Read south west gbaya Deamɔ 19 Bible Online

Deamɔ 19 - south west gbaya bible

Deamɔ 19

¹Ha ngimɔ ka Apolos dungɔ ha Korente, Paul pena nɛ wal kuso bhandi mɔ kandɔnu Azi hɔ ha Efeze. A kpaa hio ma wi haki, ka mɛkara Jésus, nɛ wɛnɛ ana mbwa:

²«Ɛnɛ kpaa *Nzɔy-Sɔtɛ ha ngimɔ, ka ɛnɛ mɛkara Jésus nde?» Mbwa kiforo wen ha wɛnɛ: «Way, ɔ tɛ ing ma mɔ sɔngsi nde, Nzɔy-Sɔtɛ, na.»

³A ana fin: «Ɛ gdumso ɛnɛ ha li mɛng?» Mbwa kiforo wen: «Ɛ gdumso ɔ ha li lɛm nɛ osamɔ pɛ *Jean wan-gdumsiwi.»

⁴Nɛ Paul tɔa: «Jean gdumso nɛ wi ndɔng, ka mɛkara mɛ kifiri sila mbwa. Nɛ wɛnɛ tɔa ha hio wi mɔ kandɔ *Israel nde, mbwa amɛkiri wi, ka betɛ ha pata wa. Wi ɛngɛ nê Jésus.»

⁵Ka mbwa zea wen ɛngɛ, Paul gdumso mbwa ha li nɛ ling *Kongawan Jésus.

⁶Paul gdea kɔ ha zu mbwa, nɛ Nzɔy-Sɔtɛ zilo ha zu mbwa. Mbwa angara wolamɔ nɛ hio nu pɛ Nzɔy-Sɔtɛ, nɛ mbwa tɔa kuliwen.

⁷Dɔka wei ndɔng fɛt dungɔ lɛm bhukɔ gbala bwa.

⁸Paul nɛa ha *twa gɔ Sɔ, nɛ ha zang kilize tar fɛt, a dungɔ ha bulo wen nɛ da hazu wen *Kongakandɔ pɛ Sɔ. A kio wal mɛ gan zu hio wi nde, mbwa amɛkiri wen pɛa.

⁹Ma, hio ma wi dea nga zu, nɛ mbwa kafa mɛkara Jésus. Mbwa tɔa nyalɔ wen ha li giliwi fɛt sungiri osamɔ hazu wal pɛ Kongawan Jésus. Mɛgi, Paul gɔna soko hinɛ mbwa. A kaya hio *wan-yambimɔ pɛ Jésus gde nɛtɛ. Nɛ swe fɛt, wɛnɛ dungɔ ha osamɔ ha twa yambimɔ pɛ Tiranos.

¹⁰Paul osamɔ mɛgi lɛm kili bɛlɛ bwa. Tuka ɛngi, hio wi mɛ kandɔnu Azi fɛt zea wen pɛ Kongawan, ngase hio *zuife, ngase hio wi mɔ hio olo kandɔ.

¹¹Nɛ wal Paul, Sɔ dea hio *mɔkifi, ka wi tɛ zɔk sɔngsi na.

¹²Ɛ dungɔ ha kuo hio la gok zu nɛ hio ma bebe la, ka ndɔa tɛ Paul, gde ha zu wan-zɛlɛ. Mɛgi, hio zɛlɛ kara nɛ hio gdanga sɔtɛ fɛt gboa ha tɛ mbwa.

¹³Hio ma wan-nganga *zuife ka dungɔ ha ndota ha hio bhandi nɛtɛ-nɛtɛ, wea yinɔ hio gdanga sɔtɛ ha tɛ wi nɛ ling *Kongawan Jésus. Mbwa tɔa: «Mi ha nu nde, ɛnɛ agbo pen nɛ ling Jésus ɛngɛ, ka Paul ha tɔa wen pɛa.»

¹⁴Hio bewei mɔrkɔ zanga bwa pɛ ma gasa wan-hasadaka pɛ hio zuife, ling wa nde, Seva, dea fin mɛgi.

¹⁵Ma, gdanga sɔtɛ tɔa ha mbwa: «Mi ingɔ Jésus, nɛ mi ingɔ Paul. Ma, ɛnɛ nê o?»

¹⁶Nɛ wi, ka gdanga sɔtɛ ha tɛ wa, kpera tek ha zu mbwa nɛ ngaya pɛa pena mbwa. Mɛgi, mbwa yuomɔ pen ha twa pɛa nɛ sɔngɛrɛ, nɛ dalɛ ha tɛ mbwa.

¹⁷Ka hio wi mɛ Efeze, hio zuife nɛ hio wi mɔ olo kandɔ, zea kasia, ke baa mbwa fɛt, nɛ mbwa lukoso ling Kongawan Jésus.

¹⁸Hio dɔka wi ka mɛkara Jésus, tɛa tɛ gbasi tom nganga, ka mbwa ha dea, ha li hio wi fɛt.

¹⁹Hio dɔka wi ka dea tom nganga sɔngsi, kuo takarata nganga pɛ mbwa tɛ besisi ha we ha li wi fɛt. Ɛ tɔla gɛnɛ takarata ndɔng fɛt, nɛ ɛ kpaa nde, mbɔlia lɛma nɛ mbɔli bubolo tomay bhukɔa mɔrkɔ.

²⁰Tuka ɛngi, wen pɛ Sɔ yambala dam bhandi fɛt, nɛ yo gbasa ziomɔ pɛ Kongawan.

