Read south west gbaya Deamɔ 28 Bible Online

Deamɔ 28 - south west gbaya bible

Deamɔ 28

¹Ka ɔ kpɔya ha ngamɔ ɛngɛ kari, ɔ zea nde, ling kisi ɛngɛ nê Malte.

²Hio wi mɛ kisi ɛngɛ dea ngay ha tɛ ɔ, nɛ mbwa baa ɔ nɛ dede kɔ. Mbwa lɛa gasa we ha ɔ, hazu kolo dungɔ ha ɔla, nɛ gangmɔ ang pentɛ.

³Paul wesara hio sɛkɛ-sɛkɛ gua nɛdɔka a ha we. Ka gbɛngamɔ lea soko gua, ma gɔk gboa ha sokoa gɔm kɔ wa nɛ gɛa ha yo ndɛlɛng.

⁴Ka hio wi mɛ kisi ɛngɛ zɔka gɔk ha kɔ Paul ndɛlɛlɛ, mbwa tɔa ha soko may: «Tɛwen, wi kɛ nê nagbɛwi. A kpɔya mɔ ha li, ma, sɔ kundiki mɔ pɛ ɔ tɛ ngoy nde, wɛnɛ adung nɛ zutunɔ na.»

⁵Mɛgi, Paul ngbanzala gɔk ɛngɛ pi ha li we, nɛ wɛnɛ tɛ kpa gdangamɔ ndang na.

⁶Hio wi ndɔng dungɔ ha kera nde, mana tɛ Paul beha, mana a betek ha nu nɛhasa fe. Mbwa kera mɔ ngimɔ nɛzikoa gan, nɛ mbwa zɔka nde, ma gdangamɔ tɛ hɔ ha tɛ wa na. Mɛgi, mbwa kpala takaramɔ, nɛ mbwa tɔa: «Wɛnɛ nê ma sɔ.»

⁷Sanga nɛ bhandi ɛngi, gasa nu fɔ pɛ wan-le kisi ɛngɛ dungɔ ang. Ling wia nde Publius. A baa ɔ nɛ dede kɔ, nɛ a pama ɔ ha zang twa pɛa lɛm yala tar.

⁸Bafa mɛ Publius ɔanu nɛ zɛlɛ bawetɛ nɛ sɔa tɔk. Paul lea pimbi pɛa, gdea kɔ ha tɛ wa, gɔa Sɔ, nɛ kpasasa wɛnɛ.

⁹Hapata ɛngi, hio olo wan-zɛlɛ mɛ kisi ɛngɛ tɛa ha pɛa, nɛ a kpasasa mbwa.

¹⁰Hio wi mɛ kisi ɛngɛ lukoso ɔ nɛ wal nɛtɛ-nɛtɛ. Nɛ ka ɔ ha pena, mbwa haa ɔ hio mɔ fɛt ka kɔpa ɔ hazu yali.

¹¹Kilize tar hapata hɔa ha kisi Malte, ɔ pena nɛ ma kuga ka guotɛ ha Alezandri, nɛ ka pensa ngimɔ gangmɔ ha kisi ɛngɛ. Ling kuga nde, hio sɔ bedan.

¹²Kuga bhanda ha le Sirakus, nɛ ɔ dea yala tar haki.

¹³Angiri haki, ɔ baa pɛtɛ nu bɛlɛ nɛnɛ hɔ ha le Rezio. Ka mɔsaa, bok mɔ wal gdɔk swe guotɛ. Mɛgi, ɔ dea sɔna nɛ yala bwa mɛ hɔ ha le Puzole.

¹⁴Ɔ kpaa hio ya ha Christ haki. Nɛ mbwa alanu nde, ɔ ade dimasi ndang hinɛ mbwa. Yo dungɔ mɛgi, ka ɔ nɛa ha Rome.

¹⁵Hio ya ha Christ mɔ Rome zea kasi tɛ ɔ, nɛ mbwa wea si ɔ tɛnɛ. Hio ma tɛa kanɛ bhandi zando pɛ Apius, nɛ hio ma kanɛ bhandi, ka ɛ sa nde, twa gɛnɛ tar. Ka Paul zɔka mbwa, tɛ wa ngaya nɛ a lukoso Sɔ.

¹⁶Ka ɔ hɔa ha Rome, ɛ haa wal ha Paul mɛ ɔ ha ma twa nɛtɛ. Nɛ ma wan-bibulo ndang ha pɛm wɛnɛ haki.

