Read south west gbaya Deamɔ 4 Bible Online

Deamɔ 4 - south west gbaya bible

Deamɔ 4

¹Hio wan-hasadaka, nɛ kagama pɛ hio nasara pam *gasa twa Sɔ, nɛ hio *Sadusien hɔa hapɛtɛ Pierre nɛ Jean, ha ngimɔ ka mbwa boka ha wolamɔ ha hio wi.

²Sila wi ndɔng dungɔ ha yimɔa hazu hio *wan-nɛtom ndɔng bwa osamɔ ha hio wi nde, hio wi fɛt begutɛ fin hapata fio hazu Jésus guotɛ ha soko hio fiowi kari.

³Nɛ mbwa baa Pierre nɛ Jean pi ha twa zɔbhɔ, keri nɛ mɔsaa hazu mbolo dea kari.

⁴Ma, dɔka wi ka zea osamɔ pɛ mbwa mɛkara Jésus. Mɛgi, *giliwi mɔ eglize yɛbha pentɛ. Dɔka hio wei ha soko mbwa tɛ bo lɛm nɛ tomay mɔrkɔ.

⁵Ka mɔsaa nɛ sutole, hio *wan-kpo zuwen fɛt wesara may ha Jérusalem. Yo nê hio wan-le pɛ hio *zuife, hio kotowi nɛ hio *wan-osi mbonga.

⁶Anne, *wan-zu hio wan-hasadaka, dungɔ ang, tɛ ba Kaife, Jean, Alexandre nɛ hio olo nam fɛt pɛ wan-zu hio wan-hasadaka.

⁷Mbwa gdea Pierre nɛ Jean ha li mbwa nɛ ana mbwa: «Ɛnɛ kpasasa wi ɛngɛ nɛ nge ziomɔ ge? Ɛnɛ de yo nɛ ling o?»

⁸Pierre dona nɛ *Nzɔy-Sɔtɛ, a tɔa ha mbwa: «Ɛnɛ hio wan-le nɛ hio kotowi mɛ kandɔ pɛ ɔ,

⁹ɛnɛ ha ana ɔ mɛsɛ hazu dedemɔ ka ɔ dea ha tɛ kumɔ wi ɛngɛ, nɛ ɛnɛ ana ɔ fin mɛng ka zɛlɛ pɛa kara.

¹⁰Lɛma nde, ɛnɛ hinɛ kandɔ *Israel fɛt aing nde, wi kɛ ka dung ha li ɛnɛ, Sɔ kpasasa wɛnɛ nɛ wal ziomɔ pɛ ling Jésus-Christ, wi mɛ Nazaret. Yo nê ndangtɛ Jésus, ka ɛnɛ ngbaa ha getakate, nɛ ka Sɔ guo wɛnɛ ha soko hio fiowi.

¹¹Ɛ ngɛraka ha zang takarata pɛ Sɔ hazu Jésus nde: ‹Ta ka ɛnɛ, hio wan-bɛ twa, mulo pi, yo tɛ bo nê ta tɔn ngbili twa.›

¹²«Yo nê Jésus ndang sɔna ka lɛma mɛ kpasisi hio wi. Ha nzan fɛt, Sɔ tɛ gbasi ma mbing wi ka lɛma mɛ kpasisi ɔ ndang na.»

¹³Ka hio wan-kpo zuwen zɔka da pɛ Pierre nɛ Jean, mbwa yaksa, hazu mbwa ingɔ nde, wi ndɔng bwa nê hio gele wi ka tɛ yambi dɔka mɔ na. Ma, mbwa ingɔ nde, wi ndɔng bwa badung hinɛ Jésus.

¹⁴Mbwa kpa fin ma wen mɛ tɔ ha Pierre hinɛ Jean na, hazu mbwa zɔka wi ka zɛlɛ pɛa kara ha yola hapɛtɛ mbwa.

¹⁵Mɛgi mbwa haa nu nde, ɛ gde hio wan-nɛtom ndɔng ha dɛl ing. Nɛ hio wan-kpo zuwen ndɔng angara zanga wen ha soko may

¹⁶nɛ tɔa: «Ɔ bede mɛng nɛ wi ndɔng ge nde? Hazu hio wi ha Jérusalem fɛt ingɔ nɛdedea nde, mbwa dea *mɔweka ɛngɛ. Nɛ ɔ lɛm kafi wena fin na.

¹⁷Ma, lɛma nde, wen mɔ ɛngɛ ayɛbhi ha soko kandɔ pen mɔ sɔngsi na. Mɛgi, ɔ besɛn wen ha mbwa nɛngaya tuka nde, mbwa atɔ wen nɛ ling Jésus ha ma wi fin na.»

¹⁸Nɛ mbwa saa fin nɛ mbinga Pierre nɛ Jean, nɛ haa nu ha mbwa nde, ka mbwa awolmɔ nɛ aosimɔ nɛ ling Jésus fin na.

