Read south west gbaya Jean 9 Bible Online

Jean 9 - south west gbaya bible

Jean 9

¹Ma swe ka Jésus ha pena nɛ liwal, a zɔka ma wi, ka ɛ babhɛ nɛ gdɔka li.

²Hio *wan-yambimɔ ana Jésus: «Wan-osimɔ, hazu ge ɛ bhɛa wi ɛngɛ nɛ gdɔka li, ge nde? Yo nê hazu *sɛmbɔ pɛa, mana hazu sɛmbɔ pɛ bafa wa nɛ nana wa, nde?»

³Jésus kiforo wen: «Li wa tɛ gdɔki hazu sɛmbɔ pɛa mana hazu sɛmbɔ pɛ bafa wa nɛ mana wa na. Ɛ bhɛa wɛnɛ nɛ gdɔka li nde, ka hio wi azɔk gasa mɔ ka Sɔ bede ha tɛ wa.

⁴Lɛma nde, ɔ ade tom pɛ Sɔ ka tomsa mi, ha ngimɔ ka swe boka ha baa. Hazu zɛ tɛ bo sanga, nɛ ka yo hɔa, ma wi ndang lɛm de tom fin na.

⁵Ha ngimɔ ka mi ang ha nzan, mi nê saamɔ ka ba ha nzan.»

⁶Nɛ ka Jésus wola mɔ ndɔng fɛt kari, a pɛa tafu ha nu. A dea yo nɛ mbɔrɔa. Nɛ wɛnɛ kuo mbɔrɔ nu ɛngi sɔ ha li wan-gdɔka li ɛngɛ.

⁷A tɔa ha wɛnɛ: «Mɛ nɛ, nɛ tay li mɛ ha bebe tɔ Siloe.» (Goto ling Siloe tɔ nde, wan-nɛkasara.) Mɛgi wan-gdɔka li kɛ nɛa haki nɛ tay li wa. Ka wɛnɛ pea, a zɔka mɔ kari.

⁸Mɛgi, hio wi mɔ pɛtɛ twa pɛa nɛ hio wi ndɔng ka dung mɛ zɔk wɛnɛ ha gɔamɔ, mbwa tɔa: «Bo nê wi kɛ nê wan-gdɔka li ka dungɔnu mɛ gɔ mbɔli, na nde?»

⁹Hio ma tɔa: «Yo nê wɛnɛ.» Nɛ hio ma mbinga tɔa: «Dalo, yo nê ma wi ka ba tɛ nɛ wɛnɛ.» Ma, wei kɛ tɔa ha mbwa: «Yo nê mi.»

¹⁰Mɛgi, mbwa ana wɛnɛ: «Ɛ dea mɛng ka gbali mɛ gboa long ge?»

¹¹A kiforo tɔ ha mbwa: «Wei kɛ, ka ɛ sa nde, Jésus, ha de mbɔrɔ nu sɔ ha li mi. Nɛ wɛnɛ tɔa ha mi nde, mi anɛ nɛ tay li mi ha bebe tɔ Siloe. Mɛgi, ka mi nɛa nɛ tay li mi kari, li mi gboa long.»

¹²Nɛ mbwa ana wɛnɛ: «Weia ha ndo?» A kiforo wen: «Mi ing na.»

¹³Ɛ kuo wei kɛ ka dungɔ sɔngsi nɛ gdɔka li nɛnɛ ha pɛ hio Farizien.

¹⁴Swe ka Jésus dea nɛ mbɔrɔ nu gbosisi nɛ li wei ɛngɛ, yo dungɔ nê *swe ɔmtɛ.

¹⁵Yo nê ɛngi ka hio Farizien ana fin wei kɛ nɛ goto gbosasa li wa. Nɛ wɛnɛ tɔa ha mbwa: «A sɔa mbɔrɔ nu ha li mi, nɛ mi nɛa nɛ tay li mi. Yo nê ɛngi ka mi tɛ bo ha zɔka mɔ sising.»

¹⁶Nɛ hio ma Farizien tɔa: «Wei kɛ ka deamɔ tuka ɛngi, a bo nê wi pɛ Sɔ na, hazu a tɛ pam *mbonga hazu wen swe ɔmtɛ na.» Ma, hio ma tɔa: «*Wan-de gdangamɔ lɛm de tili *mɔweka tuka ɛngɛ na.» Mɛgi, hio Farizien kɛtana soko bwa hazu wen ɛngɛ.

¹⁷Hio Farizien ana fin wei kɛ ka li wa gboa: «Pɛ mɛ, mɛ takiri nɛ ge hazu wei kɛ ka gbosasa li mɛ ge?» A kiforo wen ha mbwa: «Wɛnɛ nê *wan-tɔkuliwen.»

¹⁸Ma, hio wan-le *zuife tɛ ngoy mɛkara nde, wei kɛ ka zɔk mɔ sising dungɔ nɛ gdɔka li sɔngsi, na. Hazu ɛngi, mbwa saa bafa wa nɛ nana wa,

¹⁹nɛ mbwa ana bafa wa hinɛ nana wa: «Wi kɛ nê bem pɛ ɛnɛ tɛwen nde? Ɛnɛ bhɛa ka wɛnɛ nɛ gdɔka li nde? Ɛ dea mɛng, ka wɛnɛ zɔka mɔ sising, ge?»

²⁰Mɛgi, bafa wa hinɛ nana wa kiforo wen: «Ɔ ingɔ nde, wi kɛ nê bem pɛ ɔ. Ɔ bhɛa ka wɛnɛ nɛ gdɔka li.

