Read south west gbaya Jean 4 Bible Online

Jean 4 - south west gbaya bible

Jean 4

¹Jésus kpaa hio *wan-yambimɔ nɛdɔka pen Jean, nɛ a gdumso fin hio dɔka wi ha li pen wɛnɛ. Hio *Farizien zea wen mɛgi, nɛ Jésus ingɔ yo.

²(Yo bo nê Jésus nɛ tɛ wa ka gdumso wi na, ma, yo nê hio wan-yambimɔ pɛa.)

³Hazu wen ɛngɛ, a guotɛ ha kandɔnu Judée pen si ha kandɔnu Galile.

⁴Hazu nɛ haki, lɛma nde, wɛnɛ agɔn nɛ zang kandɔnu *Samari.

⁵Jésus hɔa ha ma le mɔ kandɔnu Samari ka ɛ sa nde, Sikar. Yo sanga-sanga nɛ fɔ ka Jacob baha ha bewei pɛa, Joseph.

⁶Kɔ li ka Jacob baza sɔngsi bhee dung haki. Jésus dungɔnu ha pɛtɛa, hazu tɛ wa kata ha yali. Nɛ swe tɛ bo sanga nɛ sila zu.

⁷Ma bhoko mɔ kandɔnu Samari tɛa ha gduo li. Jésus tɔa ha wɛnɛ: «Mɛ ha li ha mi anɔ!»

⁸Wɛnɛ dungɔ gbatɛ hazu hio wan-yambimɔ pɛa nɛa ha le mɛ hɛ yɔngamɔ.

⁹Bhoko Samari ɛngɛ tɔa ha Jésus: «Mɛ nê zuife, nɛ mi nê wi mɔ Samari. Mɛgi, mɛ dea mɛng mɛ gɔ nɛ li ha kɔ mi ge nde?» Hazu hio zuife de sɔy hinɛ hio wi mɔ Samari na.

¹⁰Jésus kiforo wen ha wɛnɛ: «Mɛ aing se mɔ ka Sɔ ngoy mɛ ha ha hio wi, nɛ mɛ aing se mi ka gɔ li ha kɔ mɛ, ki yo nê mɛ ka begɔ li ha kɔ mi, nɛ mi betɛ ha mɛ li ka ha tunɔ.»

¹¹Bhoko ɛngɛ tɔa ha wɛnɛ: «*Kongawan, kɔ li kɛ nɛ gdukoa, nɛ mɔ mɛ gdu nɛ li bo ha kɔ mɛ na. Mɛgi mɛ bekpa li ka ha tunɔ ha ndo?

¹²Ngbabafa ɔ, Jacob, baha kɔ li ɛngɛ ha ɔ. Wɛnɛ nɔa lia, hinɛ hio bem nɛ hio namdalɛ pɛa fɛt. Mɛ takiri pɛ mɛ nde, mɛ pena Jacob nde?»

¹³Jésus kiforo wen ha wɛnɛ: «Wi ka nɔ li ɛngɛ, wɔ li bede wɛnɛ fin nɛ mbinga.

¹⁴Ma, wi ka benɔ li ka mi beha ha wɛnɛ, wɔ li lɛm mɛ de wɛnɛ fin na. Hazu li ka mi beha ha wɛnɛ, yo bekifiri nzɔngɛ nawuya ha sila wa ka ha wɛnɛ *tunɔ kpoo.»

¹⁵Mɛgi bhoko ɛngɛ tɔa ha wɛnɛ: «Kongawan, mɛ ha mi li ɛngɛ nde, wɔ li ade mi fin na, nɛ mi atɛ fin ha gduo li hakɛ na.»

¹⁶Jésus tɔa ha wɛnɛ: «Mɛ nɛ, nɛ sa wei mɛ. Ɛnɛ tɛ hinɛ may fɛt.»

¹⁷Nɛ wɛnɛ kiforo wen: «Mi bo nɛ wei na.» Nɛ Jésus tɔa fin: «Mɛ tɔa kpasawen, ka mɛ tɔa nde, mɛ bo nɛ wei na.

¹⁸Hazu sɔngsi, mɛ sio wei mɔrkɔ hapata may, nɛ wei ka mɛ dung hinɛ wɛnɛ sising, a bo nê wei mɛ na. Mɛ tɔa kpasawen.»

¹⁹Mɛgi, bhoko kɛ tɔa ha wɛnɛ: «Kongawan, mi zɔka nde, mɛ nê *wan-tɔkuliwen pɛ Sɔ.

