Read south west gbaya Luc 22 Bible Online

Luc 22 - south west gbaya bible

Luc 22

¹Yenga yɔng mampa ka ha na, ka ɛ sa nde *Pake, tɛ bo sanga.

²Hio gasa wan-hasadaka nɛ hio *wan-osi mbonga dungɔ ha kio wal mɛ gbɛ Jésus. Ma, mbwa ha yuo ke kandɔ pɛ mbwa.

³Mɛgi, *Satan lea sila Judas Iskariote, ma *wan-nɛtom ha soko hio bhukɔ gbala bwa.

⁴Judas nɛa ha pɛ hio gasa wan-hasadaka nɛ hio wan-zu hio nasara mɔ *gasa twa Sɔ. Wɛnɛ wolamɔ hinɛ mbwa hazu kpa wal ka wɛnɛ begde Jésus ha kɔ mbwa.

⁵Mbwa dungɔ nɛ totɛ ha wen ɛngi, nɛ mbwa bheka mɛ ha mbɔli ha wɛnɛ.

⁶Judas mɛkara yo, nɛ wɛnɛ angara kio dede ngimɔ mɛ gde Jésus ha kɔ mbwa nɛ wuso tuka nde, giliwi aing na.

⁷Bosi yala mɔ yenga mampa ka ha na, hɔa. Ha yala ɛngɛ, lɛma nde, ɛ agbɛ hio besami mɔ yenga Pake.

⁸Mɛgi, Jésus tomsa Pierre nɛ Jean nde, mbwa anɛ nɛ gi yɔngamɔ Pake.

⁹Mbwa anamɔ: «Mɛ ngoya nde, ɔ agi yo ha ndo nde?»

¹⁰A tɔa: «Ha ngimɔ ka ɛnɛ bele gasa le Jérusalem, ɛnɛ bekpa ma wei ha toya li ha zu wa. Ɛnɛ nak pata wa kanɛ twa ka wɛnɛ bele ang.

¹¹Ɛnɛ tɔ ha wan-twaa: ‹Wan-osimɔ pɛ ɔ ani mɛ nde, zang twa ka wɛnɛ nɛ hio *wan-yambimɔ pɛa beyɔngmɔ Pake ang ha ndo?›

¹²A beosi ha ɛnɛ ma pɛsa zang twa ha ngɔn, mɔ fɛt ha zanga. Haki ɛnɛ begi yɔngamɔ.»

¹³Hio wan-yambimɔ ndɔng pena, nɛ kpaa mɔ fɛt tuka ka Jésus tɔa nɛ ha mbwa. Nɛ mbwa gio yɔngamɔ Pake haki.

¹⁴Ka ngimɔ yɔngamɔ lɛma, Jésus dungɔ ha tabolo hinɛ hio *wan-nɛtom pɛa.

¹⁵Nɛ a tɔa ha mbwa: «Mi dungɔ ha kera nɛ tututu sila mɛ yɔng mɔ *Pake ɛngɛ hinɛ ɛnɛ, sɔngsi nde, mi akpa yeksamɔ.

¹⁶Mi tɔ ha ɛnɛ nde, hapata ɛngɛ, mi lɛm yɔng fin ma yɔngamɔ Pake na, kanɛ goto yenga Pake belɛmsiri tɛ ha zang *Kongakandɔ pɛ Sɔ.»

¹⁷Nɛ Jésus baa kɔpɔ, a lukoso Sɔ hazua, nɛ tɔa: «Ɛnɛ ba kɔpɔ ɛngɛ, nɛ kapini ha soko may.

¹⁸Mi tɔ ha ɛnɛ nde, mi lɛm nɔ li vigne fin na, kanɛ Kongakandɔ pɛ Sɔ behɔ.»

¹⁹Hapata Jésus baa mampa. A lukoso Sɔ hazua, a gbinɔ yo, nɛ haa yo ha mbwa. A tɔa: «Ɛngɛ nê tɛ mi, ka mi ha nɛ sadaka hazu ɛnɛ. Ɛnɛ de ɛngɛ mɛ gba tazu ɛnɛ nɛ mi.»

