Read south west gbaya Jean 7 Bible Online

Jean 7 - south west gbaya bible

Jean 7

¹Hapata, Jésus dungɔ ha yala bhɔn ka ha kandɔnu Galile. A tɛ ngoy fin yala ha kandɔnu Judée na, hazu haki hio wan-le *zuife dungɔ ha kio wal mɛ gbɛ wɛnɛ.

²Yenga pɛ hio zuife ka mbwa bɛ gbamsa mɛ ɔ ha sia mɔ dimasi ndang hɛra kari.

³Mɛgi hio ya mɛ Jésus tɔa ha wɛnɛ: «Mɛ gutɛ hakɛ pen si ha kandɔnu Judée nde, hio *wan-yambimɔ haki azɔk fin mɔ ndɔng ka mɛ ha dea.

⁴Hazu wi ka ngoy nde, hio wi aing wɛnɛ, a lɛm de hio mɔ pɛa nɛ wuso na. Mɛgi, ka mɛ ha dea mɔ ndɔng, lɛma nde, mɛ agbasi tɛ mɛ ha li wi mɔ nzan fɛt.»

⁵Hio ya wa tɔa mɛgi, hazu mbwa fin mɛkiri wɛnɛ na.

⁶Mɛgi, Jésus tɔa ha mbwa: «Ngimɔ pɔm tɛ hɔ ka na. Ma, pɛ ɛnɛ, ngimɔ fɛt lɛma mɛ nɛ haki.

⁷Hio wi mɔ nzan lɛm sɛn ɛnɛ na. Ma, pɔm, mbwa sɛn mi hazu mi gbasa long nde, deamɔ pɛ mbwa nɛ gdanga.

⁸Ɛnɛ nɛ ha yenga ɛngɛ. Ka bo nê mi, mi lɛm nɛ ha yenga na, hazu ngimɔ pɔm tɛ hɔ ka na.»

⁹Hapata wen ndɔng, a bhɔna ha kandɔnu Galile.

¹⁰Ka hio ya mɛ Jésus nɛa ha gala yenga kari, a guotɛ nɛ wuso nak pata mbwa. Ma, a tɛ gbasi tɛ wa na.

¹¹Ha ngimɔ yenga, hio wan-le *zuife dungɔ ha kio wɛnɛ nɛ ana mɔ nde, wɛnɛ ha ndo?

¹²Hio wi dungɔ ha tɔa wen pɛa nɛdɔka ha soko may. Hio ma tɔa nde, wɛnɛ nê dede wi. Nɛ hio ma mbinga tɔa nde, wɛnɛ nê wan-osili giliwi.

¹³Ma, hio wi tɔ wen pɛa long na, hazu mbwa dungɔ ha yuo ke hio wan-le zuife.

¹⁴Ka hio yala yenga tɛ bo ha binsilaa, Jésus lea ha *gasa twa Sɔ. Nɛ wɛnɛ angara osamɔ ha hio wi.

¹⁵Hio wi yaksa pentɛ nɛ mbwa tɔa: «Wei kɛ tɛ yambi *mbonga pɛ ɔ na. Ma, wɛnɛ ingɔ takarata pɛ Sɔ nɛdedea. A dea yo mɛng?»

¹⁶Nɛ Jésus kiforo wen ha mbwa: «Mi osi mɔ nɛ zu mi na. Ma, yo nê pɛ Sɔ ka tomsa mi.

¹⁷Wi ka ngoy de mɔ ka sila Sɔ ngoya, wɛnɛ being nde, mana osamɔ pɔm tɛ nɛ wal Sɔ, mana mi ha wola nɛ mɔ nɛ pɔm tɛ.

¹⁸Wi ka wol mɔ nɛ pɛa tɛ, a ki nɛ wal nde, hio wi alukisi nɛ wɛnɛ. Ma, wi ka ki nɛ wal nde, ɛ alukisi wi ka tomsa wɛnɛ, wɛnɛ nê wan-tɔ tɛwen, nɛ wɛnɛ bo nê wan-likisi na.