²⁰Hio ngbabafa ɔ balukisi Sɔ hakɛ ha zu ngari ɛngɛ. Ma, pɛ ɛnɛ hio zuife, ɛnɛ tɔ nde, bhandi lukisi Sɔ, yo ka haki ha Jérusalem.»

²¹Jésus tɔa ha wɛnɛ: «Bhoko, mɛ ze wen pɔm. Ma ngimɔ behɔ ka hio wi lɛm lukisi fin Sɔ ha zu ngari ɛngɛ na, ngase ha Jérusalem na.

²²Ɛnɛ, hio wi mɔ Samari, ɛnɛ ing pɛ ɛnɛ Sɔ ka ɛnɛ lukisi na. Ma, ɔ, hio zuife, ɔ ingɔ Sɔ ka ɔ lukisi. Hazu *wan-kpasisi wi gbo ha soko hio zuife.

²³Ma, ngimɔ ha tɛa, yo hɔa sising, ka hio kpasa wan-lukisi Bafa belukisi wɛnɛ nɛ sila ka dona nɛ *Nzɔy-Sɔtɛ nɛ tɛwen. Hazu Bafa ngoy nɛ wan-lukisi wɛnɛ tuka ɛngi.

²⁴Sɔ nê sɔtɛ, a bo nɛ multɛ na. Mɛgi, lɛma nde, hio wi alukisi wɛnɛ nɛ wal Nzɔy-Sɔtɛ nɛ tɛwen.»

²⁵Nɛ bhoko ɛngɛ tɔa ha wɛnɛ: «Mi ingɔ nde, *Mesi, wan-kpasisi wi, betɛ. Nɛ ka wɛnɛ hɔa, a begbasi mɔ fɛt ha ɔ.»

²⁶Jésus kiforo wen ha wɛnɛ: «Mi nê Mesi, mi ka tɔ wen ha mɛ.»

²⁷Ha ngimɔ ɛngi hio wan-yambimɔ pɛ Jésus pea. Mbwa yaksa hazu wɛnɛ ha wolamɔ hinɛ ma bhoko. Ma, ma ndang ha soko mbwa tɛ ani wɛnɛ nde, mɛ gɔ nɛ nge mɔ ha kɔ wa, mana, mɛ wolmɔ hinɛ wɛnɛ hazu ge, na.

²⁸Mɛgi, bhoko ɛngɛ laka lɔngɔ gdu li pɛa gde. A kiforo ha le nɛ tɔa ha hio wi:

²⁹«Ɛnɛ tɛ, tɛ zɔk ma wi. A tɔa ha mi deamɔ pɔm fɛt. Mana wɛnɛ nê Mesi nde?»

³⁰Mɛgi mbwa guotɛ ha zang le nɛ ha pɛ Jésus.

³¹Ha ngimɔ ka bhoko bhɔna ha zang le, hio wan-yambimɔ lokatɛ ha Jésus: «Wan-osimɔ, mɛ yɔngmɔ wa!»

³²Ma, a tɔa ha mbwa: «Mi nɛ ma yɔngamɔ ang mɛ yɔng ka ɛnɛ ing na.»

³³Hio wan-yambimɔ ana may: «Ma wi kuo nɛ ma yɔngamɔ tɛnɛ ha wɛnɛ nde?»

³⁴Jésus tɔa ha mbwa: «Ka mi de mɔ ka wan-tomsi mi ngoya, nɛ ka mi lɛmsiri tom pɛa, ɛngɛ nê yɔngamɔ pɔm.

³⁵Ɛnɛ dung mɛ tɔ nde, kilize nar ngbɔla ka ngimɔ bhi kpalmɔ alɛm. Ma, mi tɔ ha ɛnɛ nde, ɛnɛ gu li ɛnɛ zɔk fɔ! Kpalmɔ ngaya kari, nɛ ngimɔ bhi tɛ bo sanga-sanga.

³⁶Wan-bhi kpalmɔ kpa kɛamɔ sising, nɛ wɛnɛ ha bhio mɔ hazu tunɔ kpoo. Mɛgi, wan-pɛ kpalmɔ nɛ wan-bhi waya, mbwa bede totɛ gbesi.

³⁷Zɛngwen ɛngɛ nê tɛwen: ‹Wi ndang ha pɛ kpalmɔ, nɛ ma mbinga ha bhi wayaa.›

³⁸Mi tomsa ɛnɛ tuka hio wan-bhi waya ha zang fɔ ka ɛnɛ tɛ de toma na. Yo nê hio mbing wi ka dea toma, nɛ ɛnɛ kpaa nɛ gɔni mɔ ka mɔgbɛng gbaa mbwa ang.»

