Read south west gbaya Deamɔ 14 Bible Online

Deamɔ 14 - south west gbaya bible

Deamɔ 14

¹Ha Ikoniom Paul nɛ Barnabas lea fin *twa gɔ Sɔ pɛ hio *zuife. Mbwa bulo wen pɛ Sɔ nɛ ngatɛ. Mɛgi, hio dɔka zuife nɛ hio dɔka wi mɔ olo kandɔ mɛkara Jésus.

²Ma, hio zuife ndɔng ka ngoy mɛkara na, aa sɔkira ha zala hio wi mɔ olo kandɔ nde, sila mbwa apang nɛ hio ya ha Christ.

³Ngase ɛngi, Paul nɛ Barnabas dungɔ ha Ikoniom ngimɔ nɛzikoa. Mbwa gdea tazu mbwa ha tɛ *Kongawan, mɛgi mbwa wolamɔ nɛ da. Mbwa bulo wen *dede sila pɛ Sɔ, nɛ Sɔ haa mbwa ngatɛ mɛ de nɛ *mɔweka nɛ *mɔkifi hazu osi nde, wen pɛ mbwa nê tɛwen.

⁴Ma, hio wi mɛ gasa le ɛngi kɛtana soko bwa. Hio ma dungɔ ha gdong hio zuife, nɛ hio ma ha gdong hio *wan-nɛtom.

⁵Hapata, hio ma zuife nɛ hio ma wi mɔ olo kandɔ, tɛ ba nɛ hio wan-le pɛ mbwa, guotɛ sungiri nɛ Paul hinɛ Barnabas hazu lo mbwa nɛ ta gbɛ.

⁶Ka Paul nɛ Barnabas zɔka mɛgi, mbwa yuomɔ pen ha hio le mɔ kandɔnu Likaoni, ha le Listre, ha le Derbe, nɛ ha hio le hapɛtɛa.

⁷Nɛ mbwa dungɔ ha bulo *Dede Wen haki.

⁸Ha Listre, ma wi ndang ang ka ɛ bhɛa nɛ kumɔ nanga. A dung ka ha nu sɔna, a nɛ nɔ ndang na.

⁹Ma swe, wei ɛngɛ dungɔ ha zea Paul ha bulo wen. Paul mbara wɛnɛ gdoo, nɛ zɔka nde, wɛnɛ nɛ mɛkaramɔ mɛ kpasi ha zɛlɛ pɛa.

¹⁰Mɛgi, Paul tɔa ha wɛnɛ nɛ ngagɛl: «Gutɛ mɛ, mɛ yol nzeng.» Nɛ wia kpera, nɛ a angara nɛa nɔ.

¹¹Ka hio wi zɔka mɔ ka Paul dea, mbwa fɛt gdɔra nɛ nu le pɛ mbwa Likaoni, mbwa tɔa: «Hio sɔ yola tɛ wi, nɛ mbwa zilo tɛ ha le pɛ ɔ.»

¹²Mbwa saa ling Barnabas nde, Zeus, gasa sɔ pɛ mbwa, nɛ ling Paul nde Hermes, hazu a dungɔ nê wan-bulwen olo nu sɔ Zeus.

¹³Wan-hasadaka mɔ twa sɔ Zeus, ka dungɔ ha dɛl ha nu kin le, kuo hio bafa nday, ka ɛ kpoa hio dote ha zu mbwa, nɛnɛ ha li nu kin le. Wɛnɛ nɛ hio giliwi fɛt ngoya ha nɛ sadaka ha Paul nɛ Barnabas.

¹⁴Ka Paul nɛ Barnabas zea wena, mbwa gbaa la ha tɛ mbwa, kpera le soko giliwi nɛ mbwa tɔa:

¹⁵«Hio dan ɔ, ɛnɛ de mɔ mɛgɛ hazu ge? Zɔk, ɔ nê wi gbesi tuka ɛnɛ. Ɔ bul *Dede Wen ha ɛnɛ nde, ɛnɛ ato gdong ha hio buko sɔ ndɔng nɛ ndari tunɔ Sɔ ka bade ngɔn nɛ nu, nana-litɔng nɛ mɔ fɛt ka dung ang.