²⁰Hapata yɔngamɔ, Jésus baa fin kɔpɔ, nɛ tɔa: «Kɔpɔ ɛngɛ nê mbombe nɔa *mbon ha soko Sɔ nɛ wi. Yo nê mbon nɛ wal tɔktɛ mi ka sɛ ha wen zu ɛnɛ.»

²¹«Ma, ɛnɛ zɔk, wi ka beha kasatɛ mi hakɛ ha tabolo hinɛ mi.

²²Kpasawen, mi, *Bewei pɛ Wi, befe tuka ka Sɔ bhɔngara. Ma, ngɔtɛ ha wi ka beha kasatɛ mi.»

²³Mɛgi, hio wan-nɛtom angara ana may: «Yo nê o ha soko ɔ, ka bede mɛgi o nde?»

²⁴Hio *wan-nɛtom angara zanga wen ha soko may, hazu ing wi ka dung nɛ gasaa ha soko mbwa.

²⁵Jésus tɔa ha mbwa: «Hio *kongapora ba kandɔ pɛ mbwa nɛ nga kɔ. Nɛ hio zio wi de nde, ɛ asa mbwa nde, wan-de dedemɔ.

²⁶Ma, pɛ ɛnɛ yo bo mɛgi na. Lɛma nde, gasa wi ha soko ɛnɛ adung nɛ bebea. Nɛ wi ka dung ha zua, lɛma nde, wɛnɛ adung tuka wan-tom.

²⁷O nê gasa wi o? Wi ka dung ha tabolo mana wan-de tom ha wɛnɛ? Yo bo nê wi ɛngɛ ka dung ha tabolo, na nde? Ma, pɔm, mi dung ha soko ɛnɛ tuka wan-de tom ha ɛnɛ fɛt.

²⁸«Yo nê ɛnɛ ka bhɔna hapɛtɛ mi nɛ mboazu ha zang gasa yeksamɔ pɔm.

²⁹Yo nê ɛngi, ka mi begde *Kongakandɔ pɛ Sɔ ha kɔ ɛnɛ, tuka ka Bafa mi gdea yo ha kɔ mi.

³⁰Ha ngimɔ ka mi bedung kongapora, ɛnɛ beyɔng nɛ nɔ mɔ ha tabolo hinɛ mi. Nɛ ɛnɛ bedung ha zu hio solowan mɛ gɔn kita ha zu hio kandɔ pɛ *Israel bhukɔ gbala bwa.»

³¹«Simon, Simon, mɛ ze nɛdedea, Sɔ haa wal ha *Satan mɛ zɛk ɛnɛ tuka ka ɛ zɛk nɛ kpalmɔ.

³²Ma, mi gɔa Sɔ hazu mɛ nde, ka mɛ alak mɛkaramɔ gde na. Nɛ hapata, ka mɛ bekifiri fin ha pɔm, lɛma nde, mɛ angasisi hio ya mɛ.»

³³Pierre tɔa ha wɛnɛ: «*Kongawan, mi tɛ bo gdungɛ-gdungɛ mɛ nɛ hinɛ mɛ ha zɔbhɔ nɛ ha fio fin.»

³⁴Jésus kiforo wen: «Pierre, mi tɔ ha mɛ nde, mɛsɛ, sɔngsi ka gɔlɛ tɛ dɔm ka na, mɛ bekafi mi zetar nde, mɛ ing mi na.»

³⁵Hapata Jésus ana hio *wan-nɛtom pɛa: «Ha ngimɔ ka mi tomsa ɛnɛ nɛ gbele kɔ, mbɔli bona, ngobho yali bona, nakala bona, ha ngimɔ ɛngi ma mɔ kɔpa ɛnɛ nde?» Mbwa kiforo wen: «Ma mɔ ndang tɛ kɔpi ɔ na.»

