Read south west gbaya Deamɔ 23 Bible Online

Deamɔ 23 - south west gbaya bible

Deamɔ 23

¹Paul zɔka hio wan-kpo zuwen gdoo, nɛ a tɔa: «Hio ya mi, ingɔmɔ sila pɔm gbasa ha mi nde, swe fɛt, mi dungɔ nɛdedea ha li Sɔ gbo ha swe mɛsɛ.»

²Ananias, *wan-zu hio wan-hasadaka, haa nu ha hio wi hapɛtɛ Paul mɛ mɛl nu wa.

³Nɛ Paul tɔa ha wɛnɛ: «Mɛ, gdanga ngeng nɛ bu bhondo ha tɛa. Sɔ bemɛl mɛ fin! Mɛ dungɔnu hazu gɔn kita ha zu mi lɛm nɛ *mbonga. Ma, mɛ tukolo mbonga nɛ tɛ mɛ, hazu mɛ haa nu nde, ɛ amɛl mi.»

⁴Wi ndɔng, ka dung hapɛtɛ Paul, gbaa tazu wa: «Pangay, mɛ ha fɛngsa wan-zu hio wan-hasadaka pɛ Sɔ!»

⁵Paul kiforo wen: «Hio ya mi, mi tɛ ing nde, wɛnɛ nê wan-zu hio wan-hasadaka, na. Hazu ɛ ngɛraka ha zang takarata pɛ Sɔ nde, ka mɛ atɔ gdanga wen ha tɛ wan mɔ zu kandɔ pɛ mɛ na.»

⁶Paul ingɔ nde, hio ma wan-kpo zuwen nê zugili *Sadusien, nɛ hio ma nê zugili *Farizien. Mɛgi, a gdɔra ha mbwa nɛ ngagɛl: «Hio ya mi, mi nê tɛ Farizien, bezang pɛ hio Farizien. Ɛ gdea mi hakɛ ha li kita hazu mi mɛkara nde, hio fiowi begutɛ.»

⁷Ka wɛnɛ tɔa mɛgi, hio Farizien nɛ hio Sadusien angara mɔya ha soko may, nɛ mbwa kɛtana soko.

⁸Hio Sadusien tɔ pɛ mbwa nde, hio fiowi lɛm gutɛ na. Nɛ nde, hio *telenge nɛ hio sɔtɛ bona. Ma, hio Farizien mɛkara pɛ mbwa nde, hio mɔ ndɔng fɛt ang.

⁹Hio wi fɛt angara gdɔra nɛ ngaya. Mɛgi, hio ma *wan-osi mbonga mɔ zugili Farizien, guotɛ nɛ mbwa sio kafɛ nɛ ngaya nɛ tɔa: «Ɔ tɛ kpa ma gdangamɔ ha tɛ wei kɛ ndang na. Mana ma telenge, mana ma sɔtɛ wolamɔ ha wɛnɛ.»

¹⁰Ka woto-wotomɔ tɛ bo nɛngaya, ke baa gasa kagama-bulo nde, mbwa betɛ gdɛri soko Paul nɛ kɔ may. Mɛgi, a haa nu nde, hio wan-bibulo atɛ tɛ zin wɛnɛ ha soko mbwa sinɛ ha zang kin.

¹¹Ha zɛ mɔ pata, *Kongawan gbasa tɛ ha Paul nɛ tɔa: «Mɛ ba da! Gbesi tuka ka mɛ kɛa nɛ wen pɔm hakɛ ha Jérusalem, dea ka de nde, mɛ akɛ fin wen pɔm ha Rome gbesi.»

¹²Ka mɔ saa nɛ sutole, hio ma zuife aa gdungi tɛ Paul. Mbwa kanamɔ nɛ gɔna nu nde, mbwa lɛm yɔng mɔ nɛ nɔ mɔ na, kanɛ mbwa gbɛa wɛnɛ.

¹³Dɔka wi ndɔng, ka aa gdungi tɛ Paul, pena bhukɔa nar.

¹⁴Mbwa nɛa ha pɛ hio gasa wan-hasadaka nɛ hio kotowi nɛ tɔa ha mbwa: «Ɔ kanamɔ nɛ gɔna nu nde, ma mɔ ndang lɛm ndɔ nu ɔ na, kanɛ ɔ gbɛa Paul.

¹⁵Mɛgi, ɛnɛ nɛ hio *wan-kpo zuwen fɛt, ɛnɛ de mbɔlɛ nɛ tɔ ha gasa kagama-bulo mɔ Rome nde, ɛ aku Paul tɛnɛ, ka ɛnɛ aki goto wen pɛa. Pɛ ɔ, ɔ bedung gdungɛ-gdungɛ mɛ gbɛ wɛnɛ sɔngsi nde, wɛnɛ ahɔ hakɛ.»

¹⁶Ma, beyang mɛ Paul zea tɔa gdungi ɛngɛ, nɛ wɛnɛ nɛa nɛ le zang kin pɛ hio wan-bibulo nɛ tɔa wena ha Paul.