²¹Ma, ɔ ing mɔ ka dea nde wɛnɛ azɔk mɔ sising, na. Nɛ ɔ ing wi ka gbosasa li wa na. Wɛnɛ bo fin nê bhobem na. Ɛnɛ ani nɛ wɛnɛ. A lɛma mɛ kifiri wen ha ɛnɛ nɛ nu wa.»

²²Mbwa kiforo wen mɛgi, hazu mbwa ha yuo ke hio wan-le zuife. Hazu sɔngsi hio wan-le zuife kpoa zuwen nde, wi ndɔng ka mɛkiri Jésus tuka *Mesi, lɛm dung ha soko giliwi mɔ *twa gɔ Sɔ fin na, ɛ bemul mbwa pi.

²³Yo nê ɛngi, ka bafa wa nɛ nana wa tɔa nde, a bo fin nê bhobem na, dea nde, mbwa a-ani nɛ wɛnɛ.

²⁴Mɛgi, hio Farizien saa fin wei kɛ ka li wa gboa, nɛ mbwa ana wɛnɛ: «Mɛ tɔ kpasawen ha li Sɔ. Ɔ ingɔ pɛ ɔ nde, wei kɛ nê wan-de gdangamɔ.»

²⁵A kiforo wen: «Ka wɛnɛ nê wan-de gdangamɔ, mi ing pɔm na. Ma, mi ingɔ nde, sɔngsi mi dungɔ nɛ gdɔka li, nɛ sising, mi tɛ bo ha zɔka mɔ.»

²⁶Mbwa ana wɛnɛ fin: «A dea nɛ nge tɛ mɔ ha tɛ mɛ ge? A gbosasa li mɛ mɛng?»

²⁷A kiforo wen ha mbwa: «Mi tɔa yo ha ɛnɛ kari, nɛ ɛnɛ ngoy ze mi na. Ma, ɛnɛ ngoy mɛ ze yo fin hazu ge? Ɛnɛ ngoy mɛ tɛ fin nɛ hio *wan-yambimɔ pɛa nde?»

²⁸Mbwa yaa wɛnɛ nɛ mbwa tɔa: «Pɛ mɛ, mɛ nê wan-yambimɔ pɛa! Ma, pɛ ɔ, ɔ nê hio wan-yambimɔ pɛ Moïse.

²⁹Ɔ ingɔ nde, Sɔ bawolmɔ ha Moïse. Ma, pɛ wei kɛ, ɔ ing bhandi ka wɛnɛ guotɛ ang tɛnɛ na.»

³⁰Wei kɛ kiforo wen ha mbwa: «Nde ge? Wen ɛngɛ yaksa mi. Ngase wɛnɛ gbosasa li mi, ɛnɛ nde, ɛnɛ ing bhandi ka wɛnɛ guotɛ ang tɛnɛ na.

³¹Ɔ hinɛ ɛnɛ, ɔ ingɔ nde, Sɔ ze gɔamɔ pɛ wan-de gdangamɔ na. Ma, a ze nɛ gɔamɔ pɛ wi ka ze nu wa, nɛ ka de mɔ ka sila wa ngoya.

³²Ɛ tɛ ze ka sɔngsi nde, ma wi gbosasa li wi ka ɛ bhɛa nɛ gdɔka li, na.

³³Wei kɛ abo se nê wi pɛ Sɔ na, ki a lɛm de mɔ tuka ɛngɛ na.»

³⁴Nɛ mbwa tɔa ha wɛnɛ: «Mɛ ka mɛ nê wan-de gdangamɔ angiri ha bhɛ pɛ mɛ, mɛ ngoya osi mɔ ha ɔ, nde?» Mɛgi, mbwa yinɔ wɛnɛ gbo ha twa gɔ Sɔ.

³⁵Jésus zea nde, hio *Farizien mulo pi wei kɛ ka wɛnɛ gbosasa li wa, gbo ha soko giliwi mɔ *twa gɔ Sɔ. Mɛgi, a kpaa may hinɛ wɛnɛ nɛ a ana wɛnɛ: «Mɛ mɛkara *Bewei pɛ Wi nde?»

³⁶Nɛ wɛnɛ ana Jésus: «*Kongawan, wɛnɛ nê o? Mɛ osi wɛnɛ ha mi, ka mi amɛkiri wɛnɛ.»

³⁷Jésus kiforo wen ha wɛnɛ: «Mɛ zɔka wɛnɛ kari. Yo nê mi, ka wolmɔ ha mɛ!»

³⁸Mɛgi, wei kɛ tɔa: «Kongawan, mi mɛkara mɛ.» Nɛ wɛnɛ ngbio zigolo ha si Jésus.

³⁹Nɛ Jésus tɔa ha wɛnɛ: «Mi tɛa ha nzan hazu gba soko hio wi nde, ka hio wan-gdɔka li azɔk mɔ, nɛ ka li hio wan-dede li agdɔki.»

⁴⁰Hio ma Farizien ka dungɔ hapɛtɛ Jésus zea wen ndɔng. Nɛ mbwa ana wɛnɛ: «Ɔ fin fɛt nê hio wan-gdɔka li nde?»

⁴¹Nɛ Jésus kiforo wen ha mbwa: «Ɛnɛ abo se nê hio wan-gdɔka li, ki ma *sɛmbɔ bo ha zu ɛnɛ na. Ma, ɛnɛ tɔa nde, ɛnɛ nê hio wan-dede li. Mɛgi, sɛmbɔ bebhɔn ha zu ɛnɛ.»