¹⁹Bo nê Moïse baha ɛnɛ mbonga na nde? Ma, ma wi ndang ha soko ɛnɛ ka de mɔ lɛm nɛ mbonga ɛngɛ bona. Ɛnɛ ngoy gbɛ mi hazu ge?»

²⁰Mɛgi, giliwi ndɔng kiforo wen ha wɛnɛ: «Mɛ nɛ ma dua ha zang mɛ. O ha ngoy mɛ gbɛ mɛ o?»

²¹Nɛ wɛnɛ tɔa ha mbwa: «Mi dea ma *mɔkifi ndang. Nɛ ɛnɛ fɛt yaksa pentɛ.

²²Hio ngbabafa ɛnɛ angara gɔna sɔru bewei pɛ mbwa sɔngsi ka Moïse baha nu ha ɛnɛ mɛ de yo. Nɛ ɛnɛ mɛkara mɛ gɔn sɔru ngase ha *swe ɔmtɛ, hazu Moïse baha nu mɛ gɔn yo dimasi ndang hapata bhɛ.

²³Ɛnɛ gɔn sɔru ha swe ɔmtɛ tuka nde, ɛnɛ atukili mbonga na. Mɛgi ɛnɛ de ngambi sungiri nɛ mi hazu mi kpasasa wi ha swe ɔmtɛ hazu ge?

²⁴Ka ɛnɛ agɔn kita nɛ peali na. Ma, ɛnɛ gɔn kita nzeng.»

²⁵Hio ma wi mɛ Jérusalem dungɔ ha anamɔ: «Bo nê wei kɛ nê wi ka ɛ ki mɛ gbɛ na nde?

²⁶Ɛnɛ zɔk, wɛnɛ ha bulo wen ha li wi fɛt, nɛ ɛ gdɔki wal ha wɛnɛ na. Hio wan-le pɛ ɔ ingɔ ka nde, wɛnɛ nê Mesi nde?

²⁷Ma, ma wi ndang lɛm ing bhandi ka Mesi begutɛ ang tɛnɛ na. Pɛa, ɔ ingɔ bhandi ka wɛnɛ guotɛ ang nɛdedea.»

²⁸Mɛgi, ka Jésus dungɔ ha osamɔ ha zang *gasa twa Sɔ, wɛnɛ tɔa nɛ ngagɛl: «Yo nê kpasawen nde, ɛnɛ ingɔ goto mi nɛ bhandi ka mi guotɛ ang tɛnɛ nde? Mi tɛ tɛ nɛ wal ziomɔ pɔm na. Wi ka tomsa mi, wɛnɛ nê wan-tɔ tɛwen. Ma, pɛ ɛnɛ, ɛnɛ ing wɛnɛ na.

²⁹Yo nê mi, ka ingɔ wɛnɛ hazu mi guotɛ ha pɛa tɛnɛ. Nɛ yo nê wɛnɛ ka tomsa mi hakɛ ha nzan.»

³⁰Mɛgi, mbwa dungɔ ha kio wal mɛ ba wɛnɛ. Ma, ma wi ndang tɛ gde kɔ ha tɛ wa na. Hazu ngimɔ pɛa tɛ lɛm ka na.

³¹Dɔka wi ha soko giliwi ndɔng mɛkara Jésus, nɛ mbwa dungɔ ha tɔa: «Ha ngimɔ ka Mesi betɛ, a bede *mɔweka pen ɛ ndɔng ka wei kɛ ha dea nde?»

³²Hio *Farizien zea wen ka hio wi dungɔ ha yimɔlɔa ha soko may ha wen pɛ Jésus. Mɛgi, hio gasa wan-hasadaka nɛ hio Farizien tomsa hio ma nasara mɔ *gasa twa Sɔ, hazu nɛ, nɛ ba Jésus.

³³Jésus tɔa: «Mi dung fin hinɛ ɛnɛ ngimɔ tikiring. Hapata, mi benɛ ha pɛ wi ka tomsa mi.

³⁴Ɛnɛ beki mi gan, ɛnɛ lɛm kpa mi na. Hazu ɛnɛ lɛm mɛ hɔ ha bhandi ka mi benɛ ang na.»

