Read south west gbaya Jean 11 Bible Online

Jean 11 - south west gbaya bible

Jean 11

¹Ha le Betani ma wi nɛ zɛlɛ, ling wa nde Lazare. Yo nê le ka Marie hinɛ ya wa Marthe de le ang.

²Marie nê bhoko ɛngɛ ka bahɔng se nanga Jésus nɛ dede pɛl kulo liama, nɛ ka baku bumɔzu wa limbi nɛ yo. Nɛ Lazare, ka dung nɛ zɛlɛ, nê ya wa.

³Hazu ɛngi, hio ya mɔ bhoko bwa pio kasara ha Jésus mɛgɛ: «*Kongawan, dan mɛ ka mɛ ngoya pentɛ, wɛnɛ nɛ zɛlɛ.»

⁴Ka Jésus zea wena, a tɔa: «Zɛlɛ pɛ Lazare bo nê zɛlɛ fio na. Ma, yo baa wɛnɛ tuka nde, Sɔ agbasi *lɛkɛ-lɛkɛmɔ pɛa, nɛ nde, ɛ azɔk fin lɛkɛ-lɛkɛmɔ pɔm, *Bewei pɛ Sɔ.»

⁵Jésus ngoya Marthe, ya wa Marie, nɛ Lazare pentɛ.

⁶Ma, ngase ka Jésus zea nde, Lazare nɛ zɛlɛ, a bhɔna ha bhandi ka wɛnɛ dung ang lɛm yala bwa ing.

⁷Hapata, a tɔa ha hio *wan-yambimɔ pɛa: «Ɔ kifiri nɛ ha kandɔnu Judée.»

⁸Nɛ hio wan-yambimɔ tɔa ha wɛnɛ: «Wan-osimɔ, hio wi dungɔ ha kio wal nde, mbwa alo mɛ nɛ ta gbɛ pata tɛ yɛ ka na. Ma, mɛ ngoy mɛ kifiri fin si haki nde?»

⁹Jésus kiforo wen ha mbwa: «Bo nê swe ndang nɛ ngonga bhukɔ gbala bwa na nde? Ka ma wi yal nɛ swe, a lɛm kɔ nanga na, hazu wɛnɛ ha zɔka saamɔ ka ba ha nzan.

¹⁰Ma, ka wi yal nɛ zɛ, a bekɔ nanga hazu saamɔ bo hapɛtɛ wa na.»

¹¹Hapata wen ndɔng, Jésus tɔa ha hio wan-yambimɔ: «Dan ɔ, Lazare ha ɔala. Ma, mi benɛ nɛ tunsi wɛnɛ.»

¹²Mbwa tɔa ha wɛnɛ: «Kongawan, ka wɛnɛ ɔ nɛ la, zɛlɛ pɛa bekari.»

¹³Jésus ngoy tɔ nde, Lazare fea fe. Ma, hio wan-yambimɔ takara pɛ mbwa takiri nde, a tɔ nɛ tɛ wen ɔala.

¹⁴Mɛgi a tɔa ha mbwa long: «Lazare fea fe.

¹⁵Mi nɛ totɛ hazu mi bo ang hinɛ wɛnɛ na. Sɔ dea mɛgi tuka nde, ɛnɛ amɛkiri mi. Ma, ɔ nɛ ha pɛa.»

¹⁶Thomas ka ɛ sa fin nde bedan, tɔa ha hio olo wan-yambimɔ fɛt: «Ɔ fɛt, ɔ nɛ hinɛ Jésus nde, ɔ afe hinɛ wɛnɛ.»

¹⁷Ka Jésus hɔa ha Betani, a kpaa nde, ɛ gunɔ Lazare tɛ bo nê zenar yala.

¹⁸Soko Betani hinɛ Jérusalem lɛma nɛ kilomɛtɛrɛ tar sɔna.

¹⁹Mɛgi, hio *zuife nɛdɔka dungɔ ha tɛa ha pɛ Marthe hinɛ Marie, hazu yɔkili mbwa hapata fio pɛ ya mbwa bewei.

²⁰Ka Marthe zea nde, Jésus hɔa, a nɛa nɛ we si wa. Marie bhɔna pɛa ha dungɔnu ha zang twa.

²¹Marthe tɔa ha Jésus: «*Kongawan, abo se nde mɛ badung hakɛ, ki ya mi tɛ fe na.

