Read south west gbaya Luc 9 Bible Online

Luc 9 - south west gbaya bible

Luc 9

¹Jésus wesara hio wan-nɛtom bhukɔ gbala bwa, nɛ wɛnɛ haa mbwa ngatɛ nɛ ziomɔ mɛ gan zu hio gdanga sɔtɛ fɛt, nɛ mɛ karsi hio zɛlɛ.

²Nɛ wɛnɛ tomsa mbwa hazu bul wen *Kongakandɔ pɛ Sɔ, nɛ hazu kpasisi hio wan-zɛlɛ.

³A tɔa ha mbwa: «Ka ɛnɛ aba ma mɔ yali ndang na. Ka ɛnɛ aba ngase tongolo, ngase ngobho, ngase yɔngamɔ, ngase mbɔli na. Ka ma wi ha soko ɛnɛ anɛ nɛ latɛ bwa na.

⁴Ka ɛ baa ɛnɛ ha ma twa, ɛnɛ bhɔn sɔna haki, kanɛ ɛnɛ guotɛ ha le ɛngi pen.

⁵Nɛ ka hio wi ha ma le ba ɛnɛ nɛ dede kɔ na, ɛnɛ pen ha le ɛngi. Nɛ ɛnɛ ngbɔ ngbabhuki nanga ɛnɛ, ka yo aosi ha mbwa gdanga deamɔ pɛ mbwa.»

⁶Hio wan-nɛtom pena, mbwa nɛa gɔn hio le nɛnɛ. Ha bhandi fɛt mbwa bulo *Dede Wen nɛ mbwa kpasasa hio wan-zɛlɛ.

⁷Gɔfɔrma Herode, zea kasi mɔ fɛt ka hɔa. A ing fin mɔ ka wɛnɛ betakiri hazua na. Hazu hio ma wi dungɔ ha tɔa: «Jésus nê Jean ka guotɛ ha soko hio fiowi.»

⁸Nɛ hio ma tɔa: «Yo nê *Elie ka guotɛ ha ngɔn tɛ», nɛ hio ma mbinga tɔa: «Yo nê ma *wan-tɔkuliwen mɔ sɔngsi ka guotɛ nɛ tunɔ fin.»

⁹Ma, Herode tɔa: «Ɛ gɔna zu Jean bhee, mi nɛ pɔm tɛ ha ha nua. Mi ha zea kasi tɛ wi ɛngɛ nɛdɔka. Wɛnɛ nê o fin o?» Nɛ wɛnɛ kio wal mɛ zɔk Jésus.

¹⁰Hio *wan-nɛtom kiforo tɛ ha pɛ Jésus, nɛ baa kasi mɔ fɛt ka mbwa dea ha wɛnɛ. Nɛ a daka tɛ hinɛ mbwa gbatɛ ha ma bhandi nɛ wal le Betsaida.

¹¹Ma, hio giliwi ingɔ yo, nɛ mbwa naka pata wa. Jésus baa mbwa, nɛ a tɔa ha mbwa wen hazu *Kongakandɔ pɛ Sɔ. Nɛ a kpasasa hio wan-zɛlɛ.

¹²Nɛ ka swe angara lea, hio wan-nɛtom tiko tɛ hapɛtɛ wa nɛ tɔa: «Mɛ ha wal ha giliwi ka mbwa anɛ ha hio le nɛ ha nu fɔ mɔ pɛtɛa. Haki mbwa bekpa bhandi ɔnu nɛ yɔngamɔ fin, hazu ɔ dung hakɛ ha kpɛnu.»

¹³Ma, a kiforo wen ha mbwa nɛ tɔa: «Ɛnɛ ha yɔngamɔ ha mbwa nɛ tɛ ɛnɛ!» Hio wan-nɛtom tɔa: «Ɔ nɛ mampa mɔrkɔ nɛ kɔyɔ bwa sɔna. Mɛgi dea nde, ɔ anɛ sɔngsi mɛ hɛ yɔngamɔ hazu dɔka wi ndɔng fɛt!»

