Read south west gbaya Luc 6 Bible Online

Luc 6 - south west gbaya bible

Luc 6

¹Ha ma swe ɔmtɛ, Jésus gɔna ha zang fɔ kpalmɔ tuka sundu. Hio *wan-yambimɔ pɛa bhio hio ma wayaa nɛ mbwa ngbɔa ha kɔ yɔng.

²Nɛ hio ma *Farizien ana mbwa: «Hazu ge ɛnɛ ha dea mɔ, ka *mbonga kafa mɛ de yo ha swe ɔmtɛ ge nde?»

³Jésus kiforo wen ha mbwa: «Ɛnɛ tɛ tɔl mɔ ka David nɛ hio wi pɛa bade ha ngimɔ ka mbwa dungɔ nɛ wɔ, na nde?

⁴A lea zang twa Sɔ nɛ kuo mampa ka ɛ haa nɛ sadaka kari. A yɔnga nɛ haa ma ha hio wi pɛa, ngase ka mbonga pɛ ɔ haa nu nde, sɔna nê hio wan-hasadaka ayɔng yo.»

⁵Nɛ Jésus tɔa fin ha mbwa: «Mi, *Bewei pɛ Wi nê wan hazu swe ɔmtɛ.»

⁶Ha ma mbing *swe ɔmtɛ, Jésus lea ma *twa gɔ Sɔ, nɛ a osa mɔ ha hio wi. Ma wi ka wekɔ wa yɔmba, dungɔ haki.

⁷Hio *Farizien nɛ hio *wan-osi mbonga dungɔ ha mbara Jésus nde, mana a bekpasisi ma wan-zɛlɛ ha swe ɔmtɛ, tuka nde ka mbwa akpa wal mɛ fundi nɛ wɛnɛ.

⁸Ma, Jésus ingɔ takaramɔ pɛ mbwa. Nɛ wɛnɛ tɔa ha wan-yɔmba kɔ mɛgɛ: «Gutɛ mɛ, nɛ nɛ yol ha binsila.» A guotɛ nɛ nɛ yol.

⁹Nɛ Jésus tɔa ha mbwa: «Mi ani ɛnɛ nde, mbonga pɛ ɔ haa wal mɛ de nɛ ge? Dede mɔ mana gdanga mɔ? Kpasasa tunɔ mana yangala tunɔ pɛ wi?»

¹⁰Jésus zɔka mbwa hɛrr fɛt, nɛ wɛnɛ tɔa ha wan-yɔmba kɔ: «Yafifi kɔ mɛ!» Wan-zɛlɛ ɛngɛ dea mɛgi nɛ kɔ wa kiforo nɛ dedea.

¹¹Ma, mbwa dea ngambi gdang, nɛ mbwa ana may hazu ing mɔ ka mbwa bede nɛ Jésus.

¹²Ma swe hapata ɛngi, Jésus nɛa ha zu ngari hazu gɔ Sɔ. A dungɔ haki ha gɔa Sɔ nɛ zɛ fɛt.

¹³Ka mɔsaa, a wesara hio *wan-yambimɔ pɛa, nɛ a kuo hio ma ha soko mbwa bhukɔ gbala bwa gde nɛtɛ. Nɛ wɛnɛ saa ling mbwa nde, hio wan-nɛtom.

¹⁴Wi ndɔng nê: Simon ka Jésus saa fin nde Pierre, André ya mɛ Pierre, Jacques hinɛ ya wa Jean, Philippe nɛ Barthélemy,

¹⁵Matthieu nɛ Thomas, Jacques bewei pɛ Alfe, nɛ Simon ka ɛ sa nde «Bele ka yin gɔn-gɛnɛ wan-le»,

¹⁶Judas bewei pɛ Jacques, nɛ Judas Iskariote wan-hakasatɛ Jésus.

¹⁷Jésus zilo ngari hinɛ hio *wan-nɛtom pɛa. Nɛ mbwa yola ha tɛlɛfɛn bhandi ka hio olo *wan-yambimɔ dungɔ ang hinɛ gasa zugiliwi mɔ kandɔnu Judée, mɔ gasa le Jérusalem nɛ mɔ kandɔnu mɔ le Tir nɛ Sidon, ka dung hapɛtɛ nana-litɔng.

¹⁸Zugiliwi ndɔng tɛa hazu ze wen pɛ Jésus, nɛ hazu nde, wɛnɛ akarsi hio zɛlɛ pɛ mbwa. Nɛ Jésus kpasasa fin hio wi ka kpaa yeksamɔ ha kɔ gdanga sɔtɛ.

