Jésus baa tɛ wan-zɛlɛ, kpasasa wɛnɛ nɛ a gdea wɛnɛ pen.

⁵Nɛ Jésus ana mbwa: «Ka ma bem mana nday pɛ ɛnɛ teka ha kɔ li, ɛnɛ dak wɛnɛ nɛhasa ngase ha swe ɔmtɛ na nde?»

⁶Nɛ mbwa lɛm kifiri wen ndang na.

⁷Ka Jésus zɔka nde, hio wi ka ɛ saa ha yɔngamɔ ɛngɛ weki sɔna nɛ bosi kiti, a tɔa ha mbwa:

⁸«Ka ma wi sa mɛ ha yenga sibhoko, ka mɛ apen nɛ dung ha bosi kiti na. Yu nde, ka ɛ saa ma zio wi pen mɛ,

⁹wan-sa ɛnɛ betɔ ha mɛ: ‹Mɛ gde bhandi ɛngɛ ha wɛnɛ.› Ha ngimɔ ɛngi, mɛ begutɛ nɛ foy hazu nɛ, nɛ dung ha kpogio bhandi.

¹⁰Ma, ka ɛ sa mɛ, mɛ nɛ, nɛ dung ha kpogio bhandi. Mɛgi ka wan-sa ɛnɛ hɔa, a betɔ ha mɛ: ‹Dan mi, mɛ tɛ hakɛ ha dede bhandi.› Mɛgi mɛ bedung nɛ zioa ha li hio na-gal yenga fɛt.

¹¹Hazu, ɛ behilsi hio wan-sutɛ fɛt, nɛ ɛ begu wi ka hilo nɛ mɛndi gde ha ngɔn.»

¹²Nɛ Jésus tɔa fin ha wan-sa wɛnɛ: «Ka mɛ de fada mana nɛ gasa swe mana nɛ mbolo, ka mɛ asa ngase dan mɛ, ngase ya mɛ, ngase nam pɛ mɛ, ngase wan-kpamɔ mɔ pɛtɛ twa na. Yu nde, mbwa betɛ sa fin mɛ, mɛ kɛ dedemɔ ka mɛ dea ha tɛ mbwa.

¹³Ma, ka mɛ de fada, mɛ sa nɛ hio fabha wi, kumɔ wi, wan-zɛlɛ mɛla, nɛ wan-gdɔka li.

¹⁴Mɛgi mɛ bedung nɛ totɛ hazu mbwa bo nɛ mɔ mɛ kɛ mɛ na. Nɛ Sɔ bekɛ mɛ ha ngimɔ ka hio *nzeng wi begutɛ ha fio.»

¹⁵Ma wi ka dungɔ ha yɔngamɔ hinɛ Jésus zea wen ndɔng, nɛ a tɔa ha wɛnɛ: «Totɛ ha wi ka beyɔngmɔ ha *Kongakandɔ pɛ Sɔ.»

¹⁶Nɛ Jésus tɔa ha wɛnɛ: «Ha ma le, ma wi dea gasa fada nɛ a gbaa tazu wi nɛdɔka.

¹⁷Ka ngimɔ yɔngmɔ lɛma, a tomsa ma wan-tom pɛa hazu tɔ ha mbwa: ‹Ɛnɛ tɛ, hazu wan pɔm bhɔngara mɔ fɛt kari.›

¹⁸Ma, mbwa ndang ndang fɛt tɔa tili wen nɛtɛ-nɛtɛ. Bosi wi tɔa ha wan-tom: ‹Mi hɛa fɔ sising. Dea nde, mi anɛ nɛ zɔk yo. Mi ba nanga mɛ, mi lɛm tɛ na.›

¹⁹Ma tɔa pɛa: ‹Mi hɛa hio nday gɔm fɔ bhukɔ. Mɛgi, mi ha nɛa ha wea mbwa. Mi ba nanga mɛ, mi lɛm tɛ na.›