³⁶Mɛgi a tɔa ha mbwa fin: «Ma, sising, wi ka dung nɛ mbɔli mana nɛ ngobho yali, wɛnɛ aba yo fɛt. Nɛ ka ma wi bo nɛ gbapa na, wɛnɛ agdongi gbambusa pɛa mɛ hɛ nɛ yo.

³⁷Ɛ gɔna ha zang takarata pɛ Sɔ nde, ‹Ɛ tɔla wɛnɛ ha soko *wan-de gdangamɔ.› Mi tɔ ha ɛnɛ nde, dea ka de nde, yo alɛmsiri tɛ hazu mi. Tunɔ pɔm bekari sising.»

³⁸Hio wan-nɛtom kiforo wen: «*Kongawan, gbapa bwa ga.» A tɔa ha mbwa: «Yo kara mɛgi.»

³⁹Jésus gboa ha Jérusalem nɛ nɛa ha zu ngari Olivier, tuka ndɔki deamɔ pɛa. Nɛ hio *wan-yambimɔ pɛa nɛa hinɛ wɛnɛ.

⁴⁰Ka Jésus hɔa haki, a tɔa ha mbwa: «Ɛnɛ agɔ Sɔ tuka nde, *sɛbhalamɔ agan zu ɛnɛ na.»

⁴¹Hapata Jésus tiko fin nɛ yɛa tikiring. Haki, a ngbio zigolo nɛ gɔa Sɔ,

⁴²a tɔa: «Bafa mi, ka mɛ ngoya, mɛ kusi kɔpɔ yimtɛ ɛngɛ ha zu mi yunɛ. Ma, bo tuka mi ngoya na, ma, tuka mɛ ngoya.» [

⁴³Ma *telenge mɔ ngɔn gbasa tɛ ha wɛnɛ mɛ ha da ha wɛnɛ.

⁴⁴Jésus tɛ bo nɛ nɔzang pentɛ, mɛgi a angara gɔa Sɔ nɛngaya pen mɔ sɔngsi. Nɛ gbɛngamɔ tɛ wa sɛa ha nu tuka mbɔrɔ tɔk.]

⁴⁵Ka wɛnɛ karsa gɔa Sɔ, a guotɛ kifiri nɛ ha pɛ hio wan-yambimɔ pɛa. Nɛ a kpaa mbwa ha ɔala, hazu tɛ mbwa kata nɛ ngɔtɛ.

⁴⁶Mɛgi a ana mbwa: «Mɛng, ɛnɛ ha ɔala? Ɛnɛ gutɛ, nɛ gɔ Sɔ tuka nde, sɛbhalamɔ agan zu ɛnɛ na.»

⁴⁷Ka Jésus boka ha wolamɔ, zugiliwi hɔa. Judas, ma *wan-nɛtom pɛa ha soko bhukɔ gbala bwa, nɛa ha li mbwa. A tiko tɛ hapɛtɛ Jésus hazu duy mbuku wa.

⁴⁸Mɛgi Jésus tɔa ha wɛnɛ: «Judas, yo nɛ wal duyo mbuku mi, *Bewei pɛ wi, ka mɛ ha kasa tɛ mi nde?»

⁴⁹Ka hio wan-nɛtom zɔka nde, mɔ tɛ bo nɛ ngaya, mbwa ana Jésus: «*Kongawan, ɔ abi nɛ gbapa gele nde?»

⁵⁰Nɛ ma wan-nɛtom daka gbapa sungiri nɛ wan-tom pɛ *wan-zu hio wan-hasadaka nɛ gɔna zala wa mɔ wal wekɔ.

⁵¹Ma, Jésus gaya mbwa: «Yo kara! Lak gde mɛgi!» Nɛ a gdea kɔ ha bhandi zala wi ɛngi nɛ kpasasa wɛnɛ.

⁵²Jésus ana hio gasa wan-hasadaka, hio nasara mɔ *gasa twa Sɔ nɛ hio kotowi: «Ɛnɛ tɛa ha baa mi nɛ mbiti te nɛ gbapa tuka mi nê nagbɛwi nde?