¹⁹Nɛ giliwi fɛt kio wal mɛ ndɔ tɛ wa, hazu ngatɛ mɛ karsi zɛlɛ gbo ha tɛ wa, nɛ a kpasasa hio wan-zɛlɛ fɛt.

²⁰Jésus zɔka hio *wan-yambimɔ pɛa nɛ a tɔa ha mbwa: «Totɛ ha ɛnɛ ka dung nê fabha wi hazu ɛnɛ bedung hio wi mɔ *Kongakandɔ pɛ Sɔ.

²¹Totɛ ha ɛnɛ ka dung nɛ wɔ sising, hazu zang ɛnɛ bedon. Totɛ ha ɛnɛ ka he kwa sising, hazu ɛnɛ bemam mami nɛ totɛ.

²²Totɛ ha ɛnɛ ka hio wi besɛn ɛnɛ, nɛ ka mbwa bemul ɛnɛ pi, nɛ ka mbwa beya ɛnɛ nɛ fɛngsi ling ɛnɛ, hazu mi, *Bewei pɛ Wi.

²³Ɛnɛ de totɛ ha ngimɔ ka mɔ ndɔng behɔ, nɛ ɛnɛ de gaga hazu mɔ-kɛ ɛnɛ nɛ gasaa ha zang ngɔn. Hazu hio ngbabafa mbwa bade se mɛgi ha tɛ hio *wan-tɔkuliwen.

²⁴Ma, ngɔtɛ ha ɛnɛ hio wan-kpamɔ, hazu ɛnɛ kpaa mɔ gasisi sila ɛnɛ kari.

²⁵Ngɔtɛ ha ɛnɛ ka zang ɛnɛ dona sising, hazu wɔ bede bin ɛnɛ. Ngɔtɛ ha ɛnɛ ka mam mami sising, hazu ɛnɛ bedung ha zang kobhe bin nɛ ɛnɛ behe kwa.

²⁶Ngɔtɛ ha ɛnɛ ka hio wi fɛt ha tɔa dede kasi tɛ ɛnɛ, hazu hio ngbabafa mbwa dea gbesi ha tɛ hio wan-tɔkuliwen dalo.»

²⁷«Ma, mi tɔ ha ɛnɛ ka ze mi sising nde, ɛnɛ angoy hio ngana pɛ ɛnɛ, nɛ ɛnɛ ade dedemɔ ha tɛ wi ndɔng ka sɛn ɛnɛ.

²⁸Ɛnɛ awol dede wen ha zu wi ndɔng ka fom ɛnɛ. Ɛnɛ agɔ Sɔ hazu ɛ ndɔng ka yukiti ɛnɛ.

²⁹Ka ma wi mɛla mɛ ha ma mbuku ndang, kifiri bhalkɔa ha wɛnɛ amɛl fin. Ka ma wi baa gasa latɛ pɛ mɛ, gde wɛnɛ aku fin latɛ mɔ sia.

³⁰Ka ma wi gɔa mɔ ha kɔ mɛ, mɛ ha yo ha wɛnɛ. Nɛ ka ma wi baa ma mɔ pɛ mɛ, ka mɛ a-ani yo fin na.

³¹Mɔ fɛt ka ɛnɛ ngoy nde, hio wi ade yo ha tɛ ɛnɛ, ɛnɛ de yo gbesi ha tɛ mbwa!

³²«Ka ɛnɛ ngoy sɔna nɛ wi ndɔng ka ngoy ɛnɛ, ki ɛ belukisi ɛnɛ hazu ge? Hazu hio *wan-de gdangamɔ fin ha ngoya hio wi ka ngoy mbwa.

³³Nɛ ka ɛnɛ de dedemɔ sɔna ha tɛ wi ndɔng ka de dedemɔ ha tɛ ɛnɛ, ki ɛ belukisi ɛnɛ hazu ge? Hazu hio wan-de gdangamɔ fin ha dea gbesi.

³⁴Nɛ ka ɛnɛ ha mbee sɔna ha ɛ ndɔng ka ɛnɛ takara nde, mbwa bekifiri yo ha ɛnɛ, ki ɛ belukisi ɛnɛ hazu ge? Hazu hio wan-de gdangamɔ fin ha haa mbee ha ma mbinga tuka nde, wi ndɔng akifiri yo ha mbwa.

