Read south west gbaya Deamɔ 26 Bible Online

Deamɔ 26 - south west gbaya bible

Deamɔ 26

¹Agripa tɔa ha Paul: «Mi ha mɛ ngimɔ hazu kɛ wen tɛ mɛ.» Paul pɛa kɔ nɛ a kɛa wen tɛ wa mɛgɛ:

²«Kongapora Agripa, mɛsɛ mi nɛ totɛ mɛ kɛ wen tɛ mi ha li mɛ hazu mɔ fɛt, ka hio *zuife fundi nɛ mi.

³Mi nɛ totɛ pen fɛt, hazu mɛ ingɔ hio ndɔki deamɔ nɛ hio mɔ sikafɛ pɛ hio zuife nɛkpasa. Mɛgi, mi alnu ha mɛ nde, mɛ aba sila mɛ nɛ ze wen pɔm.

⁴«Hio zuife fɛt ingɔ deamɔ pɔm nisi ha pɔlɔmbɔ tɛ, hazu mi dungɔ ha soko kandɔ pɔm nɛ ha Jérusalem angiri ha bosi ngimɔ.

⁵Mbwa ingɔ mi bhee. Ka mbwa ngoya, mbwa betɔ ha mɛ nde, mi dungɔ nê wi mɔ zugili *Farizien. Hio Farizien ha pama mɔ Sɔ pɛ ɔ nɛngaya pentɛ pet.

⁶Sising, mi yol hakɛ ha li kita hazu mi gdea tazu mi ha gɔnanu, ka Sɔ bagɔn ha hio ngbabafa ɔ.

⁷Hio nugala bhukɔ gbala bwa mɔ kandɔ pɛ ɔ, *Israel, ha gdea tazu nde, mbwa bezɔk swe, ka Sɔ belɛmsiri nɛ gɔnanu pɛa. Yo nê ɛngi, ka mbwa ha dea tom Sɔ nɛ lululu sila swe nɛ zɛ. Kongapora Agripa, hio zuife fundo mi hazu mi ha gdea tazu mi gbesi.

⁸Hazu ge ɛnɛ, hio zuife, ha takara nde, Sɔ tunsi hio fiowi na, ge nde?

⁹«Sɔngsi, mi takara pɔm nde, yo nɛdedea nde, mi abi bulo nɛ wal nɛtɛ-nɛtɛ fɛt sungiri nɛ hio wi ka mɛkara Jésus, wi mɛ Nazaret.

¹⁰Nɛ mi dea mɛgi ha Jérusalem. Hio gasa wan-hasadaka haa ziomɔ ha mi, nɛ mi baa hio wi, ka mɛkara Jésus, nɛdɔka pi ha twa zɔbhɔ. Nɛ mi mɛkara ka ɛ gɔna kita fio ha zu mbwa.

¹¹Mi dungɔ ha nɔsasa mbwa mɛ lak mɛkara Jésus gde nɛ wal ndulso mbwa nɛ zambala ha hio *twa gɔ Sɔ. Tuka mi dungɔ nɛ gdanga ngambi sungiri nɛ mbwa, mi namala mbwa hɔ ha hio gɔn-gɛnɛ le.

¹²«Ma swe, mi nɛa ha Damas, hazu hio gasa wan-hasadaka haa mi tom nɛ ziomɔ mɛ namili hio wi pɛ Christ.

¹³*Kongapora Agripa, ka mi boka ha liwal, ka swe tɛ bo ha sila zu, ma gasa saamɔ pen saamɔ swe zilo ha ngɔn tɛ, tɛ ba zikiri mi hinɛ hio sɔy-yali pɔm.

¹⁴Ɔ fɛt teka ha nu, nɛ mi zea ma gɛl ha wolamɔ ha mi nɛ nu *Hebro nɛ tɔa: ‹Saul, Saul, mɛ namili mi hazu ge? Mɛ kimbili mɛ gan zu mi hazu ge? Nday lɛm gan zu wan wa na.›

¹⁵Mi anamɔ: ‹*Kongawan, mɛ nê o?› Nɛ Kongawan kiforo wen: ‹Mi nê Jésus, ka mɛ ha namala.

¹⁶Ma, mɛ gutɛ yol ha ngɔn. Mi gbasa tɛ mi ha mɛ hazu weki mɛ tuka wan-tom pɔm. Mɛ zɔka mi swe mɛsɛ. Mɛ bebul wena nɛ fin wen mɔ ka mi beosi ha mɛ bin.