²²Ma, mi ingɔ nde, ngase ɛngi, Sɔ beha mɛ mɔ fɛt ka mɛ beani ha kɔ wa.»

²³Nɛ Jésus tɔa ha wɛnɛ: «Ya mɛ betun.»

²⁴Marthe tɔa ha wɛnɛ: «Mi ingɔ nde, a betun ha kpogio ngimɔ, ka hio fiowi fɛt betun.»

²⁵Jésus kiforo wen ha wɛnɛ: «Mi nê wan-tunsi hio fiowi, nɛ mi nê wan-ha tunɔ ha hio wi. Wi ka mɛkiri mi, wɛnɛ bedung nɛ zutunɔ ngase ka wɛnɛ fea.

²⁶Nɛ wi ndang ndang fɛt ka dung nɛ zutunɔ nɛ ka mɛkiri mi, mbwa lɛm fe ndang na. Pɛ mɛ, mɛ mɛkara wen ɛngɛ nde?»

²⁷Marthe kiforo wen ha wɛnɛ: «Ey, Kongawan, mi mɛkara nde, mɛ nê *Mesi, *Bewei pɛ Sɔ, ka ɛ batɔ nde, wɛnɛ betɛ ha nzan.»

²⁸Ka Marthe wolamɔ hinɛ Jésus kari, a pena nɛ, nɛ sa ya wa, Marie. A tɔa ha wɛnɛ nɛ wuso: «Wan-osimɔ hɔa, nɛ wɛnɛ saa mɛ.»

²⁹Ka Marie zea mɛgi, a guotɛ sɔwi nɛ ha pɛ Jésus.

³⁰Ha ngimɔ ɛngi, Jésus tɛ le ka zang le na. A bhɔna ka ha ndangtɛ bhandi ka Marthe kpaa wɛnɛ ang.

³¹Hio wi dungɔ ha zang twa hinɛ Marie hazu yɔkili wɛnɛ. Ka mbwa zɔka wɛnɛ ha gboa nɛhasa, mbwa ndara wɛnɛ. Hazu mbwa takara pɛ mbwa nde, a nɛ ha hea kwa ha zupisi.

³²Marie hɔa ha bhandi ka Jésus dung ang. Nɛ ka wɛnɛ zɔka Jésus, a teka ha si nanga wa nɛ a tɔa: «*Kongawan, abo se nde mɛ badung hakɛ, ki ya mi tɛ fe na.»

³³Jésus zɔka Marie ha hea kwa. Nɛ wi ndɔng fɛt ka ndara wɛnɛ hea fin kwa. Mɛgi Jésus dea ngɔtɛ pentɛ nɛ sila wa doya nɛ kobhe.

³⁴A ana mbwa: «Ɛnɛ gunɔ wɛnɛ ha ndo?» Mbwa kiforo wen ha wɛnɛ: «Kongawan, mɛ tɛ tɛ zɔk bhandia.»

³⁵Nɛ Jésus angara hea kwa.

³⁶Mɛgi hio wi tɔa: «Ɛnɛ zɔk, a ngoya wɛnɛ pentɛ.»

³⁷Ma, hio ma wi ha soko mbwa tɔa: «Wɛnɛ ka bagbosisi li wan-gdɔka li, a lɛma gdɔki wal ha fio mɛ gbɛ Lazare, na nde?»

³⁸Sila Jésus dona nɛ kobhe fin nɛ mbinga, nɛ wɛnɛ nɛa ha zupisi. Yo dungɔ nɛ ngu ka ɛ gdɔka nua nɛ ma viɛ-viɛ gasa ta.

³⁹Nɛ Jésus tɔa: «Ɛnɛ kinsi ta kɛ yunɛ!» Nɛ Marthe ya mɛ fio tɔa ha wɛnɛ: «*Kongawan, ki pɛl tɛ wa begbɛ ɔ, hazu a dea nɛ yala nar ha kɔfio mɛsɛ.»

⁴⁰Nɛ Jésus kiforo wen ha wɛnɛ: «Bo nɛ mi tɔa nde, ka mɛ mɛkiri mi, mɛ bezɔk *lɛkɛ-lɛkɛmɔ pɛ Sɔ, na nde?»

⁴¹Ɛ kinso ta yunɛ. Jésus guo li ha ngɔn nɛ wɛnɛ tɔa: «Bafa mi, mi lukisi mɛ hazu mɛ ha zea gɔamɔ pɔm.