¹⁶Ha hio ngimɔ ka pena, Sɔ gdea hio kandɔ fɛt nde, mbwa aba wal, ka sila mbwa ngoya.

¹⁷Ma, ngase ɛngi, swe fɛt wɛnɛ ha gbasa tɛ nɛ wal dedemɔ ka wɛnɛ ha dea. Wɛnɛ ha ɔlsa dede kolo ha zu ɛnɛ, nɛ ha dea nde, hio yɔng pɛ ɛnɛ afe ha dede ngimɔ. Wɛnɛ ha haa yɔngamɔ ha ɛnɛ nɛ ha donsa sila ɛnɛ nɛ totɛ.»

¹⁸Ngase nɛ tɔa mɛgi, hio *wan-nɛtom kpaa gasa yeksamɔ mɛ dol hio giliwi mɛ ha sadaka ha mbwa.

¹⁹Hio ma *zuife guotɛ ha gasa le Antioshe nɛ Ikoniom tɛnɛ. Mbwa aa sɔkira ha zala hio wi, nɛ mbwa loa Paul nɛ ta. Hazu mbwa takara nde, a fea kari, mbwa daka wɛnɛ nɛnɛ ha gdong le.

²⁰Ma, ka hio *wan-yambimɔ pɛ Jésus wesara may zikiri wɛnɛ, a guotɛ si ha gasa le. Ka mɔsaa, wɛnɛ hinɛ Barnabas baa wal pen ha Derbe.

²¹Ha le Derbe, Paul nɛ Barnabas bulo *Dede Wen, nɛ dɔka wi tɛ bo nê *wan-yambimɔ pɛ Jésus. Hapata, mbwa kiforo fin ha Listre, ha Ikoniom, nɛ ha Antioshe mɔ Pisidi.

²²Ha zang le ndɔng mbwa mboa hio wan-yambimɔ pɛ Jésus nde, mbwa abhɔn nɛ nɔa nging ha mɛkaramɔ. Mbwa tɔa fin: «Dea nde, ɔ akpa gasa yeksamɔ sɔngsi ka ɔ bele ha zang *Kongakandɔ pɛ Sɔ.»

²³Ha eglize ndang ndang fɛt, Paul nɛ Barnabas weka hio kotowi gde ha zu mbwa. Mbwa gɔa Sɔ nɛ zimɔ yɔngamɔ, nɛ mbwa gdea kotowi ndɔng ha kɔ *Kongawan, ka mbwa mɛkara ha wɛnɛ.

²⁴Hapata mbwa gɔna kandɔnu Pisidi nɛ hɔa ha kandɔnu Panfili fin.

²⁵Mbwa bulo wen pɛ Sɔ ha le Perze, nɛ mbwa zilo nɛ ha le Atali.

²⁶Haki, mbwa lea kuga hazu kifiri ha Antioshe, le ka mbwa ba-angiri nɛ yali pɛ mbwa. Yo nê haki ka ɛ bagde mbwa ha si *dede sila pɛ Sɔ hazu tom ka mbwa lɛmsara sising.

²⁷Nɛ ka mbwa hɔa ha Antioshe, mbwa wesara *giliwi mɔ eglize nɛ baa kasi mɔ fɛt, ka Sɔ dea nɛ wal mbwa. Mbwa tɔa fin nde, Sɔ haa wal mɛ mɛkiri Jésus ha hio wi ndɔng, ka bo nê *zuife na.

²⁸Nɛ mbwa dungɔ ngimɔ nɛzikoa haki hinɛ hio wan-yambimɔ pɛ Jésus.