¹⁴Hazu dɔka wei fɛt ka wesara may lɛma nɛ tomay mɔrkɔ. Nɛ Jésus haa nu ha hio *wan-yambimɔ pɛa: «Ɛnɛ tɔ ha hio wi nde, mbwa adungnu nɛ zugili mɔ wi bhukɔa mɔrkɔ bhukɔa mɔrkɔ.»

¹⁵Nɛ mbwa dea mɛgi nɛ hio wi fɛt dungɔnu.

¹⁶Jésus kuo mampa ndɔng mɔrkɔ nɛ kɔyɔ ndɔng bwa. A guo li ha ngɔn, nɛ a wola dede wen ha zua. A gbinɔ yo, nɛ a haa yo ha hio wan-yambimɔ mɛ kapini ha giliwi.

¹⁷Nɛ wi fɛt yɔnga zang mbwa don. Nɛ ɛ kaya olo titi yɔngamɔ don gɛsɛ bhukɔ gbala bwa.

¹⁸Ma swe Jésus ha gɔa Sɔ gbatɛ, sɔna nê hio *wan-yambimɔ pɛa ka dung hinɛ wɛnɛ. Mɛgi wɛnɛ ana mbwa: «Hio wi tɔ nde, mi nê o?»

¹⁹Hio wan-yambimɔ kiforo wen: «Hio ma wi tɔ nde, mɛ nê *Jean wan-gdumsiwi. Hio ma nde, mɛ nê *Elie. Nɛ hio ma mbinga nde, mɛ nê ma *wan-tɔkuliwen mɔ sɔngsi ka guotɛ ha soko hio fiowi.»

²⁰Nɛ Jésus ana mbwa: «Ma, ɛnɛ, ɛnɛ tɔ pɛ ɛnɛ nde, mi nê o?» Pierre kiforo wen: «Mɛ nê Mesi ka Sɔ tomsa.»

²¹Jésus haa nu ha mbwa nɛngaya nde, mbwa atɔ wen ɛngɛ ha ma wi ndang na.

²²Nɛ a tɔa fin: «Lɛma nde mi, *Bewei pɛ Wi, mi akpa yimtɛ nɛdɔka. Hio kotowi, hio gasa wan-hasadaka nɛ hio *wan-osi mbonga bemul mi pi. Ɛ begbɛ mi, nɛ zetar yala, mi bekifiri ha tunɔ.»

²³Nɛ wɛnɛ tɔa ha wi fɛt: «Ka ma wi ngoy ndari mi, wɛnɛ akafi wɔ mɔ nzan fɛt, wɛnɛ agu getakate pɛa yala ndang ndang fɛt, nɛ wɛnɛ andari mi.

²⁴Hazu wi ka ngoy kpasisi tunɔ pɛa, a beyɔsisi yo. Ma, wi ka yɔsisi tunɔ pɛa hazu mi, a bekpasisi yo.

²⁵Ka ma wi yɔsasa tunɔ pɛa mana a gdangsa yo nɛ wal kpaa mɔ nzan fɛt, kpaamɔ pɛa bede nɛ ge ha wɛnɛ ge nde?

²⁶Ka ma wi nɛ foy hazu mi nɛ hazu wen pɔm, mi, Bewei pɛ Wi, bedung nɛ foy hazu wa ha ngimɔ ka mi bekifiri ha zang *lɛkɛ-lɛkɛmɔ pɔm, pɛ Bafa mi nɛ pɛ hio nzɔy *telenge.

²⁷Mɛgi, mi tɔ kpasawen ha ɛnɛ nde, hio ma ha soko ɛnɛ ka dung hakɛ sising lɛm fe na, kanɛ mbwa bezɔk *Kongakandɔ pɛ Sɔ.»

²⁸Mana hapata yala mɔrkɔ zanga tar, ka Jésus tɔa wen ndɔng, a kuo Pierre, Jacques nɛ Jean nɛnɛ ha zu ngari hazu gɔ Sɔ.

²⁹Ha ngimɔ ka wɛnɛ ha gɔa Sɔ, zang li wa kpala tɛ, nɛ la pɛa tɛ bo nɛ bua ndong-ndong.