²¹Hapata mɔ ndɔng, Paul bheka mɛ gɔn hio kandɔnu Masedoane nɛ Akai hazu kifiri si ha Jérusalem. A tɔa: «Ka mi hɔa haki, dea nde, mi apen fin nɛ ha gasa le Rome.»

²²Nɛ a tomsa hio wan-gbakiri wɛnɛ bwa, Timothée nɛ Eraste, nɛ ha Masedoane. Ma, Paul bhɔna pɛa ha kandɔnu Azi lɛm nɛ ma ngimɔ.

²³Ha ngimɔ ɛngi, hio gasa woto-wotomɔ angara ha wen osamɔ hazu wal pɛ *Kongawan Jésus.

²⁴Ma wan-doy bubolo dungɔ ang, ling wa nde Demetrius. A dungɔ ha doya hio bebe twa nɛ bubolo, ka baa may nɛ *gasa twa sɔ bhoko Artemis. Wɛnɛ nɛ hio wan-tom pɛa dungɔ ha kpaa mbɔli nɛ wal tom ɛngɛ pentɛ.

²⁵A wesara hio wan-tom ndɔng, tɛ ba hio wi, ka de ndangtɛ tom ɛngɛ, nɛ tɔa ha mbwa: «Hio dan mi, ɛnɛ ingɔ nɛdedea nde, yo nɛ wal tom ɛngɛ ka ɔ kpa nɛ mɔ.

²⁶Ma, ɛnɛ ha zea nɛ zɔka Paul ha tɔa nde, sɔ ka ɛ dea nɛ kɔ, yo bo nê kpasa sɔ na. A gana zu wi nɛdɔka nde, mbwa amɛkiri wen pɛa. A dea mɛgi bo sɔna ha Efeze na, ma, mɛ lɛm nɛ kandɔnu Azi fɛt.

²⁷Ɛngɛ lɛma mɛ gdangsi tom pɛ ɔ. Yo bo sɔna nê ɛngɛ na, ma, hio wi bezɔk twa gasa sɔ bhoko Artemis tuka gbelemɔ. Sising, hio wi mɛ Azi nɛ nzan fɛt ha lukoso Artemis, ma, hio wi lɛm ba fin wɛnɛ nɛ kongaa na.»

²⁸Ka hio wi ndɔng zea mɛgi, sila mbwa yimɔ, nɛ mbwa angara gdɔra: «Artemis mɔ Efeze nê gasa sɔ!»

²⁹Mɛgi, zang le ɛngi fɛt bhunzoko. Hio wi fɛt sɔawi ha gasa bhandi de saka. Ha liwal mbwa baa hio sɔy-yali pɛ Paul bwa, Gaius nɛ Aristarke, hio wi mɛ Masedoane, nɛnɛ haki.

³⁰Paul ngoya mɛ nɛ, nɛ gbasi tɛ ha li giliwi, ma, hio *wan-yambimɔ pɛ Jésus dolsa wɛnɛ.

³¹Hio ma wan-le mɔ Azi, ka dungɔ nê dan mɛ Paul, pio kasara mɛ mbo wɛnɛ nde, ka wɛnɛ anɛ ha gasa bhandi de saka na.

³²Ha bhandi ɛngi, hio wi dea woto-wotomɔ. Mbwa dungɔ ha gdɔra nɛtum-nɛtum, nɛ sulo mbwa ing fin goto wesara may pɛ mbwa na.

³³Hio *zuife kuo Alexandre gde ha li giliwi. Nɛ hio ma wi mɛ zugili tɔa goto wesara may ɛngɛ ha wɛnɛ. Mɛgi, Alexandre pɛbhaka kɔ hazu a ngoya lea gdong wen pɛ hio zuife ha li wi fɛt.

³⁴Ma, ka giliwi ingɔ nde, wɛnɛ nê zuife, mbwa gdɔra gbɔɔ mɛ lɛm ngonga bwa nɛ tɔa: «Artemis mɔ Efeze nê gasa sɔ.»

³⁵Ha kpogioa, wan-ngɛrikimɔ mɔ le Efeze gaya giliwi nɛ tɔa: «Ɛnɛ hio wi mɛ le Efeze, hio wi fɛt ingɔ nde, le Efeze nê bhandi pam twa gasa sɔ Artemis nɛ zizi tɛ wa, ka guotɛ ha ngɔn tek ha nu.

³⁶Ma wi ndang lɛm sikafɛ ang na. Mɛgi, ɛnɛ kari sɛm yu nde, ɛnɛ betɛ de mɔ nɛtum.

³⁷Hio wi ndɔng, ka ɛnɛ kaya tɛnɛ hakɛ, mbwa tɛ zu mɔ ha zang twa sɔ na, nɛ mbwa tɛ fɛngsi sɔ bhoko pɛ ɔ na.

³⁸Ka Demetrius nɛ hio wan-tom pɛa nɛ ma wen sungiri nɛ ma wi, dea nde, mbwa aku wena nɛnɛ ha li kita, hazu swe kita ang nɛ hio wan-gɔn kita ang fin.

³⁹Nɛ ka ɛnɛ nɛ ma wen fin, wesara may pɛ hio *wan-kpo zuwen begɔn soko wena lɛm nɛ *mbonga pɛ ɔ.

⁴⁰Ka bo mɛgi na, gɔfɔrma mɔ Rome lɛma fundi ɔ hazu woto-wotomɔ ka hɔa swe mɛsɛ. Nɛ ɔ lɛm ing wen ngangi tɛ ɔ na, hazu goto wesara may ɛngɛ bona.»

⁴¹Nɛ ka wɛnɛ tɔa mɛgi kari, a haa nu nde, wi fɛt asi.