¹⁷Ka Paul zea mɛgi, a saa ma kagama-bulo nɛ tɔa ha wɛnɛ: «Mɛ ku pɔlɔmbɔ wei ɛngɛ nɛnɛ ha pɛ gasa kagama-bulo. Wɛnɛ nɛ ma wen mɛ tɔ ha wɛnɛ.»

¹⁸Kagama-bulo ngbɔsa pɔlɔmbɔ wei ɛngɛ nɛnɛ ha pɛ gasa kagama-bulo nɛ tɔa: «Paul, wan-zɔbhɔ saa mi nɛ tɔa ha mi nde, mi aku pɔlɔmbɔ wi ɛngɛ tɛnɛ ha mɛ hazu wɛnɛ nɛ ma wen mɛ tɔ ha mɛ.»

¹⁹Mɛgi, gasa kagama-bulo baa ndɔngkɔ pɔlɔmbɔ wei ɛngɛ nɛ daka tɛ hinɛ wɛnɛ. A ana wɛnɛ: «Mɛ ngoy tɔ nɛ nge wen ha mi ge?»

²⁰A kiforo wen: «Hio zuife kpoa zuwen mɛ de mbɔlɛ tɛ ani mɛ nde, mɛ aku Paul nɛ mɔsaa nɛnɛ ha li hio wan-kpo zuwen hazu nde, mbwa a-ani goto wen pɛa nɛkpasa.

²¹Ma, ka mɛ aze wen pɛ mbwa na, hazu hio wi pen bhukɔa nar aa baka zengi nɛ wɛnɛ. Mbwa kanamɔ nɛ gɔna nu nde, mbwa lɛm yɔng mɔ nɛ nɔ mɔ na, kanɛ mbwa gbɛa Paul. Mbwa tɛ bo gdungɛ-gdungɛ, mbwa keri sɔna nɛ wen nu mɛ.»

²²Nɛ gasa kagama-bulo tɔa ha pɔlɔmbɔ wei ɛngɛ: «Kpɛ-kpɛ-kpɛ, ka mɛ atɔ ha ma wi nde, mɛ tɔa yo ha mi, na. Mɛ si nɛdedea.»

²³Gasa kagama-bulo saa kagama-bulo bwa nɛ a tɔa ha mbwa: «Ɛnɛ wesiri hio wan-bibulo gɔmmay bwa, nɛ hio wan-dang yanga bhukɔa mɔrkɔ zu bhuze bwa, nɛ hio wan-sɛ gɔmmay bwa. Ɛnɛ fɛt abhɔngiri tɛ ɛnɛ mɛ pen nɛ ha le Sezare nɛ zɛ mɛsɛ ha ngonga mɔrkɔ zanga nar.

²⁴Ɛnɛ abhɔngiri fin hio ma yanga mɛ toy Paul. Nɛ ɛnɛ aku wɛnɛ nɛnɛ ha li gɔfɔrma Félix nɛ dede tɛ.»

²⁵Hapata, a ngɛraka ma takarata mɛgɛ:

²⁶«Mi, Claude Lisias, mi fana konga gɔfɔrma Félix.

²⁷Hio *zuife baa wei ɛngɛ, nɛ mbwa dungɔ sanga hapɛtɛ gbɛa wɛnɛ. Mi hinɛ hio wan-bibulo pɔm, ɔ zinɔ wɛnɛ ha kɔ mbwa yunɛ, hazu mi zea nde, wɛnɛ nê bele mɔ Rome.

²⁸Mi kuo wɛnɛ gde ha li hio *wan-kpo zuwen pɛ hio zuife, hazu ing goto wen, ka mbwa fundo nɛ wɛnɛ.

²⁹Mi kpaa nde, mbwa fundo wɛnɛ sɔna hazu wen *mbonga pɛ mbwa. Mi tɛ kpa ma mɔ, ka lɛma nɛ fio mana zɔbhɔ na.

³⁰Ka mi kpaa kasara nde, hio zuife aa gdungi tɛ wa, mi tomsa wɛnɛ nɛhasa ha pɛ mɛ. Mi haa fin nu ha hio wan-fundi wɛnɛ hazu nɛ nɛ tɔ wen, ka sungiri wɛnɛ ha li mɛ.»

³¹Hio wan-bibulo dea mɔ lɛm nɛ haanu pɛ gasa kagama-bulo: Mbwa kuo Paul nɛ zɛ nɛnɛ ha le Antipatri.

³²Ka mɔsaa, hio wan-dang yanga tongara hinɛ Paul, nɛ hio oloa kiforo pe ha kin pɛ mbwa.

³³Ka mbwa hɔa ha Sezare, mbwa haa takarata ha gɔfɔrma, nɛ mbwa osa Paul ha wɛnɛ fin.

³⁴Ka gɔfɔrma tɔla takarata ɛngɛ, a ana Paul: «Mɛ nê wi mɔ nge kandɔnu ge?» Nɛ Paul tɔa: «Mi nê wi mɔ kandɔnu Silisi.»

³⁵A tɔa ha wɛnɛ: «Mi beani mɛ, ha ngimɔ ka hio wan-fundi mɛ behɔ.» Hapata, a haa nu nde, ɛ apam Paul ha twa zɔbhɔ mɔ gasa kin pɛ *kongapora Herode.