³⁰Nɛ wi bwa hɔa tɛ wolmɔ hinɛ wɛnɛ. Yo nê Moïse hinɛ *Elie.

³¹Mbwa gbasa tɛ mbwa ha zang lɛkɛ-lɛkɛmɔ pɛ Sɔ. Nɛ mbwa tɔa wen tom ka Jésus belɛmsiri ha Jérusalem nɛ wal fio pɛa.

³²Pierre nɛ hio dan wa dungɔ ha zang la. Ka li mbwa gɔna, mbwa zɔka lɛkɛ-lɛkɛmɔ pɛ Jésus nɛ wi ndɔng bwa ka dung hapɛtɛ wa.

³³Nɛ ha ngimɔ ka wi ndɔng kɛtana soko hinɛ Jésus, Pierre tɔa ha wɛnɛ: «Wan-osimɔ, yo nɛdedea, ɔ bhɔn hakɛ. Ɔ bebɛ gbamsa tar, ndang ha mɛ, ndang ha Moïse nɛ ndang ha Elie.» Pierre ing mɔ ka wɛnɛ ha tɔa na.

³⁴Nɛ ka wɛnɛ boka ha wolamɔ, kutu hɔa tɛ gok mbwa nɛ simɔa. Nɛ ke baa hio *wan-nɛtom ha ngimɔ ka kutu zilo nɛ mbwa tɛ bo ha zanga.

³⁵Nɛ ma gɛl gboa ha zang kutu nɛ tɔa: «Wi kɛ nê Bewei pɔm ka mi weka. Ɛnɛ ze nu wa!»

³⁶Hapata gɛl ɛngi, ɛ zɔka kanɛ Jésus sɔna. Hio wan-nɛtom ndɔng tar gdɔka nu mbwa. Ha ngimɔ ɛngi, mbwa tɛ tɔ kasi mɔ ka mbwa zɔka ha ma wi ndang na.

³⁷Ha yala pata, Jésus nɛ *wan-nɛtom ndɔng tar zilo ngari. Nɛ gasa zugili kpa may hinɛ mbwa.

³⁸Ma wi ndang ha soko zugiliwi gdɔra nɛ ngagɛl: «Wan-osimɔ, mi lokitɛ ha mɛ, zɔk ndanga bem pɔm nɛ bewei!

³⁹Gdanga sɔtɛ ha baa wɛnɛ, ha dea nde wɛnɛ agdɔri, ha fesa wɛnɛ nɛngaya, nɛ puru ha gboa ha nu wa. Yo lak wɛnɛ gde sɔna ha ngimɔ, ka tɛ wa mɔka vulɛ-vulɛ.

⁴⁰Mi lokatɛ ha hio *wan-yambimɔ pɛ mɛ nde, mbwa ayin gdanga sɔtɛ ɛngɛ, ma, mbwa lɛm de yo na.»

⁴¹Jésus kiforo zɔk mbwa nɛ wɛnɛ tɔa: «Ɛnɛ, hio gdanga wan-sikafɛ nɛ Sɔ! Mi beba sila mi mɛ dung hinɛ ɛnɛ kanɛ nge ngimɔ ge? Mɛ ku bewei pɛ mɛ tɛnɛ.»

⁴²Ka bem kɛ ha tɛa, gdanga sɔtɛ ngbaa wɛnɛ ha nu nɛ yo fesa wɛnɛ nɛngaya. Ma, Jésus sɛna wen nɛngaya ha gdanga sɔtɛ. A kpasasa bem ɛngɛ nɛ a haa wɛnɛ ha bafa wa.

⁴³Nɛ wi fɛt yaksa hazu gasa ngatɛ pɛ Sɔ. Ha ngimɔ ka wi fɛt boka ha yaksa hazu mɔ ka Jésus dea, a tɔa ha hio *wan-yambimɔ pɛa:

⁴⁴«Ɛ begde mi, *Bewei pɛ Wi, ha kɔ hio wi. Ɛnɛ ze yo nɛdedea!»

