Read south west gbaya Luc 3 Bible Online

Luc 3 - south west gbaya bible

Luc 3

¹Ha ndangtɛ ngimɔ ka *kongapora mɔ Rome, Sezar Tibere, dea tom lɛm bɛlɛ bhukɔ zanga mɔrkɔ, Ponse Pilate dungɔ gɔfɔrma mɔ kandɔnu Judée, Herode dungɔ kongapora mɔ kandɔnu Galile, Philippe ya mɛ Herode dungɔ kongapora mɔ kandɔnu Iture nɛ mɔ kandɔnu Trakoni, Lisanias dungɔ kongapora mɔ kandɔnu Abilene,

²nɛ Anne nɛ Kaife dungɔ nɛ hio *wan-zu hio wan-hasadaka. Ha ngimɔ ɛngi Sɔ wola wen ha Jean bewei pɛ Zakari ka dungɔ ha kpɛnu.

³Nɛ wɛnɛ ha yala dam kandɔnu mɔ li Jourdain fɛt. A gbaa tazu hio wi nɛ wen mɛgɛ: «Ɛnɛ tɛ, mi gdumsi ɛnɛ ha li hazu osi nde, ɛnɛ kiforo sila ɛnɛ. Mɛgi Sɔ bebisi *sɛmbɔ pɛ ɛnɛ.»

⁴Gbesi tuka ka *wan-tɔkuliwen Esaïe bangɛriki: «Gɛl wi ndang gdɔra ha kpɛnu: ‹Ɛnɛ bhɔngiri mbango pɛ *Kongawan. Ɛnɛ yolsi hio bhɛtɛ-bhɛtɛ wal pɛa.

⁵Ɛnɛ donsi hio fongo fɛt nɛ ɛnɛ hilsi hio bhele-bhele ngari nɛ hio bebe ngari fɛt. Ɛnɛ yolsi ngbuo wal nɛ ɛnɛ lɔksi ngbukuru-ngbukuru wal.

⁶Nɛ wi fɛt bezɔk *mɔkpasi ka Sɔ bekpasisi nɛ mbwa.›»

⁷Giliwi dungɔ ha tɛa ha pɛa hazu nde, wɛnɛ agdumsi mbwa ha li. Nɛ wɛnɛ tɔa ha mbwa: «Ɛnɛ kul pɛ da gɔk! Ngambi pɛ Sɔ tɛ bo sanga-sanga! O ha osi ha ɛnɛ nde, ɛnɛ lɛm kpɔy ha yo, o nde?

⁸Ɛnɛ de dedemɔ ka osi nde, ɛnɛ kiforo sila ɛnɛ! Nɛ ɛnɛ karsi lukoso tɛ nde, Abraham nê ngbabafa ɛnɛ! Hazu Sɔ lɛma kifiri hio ta ndɔng gde nɛ hio bezang pɛ Abraham.

⁹Ɛ gdea kpe ha gunte kari, te ndang ndang fɛt ka way dede waya na, ɛ begɔn yo pi ha we.»

¹⁰Hio giliwi ana wɛnɛ: «Ɔ bede mɛng?»

¹¹A kiforo wen ha mbwa: «Ka ma wi nɛ latɛ bwa, wɛnɛ aha ma ha wi kɛ ka bo nɛ yo na. Nɛ ka ma wi nɛ yɔngamɔ, wɛnɛ akapini ma ha wi kɛ ka bo nɛ yo na.»

¹²Hio wan-ndɛm mbɔli garama tɛa ha pɛa hazu nde, wɛnɛ agdumsi mbwa ha li. Nɛ mbwa ana wɛnɛ: «Wan-osimɔ, ɔ bede mɛng?»

¹³A kiforo wen ha mbwa: «*Mbonga osa dɔka mbɔli garama ha ɛnɛ. Ka ɛnɛ aba pen zua na!»

¹⁴Hio wan-bibulo fin ana wɛnɛ nɛ mbwa tɔa: «Ma, pɛ ɔ, ɔ bede mɛng?» Nɛ wɛnɛ tɔa ha mbwa: «Ɛnɛ ba mɔ pɛ wi nɛ nga mbanzi na! Nɛ ɛnɛ fundi wi nɛ wen dalo na! Dea nde, mbɔli tom pɛ ɛnɛ alɛm nɛ ɛnɛ sɔna.»

¹⁵Hio giliwi dungɔ ha kera hɔa pɛ *Mesi. Mɛgi mbwa ana ha sila mbwa nde, mana Jean nê Mesi.

¹⁶Ma, Jean tɔa ha mbwa: «Pɔm, mi gdumsi nɛ ɛnɛ ha li. Ma wi kɛ ka betɛ ha pata mi, wɛnɛ nɛ gasaa pen mi. Mi bo nɛ zioa hazu bul pɛl nakala pɛa na. A begdumsi ɛnɛ ha zang *Nzɔy-Sɔtɛ nɛ ha zang we.

