Read south west gbaya Luc 16 Bible Online

Luc 16 - south west gbaya bible

Luc 16

¹Jésus tɔa fin ha hio *wan-yambimɔ pɛa: «Ma wan-kpamɔ dungɔ se nɛ wan-pam mɔ pɛa. Nɛ ɛ tɛa tɛ tɔ ha wɛnɛ nde, wan-pam mɔ ha gdangsa toy pɛa.

²Mɛgi wan-kpamɔ saa wɛnɛ nɛ tɔa: ‹Mi zea nɛ ge hazu mɛ ge nde? Mɛ osi ha mi pata mɔ fɛt ka mɛ dea nɛ toy pɔm. Hazu mɛ lɛm dung wan-pam mɔ pɔm fin na.›

³Nɛ wan-pam mɔ tɔa ha sila wa: ‹Wan pɔm begbosisi mi ha tom, mi bede mɛng? Mi bo nɛ ngaya mɛ gɔm fɔ na, nɛ mi nɛ foy mɛ gɔ mɔ.

⁴Mi ingɔ mɔ ka mi bede tuka nde, hio wi apam mi ha twa pɛ mbwa, ka wan pɔm begbosisi mi ha tom.›

⁵Mɛgi, a saa wi ndang ndang fɛt ka mbee pɛ wan pɛa ha zu mbwa. A ana bosia: ‹Mbee pɛ wan pɔm ha zu mɛ ge?›

⁶Wɛnɛ kiforo wen: ‹Yo nê ngbakpana nɔ gɔmmay ndang.› Nɛ wan-pam mɔ tɔa: ‹Takarata mbee pɛ mɛ gɔ. Mɛ dungnu nɛhasa, nɛ mɛ gɔn bhukɔa mɔrkɔ.›

⁷Nɛ a ana ma mbinga: ‹Mbee pɛ wan pɔm ha kɔ mɛ ge?› Wɛnɛ kiforo wen: ‹Yo nê gasa gɛsɛ kpalmɔ gɔmmay ndang.› Nɛ wan pam mɔ tɔa: ‹Takarata mbee pɛ mɛ gɔ. Mɛ gɔn bhukɔa mɔrkɔ zu bhukɔa tar.›

⁸Nɛ wan pɛ gdanga wan-pam mɔ lukoso wɛnɛ hazu a dea mɔ nɛ zɔma. Tɛwen, hio wi mɔ nzan de mɔ ha soko may nɛ zɔma, pen hio wi mɔ saamɔ pɛ Sɔ.

⁹«Nɛ mi tɔ ha ɛnɛ nde, ɛnɛ aku kpaamɔ mɔ nzan de nɛ dedemɔ ha tɛ hio wi nde, ɛnɛ atɛ dede dan mbwa. Mɛgi, ha ngimɔ ka yo bekari, Sɔ beba ɛnɛ nɛ dede kɔ ha twa pɛa kpoo.»

¹⁰«Wi ka dung nɛ mboazu ha bebe mɔ, a bedung fin nɛ mboazu ha gasa mɔ. Nɛ wi ka de nzeng mɔ nɛ bebe mɔ na, lɛm de fin nzeng mɔ nɛ gasa mɔ na.

¹¹Mɛgi, ka ɛnɛ dea mɔ nɛ yambala zu nɛ kpaamɔ mɔ nzan, Sɔ begde kpasa kpaamɔ ha kɔ ɛnɛ mɛng?

¹²Nɛ ka ɛnɛ pama kpaamɔ pɛ mbing wi nɛ yambala zu, Sɔ beha ɛnɛ kpaamɔ ka dung nɛ pɛ ɛnɛ nɛ tɛ ɛnɛ mɛng?

¹³Bala ndang lɛm dung nɛ wan bwa na. Hazu, a bengoy ma ndang nɛ sɛn mbinga, mana a beze nu ma ndang nɛ de kpandele sungiri nɛ mbinga. Ɛnɛ lɛm de tom ha kɔ Sɔ nɛ ha kɔ mbɔli na.»

¹⁴Hio *Farizien zea wen ndɔng fɛt, nɛ mbwa mama Jésus hazu mbwa ngoya mbɔli gdang.

¹⁵Ma, Jésus tɔa ha mbwa: «Ɛnɛ ha osa tɛ ɛnɛ ha li wi tuka *nzeng wi. Ma, Sɔ ingɔ sila ɛnɛ. Mɔ ka dung nɛ zioa ha li wi, dung nê mɔ nyɛl ha li Sɔ.»