¹⁷Mi betomsi mɛ ha pɛ hio *zuife nɛ ha soko hio olo kandɔ. Nɛ mi bepam mɛ sungiri nɛ mbwa.

¹⁸Mi betomsi mɛ hazu gbosisi gbali mbwa nde, mbwa agbo ha tutum tɛ ha saamɔ, gbo ha si ziomɔ pɛ *Satan tɛ ha pɛ Sɔ. Ka mbwa mɛkara mi, mi bebisi *sɛmbɔ pɛ mbwa, nɛ mi begde mbwa ha soko hio nzɔy wi pɛ Sɔ.›»

¹⁹«Mɛgi, *kongapora Agripa, mi tɛ de kpandele sungiri nɛ zizimɔ ɛngɛ ka zilo ha ngɔn tɛ na.

²⁰Ma, ha bosia, mi bulo wen ha hio wi mɛ Damas nɛ hio wi mɛ Jérusalem. Hapata fin ha hio wi mɛ kandɔnu Judée nɛ hio wi mɔ hio olo kandɔ nde, mbwa akpali deamɔ pɛ mbwa nɛ kifiri tɛ ha pɛ Sɔ, nɛ mbwa ade mɔ, ka osi nde, mbwa kiforo sila nɛkpasa.

²¹Yo nê hazu ɛngi, ka hio *zuife baa mi ha zang *gasa twa Sɔ, nɛ ka mbwa kio wal mɛ gbɛ mi.

²²Ma, Sɔ ha pama mi hɔ ha swe mɛsɛ, nɛ mi bhɔna ka ha bulo wen ha hio konga wi nɛ hio fabha wi gbesi. Hio *wan-tɔkuliwen hinɛ Moïse batɔ wen mɔ ka behɔ. Nɛ mi tɔ kanɛ ndangtɛ wen ɛngɛ nde,

²³*Mesi bekpa yimtɛ, nɛ a bedung nê bosi wi, ka begutɛ ha soko hio fiowi. A bebul wen *mɔkpasi ha kandɔ zuife nɛ ha hio olo kandɔ fin. Nɛ wen ɛngɛ bedung tuka saamɔ hazu mbwa.»

²⁴Ka Paul boka ha kɛa wen tɛ wa, Festus tɔa nɛ ngagɛl: «Paul, bili ha dea mɛ! Yamba mɔ pentɛ dea bili ha zu mɛ.»

²⁵Ma, Paul tɔa: «Konga Festus, bili de mi na. Wen ka mi ha tɔa nê tɛwen nɛ mbaramɔ.

²⁶*Kongapora Agripa ingɔ mɔ ndɔng kari. Yo nê ɛngi, ka mi wolmɔ ha wɛnɛ nɛ da. Mi ingɔ nɛdedea nde, ma mɔ ndɔng ndang wusi tɛ ha li wa na, hazu mɔ ndɔng tɛ pen ha tutum na.

²⁷Kongapora Agripa, mɛ mɛkara wen pɛ hio *wan-tɔkuliwen, na nde? Mi ingɔ nde, mɛ mɛkara yo.»

²⁸Agripa tɔa ha Paul: «Ngbɔla ngɛt sising nde, mɛ agan zu mi mɛ tɛ wi pɛ Christ.»

²⁹Paul kiforo wen: «Ngase angbɔl ngɛt, mana nɛdɔka, yo de mɔ na. Mi ha gɔa Sɔ nde, mɛ, tɛ ba nɛ hio wi fɛt ka ze mi mɛsɛ, atɛ gbesi tuka mi. Ma, bo nɛ gbazɔbhɔ ha kɔ na.»

³⁰Mɛgi, kongapora Agripa, gɔfɔrma Festus, Berenise, nɛ hio wi mɔ pɛtɛ tɛ mbwa fɛt guotɛ.

³¹Nɛ ka mbwa daka tɛ, mbwa tɔa ha soko may: «Wei kɛ tɛ de ma mɔ ndang, ka lɛma nɛ fio mana zɔbhɔ na.»

³²Nɛ Agripa tɔa ha Festus: «Ɔ lɛma dak kɔ ha tɛ wa, ma, a ngoya nde, kongapora Sezar agɔn kita ha zu wa.»