Read south west gbaya Jean 13 Bible Online

Jean 13 - south west gbaya bible

Jean 13

¹Ha gangli yenga *Pake, Jésus ingɔ nde, a tɛ bo sanga-sanga mɛ lak nu ɛngɛ gde, hazu kifiri si ha pɛ Bafa wa. Swe fɛt wɛnɛ ngoya hio wi pɛa ha nzan, nɛ sising a gbasi nde, a ngoya mbwa wɛ ɛ.

²Nɛ mbolo, Jésus dungɔ ha yɔngamɔ hinɛ hio wan-yambimɔ pɛa. *Satan bagde se takaramɔ ha sila Judas bem pɛ Simon Iskariote nde, ka wɛnɛ agdongi Jésus ha hio ngana pɛa.

³Jésus ingɔ nde, Sɔ gdea mɔ fɛt ha kɔ wa. A ingɔ fin nde, a bagutɛ ha pɛ Sɔ tɛnɛ, nɛ nde, a bekifiri si ha pɛ Sɔ.

⁴Ha ngimɔ yɔngamɔ Jésus guotɛ, a kpɔsa gasa la pɛa gde ha nu. A baa ma la limbitɛ libhiki ha guntini wa.

⁵Hapata, a aa li ha ma toy. A angara fala nanga hio wan-yambimɔ pɛa, nɛ wɛnɛ dio yo nɛ la limbitɛ ɛngɛ, ka wɛnɛ libhoko ha guntini wa.

⁶Nɛ ka Jésus hɔa ha tɛ Simon Pierre, a ana Jésus: «*Kongawan, yo nê mɛ ka befal nanga mi kpasawen nde?»

⁷Jésus kiforo wen ha wɛnɛ: «Mɔ ka mi ha dea, mɛ lɛm ing gotoa sising na. Ma, mɛ being bin yo hapata.»

⁸Pierre kiforo wen ha wɛnɛ: «Way! Mɛ lɛm fal nanga mi ndang nɛ ndang na.» Mɛgi, Jésus tɔa ha wɛnɛ: «Ka mi fal nanga mɛ na, ki mɛ lɛm dung wi pɔm fin na.»

⁹Nɛ Simon Pierre tɔa ha wɛnɛ: «Kongawan, ka bo mɛgi, ka mɛ afal sɔna nɛ nanga mi na. Ma, mɛ fal fin hio kɔ mi nɛ zu mi fɛt.»

¹⁰Jésus kiforo wen ha wɛnɛ: «Wi ka zoya li kari, lɛma fal sɔna nɛ nanga wa hazu olo tɛ wa nɛ saa kari. Nɛ ɛnɛ dung nɛ saa, ma, yo bo nê ɛnɛ fɛt mburr na.»

¹¹Jésus tɔa mɛgi, hazu a ingɔ wi kɛ ka begdongi wɛnɛ ha hio ngana pɛa. Yo nê ɛngi ka wɛnɛ tɔa nde, yo bo nê mbwa fɛt mburr ka dung nɛ saa na.

¹²Ka Jésus fala nanga hio wan-yambimɔ fɛt kari, a kuo gasa la pɛa yol, nɛ wɛnɛ dungɔnu hapɛtɛ yɔngamɔ nɛ mbinga. Mɛgi, a ana mbwa: «Ɛnɛ ingɔ goto mɔ ka mi ha dea ha tɛ ɛnɛ nde?

¹³Ɛnɛ ha saa mi nde, Wan-osimɔ, nɛ nde, Kongawan. Ɛnɛ sa yo nɛdedea, hazu mi dung mɛgi tɛwen.

¹⁴Mɛgi, ka mi, Kongawan pɛ ɛnɛ nɛ Wan-osimɔ pɛ ɛnɛ fal nanga ɛnɛ, lɛma nde, ɛnɛ fin afal nanga may.

¹⁵Mi dea ɛngɛ ha li ɛnɛ tuka wekamɔ nde, ɛnɛ ade fin gbesi tuka mi dea.

¹⁶Kpasawen mi tɔ ha ɛnɛ nde, wan-tom bo nɛ zioa pen wan pɛa na. Nɛ wan-nɛkasara bo nɛ zioa pen wan-tomsi wɛnɛ na.

¹⁷Sising ɛnɛ ingɔ mɔ ndɔng kari. Ka ɛnɛ de mɛgi, ki ɛnɛ bedung nɛ totɛ.

¹⁸«Mi tɔ wen ɛngɛ bo hazu ɛnɛ fɛt na. Mi ingɔ wi ndɔng ka mi weka. Ma, lɛma nde, wen ɛngɛ ha zang takarata pɛ Sɔ alɛmsiri tɛ: ‹Wi kɛ ka mi yɔngamɔ hinɛ may, tɛ bo nê kɔmbɛ pɔm.›

¹⁹Mi tɔ wen ndɔng ha ɛnɛ bingiri tuka nde, ka mɔa behɔ, ɛnɛ amɛkiri nde, mi nê *Mesi.

