Read south west gbaya Jean 2 Bible Online

Jean 2 - south west gbaya bible

Jean 2

¹Hapata yala bwa, ɛ dea ma yenga sibhoko ha le Kana, ha kandɔnu Galile. Nana mɛ Jésus dungɔ ang.

²Nɛ ɛ saa Jésus hinɛ hio *wan-yambimɔ pɛa fin nde, mbwa anɛ ha yenga.

³Nɛ ka hio wi nɔa li vigne tee karsi, nana mɛ Jésus tɔa ha wɛnɛ: «Mbwa bo fin nɛ li vigne na.»

⁴Ma, Jésus kiforo wen ha wɛnɛ: «Nana mi, mɛ takiri pɛ mɛ nde, wen ɛngɛ zɔk nɛ mi nde? Ngimɔ pɔm tɛ lɛm ka na.»

⁵Nɛ nana wa tɔa ha hio wan-tom: «Ɛnɛ de mɔ fɛt ka wɛnɛ betɔ ha ɛnɛ mɛ de!»

⁶Hio gasa kpana ka ɛ sɛka nɛ ta, dungɔ haki mɔrkɔ zanga ndang. Kpana ndang ba nɛ li hapɛtɛ litɛrɛ gɔmmay ndang. Ɛ ha kuo li ha zanga sasisi nɛ tɛ lɛm nɛ ndɔki deamɔ pɛ hio *zuife.

⁷Jésus haa nu ha hio wan-tom: «Ɛnɛ a li ha zang hio kpana ndɔng!» Nɛ mbwa donsa hio yo lɛtɛtɛ.

⁸Nɛ Jésus tɔa ha mbwa: «Ɛnɛ gdu ma nua nɛnɛ ha wan-bhɔngiri mɔ yenga.» Nɛ mbwa kuo yo nɛnɛ.

⁹Wan-bhɔngiri mɔ yenga tota li, ka kifo li vigne. Ma, a ing bhandi ka ɛ kuo yo ang tɛnɛ na. Sɔna nê hio wan-tom ka gduo lia ingɔ gotoa. Mɛgi a saa wan-sibhoko,

¹⁰nɛ a tɔa ha wɛnɛ: «Hio wi fɛt ha kapana dede li vigne sɔngsi. Nɛ ka yo baa li wan-gal yenga kari, ki ɛ tɛ kapini dɔkɔ ka bo nɛ dedea na. Ma, pɛ mɛ, mɛ pama dede li vigne gbo sising.»

¹¹Ɛngɛ nê bosi *mɔweka pɛ Jésus. A dea yo ha Kana, ha kandɔnu Galile. Yo gbasa ziomɔ pɛa ha li hio wi, nɛ hio wan-yambimɔ pɛa mɛkara wɛnɛ.

¹²Hapata ɛngi, Jésus nɛa ha le Kapernaum, wɛnɛ hinɛ nana wa, hio ya wa, nɛ hio wan-yambimɔ pɛa. Ma, mbwa tɛ bhɔn haki yala nɛdɔka na.

¹³Yala yenga *Pake hɛra kari, nɛ Jésus nɛa ha Jérusalem.

¹⁴Ha zang gasa twa Sɔ wɛnɛ kpaa hio wi ha gdonga hio nday, hio sami, hio gbakuli. Nɛ wɛnɛ kpaa fin hio wan-kpali mbɔli ha dungɔnu.

¹⁵Mɛgi a kuo hio ma pɛl de nɛ zambala, nɛ wɛnɛ yinɔ mbwa hinɛ hio nday nɛ sami pɛ mbwa gbosisi ha dɛl. A gɔsa mbɔli pɛ hio wan-kpali mbɔli ha nu, nɛ a kinso tabolo pɛ mbwa.

¹⁶A tɔa ha hio wan-gdongi gbakuli: «Ɛnɛ kay mɔ ndɔng fɛt yunɛ hakɛ. Ka ɛnɛ akpali twa pɛ Bafa mi nɛ twa de zando na!»

¹⁷Tazu hio *wan-yambimɔ gbaa nɛ wen ha zang takarata pɛ Sɔ nde: Dea gula twa pɛ mɛ begbɛ mi bin.

¹⁸Hio wan-le *zuife tɔa ha wɛnɛ: «Mɛ de ma *mɔweka ka ɔ azɔk nde, mɛ dung nɛ ziomɔ mɛ de nɛ mɔ ndɔng!»

¹⁹Jésus kiforo wen ha mbwa: «Ɛnɛ gbin gasa twa Sɔ ɛngɛ fɛt yunɛ, nɛ mi bebɛ yo fin nɛ mbinga ha zang yala tar.»

²⁰Mbwa tɔa ha wɛnɛ: «Ɛ bɛa twa ɛngɛ ha zang kili bɛlɛ bhukɔa nar zanga mɔrkɔ gbala ndang, nɛ mɛ bebɛ yo fin nɛ mbinga ha zang yala tar karsi nde?»

²¹Ma, gasa twa Sɔ ka Jésus tɔa wena, dungɔ nê tɛ wa.

²²Tazu hio wan-yambimɔ pɛa gbaa nɛ wen ɛngi sɔna ha ngimɔ ka Jésus guotɛ ha soko hio fiowi. Mɛgi, mbwa mɛkara hio wen pɛ takarata pɛ Sɔ fɛt, nɛ hio wen ka Jésus batɔ se.

²³Ha ngimɔ ka Jésus dungɔ ha gala yenga *Pake ha Jérusalem, hio wi nɛdɔka mɛkara wɛnɛ hazu mbwa zɔka hio *mɔweka ka wɛnɛ dungɔ ha dea.

²⁴Ma, Jésus tɛ gde tazu ha tɛ mbwa na, hazu a ingɔ mbwa fɛt nɛdedea.

²⁵Ma wi ndang lɛm tɔ goto deamɔ pɛ wi ha Jésus na, hazu wɛnɛ nɛ tɛ wa ingɔ mɔ ka dung ha zang sila wi fɛt.