Read south west gbaya Deamɔ 15 Bible Online

Deamɔ 15 - south west gbaya bible

Deamɔ 15

¹Hio ma wi, ka guotɛ ha Judée tɛ ha Antioshe mɔ Siri, osa mɔ ha hio wi pɛ Christ nɛ tɔa: «Ka ɛ gɔn sɔru ɛnɛ lɛm nɛ *mbonga pɛ Moïse na, Sɔ lɛm kpasisi ɛnɛ na.»

²Paul nɛ Barnabas kafa wen ɛngɛ nɛ sio kafɛ nɛngaya hinɛ wi ndɔng. Ɛ bhɔngara wen nde, Paul, Barnabas nɛ hio ma wi anɛ ha Jérusalem, nɛ gde wen mɔ ɛngɛ ha li hio *wan-nɛtom nɛ hio kotowi mɔ eglize.

³Eglize mɔ Antioshe gbakara mbwa nɛ mɔ fɛt hazu yali. Nɛ mbwa gɔna kandɔnu Fenisi nɛ *Samari. Ha liwal mbwa baa kasi ha hio wi pɛ Christ nde, wi ndɔng, ka bo nê *zuife na, kiforo sila nɛ mɛkara Jésus. Kasi ɛngɛ haa totɛ pentɛ ha hio wi pɛ Christ fɛt.

⁴Ka mbwa hɔa ha Jérusalem, *giliwi mɔ eglize, nɛ hio wan-nɛtom nɛ hio kotowi baa mbwa nɛ dede kɔ. Mbwa baa kasi mɔ fɛt, ka Sɔ dea nɛ wal mbwa.

⁵Ma, hio ma wi ha soko zugili *Farizien ka mɛkara Jésus guotɛ tɔ nde, dea ka de nde, ɛ agɔn sɔru wi pɛ Christ ndɔng, ka bo nê zuife na, nɛ ɛ aha nu ha mbwa mɛ pam mbonga pɛ Moïse.

⁶Mɛgi hio wan-nɛtom nɛ hio kotowi wesara may hazu ki goto wen ɛngɛ.

⁷Nɛ ka mbwa sio kafɛ nɛdɔka, Pierre guotɛ tɔ ha mbwa: «Hio ya mi, ɛnɛ ingɔ nde, yo tɛ bo nê ngimɔ nɛdɔka, ka Sɔ saa mi ha soko ɛnɛ hazu bul *Dede Wen ha wi ndɔng, ka bo nê zuife na, tuka nde, mbwa aze yo nɛ mɛkiri Jésus.

⁸Nɛ Sɔ, ka ingɔ sila wi fɛt, gbasa nde, a mɛkara mbwa nɛ wal haa *Nzɔy-Sɔtɛ ha mbwa fin, gbesi tuka ka wɛnɛ baha ha ɔ.

⁹Sɔ tɛ gba soko ɔ hinɛ mbwa na. A sasasa sila mbwa hazu mbwa mɛkara Jésus.

¹⁰Hazu ge ɛnɛ ha wea sila Sɔ sising nɛ wal gdea zio toy ha zu wi ndɔng ge nde? Ngase hio ngbabafa ɔ, ngase ɔ, tɛ lɛm toy yo na.

¹¹Ma, ɔ mɛkara nde, Sɔ kpasasa ɔ nɛ wal *dede sila pɛ *Kongawan Jésus gbesi tuka mbwa fin.»

¹²Nɛ wi fɛt ka wesara may haki kara selele. Mbwa fɛt lɛnga zala ha tɛ Barnabas hinɛ Paul ha tɔa wen *mɔweka nɛ *mɔkifi, ka Sɔ dea nɛ wal mbwa ha soko hio wi ndɔng, ka bo nê zuife na.

¹³Ka mbwa karsa tɔa wen, Jacques kɔa nɛ tɔa: «Hio ya mi, ɛnɛ ze mi!

¹⁴Simon baa kasi ha ɔ sising mɛng Sɔ bhɔngara sɔngsi bhee mɛ weki ma kandɔ pɛa ha soko ɛ ndɔng, ka bo nê zuife na.

¹⁵Kasi ɛngɛ lɛma nɛ hio wen, ka hio *wan-tɔkuliwen bangɛriki:

¹⁶‹Kongawan tɔa: Hapata ɛngi, mi bekifiri bin, nɛ twa pɛ David ka bagbin, mi bebɛ yo nɛ mbinga. Mi begu yangala twa ɛngɛ gde ha ngɔn, mi beyolsi yo fin,

¹⁷tuka nde, hio olo wi fɛt nɛ hio kandɔ fɛt, ka mi basa mɛ tɛ hio wi pɔm, aki mi, Kongawan. Mi bede mɔ ndɔng,

¹⁸ka mi bagbasi sɔngsi bhee.›»

¹⁹Nɛ Jacques tɔa fin: «Mɛgi, mi kpaa nɛdedea nde, hio wi ka bo nê zuife na, nɛ ka kiforo sila ha Sɔ, akpa yeksamɔ na.

²⁰Ma, ɔ ngɛriki sɔna ha mbwa nde, mbwa azim sari, ka ɛ haa nɛ sadaka ha hio gbele sɔ. Nde, ka mbwa ade wanza na. Nde, mbwa azim sari ka tɔktɛ wa tɛ sɛ fɛt na. Nɛ nde, ka mbwa ayɔng tɔk sari na.