¹⁷Wɛnɛ tɛ bo sanga mɛ pɛfi kpalmɔ pɛa. Hapata a besasisi bhandi pɛfi mɔ. Nɛ wɛnɛ bewesiri hongbongbo kpalmɔ gde ha zang gulo nɛ a bebesisi sara ha we ka bisi na.»

¹⁸Mɛgi Jean dungɔ ha bulo *Dede Wen ha hio wi nɛ wal dɔka mbinga mbɔla fin.

¹⁹Nɛ Jean sɛna wen ha Herode, kongapora mɔ kandɔnu Galile, hazu wɛnɛ dea wanza nɛ wal sio Herodiade, ko pɛ ya wa. Nɛ wɛnɛ sɛna wen fin hazu hio mbinga gdangamɔ pɛ Herode fɛt.

²⁰Mɛgi Herode aa ma gdangamɔ fin ha zu hio gdangamɔ pɛa fɛt, ka wɛnɛ pio Jean ha zɔbhɔ.

²¹Ka Jean tɛ le ka zɔbhɔ na, a gdumso hio wi fɛt ka tɛa ha pɛa. Nɛ a gdumso fin Jésus. Ha ngimɔ ka Jésus ha gɔa Sɔ, liswe gboa long.

²²Nɛ *Nzɔy-Sɔtɛ zilo ha zu Jésus tuka gbakuli. Nɛ ma gɛl gboa ha liswe nɛ tɔa: «Mɛ nê bewei pɔm ka mi ngoya gdang. Mɛ gdea totɛ ha sila mi.»

²³Ha ngimɔ ka Jésus angara tom pɛa, bɛlɛ pɛa hɔa mana bhukɔa tar. Ɛ takara nde, wɛnɛ nê bem pɛ Joseph bewei pɛ Heli.

²⁴Heli bewei pɛ Matate, Matate bewei pɛ Lévi, Lévi bewei pɛ Malki, Malki bewei pɛ Yanai, Yanai bewei pɛ Joseph,

²⁵Joseph bewei pɛ Matatias, Matatias bewei pɛ Amos, Amos bewei pɛ Nahum, Nahum bewei pɛ Esli, Esli bewei pɛ Nagai,

²⁶Nagai bewei pɛ Maat, Maat bewei pɛ Matatias, Matatias bewei pɛ Semein, Semein bewei pɛ Yosek, Yosek bewei pɛ Yoda,

²⁷Yoda bewei pɛ Yoanan, Yoanan bewei pɛ Resa, Resa bewei pɛ Zorobabel, Zorobabel bewei pɛ Salatiel, Salatiel bewei pɛ Neri,

²⁸Neri bewei pɛ Melki, Melki bewei pɛ Adi, Adi bewei pɛ Kosam, Kosam bewei pɛ Elmadam, Elmadam bewei pɛ Er,

²⁹Er bewei pɛ Jésus, Jésus bewei pɛ *Eliezer, Eliezer bewei pɛ Yorim, Yorim bewei pɛ Matate, Matate bewei pɛ Lévi,

³⁰Lévi bewei pɛ Siméon, Siméon bewei pɛ Juda, Juda bewei pɛ Joseph, Joseph bewei pɛ Yonam, Yonam bewei pɛ Eliakim,

³¹Eliakim bewei pɛ Melea, Melea bewei pɛ Mena, Mena bewei pɛ Matata, Matata bewei pɛ Natan, Natan bewei pɛ David,

³²David bewei pɛ Yese, Yese bewei pɛ Obed, Obed bewei pɛ Boaz, Boaz bewei pɛ Sala, Sala bewei pɛ Naason,

³³Naason bewei pɛ Aminadab, Aminadab bewei pɛ Ademin, Ademin bewei pɛ Arni, Arni bewei pɛ Esrom, Esrom bewei pɛ Fares, Fares bewei pɛ Juda,

³⁴Juda bewei pɛ Jacob, Jacob bewei pɛ Isaac, Isaac bewei pɛ Abraham, Abraham bewei pɛ Tera, Tera bewei pɛ Nakor,

³⁵Nakor bewei pɛ Seruk, Seruk bewei pɛ Ragaum, Ragaum bewei pɛ Falek, Falek bewei pɛ Eber, Eber bewei pɛ Sela,

³⁶Sela bewei pɛ Kainan, Kainan bewei pɛ Arpaksad, Arpaksad bewei pɛ Sem, Sem bewei pɛ Noe, Noe bewei pɛ Lamek,

³⁷Lamek bewei pɛ Matusala, Matusala bewei pɛ Henok, Henok bewei pɛ Yared, Yared bewei pɛ Maleleel, Maleleel bewei pɛ Kainam,

³⁸Kainam bewei pɛ Enos, Enos bewei pɛ Set, Set bewei pɛ Adam, Adam bewei pɛ Sɔ.