¹⁹Ma, Pierre nɛ Jean kiforo wen ha mbwa: «Yo nê nzeng ha li Sɔ nde, ɔ aze nu ɛnɛ pen zea nu Sɔ nde? Ɛnɛ gɔn soko wen ɛngɛ nɛ pɛ ɛnɛ tɛ.

²⁰Pɛ ɔ, ɔ lɛm lak bulo wen mɔ, ka ɔ zɔka nɛ zea, gde na.»

²¹Hio wan-kpo zuwen sɛna wen ha mbwa fin nɛngaya. Hapata, mbwa daka kɔ ha tɛ mbwa. Mbwa tɛ kpa wal mɛ ndulsi hio wan-nɛtom ndɔng na, hazu hio wi fɛt lukoso Sɔ hazu mɔ ka hɔa.

²²Wi kɛ ka zɛlɛ pɛa kara, bɛlɛ pɛa pena bhukɔa nar.

²³Ka ɛ gbosasa Pierre nɛ Jean ha twa zɔbhɔ kari, mbwa sio hapɛtɛ hio olo wi pɛ Christ. Mbwa baa kasi mɔ fɛt ka hio gasa wan-hasadaka nɛ hio kotowi tɔa ha mbwa.

²⁴Nɛ ka hio wi pɛ Christ zea wen ndɔng, mbwa fɛt gɔa Sɔ nɛ sila ndang nɛ tɔa: «*Kongawan, yo nê mɛ ka dea ngɔn nɛ nu, nɛ nana-litɔng nɛ hio mɔ fɛt ka dung ang.

²⁵Nɛ wal *Nzɔy-Sɔtɛ pɛ mɛ, mɛ bagde wen ha nu ngbabafa ɔ, David, wan-tom pɛ mɛ. Mɛ batɔ nɛ wal nu wa: ‹Hazu ge hio mbing kandɔ de woto-wotomɔ, nɛ mbwa ha bhɔngara wen mɛ de gombo mɔ ge nde?

²⁶Hio *kongapora mɔ nzan bhɔngara tɛ hazu bi bulo, nɛ hio wan-le wesara may sungiri nɛ Kongawan Sɔ hinɛ *Mesi pɛa.›

²⁷«Yo nê kpasawen, Herode nɛ Ponse Pilate, nɛ hio wi mɛ mbing kandɔ, nɛ hio wi mɛ kandɔ *Israel, wesara may fɛt hakɛ ha Jérusalem sungiri nɛ Jésus, nzɔy wan-tom pɛ mɛ, ka mɛ hɔnga tuka Mesi.

²⁸Mɛgi, mbwa lɛmsara hio mɔ fɛt, ka mɛ babhɔngiri sɔngsi nɛ wal ngatɛ pɛ mɛ. Mɛ ngoya nde, mɔ ahɔ tuka ɛngɛ.

²⁹Nɛ sising, Kongawan, mɛ ze wen pɛ mbwa nde, mbwa bede ngamɔ ha tɛ ɔ. Mɛ ngasisi ɔ, hio wan-tom pɛ mɛ, ka ɔ abul wen pɛ mɛ nɛ da.

³⁰Mɛ ha ngatɛ ha ɔ ka ɔ akpasisi hio wan-zɛlɛ, nɛ ka ɔ ade hio *mɔweka nɛ *mɔkifi nɛ ling Jésus, nzɔy wan-tom pɛ mɛ.»

³¹Ka mbwa karsa gɔa Sɔ, nu yaka ha bhandi ka mbwa dungɔ ang. Mbwa fɛt dona nɛ Nzɔy-Sɔtɛ, nɛ mbwa bulo wen pɛ Sɔ nɛ da.

³²Giliwi ka mɛkara Christ dungɔ nɛ sila ndang, nɛ takaramɔ ndang. Ma wi ndang tɛ tɔ nde, mɔ pɛa nɛ pɛa gbatɛ, na. Ma, kpaamɔ ndɔng nɛ pɛ mbwa fɛt gbesi.

³³Hio *wan-nɛtom kɛa nɛ bulo wen nɛ gasa ziomɔ nde, *Kongawan Jésus guotɛ ha soko hio fiowi. Nɛ Sɔ dea *dede sila gdang ha tɛ mbwa fɛt gbi.

³⁴Mɛgi, mɔ kɔpi ma wi ndang na, hazu ɛ ndɔng ka dungɔ nɛ twa mana fɔ, gdonga yo nɛ kuo mbɔlia tɛnɛ

³⁵ha pɛ hio wan-nɛtom. Nɛ mbwa kapana yo ha wi ndang ndang fɛt, lɛm nɛ mɔ ka kɔpa mbwa.

³⁶Ma bezang pɛ Lévi ang, ling wa nde, Joseph. Ɛ bhɛa wɛnɛ ha Shipre. Hio wan-nɛtom haa ma ling wa nde, Barnabas, ka tɔ nde, wan-yɔkili wi.

³⁷A gdonga fɔ pɛa nɛ kuo mbɔlia tɛnɛ ha pɛ hio wan-nɛtom.