²¹Hazu angiri nɛ ngimɔ pɛ hio ngbabafa ɔ, ɛ bulo mbonga ndɔng pɛ Moïse ha zang hio le fɛt, nɛ ha *swe ɔmtɛ fɛt, ɛ tɔla yo nɛnɛ ha zang hio *twa gɔ Sɔ.»

²²Hio wan-nɛtom, hio kotowi nɛ *giliwi mɔ eglize fɛt zɔka nɛdedea mɛ weki hio ma wi ha soko mbwa hazu tomsi ha Antioshe hinɛ Paul nɛ Barnabas. Mbwa weka Jude, ka ɛ sa nde Barsabas, nɛ Silas. Wi ndɔng bwa dungɔ nɛ zioa ha li mbwa.

²³Mbwa ngɛraka ma takarata gde ha kɔ wi ndɔng. Yo tɔa mɛgɛ: «Ɔ, hio wan-nɛtom nɛ hio kotowi fɛt, ɔ fana hio ya ɔ, ka bo nê zuife na, ka dung ha le Antioshe, ha kandɔnu Siri nɛ ha kandɔnu Silisi.

²⁴Ɔ zea nde, hio ma wi ha soko ɔ hɔa ha pɛ ɛnɛ nɛ tɔa ma wen ka bhunzoko nɛ gdangsa sila ɛnɛ. Ɔ tɛ haa nu ha mbwa mɛ tɔ wen mɛgi na.

²⁵Hazu ɛngi, ɔ kpoa zuwen nɛ sila ndang mɛ weki hio ma wi, nɛ tomsi mbwa ha pɛ ɛnɛ hinɛ hio ndɔngsila ɔ, Paul nɛ Barnabas,

²⁶ka kpɔya mɔ ha fio ha dea tom pɛ *Kongawan pɛ ɔ, Jésus-Christ.

²⁷Mɛgi, ɔ tomsa Jude nɛ Silas ha pɛ ɛnɛ. Mbwa betɔ ha ɛnɛ nɛ tɛ mbwa mɔ ka ɔ ngɛraka hakɛ.

²⁸*Nzɔy-Sɔtɛ nɛ ɔ fɛt zɔka nde, yo bo nɛ dedea mɛ gde ma zio toy ha zu ɛnɛ na. Yo sɔna nê mɔ ndɔng, ka lɛma:

²⁹Ɛnɛ azim sari, ka ɛ haa nɛ sadaka ha hio gbele sɔ. Ka ɛnɛ ayɔng tɔk sari na. Ɛnɛ azim fin sari ka tɔktɛ wa tɛ sɛ fɛt na. Ka ɛnɛ ade wanza na. Ka ɛnɛ pama mɔ ndɔng, ɛnɛ bede mɔ nɛdedea. Ɔ fana ɛnɛ fɛt.»

³⁰Mɛgi, hio wan-nɛkasara ndɔng nar pena. Ka mbwa hɔa ha Antioshe, mbwa wesara hio wi pɛ Christ fɛt, nɛ haa takarata ɛngɛ ha mbwa.

³¹Mbwa tɔla yo, nɛ mbwa dea totɛ pentɛ hazu yo haa da ha mbwa.

³²Nɛ Jude nɛ Silas, ka dungɔ fin nê hio *wan-tɔkuliwen, mboa hio ya ndɔng nɛ dɔka wen hazu ngasisi mɛkaramɔ pɛ mbwa.

³³Mbwa dungɔ haki ma ngimɔ, hapata hio ya ndɔng kɛatɛ nɛ mbwa nde, mbwa asi nɛ gaamɔ ha pɛ hio wi ndɔng, ka batomsi mbwa. [

³⁴Ma, Silas ngoya pɛa mɛ bhɔn haki.]

³⁵Paul nɛ Barnabas bhɔna ha Antioshe. Mbwa hinɛ dɔka hio ma wi osa nɛ bulo *Dede Wen pɛ Kongawan.

³⁶Hio ma yala hapata, Paul tɔa ha Barnabas: «Ɔ kifiri nɛ, nɛ zɔk hio ya ɔ ha hio le fɛt, ka ɔ babul wen pɛ *Kongawan ang, hazu zɔk mana mbwa dung mɛng.»

³⁷Barnabas ngoya kuo Jean, ka ɛ sa fin nde Marc, nɛnɛ hinɛ mbwa.

³⁸Ma, Paul kpaa nde, yo bo nɛdedea mɛ ku wɛnɛ nɛnɛ ha yali na, hazu a bayumɔ lak mbwa gde ha Panfili, nɛ a tɛ nɛ ha tom hinɛ mbwa fin na.

³⁹Mɛgi, mbwa zanga wen nɛkpasa ha soko may, nɛ mbwa kɛtana soko. Barnabas kuo Marc, nɛ mbwa lea kuga hazu nɛ ha kisi Shipre.

⁴⁰Paul nɛ pɛa tɛ weka Silas. Ka hio wi pɛ Christ gɔa Sɔ mɛ de *dede sila ha tɛ mbwa, mbwa pena.

⁴¹Mbwa gɔna kandɔnu Siri nɛ Silisi nɛ ngasasa hio wi mɔ hio eglize haki.