¹⁷Hapata yala tar, Paul saa hio gasa wi pɛ hio *zuife mɔ Rome ha pɛa. Ka mbwa wesara may, Paul tɔa ha mbwa: «Hio ya mi, mi tɛ de ma gdangamɔ ndang sungiri nɛ kandɔ *Israel, mana sungiri nɛ ndɔki deamɔ pɛ hio ngbabafa ɔ na. Ngase ɛngi, ɛ baa mi ha Jérusalem gde ha kɔ hio wi mɔ Rome.

¹⁸Hio wi mɔ Rome ana mi, nɛ mbwa tɛ kpa ma gdangamɔ ha zu mi, ka lɛma nɛ kita fio ndang na. Mɛgi, mbwa ngoya daksa kɔ ha tɛ mi.

¹⁹Ma, hio ma zuife sungoro wen ɛngɛ. Yo nê mɔ ɛngɛ ka nɔsasa mi mɛ ani nde, *kongapora Sezar agɔn kita ha zu mi. Ma, mi bo nɛ ma mɔ mɛ fundi nɛ kandɔ pɔm na.

²⁰Mɛgi, mi saa ɛnɛ hazu tɔ ha ɛnɛ nde, mi dung sising nɛ gbazɔbhɔ ɛngɛ hazu mi bulo wen mɔ, ka kandɔ Israel fɛt gde tazu ha zua.»

²¹Hio zuife ndɔng tɔa ha wɛnɛ: «Ɔ tɛ kpa ma takarata pɛ hio wi mɔ Judée hazu mɛ na. Ma ya ɔ ndang tɛ hɔ hakɛ tɛ ba kasi tɛ mɛ, mana tɛ tɔ gdanga wen ha tɛ mɛ na.

²²Ma, ɔ ngoya ze hio takaramɔ pɛ mɛ. Hazu, ha bhandi fɛt, hio wi ha sungoro zugili ɛngɛ ka mɛ ha sokoa.»

²³Nɛ ka yala ka mbwa baweki ha Paul lɛma kari, mbwa tɛa ha twa pɛa nɛdɔka pen mɔ sɔngsi. A bulo wen *Kongakandɔ pɛ Sɔ ha mbwa, nɛ a kio wal mɛ gan zu mbwa nde, mbwa amɛkiri Jésus. A osa mɔ nɛ sutole kanɛ zɛ nɛ wal tɔla hio ma ngɛrakamɔ ha zang *mbonga pɛ Moïse nɛ ha zang takarata pɛ hio *wan-tɔkuliwen.

²⁴Hio ma mɛkara hio wen, ka wɛnɛ tɔa, nɛ hio ma kafa yo.

²⁵Mbwa tɛ ze may na. Mɛgi, sɔngsi kɛtana soko, Paul tɔa ha mbwa sɔna: «Wen ka *Nzɔy-Sɔtɛ batɔ ha hio ngbabafa ɛnɛ nɛ wal nu wan-tɔkuliwen Esaïe, yo tɛ bo nê tɛwen.

²⁶A batɔ: ‹Mɛ nɛ, nɛ tɔ ha hio wi mɛ kandɔ ɛngɛ: Ɛnɛ belɛngi zala, ma, ɛnɛ lɛm ze mɔ na. Ɛnɛ begɛri mɔ, ma, ɛnɛ lɛm zɔk mɔ na.

²⁷Hazu sila wi mɔ kandɔ ɛngɛ tɛ bo gdingbiti. Mbwa gdɔka zala mbwa nɛ li mbwa tuka nde, li mbwa azɔk mɔ na, nɛ zala mbwa aze mɔ na, nɛ sila mbwa aing gotomɔ na. Yu nde, mbwa betɛ kifiri sila mbwa nɛ mi betɛ kpasisi mbwa.›»

²⁸Paul tɔa fin: «Mɛgi, ɛnɛ aing nde, Sɔ tomsa wen ɛngɛ ha hio olo kandɔ nde, a bekpasisi mbwa. Pɛ mbwa, mbwa beze.» [

²⁹Ka Paul tɔa wen ndɔng kari, hio zuife angara zanga wen ha soko may si nɛ.]

³⁰Paul ɔa ha zang twa ɛngɛ, ka wɛnɛ futi nɛ mbɔli lɛm kili bɛlɛ bwa. Nɛ wɛnɛ baa hio wi fɛt ka tɛa ha pɛa nɛ dede kɔ.

³¹A dungɔ ha bulo wen Kongakandɔ pɛ Sɔ, nɛ ha osa mɔ nɛ da hazu *Kongawan Jésus-Christ. Nɛ ma wi ndang dol wɛnɛ na.