Read south west gbaya Deamɔ 12 Bible Online

Deamɔ 12 - south west gbaya bible

Deamɔ 12

¹Ha ngimɔ ɛngi, *kongapora Herode angara fin namala hio ma wi ha soko *giliwi mɔ eglize.

²A haa nu mɛ gdɛngiri gɛl Jacques, ya mɛ Jean, nɛ gbapa.

³Ka wɛnɛ zɔka nde, hio *zuife dungɔ nɛ totɛ ha wena, a haa nu nde, ɛ aba fin Pierre. Mɔ ɛngɛ hɔa ha ngimɔ yenga yɔng mampa ka ha na.

⁴Ka ɛ baa Pierre pi ha twa zɔbhɔ, Herode weka hio zugili bulo nar hazu pɛm wɛnɛ. Ha zang zugili ndɔng ndang ndang, ɛ kpa wan-bibulo nar. Herode takara mɛ gɔn kita ha zu Pierre ha li hio wi fɛt hapata yenga *Pake.

⁵Mɛgi, ɛ dungɔ ha pɛma Pierre ha zang twa zɔbhɔ. Ma, giliwi mɔ eglize dungɔ ha gɔa Sɔ hazu wa nɛting.

⁶Ha gangli yala ka Herode ngoya mɛ gɔn kita ha zu Pierre ha li wi fɛt, Pierre dungɔ ha ɔala ha soko hio wan-bibulo bwa. Ɛ sanga kɔ wa ndang ndang nɛ gbazɔbhɔ hinɛ kɔ ma wan-bibulo ndɔng, nɛ hio ma wan-bibulo dungɔ ha pɛma nutwa zɔbhɔ.

⁷Nɛhasa, ma telenge pɛ *Kongawan gbasa tɛ, nɛ gasa saamɔ baa zikiri zang twa zɔbhɔ. Hazu tunsi Pierre, telenge fesa wɛnɛ ha mbanzi nɛ tɔa: «Gutɛ mɛ nɛhasa.» Nɛ gbazɔbhɔ kpɔsa ha kɔ wa ha ndangtɛ ngimɔ.

⁸Telenge tɔa ha wɛnɛ: «Mɛ hɛl pɛrɛng, nɛ mɛ sang nakala pɛ mɛ.» Pierre dea mɛgi nɛ telenge tɔa fin ha wɛnɛ: «Mɛ yol gasa la pɛ mɛ, nɛ mɛ ndari mi.»

⁹Pierre gboa ha twa zɔbhɔ nɛ ndara telenge. A takara nde, mɔ ka telenge dea, tɛ dung nɛ kpasawen na, ma, wɛnɛ zɔka nɛ lisɔ.

¹⁰Ka mbwa pena bosi zugili bulo nɛ zebwa zugili kari, mbwa hɔa ha nu kin ɛngɛ, ka gde li ha gasa le. Ngase yo nê mɔ bolo, yo gbosasa tɛ nɛ tɛ wa ha li mbwa, nɛ mbwa gboa nɛ ha dɛl. Ka mbwa ha nɛa ha ma wal, telenge laka wɛnɛ gde nɛhasa.

¹¹Mɛgi, tazu Pierre gbaa, nɛ wɛnɛ tɔa: «Sising, mi ingɔ nɛdedea nde, yo nê Kongawan ka tomsa telenge pɛa, hazu ku mi yunɛ ha kɔ Herode, nɛ tili gdangamɔ fɛt ka hio *zuife bheki sungiri nɛ mi.»

¹²Hapata, ka wɛnɛ baa zu tikiring, a nɛa ha twa pɛ Marie nana mɛ Jean, ka ɛ sa fin nde, Marc. Haki hio wi wesara may nɛdɔka ha gɔa Sɔ.

¹³Pierre hɔa tɛ kɔn nutwa kokoko. Ma bhoko-de tom ka ɛ sa nde Rode, tɛa ha gbosasa nutwa.

¹⁴Ka wɛnɛ ingɔ Pierre nɛ wal gɛl wa, totɛ dona sila wa. A tɛ gbosisi nutwa na, ma, a sɔawi ha zang twa nɛ tɔa nde, Pierre ha nutwa.

¹⁵Mbwa tɔa ha wɛnɛ: «Bili ha dea mɛ!» Ma, a bhɔna ka ha ndangtɛ wen pɛa. Mɛgi, mbwa tɔa: «Yo nê sɔtɛ wa.»

¹⁶Ma, Pierre bhɔna ha kɔna nutwa kanɛ mbwa gbosasa yo. Ka mbwa zɔka wɛnɛ, mbwa yaksa pentɛ.

¹⁷Pierre pɛbhaka kɔ ha mbwa nde, mbwa akari sɛm. Nɛ wɛnɛ tɔa ha mbwa, wal ka Kongawan gbosasa wɛnɛ ha twa zɔbhɔ gde ha dɛl. A tɔa fin: «Ɛnɛ pi kasara wen mɔ ndɔng ha Jacques, nɛ hio olo ya ha Christ.» Hapata a gboa pen nɛ ha ma mbing bhandi.

¹⁸Ka mɔsaa, sila hio wan-bibulo bhunzoko nɛkpasa. Mbwa anamɔ ha soko may: «Yo nê ge ka hɔa ha Pierre ge?»

¹⁹Herode tomsa mɛ ki Pierre gan, ɛ kpa wɛnɛ na. Mɛgi, a ana hio wan-bibulo ka pɛma Pierre ndɛl-ndɛl. Nɛ a haa nu nde, ɛ agbɛ mbwa. Hapata, Herode guotɛ ha kandɔnu Judée nɛ ha Sezare hazu dung haki ma ngimɔ.

²⁰*Kongapora Herode dungɔ nɛ ngambi pentɛ sungiri nɛ hio wi mɛ le Tir nɛ Sidon. Hazu mbwa kpa yɔngamɔ ha kandɔnu pɛa, mbwa tomsa hio ma wi ha pɛa mɛ ani gaamɔ. Mbwa dea gdidan hinɛ Blastus, wan-pam twa pɛ Herode. Nɛ wɛnɛ bhɔngara yala kpa may hinɛ Herode.

²¹Ka yala ɛngɛ lɛma, Herode yola la konga pɛa nɛ dungɔnu ha zu solowan. Nɛ wɛnɛ tɔa wen ha mbwa ha li wi fɛt.

²²Kandɔ fɛt gdɔra: «Ɛngɛ nê gɛl sɔ. Yo bo nê gɛl wi na.»

²³Ha ndangtɛ ngimɔ, ma *telenge pɛ *Kongawan mɛla wɛnɛ nɛ zɛlɛ hazu a tɛ lukisi Sɔ na, ma, a mɛkara nde, hio wi alukisi wɛnɛ tuka Sɔ. Mɛgi, hio yolo yɔnga wɛnɛ nɛ a fea.

²⁴Ma, wen pɛ Sɔ yɛbha pen mɔ sɔngsi, nɛ *giliwi mɔ eglize fin.

²⁵Ka Barnabas hinɛ Saul karsa tom pɛ mbwa ha Jérusalem, mbwa kuo Jean, ka ɛ sa fin nde Marc, sinɛ hinɛ mbwa.