Read south west gbaya Deamɔ 1 Bible Online

Deamɔ 1 - south west gbaya bible

Deamɔ 1

¹Dede Théophile, ha bosi takarata ka mi bangɛriki ha mɛ, mi batɔ ngbak wen mɔ, ka Jésus dea nɛ osa, angiri ha bosi ngimɔ,

²kanɛ swe ka Sɔ guo wɛnɛ si ha ngɔn. Jésus baweki se hio *wan-nɛtom pɛa. Nɛ sɔngsi ka wɛnɛ tɛ si ka ha ngɔn na, a osa ha mbwa nɛ wal ngatɛ pɛ Nzɔy-Sɔtɛ mɔ ka mbwa bede.

³Hapata fio pɛa, a dungɔ ha gbasa tɛ ha mbwa ha zang yala bhukɔa nar. A osa ha mbwa nɛ dɔka wal nɛtɛ-nɛtɛ nde, wɛnɛ nɛ zutunɔ. Nɛ wɛnɛ tɔa wen *Kongakandɔ pɛ Sɔ ha mbwa.

⁴Ma swe ka wɛnɛ ha yɔngamɔ hinɛ mbwa, a haa nu ha mbwa: «Ɛnɛ bhɔn hakɛ ha Jérusalem keri nɛ mɔ, ka Bafa mi bagɔn nua, nɛ ka mi batɔ wena ha ɛnɛ.

⁵Jean gdumso hio wi ha li, ma, yala dɔk na, Sɔ begdumsi ɛnɛ ha zang Nzɔy-Sɔtɛ.»

⁶Hio *wan-nɛtom wesara may hapɛtɛ Jésus, nɛ ana wɛnɛ mɛgɛ: «*Kongawan, sising mɛ bebhɔngiri kongakandɔ pɛ ɔ, *Israel, nɛ mbinga, na nde?»

⁷Ma, Jésus kiforo wen ha mbwa: «Ɛnɛ lɛm ing swe nɛ ngimɔ ka mɔ ndɔng behɔ nɛ na. Yo nê Bafa mi ha weki yo nɛ wal ziomɔ pɛa.

⁸Ma, ka *Nzɔy-Sɔtɛ zilo ha zu ɛnɛ, ɛnɛ bekpa ngatɛ, nɛ ɛnɛ bedung hio wan-bul wen tɛ mi ha hio wi mɛ Jérusalem, hio wi mɛ kandɔnu Judée nɛ kandɔnu *Samari fɛt, gbo ha kpogio nzan.»

⁹Ka wɛnɛ tɔa wen ndɔng ha mbwa kari, a danga ha li mbwa fɛt si ha ngɔn. Nɛ buswe kuo wɛnɛ nɛ gdɔka pata wa ha li mbwa.

¹⁰Ka mbwa boka ha gɛramɔ ha ngɔn ha danga pɛa, nɛhasa wi bwa nɛ bu latɛ yola ha soko mbwa.

¹¹Nɛ mbwa tɔa: «Ɛnɛ, wi mɛ Galile, ɛnɛ yol hakɛ ha gɛramɔ ha ngɔn hazu ge? Jésus ɛngɛ ka Sɔ guo wɛnɛ si nɛ ha ngɔn, a bekifiri bin gbesi tuka ka ɛnɛ zɔka wɛnɛ ha danga.»

¹²Hapata hio *wan-nɛtom laka zu ngari Olivier gde, nɛ mbwa zilo nɛ ha Jérusalem. Yɛa soko Jérusalem nɛ ngari ɛngɛ lɛma kilomɛtɛrɛ ndang.

¹³Nɛ ka mbwa hɔa haki, mbwa danga nɛ ha pimbi ha ngɔn mɔ twa ka mbwa dungɔ mɛ wesiri may ang. Wi ndɔng nê: Pierre, Jean, Jacques, André, Philippe, Thomas, Barthélemy, Matthieu, Jacques bewei pɛ Alfe, Simon ka ɛ sa nde «Wan-yin gɛnɛ kongawan», hinɛ Jude bewei pɛ Jacques.

¹⁴Mbwa fɛt dungɔ ha wesara may nɛ gɔ Sɔ nɛting nɛ sila ndang. Marie, nana mɛ Jésus, nɛ hio ma bhoko dungɔ hinɛ mbwa, tɛ ba nɛ hio ya mɛ Jésus.

¹⁵Ha ma yala ndɔng ndang, hio ya ha Christ wesara may lɛm nɛ wi gɔmmay zu bhuze bwa. Pierre guo tɛ tɔ ha mbwa:

¹⁶«Hio ya mi, ha zang takarata pɛ Sɔ, *Nzɔy-Sɔtɛ bagbasi nɛ wal nu David ma mɔ hazu Judas, wi ka baosi wal ha hio wan-ba Jésus. Dea nde, mɔ ɛngɛ alɛmsiri tɛ.

¹⁷Ɛ tɔla wɛnɛ ha soko ɔ, nɛ wɛnɛ dea ndangtɛ tom ɛngɛ hinɛ ɔ.

¹⁸Sɔngsi, wi ɛngɛ hɛa fɔ nɛ mbɔli ka ɛ kɛa nɛ wɛnɛ hazu gdanga tom pɛa. Hapata, a teka gɔm zu ha nu. Zang wa mbanga nɛ wazang wa sɛa a ha dɛl.

¹⁹Hio wi mɛ Jérusalem fɛt ingɔ wen mɔ ɛngɛ nɛdedea. Mɛgi, mbwa saa ling fɔ ɛngɛ nɛ nu le pɛ mbwa nde, Hakeldama. Ling ɛngɛ tɔ nde, fɔ tɔk.

²⁰«Hazu ɛ ngɛraka ha zang takarata *gima pɛ David tuka ɛngɛ: ‹Dea nde, twa pɛa adung nɛ gomboa. Ka ma wi aɔ ang fin na.› Nɛ fin nde, ‹Ma mbing wi aba bhandi tom ka wɛnɛ laka gde.›

²¹«Dea nde, ma wei ale ha soko ɔ. Wɛnɛ fin bebul wen guotɛ pɛ Jésus ha soko hio fiowi. Lɛma nde, wɛnɛ adung nê wi ka nɛa hinɛ ɔ ha ngimɔ fɛt ka Kongawan Jésus yala ha soko ɔ, angiri ha ngimɔ ka Jean gdumso nɛ wɛnɛ ha li, kanɛ ngimɔ ka wɛnɛ danga nɛ si ha ngɔn.»

²³Mɛgi, mbwa saa ling wi bwa: Joseph, ka ɛ sa nde Barsabas, ma ling wa fin nde Yustus, hinɛ Matthias.

²⁴Hapata, mbwa gɔa Sɔ nɛ tɔa: «Kongawan, mɛ ingɔ mɔ fɛt ha zang sila wi, mɛ osi ha ɔ wi ka mɛ weka ha soko wi ndɔng bwa.

²⁵Wɛnɛ bedung wan-nɛtom nɛ a bede tom ha bhandi ka Judas laka gde pen si ha bhandi ka lɛma nɛ wɛnɛ.»

²⁶Mbwa dea mbela nɛ yo teka ha zu Matthias. Mɛgi, mbwa gdea wɛnɛ ha soko wan-nɛtom bhukɔ gbala ndang.