Read south west gbaya Luc 15 Bible Online

Luc 15 - south west gbaya bible

Luc 15

¹Hio wan-ndɛm mbɔli garama nɛ hio *wan-de gdangamɔ fɛt tiko tɛ hapɛtɛ Jésus hazu ze wen pɛa.

²Nɛ hio *Farizien nɛ hio *wan-osi mbonga dea ngambi nɛ tɔa: «Wi ɛngɛ ha dea sɔy hinɛ hio wan-de gdangamɔ, nɛ wɛnɛ ha yɔngamɔ hinɛ mbwa!»

³Mɛgi Jésus tɔa towen ɛngɛ ha mbwa:

⁴«Ka ma wi ha soko ɛnɛ nɛ sami gɔmmay ndang, nɛ ma ndang yɔamɔ, bo nê wɛnɛ lak sami bhukɔa mɔrkɔ zu bhukɔa nar zanga mɔrkɔ gbala nar gde ha zang bɛlɛ, mɛ nɛ ha kio ndanga kanɛ a kpaa yo, na nde?

⁵Nɛ ka wɛnɛ kpaa sami ɛngɛ, a de totɛ nɛ ba wɛnɛ gde ha zu bhaka wa,

⁶si nɛ ha le. Haki wɛnɛ sa hio dan wa nɛ hio wi mɔ pɛtɛ twa, nɛ tɔ ha mbwa nde, mbwa ade totɛ hinɛ wɛnɛ hazu a kpaa sami pɛa ka yɔamɔ.

⁷Mi tɔ ha ɛnɛ nde, gbesi tuka ɛngi, Sɔ bede totɛ ha ngɔn hazu wan-de gdangamɔ ndang ka kiforo sila wa. Nɛ totɛ ɛngɛ bepen totɛ hazu wi bhukɔa mɔrkɔ zu bhukɔa nar zanga mɔrkɔ gbala nar, ka dung nzeng kari, ka bo fin nɛ wen hazu kifiri sila mbwa na.»

⁸«Nɛ fin, ka ma bhoko nɛ mbɔli bhukɔ, nɛ ma ndang yɔa, bo nɛ wɛnɛ du lamba nɛ huy twa mɛ ki nɛ mbɔlia nɛting kanɛ a kpaa yo, na nde?

⁹Nɛ ka wɛnɛ kpaa yo, a sa hio dan wa nɛ hio wi mɔ pɛtɛ twa, nɛ tɔ nde, mbwa ade totɛ hinɛ wɛnɛ, hazu a kpaa mbɔli pɛa ka yɔa.

¹⁰Mi tɔ ha ɛnɛ nde, gbesi tuka ɛngi, hio *telenge pɛ Sɔ de totɛ hazu ma *wan-de gdangamɔ ndang ka kiforo sila wa.»

¹¹Jésus tɔa fin: «Ha ma le, ma wei badung se nɛ bewei bwa.

¹²Ma yala, bem mɔ pata tɔa ha bafa wa: ‹Bafa mi, mɛ kapini likɔ ha ɔ.› Nɛ bafa mbwa kapana likɔ pɛa ha soko mbwa.

¹³Ngimɔ tikiring hapata, bem ɛngɛ gdonga likɔ pɛa fɛt, nɛ baa mbɔlia si nɛ ha ma mbing kandɔnu nɛyɛa. Haki, a gdangsa kpaamɔ pɛa fɛt nɛ dea mɔ tum.

¹⁴Nɛ ka wɛnɛ gdangsa mɔ fɛt, gasa foto teka ha kandɔnu ɛngi. Nɛ mɔ fɛt angara kɔpa wɛnɛ.

¹⁵Mɛgi a nɛa dea tom ha pɛ ma wi mɔ kandɔnu ɛngi, ka tomsa wɛnɛ mɛ pɛm nguru ha nu fɔ pɛa.

¹⁶Nɛ wɛnɛ nɛ hɛl mɛ donsi zang wa nɛ yɔngamɔ pɛ nguru. Ma, ɛ ha yo ha wɛnɛ na.

¹⁷Nɛ sising, wɛnɛ takaramɔ nɛ a tɔa: ‹Hio wan-tom fɛt pɛ bafa mi ha yɔngamɔ zang mbwa don, lak oloa gde. Ma, mi ha fea wɔ hakɛ!

¹⁸Mi bekifiri ha pɛ bafa mi, nɛ mi betɔ ha wɛnɛ nde, bafa mi, mi dea gdangamɔ sungiri Sɔ nɛ sungiri mɛ.

¹⁹Mi bo nɛ zioa mɛ dung fin bem pɛ mɛ na. Ma, mɛ ba mi tuka ma wan-tom pɛ mɛ wa.›

²⁰Mɛgi, a kiforo si ha pɛ bafa wa. Ngase ka wɛnɛ boka nɛyɛa, bafa wa ingɔ wɛnɛ nɛ sila wa gdɔya nɛ kobhe. A sɔawi nɛ fuki bem nɛ duy nu wa.

²¹Nɛ bem tɔa ha wɛnɛ: ‹Bafa mi, mi dea gdangamɔ sungiri Sɔ nɛ sungiri mɛ. Mi bo nɛ zioa mɛ dung fin bem pɛ mɛ na.›

²²Ma, bafa wa haa nu ha hio wan-tom pɛa: ‹Ɛnɛ a dede la ha tɛ wa, nɛ a konga ha bhanza kɔ wa, nɛ a fin nakala ha nanga wa!

²³Ɛnɛ ku ngbanga benday gbɛ, ka ɔ ayɔng de nɛ totɛ.

²⁴Hazu bem pɔm ka bafe, tunɔ sising. A bayɔmɔ, ma, mi kpaa wɛnɛ sising.› Nɛ mbwa angara dea totɛ.

²⁵«Ma, pɛ kay bem, a bhɔna ka ha fɔ. Ka wɛnɛ kiforo hɔ hapɛtɛ twa, a zea gisi bio nɛ yula.

²⁶A saa ma wan-tom nɛ ana wɛnɛ nde, yo nê ge?

²⁷Wan-tom kiforo wen: ‹Bebe ya mɛ pea! Mɛgi bafa mɛ haa nu nde, ɛ gbɛ ngbanga benday hazu ya mɛ pea nɛ dede tɛ.›

²⁸Mɛgi kay bem dea ngambi nɛ kafa mɛ le twa. Nɛ bafa wa gboa hazu mbɔmbili wɛnɛ mɛ le ha twa.

²⁹Ma, kay bem pɛa kiforo wen ha wɛnɛ: ‹Bɛlɛ nɛdɔka mi ha dea tom ha mɛ, ma swe ndang mi tɛ kafi ma wen ha nu mɛ na. Ma, mɛ tɛ ha mi ma mbori swe ndang na, nde mi ade nɛ saka nɛ hio dan mi.

³⁰Bem pɛ mɛ ɛngɛ gdangsa toy pɛ mɛ fɛt ha hio bhoko-de wanza. Nɛ, ka wɛnɛ pea, mɛ gbɛa ngbanga benday ha wɛnɛ.›

³¹Bafa wa tɔa ha wɛnɛ: ‹Bem pɔm, mɛ dung hinɛ mi swe fɛt, nɛ mɔ fɛt ka dung ha kɔ mi, yo nê pɛ mɛ.

³²Ma, dea nde, ɔ ade fada nɛ totɛ hazu ya mɛ ɛngɛ bafe nɛ wɛnɛ tunɔ fin. A bayɔmɔ, ma, mi kpaa wɛnɛ sising.›»