²⁰Ma mbinga tɔa pɛa fin: ‹Mi sio bhoko sising-sising. Mɛgi mi lɛm nɛ na.›

²¹Ka wan-tom kiforo, a baa kasi mɔ ndɔng fɛt ha wan pɛa. Nɛ wan dea ngambi pentɛ, nɛ a tɔa ha wan-tom: ‹Mɛ nɛ nɛhasa ha zang le, ha mbango nɛ liwal fɛt, nɛ kay hio fabha wi, kumɔ wi, wan-gdɔka li, nɛ wan-zɛlɛ mɛla tɛnɛ hakɛ.›

²²Hapata ngimɔ tikiring, wan-tom kiforo tɛ tɔ ha wan pɛa: ‹Wan pɔm, mi dea mɔ fɛt tuka mɛ tɔa. Ma, hio ma bhandi ngbɔla nɛgbelea.›

²³Nɛ wan tɔa fin ha wan-tom pɛa: ‹Mɛ nɛ ha gdong le, ha liwal nɛ ha wal fɔ, nɛ haki mɛ anɔsisi hio wi fɛt mɛ tɛ tɛ le twa pɔm ka yo adon.

²⁴Mi tɔ ha mɛ nde, ha soko wi ndɔng ka mi saa sɔngsi gan, ma ndang lɛm yɔng yɔngamɔ pɔm na.›»

²⁵Jésus dungɔ ha yala, nɛ gasa zugiliwi ndara wɛnɛ. A kiforo tɛ, nɛ a tɔa ha mbwa:

²⁶«Ka ma wi ngoy ndari mi, wɛnɛ angoy mi pen bafa wa nɛ nana wa, pen ko nɛ hio bem pɛa, nɛ pen hio ya wa. Nɛ wɛnɛ angoy mi fin pen tɛ wa nɛ pɛa tɛ. Ka bo mɛgi na, wɛnɛ lɛm dung *wan-yambimɔ pɔm na.

²⁷Wi ka ngoy dung wan-yambimɔ pɔm, dea nde, wɛnɛ agu getakate pɛa nɛ wɛnɛ andari mi.

²⁸Ka ma wi ha soko ɛnɛ ngoya bɛ twa, a bedungnu nɛ tɔl gɛnɛ hio mɔ bɛ twa fɛt hazu ing mana mbɔli pɛa belɛm.

²⁹Yu nde, hio wi betɛ mam wɛnɛ, ka mbwa zɔka nde, a bɛa nanga twa, nɛ a lɛm karsi twa na.

³⁰Mbwa betɔ: ‹Nay, wi ɛngɛ angara bɛa twa, ma, a lɛm karsi yo na!›

³¹«Nɛ *kongapora fɛt ka ngoy nɛa ha bio bulo sungiri ma mbinga, bedungnu sɔngsi mɛ ba zu wa nde, mana a benɛ nɛ wan-bibulo tomay bhukɔ mɛ kpa ngana pɛa, ka tɛ sungiri wɛnɛ nɛ wan-bibulo tomay bhu zebwa.

³²Ka wɛnɛ zɔka nde, yo lɛm na, a betomsi kasara hazu ani gaamɔ ha ngana pɛa ha ngimɔ ka wɛnɛ boka nɛyɛa.»

³³Mɛgi Jésus tɔa ha mbwa: «Wi fɛt ha soko ɛnɛ, ka tɛ lak hio mɔ pɛa fɛt gde na, lɛm dung wan-yambimɔ pɔm na.»

³⁴«Tɔng nê dedemɔ. Ma, ka baa tɔng sabhala kari, ɛ lɛm kifiri yo nɛ baa fin na.

³⁵Tɔng ɛngɛ lɛm de fin ma tom ndang na, ngase ha fɔ, ngase ha zubokwe. Ɛ bepi yo ha dɛl. Wi ka bo nɛ zala mɛ ze mɔ, wɛnɛ aze!»