³⁵Ma, ɛnɛ angoy hio ngana pɛ ɛnɛ, nɛ ɛnɛ ade dedemɔ ha tɛ mbwa. Ɛnɛ aha mbee ha ma wi, ma ɛnɛ atakiri hazu wen kiforo yo na. Ka ɛnɛ de mɛgi, mɔ-kɛ ɛnɛ nɛ gasaa ha zang ngɔn, nɛ ɛnɛ bedung hio bem pɛ Sɔ, ka dung ha kuso ngɔn. Hazu wɛnɛ ha dea dedemɔ fin ha tɛ hio gdanga wi, nɛ ha tɛ wi ndɔng ka ing tɔa ‹oeba› na.

³⁶Ɛnɛ ade kobhe tɛ wi gbesi tuka Bafa ɛnɛ ha dea kobhe tɛ wi.»

³⁷«Ɛnɛ agɔn kita ha zu ma wi na, mɛgi Sɔ lɛm gɔn kita ha zu ɛnɛ na. Ɛnɛ agɔn kita ba ma wi na, mɛgi Sɔ lɛm gɔn kita ba ɛnɛ na. Ɛnɛ bisi *sɛmbɔ pɛ may, mɛgi Sɔ bebisi sɛmbɔ pɛ ɛnɛ.

³⁸Ɛnɛ aha mɔ ha hio wi, mɛgi Sɔ beha mɔ ha ɛnɛ. Sɔ bedonsi toy wekimɔ pɛa, a beisi yo, a beyakili yo, kanɛ yo dona gɔy. Nɛ a begɔsi yo ha nu la pɛ ɛnɛ. Sɔ beweki mɔ ha ɛnɛ nɛ ndangtɛ mɔwekimɔ ka ɛnɛ weki nɛ mɔ ha hio oloa.»

³⁹Jésus tɔa fin zɛngwen ha mbwa: «Wan-gdɔka li lɛma fin ngbɔsi ma wan-gdɔka li mɛng? Ka bo mɛgi, ki mbwa bwa fɛt betek ha zang gduko kɔ.

⁴⁰*Wan-yambimɔ ndang pen wan-osimɔ pɛa na. Ma, ka wɛnɛ yamba mɔ fɛt wɛ ɛ, a bedung tuka wan-osimɔ pɛa.

⁴¹«Hazu ge mɛ gɛri mbuli pala ka dung ha li ya mɛ, ma, mɛ zɔk gasa te ka dung ha li mɛ na ge nde?

⁴²Mɛ bede mɛng mɛ tɔ ha ya mɛ: ‹Ya mi, gde mi aku mbuli pala ha li mɛ yunɛ,› nɛ mɛ zɔk gasa te ka dung ha li mɛ na, ge nde? Wan-dambari, mɛ kusi gasa te ka dung ha li mɛ yunɛ sɔngsi. Nɛ ka mɛ zɔka mɔ buee, ki mɛ lɛma ku mbuli pala ka dung ha li ya mɛ yunɛ.»

⁴³«Dede te lɛm way gdanga wayaa na. Nɛ gdanga te lɛm way dede wayaa na.

⁴⁴Hazu ɛ ing te ndang ndang fɛt nɛ wal wayaa. Ɛ lɛm bhi waya sole ha te gaza na. Nɛ ɛ lɛm bhi waya yama ha yak ngombia na.

⁴⁵Dede wi gbosisi nɛ dedemɔ ka don zang sila wa. Nɛ gdanga wi gbosisi nɛ gdangamɔ ka don zang sila wa. Hazu wi tɔ sɔna nɛ wen mɔ, ka don zang sila wa.»

⁴⁶«Hazu ge ɛnɛ sa mi nde, *Kongawan, Kongawan, nɛ ɛnɛ de mɔ ka mi tɔ ha ɛnɛ na ge nde?

⁴⁷Wi ka tɛ ha pɔm, ka ze wen pɔm, nɛ ka de mɔ lɛm nɛ yo, wɛnɛ ba may nɛ wi ka mi beosi ha ɛnɛ.

⁴⁸A ba may nɛ ma wi ka bɛ twa, nɛ ka za kɔ nanga twa nɛ gdukoa hɔ ha nga nu. Ha ngimɔ mbeng, ka gbongbong kolo ilo twaa, yo fesi tɛ na, hazu a bɛa yo nɛdedea.

⁴⁹Ma, wi ka ze wen pɔm nɛ zala sɔna, nɛ ka de mɔ ka mi osi na, wɛnɛ ba may nɛ ma wi ka bɛa twa pɛa ha gele nu, nangaa bona. Ka gbongbong kolo ilo twaa, yo tukolo nɛhasa mburr.»