⁴⁵Ma, mbwa tɛ ing gotowen ɛngɛ na. Sɔ wuso yo tuka nde, ka mbwa aing gotoa na. Nɛ mbwa dungɔ nɛ ke mɛ ani Jésus.

⁴⁶Hio *wan-yambimɔ angara zangawen hazu ing wi ka dung nɛ gasaa ha soko mbwa.

⁴⁷Jésus ingɔ takaramɔ ka dung ha sila mbwa, nɛ wɛnɛ kuo ma bhobem ndang, tɛ gde hapɛtɛ wa.

⁴⁸Nɛ a tɔa ha mbwa: «Wi ka baa bem ɛngɛ nɛ dede kɔ hazu ling mi, wia baa mi. Nɛ wi ka baa mi, baa wi ka tomsa mi. Hazu wi ka dung nɛ bebea ha soko ɛnɛ fɛt, yo nê wɛnɛ ka dung nɛ gasaa.»

⁴⁹Jean tɔa ha Jésus: «Wan-osimɔ, ɔ zɔka ma wi ha yinɔ gdanga sɔtɛ nɛ ling mɛ. Nɛ ɔ ngoya dola wɛnɛ, hazu a bo ha ndara mɛ hinɛ ɔ na.»

⁵⁰Ma, Jésus kiforo wen ha wɛnɛ: «Ka ɛnɛ adol wɛnɛ na. Hazu wi ka sungiri ɛnɛ na, wɛnɛ nê pɛ ɛnɛ.»

⁵¹Ka ngimɔ tɛ bo sanga nde, Sɔ agu Jésus ha ngɔn, Jésus baa sila wa nɛ kɔ mɛ nɛ ha Jérusalem.

⁵²A tomsa hio wan-nɛkasara pɛa pen sɔngsi. Nɛ mbwa lea ma le mɔ kand ɔnu Samari, hazu bhɔngiri bhandi ɔnu ha Jésus.

⁵³Ma, hio wi mɔ le ɛngi tɛ ngoy baa wɛnɛ na, hazu wɛnɛ ha nɛa mɛ pen ha Jérusalem.

⁵⁴Ka hio *wan-yambimɔ Jacques nɛ Jean zɔka mɛgi, mbwa tɔa ha Jésus: «*Kongawan, mɛ ngoya nde, ɔ aha nu ha we ngɔn mɛ zil tɛ bhondisi mbwa nde?»

⁵⁵A kiforo tɛ zɔk Jacques nɛ Jean, nɛ wɛnɛ sɛna wen ha mbwa.

⁵⁶Nɛ mbwa pena nɛ ha ma mbing le.

⁵⁷Ka mbwa boka ha wal, ma wi tɔa ha Jésus: «Mi bendari mɛ ha bhandi fɛt ka mɛ benɛ ang.»

⁵⁸Jésus kiforo wen ha wɛnɛ: «Hio ngbanza nɛ ngu pɛ mbwa, nɛ hio nɔy nɛ twa pɛ mbwa. Ma, mi, *Bewei pɛ Wi, bo nɛ bhandi ɔmtɛ na.»

⁵⁹Nɛ Jésus tɔa ha ma mbingwi: «Mɛ ndari mi.» Wi kɛ kiforo wen ha wɛnɛ: «*Kongawan, mɛ gde mi anɛ, nɛ gun bafa mi sɔngsi ing.»

⁶⁰Ma, Jésus tɔa ha wɛnɛ: «Mɛ gde hio fiowi agun hio fiowi pɛ mbwa. Nɛ pɛ mɛ, mɛ nɛ nɛ bul wen *Kongakandɔ pɛ Sɔ.»

⁶¹Nɛ ma mbinga tɔa fin ha Jésus: «Kongawan, mi nɛ wɔ mɛ ndari mɛ. Ma, mɛ gde mi anɛ nɛ kɛ tɛ nɛ hio nam pɔm sɔngsi ing.»

⁶²Jésus kiforo wen ha wɛnɛ: «Wi ka gɔm fɔ, nɛ ka zifili li zɔk mɔ ha gdong, a lɛm tɛ wi mɔ Kongakandɔ pɛ Sɔ na.»