³⁹Dɔka wi mɛ Samari, ka dung ha le ɛngɛ, mɛkara Jésus hazu bhoko ɛngɛ kɛa wen nde, a tɔa ha mi deamɔ pɔm fɛt.

⁴⁰Mɛgi, ka hio wi mɛ Samari tɛa hapɛtɛ Jésus, mbwa ana wɛnɛ mɛ bhɔn hinɛ mbwa ing. Jésus mɛkara, nɛ wɛnɛ dungɔ hinɛ mbwa yala bwa.

⁴¹Hio dɔka wi pen mɔ sɔngsi mɛkara wɛnɛ, hazu yo nê Jésus nɛ pɛa tɛ ka tɔa wen ha mbwa.

⁴²Nɛ hio wi ndɔng tɔa ha bhoko ɛngɛ: «Sising, ɔ mɛkara wɛnɛ, bo sɔna hazu wen ka mɛ tɔa na, ma, hazu ɔ zea fin wɛnɛ nɛ pɛ ɔ tɛ. Mɛgi, ɔ ingɔ nde, wɛnɛ nê tɛ wan-kpasisi wi mɔ nzan.»

⁴³Hapata yala ndɔng bwa, Jésus guotɛ haki nɛ ha kandɔnu Galile.

⁴⁴Hazu Jésus nɛ pɛa tɛ batɔ nde, hio wi ba *wan-tɔkuliwen nɛ zioa ha le pɛa na.

⁴⁵Ka Jésus hɔa ha Galile, hio wi haki baa wɛnɛ nɛ dede kɔ, hazu mbwa fin banɛ ha Jérusalem ha yenga *Pake, nɛ mbwa bazɔk mɔ fɛt ka Jésus dea ha ngimɔ yenga.

⁴⁶Ha Galile, wɛnɛ hɔa ha Kana, le ka wɛnɛ bakifiri li nɛ li vigne. Ma konga nasara dungɔ haki, nɛ ma bem pɛa mɔ bewei dungɔ nɛ zɛlɛ ha Kapernaum.

⁴⁷Ka wei kɛ zea nde, Jésus guotɛ ha kandɔnu Judée tɛ ha Galile, a nɛa ha pɛ Jésus, nɛ a lokatɛ ha wɛnɛ nde, wɛnɛ anɛ ha Kapernaum nɛ kpasisi bem pɛa, ka tɛ bo sanga-sanga hapɛtɛ fio.

⁴⁸Jésus kiforo wen ha wɛnɛ: «Pɛ ɛnɛ, ɛnɛ mɛkiri mi sɔna, ka ɛnɛ zɔka *mɔweka nɛ *mɔkifi.»

⁴⁹Nasara ɛngɛ kiforo wen ha wɛnɛ: «*Kongawan, ɔ nɛ hinɛ mɛ sɔngsi ka bem pɔm tɛ fe ka na.»

⁵⁰Ma, Jésus tɔa ha wɛnɛ: «Mɛ si! Bem pɛ mɛ kpasa kari.» Wei kɛ mɛkara wen ka Jésus tɔa ha wɛnɛ, nɛ wɛnɛ sio.

⁵¹Ka wɛnɛ boka ha liwal ha sioa, hio wan-tom pɛa wea si wa, nɛ mbwa tɔa ha wɛnɛ: «Bem pɛ mɛ kpasa kari.»

⁵²Nɛ wɛnɛ ana mbwa nɛ ngimɔ ka zɛlɛ ɛngɛ kara nɛ ha tɛ bem pɛa. Nɛ mbwa tɔa ha wɛnɛ: «Yo nê mɛmbalasɔ ha ngonga ndang mɔ wal mbolo, ka zɛlɛ bawetɛ ɛngɛ kara ha tɛ wa.»

⁵³Mɛgi, bafa mɛ bem ɛngɛ ingɔ nde, yo dungɔ ha ndangtɛ ngimɔ ka Jésus wola nɛ mɔ ha wɛnɛ nde, bem pɛ mɛ kpasa kari. Mɛgi, wɛnɛ nɛ hio wi mɛ twa pɛa fɛt mɛkara Jésus.

⁵⁴Ɛngɛ nê zebwa mɔweka ka Jésus dea. A dea yo hapata ka wɛnɛ guotɛ ha Judée si ha Galile.