⁵³Mi dungɔ swe fɛt hinɛ ɛnɛ ha gasa twa Sɔ, nɛ ɛnɛ tɛ yafifi kɔ ɛnɛ sungiri mi na. Ma, sising ngimɔ pɛ ɛnɛ hɔa. Yo nê ngimɔ pɛ ngatɛ mɔ tutum.»

⁵⁴Mbwa baa Jésus nɛ ngbɔsa wɛnɛ nɛnɛ ha twa pɛ *wan-zu hio wan-hasadaka. Pierre naka mbwa nɛyɛa.

⁵⁵Haki, ɛ lɛa we ha binsila dɛl. Nɛ Pierre lea soko wi ndɔng ka dungɔnu hapɛtɛ we.

⁵⁶Ma bhoko-de tom zɔka wɛnɛ ha yolo we. A mbara wɛnɛ gdoo, nɛ tɔa: «Wei kɛ fin dungɔ ha yala hinɛ Jésus!»

⁵⁷Ma, Pierre kafa ha nu wa: «Bhoko, mi ing wɛnɛ na wa!»

⁵⁸Hapata tikiring, ma wi fin zɔka wɛnɛ nɛ tɔa: «Mɛ fin, mɛ nê kpal wi ndɔng.» Ma, Pierre kafa: «Way, bo nê mi na!»

⁵⁹Hapata ngonga ndang fin, ma mbingwi tɔa: «Kpasawen, kafɛ bona, wei kɛ dungɔ hinɛ Jésus, hazu wɛnɛ fin nê wi mɛ Galile.»

⁶⁰Ma, Pierre kiforo wen: «Ge? Mi ing wen ka mɛ tɔ na!» Nɛhasa, ka wɛnɛ boka ha wolamɔ, gɔlɛ dɔma.

⁶¹Mɛgi *Kongawan kiforo li zɔk Pierre gdoo. Nɛ tazu Pierre gbaa nɛ wen ka Kongawan tɔa sɔngsi ha wɛnɛ: «Mɛsɛ, sɔngsi dɔma gɔlɛ, mɛ bekafi mi zetar.»

⁶²Nɛ Pierre gboa ha zang kin, nɛ wɛnɛ hea kwa tung-tung.

⁶³Hio nasara ka pɛm Jésus mama wɛnɛ. Mbwa hɛla li wa nɛ mɛla wɛnɛ. Mbwa tɔa: «*Wan-tɔkuliwen, mɛ sum ling wi ka mɛla mɛ!»

⁶⁴

⁶⁵Nɛ mbwa fɛngsa wɛnɛ nɛ dɔka wen fin.

⁶⁶Ka mɔsaa, hio kotowi, hio gasa wan-hasadaka nɛ hio *wan-osi mbonga wesara may, hazu mbwa nê hio wan-kpo zuwen mɔ kandɔ zuife. Ɛ kuo Jésus nɛnɛ ha li mbwa.

⁶⁷Mbwa ana wɛnɛ: «Ka mɛ nê *Mesi, mɛ tɔ yo ha ɔ!» A kiforo wen ha mbwa: «Ka mi tɔ yo ha ɛnɛ, ɛnɛ lɛm mɛkiri wen pɔm ndang na.

⁶⁸Nɛ ka mi ani ɛnɛ ma mɔ, ɛnɛ lɛm kifiri wen ha mi ndang na.

⁶⁹Ma, angiri sising mi, *Bewei pɛ Wi, bedungnu ha wekɔ Sɔ, ka dung nɛ ziomɔ fɛt.»

⁷⁰Nɛ mbwa fɛt ana wɛnɛ fin: «Mɛgi, mɛ tɔ nde, mɛ nê *Bewei pɛ Sɔ nde?» Nɛ wɛnɛ tɔa ha mbwa: «Ɛnɛ tɔa yo nɛ tɛ ɛnɛ. Mi nê Bewei pɛ Sɔ.»

⁷¹Mɛgi, mbwa tɔa: «Ɔ zea wen nu wa nɛ tɛ ɔ kari. Ɔ lɛm ki ma wan-kɛ wen fin na.»