¹⁶«Sɔngsi hɔa pɛ *Jean wan-gdumsiwi, yo nê *mbonga pɛ Moïse nɛ hio takarata pɛ *wan-tɔkuliwen sɔna ka osa mɔ ka Sɔ ngoy. Ma, angiri nɛ Jean wan-gdumsiwi, ɛ ha bulo *Dede Wen *Kongakandɔ pɛ Sɔ. Mɛgi, hio wi fɛt kio wal mɛ le ang nɛ nga mbanzi.

¹⁷Ma, ngɔn nɛ nu bepen nɛhasa sɔngsi nde, ɛ abisi ma mbuli ngɛrakamɔ ndang ha mbonga pɛ Moïse.

¹⁸«Wi ka yangsi ko pɛa nɛ si ma mbinga, dea wanza. Nɛ wi ka si bhoko ka ɛ yangsa kari, dea wanza fin.»

¹⁹«Ma wei mɛgi badung nê wan-kpamɔ. A yola nɛ dede zio la, nɛ a dea fada swe fɛt ha zang tandamɔ pɛa.

²⁰Ma wei mɛgi fin, ling wa nde, Lazare, wɛnɛ nê fabha wi, nɛ tɛ wa fɛt nɛ gbadalɛ. A dungɔ ha ɔanu swe fɛt ha nutwa pɛ wan-kpamɔ.

²¹Hazu wɛnɛ nɛ hɛl mɛ yɔng mbuli yɔngamɔ ka gɔy ha si tabolo pɛ wan-kpamɔ. Haki hio tolo dungɔ ha yala dalɛ pɛa.

²²Ngimɔ hapata, fabha wi ɛngɛ fea, nɛ hio *telenge kuo wɛnɛ nɛnɛ gde ha ngbolokɔ Abraham. Nɛ wan-kpamɔ fea fin, ɛ gunɔ wɛnɛ.

²³A zilo ha bhandi pɛ hio fiowi, nɛ haki wɛnɛ yɔnga nzata nɛdɔka. Ka wɛnɛ guo li, a zɔka Abraham nɛyɛa nɛ Lazare ha ngbolokɔ wa.

²⁴A gdɔra: ‹Bafa Abraham, de kobhe tɛ mi wa! Mɛ tomsi Lazare atɛ tɛ pi ndɔng kɔ wa ha li mɛ gasisi nɛ lembe mi, hazu hakɛ we ha bea mi bulum-bulum.›

²⁵Nɛ Abraham tɔa: ‹Bem pɔm, tazu mɛ agba nde, ha ngimɔ tunɔ pɛ mɛ ha nu, mɛ kpaa dedemɔ pɛ mɛ kari. Ma, Lazare dungɔ pɛa nɛ ngɔtɛ. Sising ɛ ha yɔkala wɛnɛ hakɛ, ma, pɛ mɛ, mɛ ha yɔnga nzata.

²⁶Nɛ fin, gasa gduko gbongo kɛtana soko ɔ hinɛ ɛnɛ. Mɛgi hio wi hakɛ ka ngoy nɛ ha pɛ ɛnɛ, kpa wal na. Nɛ hio wi haki lɛm tɛ ha pɛ ɔ na.›

²⁷Nɛ wan-kpamɔ tɔa fin: ‹Bafa mi, mi lokitɛ ha mɛ nde, mɛ atomsi Lazare ha twa pɛ bafa mi.

²⁸Hazu mi nɛ hio ya mi mɔrkɔ haki. Dea nde, Lazare anɛ nɛ mbo mbwa tuka nde, mbwa atɛ ha bhandi yɔnga nzata ɛngɛ fin na.›

²⁹Ma, Abraham tɔa: ‹Hio ya mɛ nɛ takarata pɛ Moïse nɛ pɛ hio *wan-tɔkuliwen. Lɛma sɔna nde, mbwa aze nu mbwa.›

³⁰Nɛ wan-kpamɔ kiforo wen fin: ‹Dalo, bafa Abraham. Ma, ka ma wi ha soko fiowi hɔa ha pɛ mbwa, mbwa bekifiri sila mbwa.›

³¹Nɛ Abraham tɔa ha wɛnɛ fin: ‹Ka mbwa ze wen takarata pɛ Moïse nɛ pɛ hio wan-tɔkuliwen na, mbwa lɛm ze ndang na, ngase wen pɛ ma wi ka guotɛ ha soko hio fiowi.›»