Read south west gbaya Jean 5 Bible Online

Jean 5 - south west gbaya bible

Jean 5

¹Hapata mɔ ndɔng, ma yenga pɛ hio *zuife dungɔ ha Jérusalem, nɛ Jésus nɛa ha yo.

²Ha gasa ngeng ka zikiri Jérusalem ma nua ang, linga nde, nu ngalɔ sami. Ma bebe tɔ dungɔ haki ka ɛ sa nɛ nu *Hebro nde, Betzata. Hio gala mɔrkɔ dungɔ hapɛtɛa.

³Hio gili wan-zɛlɛ dungɔ ha ɔanu ha si gala ndɔng. Hio ma dungɔ nê wan-gdɔka li, hio ma nê kumɔ wi, nɛ hio ma nê wan-zɛlɛ mɛla. [Mbwa dungɔ ha kera ngimɔ ka *telenge pɛ Sɔ bezil ha ngɔn tɛ tɛ tongbisi li. Bosi wan-zɛlɛ ka bele ha li ka telenge ɛngɛ fesa, zɛlɛ pɛa bekari ngase ka yo badung mɛng.]

⁴

⁵Ma wi ang haki ka dung nɛ zɛlɛ tɛ bo bɛlɛ bhukɔa tar zanga mɔrkɔ gbala tar.

⁶Ka Jésus hɔa haki, a kpaa wei ɛngɛ ha ɔanu. A ingɔ nde, pata zɛlɛ pɛ wi kɛ yɛa. Mɛgi, Jésus ana wɛnɛ: «Mɛ ngoya nde, zɛlɛ pɛ mɛ akari nde?»

⁷Wan-zɛlɛ kiforo wen ha wɛnɛ: «Wan-osimɔ, ha ngimɔ ka telenge ha tongbasa li, mi tɛ kpa ma wi ka beba mi pi ha lia nɛhasa na. Ha ngimɔ ka mi ha kio wal mɛ nɛ, ma wi gɔna li mi nɛ le ha li sɔngsi mi.»

⁸Nɛ Jésus tɔa ha wɛnɛ: «Gutɛ, ba dele pɛ mɛ, mɛ nɛ nɔ!»

⁹Ha ndangtɛ ngimɔ, wei kɛ guotɛ, ba dele pɛa, nɛ a nɛa nɔ. Mɔ ɛngɛ hɔa ha *swe ɔmtɛ.

¹⁰Mɛgi, ka hio zuife zɔka wei kɛ ka zɛlɛ pɛa kara ha nɛa nɔ, mbwa tɔa ha wɛnɛ: «Mɛsɛ nê swe ɔmtɛ. *Mbonga pɛ ɔ tɔ nde, wi atoy dele na.»

¹¹Wei kɛ tɔa ha mbwa: «*Wan-kpasisi mi ha tɔ ha mi nde, mɛ aba dele pɛ mɛ, mɛ nɛ nɔ.»

¹²Mbwa ana wɛnɛ: «O ha tɔ nde, mɛ de mɛgi o?»

¹³Ma, wei kɛ tɛ ing ling wi ka kpasasa wɛnɛ na, hazu Jésus lea nɛhasa ha soko giliwi ka dung haki.

¹⁴Hapata, Jésus kpaa wei kɛ ha zang *gasa twa Sɔ. Nɛ a tɔa ha wɛnɛ: «Mɛ kpasa kari. Ka mɛ ade fin gdangamɔ na, yu nde, ma ngamɔ betɛ kpa mɛ pen mɔ sɔngsi.»

¹⁵Mɛgi, wei kɛ pena nɛ tɔ ha hio wan-le zuife nde, yo nê Jésus ka kpasasa wɛnɛ.

¹⁶Tuka ɛngi, hio zuife angara namala Jésus, hazu a kpasasa wan-zɛlɛ ha swe ɔmtɛ.

¹⁷Ma, Jésus tɔa ha mbwa: «Bafa mi ha dea tom ngimɔ fɛt. Mɛgi, mi fin, mi ha dea tom.»

¹⁸Yo nê ɛngi ka hio zuife kio wal mɛ gbɛ wɛnɛ nɛngaya pen mɔ sɔngsi. Yo bo sɔna hazu a tukolo mbonga swe ɔmtɛ na, ma, hazu a tɔa fin nde, Sɔ nê Bafa wa. Ɛngɛ osi nde, a dea tɛ wa tuka Sɔ.

¹⁹Jésus tɔa ha hio wan-le *zuife: «Kpasawen, mi tɔ ha ɛnɛ nde, mi, Bewei, lɛm de mɔ ndang nɛ zu mi na. Mi de sɔna nɛ mɔ ka mi zɔka Bafa mi ha dea. Mɔ fɛt ka Bafa mi ha dea, mi ha dea yo gbesi.

²⁰Hazu Bafa mi ngoya mi, Bewei pɛa, nɛ a osa ha mi mɔ ka wɛnɛ ha dea. Nɛ a beosi ha mi hio gasa tom fin pen mɔ ndɔng tuka nde, ɛnɛ ayaksi.

²¹Gbesi tuka Bafa mi gu hio fiowi nɛ gde mbwa nɛ tunɔ, mi Bewei pɛa, mi ha tunɔ ha hio wi tuka sila mi ngoya.

²²Hazu Bafa mi gɔn kita ha zu ma wi na. Ma, a gdea ziomɔ mɛ gɔn kita fɛt ha kɔ mi, Bewei pɛa.