²⁰Kpasawen mi tɔ ha ɛnɛ nde, wi ka ba wi ka mi tomsi nɛ dede kɔ, a baa mi kari. Nɛ wi ka ba mi nɛ dede kɔ, a baa wan-tomsi mi kari.»

²¹Ka Jésus tɔa wen ndɔng fɛt kari, sila wa dona nɛ ngɔtɛ nɛ wɛnɛ tɔa: «Kpasawen, mi tɔ ha ɛnɛ nde, ma wi ndang ha soko ɛnɛ beha kasatɛ mi.»

²²Hio *wan-yambimɔ zɔka li may hɛrr, hazu mbwa ing wi kɛ ka Jésus tɔa nɛ mɔ na.

²³Wan-yambimɔ ɛngɛ ka wɛnɛ ngoya pentɛ dungɔ hapɛtɛ wa.

²⁴Simon-Pierre yɔnga li ha wan-yambimɔ ɛngɛ mɛ ani Jésus nde, yo nê nge wi ka wɛnɛ tɔ wen pɛa, o nde?

²⁵Mɛgi, wan-yambimɔ ɛngɛ gɛngala tɛ ha li sila Jésus, nɛ a ana mɔ: «*Kongawan, wia nê o?»

²⁶Nɛ Jésus tɔa ha wɛnɛ: «Wia nê wi kɛ ka mi beku mampa dubhi nɛ likpo ha wɛnɛ.» Hapata, Jésus kuo mampa dubhi ha likpo ha Judas bewei pɛ Simon Iskariote.

²⁷Ha ngimɔ ka Judas kuo nɛ mampa ɛngɛ, *Satan lea sila wa. Jésus tɔa ha wɛnɛ: «Mɔ ka mɛ bheka mɛ de, mɛ de yo nɛhasa.»

²⁸Ma, hio olo wan-yambimɔ ka dungɔ ha yɔngamɔ hinɛ Jésus, ing goto wen ka Jésus tɔa ha wɛnɛ na.

²⁹Tuka Judas nê wan-pam mbɔli pɛ mbwa, hio ma takara pɛ mbwa nde, Jésus tɔa ha wɛnɛ mɛ hɛ ma mɔ, ka kɔpa mbwa hazu yenga, mana mɛ ha ma mbɔli ha hio fabha wi.

³⁰Ka Judas yɔnga mampa ki kari, a gboa nɛ ha dɛl nɛhasa. Ha ngimɔ ɛngi, tutum baa nu kari.

³¹Ka Judas gboa kari, Jésus tɔa: «Sising, ngimɔ lɛma kari, ka hio wi bezɔk mi, *Bewei pɛ Wi, ha zang *lɛkɛ-lɛkɛmɔ. Nɛ mbwa bezɔk lɛkɛ-lɛkɛmɔ pɛ Sɔ nɛ wal deamɔ pɔm.

³²Hazu hio wi bezɔk lɛkɛ-lɛkɛmɔ pɛ Sɔ nɛ wal deamɔ pɔm, Sɔ beosi lɛkɛ-lɛkɛmɔ pɔm ha mbwa fin. Nɛ a bede yo nɛhasa.

³³Hio dan mi, mi lɛm dung hinɛ ɛnɛ pata yɛ fin na. Ɛnɛ beki mi. Ma, mi tɔ ha ɛnɛ ndangtɛ mɔ ka mi tɔa ha hio wan-le *zuife nde, ɛnɛ lɛm nɛ ha bhandi ka mi nɛ ang na.

³⁴Mi ha mbombe mbonga ha ɛnɛ nde, ɛnɛ ngoy may gbesi tuka mi ngoya ɛnɛ, nɛ ɛnɛ ngoy may ha soko may.

³⁵Ka ɛnɛ ngoy may ha soko ɛnɛ, ki hio wi being nde, ɛnɛ nê hio *wan-yambimɔ pɔm.»

³⁶Simon Pierre ana Jésus: «*Kongawan, mɛ nɛ ha ndo?» Jésus kiforo wen ha wɛnɛ: «Sising, mɛ lɛm mɛ ndari mi nɛnɛ ha bhandi ka mi nɛ ang na. Ma, mɛ bendari mi bin hapata.»

³⁷Pierre tɔa ha wɛnɛ: «Kongawan, hazu ge mi lɛm ndari mɛ sising na, ge nde? Mi nê gdungɛ-gdungɛ mɛ fe ha wen zu mɛ.»

³⁸Jésus kiforo wen ha wɛnɛ: «Mɛ nê gdungɛ-gdungɛ mɛ fe ha wen zu mi nde? Kpasawen, mi tɔ ha mɛ nde, mɛsɛ, sɔngsi ka gɔlɛ tɛ dɔm ka na, mɛ bekafi mi zetar nde, mɛ ing mi na.»