³⁵Mɛgi hio wi anamɔ ha soko may: «Wɛnɛ benɛ ha nge bhandi ka ɔ lɛm kpa wɛnɛ ang na, ge nde? A benɛ ha pɛ hio *zuife ndɔng ka yambala ha soko hio olo kandɔ hazu osi mɔ ha hio kandɔ ndɔng nde?

³⁶Wen ndɔng ka wɛnɛ tɔa nde, ɔ beki wɛnɛ gan, ɔ lɛm kpa wɛnɛ na, hazu ɔ lɛm hɔ ha bhandi ka wɛnɛ benɛ ang na, goto wen ndɔng mɛng?»

³⁷Ha kpogio yala yenga ka dung nê tɛ gasa swea, Jésus yola ha soko giliwi nɛ wɛnɛ tɔa nɛ ngagɛl: «Ka ma wi nɛ wɔ li, wɛnɛ atɛ ha pɔm tɛ nɔ mɔ.

³⁸‹Wi ka mɛkiri mi, nanali ka ha tunɔ befok ha sila wa gbolgbol›, gbesi tuka ɛ bangɛriki ha zang takarata pɛ Sɔ.»

³⁹Jésus tɔa wen ɛngi hazu *Nzɔy-Sɔtɛ ka hio wan-mɛkiri wɛnɛ bekpa. Ha ngimɔ ɛngi, Nzɔy-Sɔtɛ tɛ zil ka tɛ ha nzan na, hazu Sɔ tɛ ba ka Jésus ha zang *lɛkɛ-lɛkɛmɔ na.

⁴⁰Ka hio giliwi zea wen ndɔng, hio ma ha soko mbwa tɔa: «Kpasawen, wi kɛ nê *wan-tɔkuliwen kɛ, ka ɔ ha kera.»

⁴¹Hio ma tɔa: «Wi kɛ nê *Mesi.» Nɛ hio ma mbinga tɔa: «Mesi lɛm gutɛ ha Galile tɛnɛ ndang na.

⁴²Hazu ɛ bangɛriki se ha zang takarata pɛ Sɔ nde, Mesi bedung nê bezang pɛ David, nɛ nde, wɛnɛ begbo ha Betlehem, le ka David bade le ang se.»

⁴³Mɛgi, hio zugiliwi kɛtana soko hazu wen pɛa.

⁴⁴Hio ma ngoya ba Jésus mɛ pi ha zɔbhɔ. Ma, ma wi ndang tɛ gde kɔ ha tɛ wa na.

⁴⁵Hio nasara ndɔng kiforo si ha pɛ hio gasa wan-hasadaka nɛ hio *Farizien, ka ana mbwa: «Hazu ge ɛnɛ tɛ ba wɛnɛ tɛnɛ na ge?»

⁴⁶Hio nasara ndɔng kiforo wen: «Ma wi ndang ka wolmɔ tuka wei kɛ bona.»

⁴⁷Mɛgi hio Farizien ana mbwa: «A osala nɛ ɛnɛ fin nde?

⁴⁸Ma wan-le zuife nɛ ma Farizien ndang tɛ mɛkiri wen pɛa na.

⁴⁹Ma, hio zugiliwi ndɔng ka ing *mbonga pɛ Moïse na, mbwa mɛkara wen pɛa. Yo nê ɛngi ka Sɔ foma mbwa kari.»

⁵⁰Nikodeme, ka banɛ se nɛ zɔk Jésus nɛ zɛ, dungɔ ha soko mbwa. Wɛnɛ fin nê Farizien nɛ wan-le. A tɔa ha mbwa:

⁵¹«Mbonga pɛ ɔ tɔ nde, ɔ agɔn kita ha zu ma wi sɔna, ka ɔ ana wɛnɛ sɔngsi nɛ ingɔ mɔ ka wɛnɛ dea.»

⁵²Mbwa kiforo wen ha wɛnɛ: «Mɛ fin nê wi mɛ kandɔnu Galile nde? Mɛ ki mɔ ha zang takarata pɛ Sɔ, nɛ mɛ bekpa nde, ma *wan-tɔkuliwen lɛm gbo ha Galile tɛnɛ na.» [

⁵³Mɛgi, wi ndang ndang fɛt sio ha twa pɛ mbwa.