⁴²Mi ingɔ nde, mɛ ha zea mi kpoo. Ma, mi tɔ yo hazu giliwi ndɔng ka zikiri mi hakɛ, ka mbwa aing nde, yo nê mɛ ka tomsa mi tɛnɛ hakɛ.»

⁴³Hapata wen ki, Jésus saa Lazare nɛ ngagɛl: «Lazare, mɛ gbo!»

⁴⁴Lazare gboa nɛ olo la ndɔng ka ɛ gunɔ nɛ wɛnɛ. Hio kɔ wa nɛ nanga wa fɛt dungɔ nɛ libhokoa nɛ pɛl la. Nɛ li wa dungɔ nɛ hɛla nɛ ma nu la fin. Jésus tɔa ha mbwa: «Ɛnɛ bul la ha tɛ wa, nɛ ɛnɛ gde wɛnɛ asi ha twa.»

⁴⁵Giliwi ndɔng ka tɛa ha dungɔa hinɛ Marie zɔka mɔ ka Jésus dea. Mɛgi dɔka wi ha soko mbwa mɛkara wɛnɛ.

⁴⁶Ma, hio ma ha soko mbwa pena nɛ kpa hio *Farizien. Nɛ mbwa tɔa ha mbwa kasi mɔ ka Jésus dea.

⁴⁷Mɛgi, hio gasa wan-hasadaka nɛ hio Farizien wesara hio *wan-kpo zuwen nɛ mbwa tɔa: «Woo! Ɔ bede mɛng? Wei kɛ ha dea hio gasa *mɔweka nɛnɛ!

⁴⁸Ka ɔ gde nde, wɛnɛ ade ka mɛgi nɛnɛ, ki hio wi fɛt bemɛkiri wɛnɛ. Ki hio wan-bi bulo mɔ Rome betɛ tɛ yangili *gasa twa Sɔ pɛ ɔ, nɛ kandɔ pɛ ɔ fɛt.»

⁴⁹Ma wi dungɔ ha soko mbwa, ling wa nde Kaife. A dungɔ nê *wan-zu hio wan-hasadaka ha bɛlɛ ɛngi. A tɔa ha mbwa: «Ɛnɛ ing mɔ ndang na!

⁵⁰Yo nɛ dedea hazu ɛnɛ nde, ma wi ndang afe ha bhandi kandɔ fɛt, tuka nde kandɔ abhondi na. Ɛnɛ ing goto wen ka mi tɔa, na nde?»

⁵¹Kaife tɛ tɔ wen ki nɛ zu wa nɛ pɛa tɛ na. Ma, tuka wɛnɛ nê wan-zu hio wan-hasadaka ha bɛlɛ ɛngi, wɛnɛ tɔa nɛ kuliwen nde, Jésus befe gɔn nɛ zu wi mɔ kandɔ *zuife fɛt.

⁵²Nɛ yo bo nê hazu kandɔ zuife sɔna na. Ma, hazu wesiri hio bem pɛ Sɔ, ka de le ha nzan fɛt.

⁵³Yo nê ha ndangtɛ swe ɛngi, ka hio wan-le zuife kpoa nɛ zuwen mɛ gbɛ Jésus.

⁵⁴Hazu ɛngi, Jésus tɛ ngoy fin gbasa tɛ wa ha li hio wi na. Mɛgi, a pena ha ma bhandi mɔ pɛtɛ kpɛnu, ha le Efraim. Wɛnɛ hinɛ hio *wan-yambimɔ pɛa dungɔ haki.

⁵⁵Ha ngimɔ ɛngi, yenga *Pake pɛ hio zuife hɛra kari. Mɛgi, hio dɔka wi mɔ kandɔnua dungɔ ha danga nɛ ha Jérusalem nde, mbwa asasisi tɛ ha li Sɔ haki sɔngsi yala yenga.

⁵⁶Mbwa dungɔ ha kio Jésus, nɛ mbwa ana may ha zang gasa twa Sɔ: «Jésus betɛ ha yenga nde? Ɛnɛ takiri pɛ ɛnɛ mɛng?»

⁵⁷Mɛgi, hio gasa wan-hasadaka nɛ hio Farizien haa nu nde, ka ma wi ingɔ bhandi ka Jésus dung ang, lɛma nde, wia aosi yo, ka mbwa anɛ nɛ ba wɛnɛ.