²³A dea mɛgi tuka nde, hio wi fɛt alukisi mi gbesi tuka mbwa lukisi nɛ Bafa mi. Wi ka lukisi mi na, a lukisi Bafa mi ka tomsa mi na.

²⁴«Kpasawen, mi tɔ ha ɛnɛ nde, wi ka ze wen pɔm nɛ ka mɛkiri Sɔ ka tomsa mi, a bedung nɛ *tunɔ kpoo. Sɔ lɛm gɔn kita ba wɛnɛ fin na. Mɛgi, wia laka fio gde kari, nɛ a tɛ bo nɛ tunɔ.

²⁵Mi tɔ fin kpasawen ha ɛnɛ nde, ngimɔ ha tɛa, yo hɔa sising, ka hio fiowi beze gɛl mi, *Bewei pɛ Sɔ, nɛ ɛ ndɔng ka zea yo betun.

²⁶Hazu, gbesi tuka Bafa mi nɛ ziomɔ mɛ ha tunɔ ha hio wi, a haa mi fin ziomɔ mɛ ha tunɔ ha hio wi.

²⁷Nɛ a haa mi fin ziomɔ mɛ gɔn kita ha zu hio wi, hazu mi nê *Bewei pɛ Wi.

²⁸Ka mɔ ndɔng ayaksi ɛnɛ na, hazu ma ngimɔ behɔ ka ɛ ndɔng ka dung ha zang kɔfio beze gɛl mi,

²⁹nɛ mbwa fɛt begutɛ ha kɔfio gbo. Ɛ ndɔng ka bade dedemɔ, mbwa begutɛ nde, mi aha mbwa tunɔ kpoo. Ma, ɛ ndɔng ka bade gdangamɔ, mbwa begutɛ nde, mi agɔn kita ba mbwa.»

³⁰«Mi lɛm de mɔ ndang nɛ zu mi na. Mi gɔn kita ha zu wi lɛm nɛ mɔ ka Sɔ osa ha mi. Mɛgi, kita ka mi gɔn nɛ nzeng, hazu mi de nɛ mɔ ka sila mi ngoya na. Ma, mi de nɛ mɔ ka sila Sɔ, wan-tomsi mi, ngoya.

³¹Ka bo nê mi gbatɛ ha kɛ wen tɛ mi nɛ pɔm tɛ, yo bo nê tɛwen na.

³²Ma, ma wi ang ka kɛ wen pɔm. Nɛ mi ingɔ nde, wen tɛ mi ka wɛnɛ kɛ, nê tɛwen.

³³Ɛnɛ batomsi hio ma wi ha pɛ *Jean wan-gdumsiwi, nɛ kɛa wen pɛa nɛ tɛwen.

³⁴Mi tɛ ngoy nde, ma wi akɛ wen hazu mi na. Ma, mi osi kɛa wen pɛ Jean ha ɛnɛ nde, Sɔ akpasisi ɛnɛ.

³⁵Jean badung tuka lamba ka wea baa, nɛ ɛnɛ dea totɛ ha yoloa ngimɔ tikiring.

³⁶Ma, pɔm, mi nɛ ma kɛa wen ka pena pɛ Jean. Yo nê hio tom pɔm, ka Bafa mi haa ha mi. Nɛ hio mɔ ndɔng ka mi de, kɛ wen hazu mi nde, yo nê Bafa mi ka tomsa mi.

³⁷Bafa mi ka tomsa mi, ha kɛa wen pɔm fin. Ma, ɛnɛ tɛ ze gɛl wa na, nɛ ɛnɛ tɛ zɔk li wa ndang na.

³⁸Ɛnɛ pam wen pɛa ha sila ɛnɛ na, hazu ɛnɛ tɛ mɛkiri mi, ka wɛnɛ tomsa ha nu na.

³⁹Ɛnɛ yambi takarata pɛ Sɔ hazu ɛnɛ takiri nde, ɛnɛ ha kpaa *tunɔ kpoo ha zanga. Ma, bo nê takarata pɛ Sɔ ha kɛ wen tɛ mi, na nde?

⁴⁰Ma, ɛnɛ ngoy tɛa ha pɔm hazu kpa tunɔ kpoo na.

⁴¹«Mi ki lukosomɔ pɛ hio wi na,

⁴²hazu mi ingɔ ɛnɛ nɛdedea nde, sila ɛnɛ ngoy Sɔ na.

⁴³Yo nê Bafa mi ka tomsa mi ha nzan. Nɛ ɛnɛ tɛ ba mi nɛ dede kɔ na. Ma, ka ma wi tɛ nɛ wal ngatɛ pɛa nɛ pɛa tɛ, ɛnɛ beba wɛnɛ nɛ dede kɔ.

⁴⁴Ɛnɛ ngoya kpaa lukosomɔ pɛ may. Ma, ɛnɛ ki lukosomɔ ka tɛ nɛ ndanga Sɔ na. Ka mɔ dung mɛgi, ki ɛnɛ betɛ mɛkiri mi mɛng?

⁴⁵Ka ɛnɛ atakiri nde, yo nê mi ka befundi ɛnɛ ha li Bafa mi, na. Wi ka befundi ɛnɛ, yo nê Moïse ka ɛnɛ gde tazu ha tɛ wa.

⁴⁶Ɛnɛ amɛkiri se Moïse nɛkpasa, ki ɛnɛ mɛkara mi, hazu wɛnɛ ngɛraka nɛ wen tɛ mi.

⁴⁷Ma, ka ɛnɛ tɛ mɛkiri ngɛrakamɔ pɛa na, ki ɛnɛ bemɛkiri wen pɔm mɛng?»