Read south west gbaya Rome 10 Bible Online

Rome 10 - south west gbaya bible

Rome 10

¹Hio ya mi, mɔ ka mi ngoya pentɛ nɛ ka mi gɔ Sɔ hazua, yo nde, wɛnɛ akpasisi hio zuife.

²Hazu mi ingɔ nde, mbwa nɛ tɛ hɛl mɛ de tom Sɔ. Ma, mbwa ing tɛ kpasa wal mɛ de nɛ yo na.

³Mbwa ing wal ka Sɔ gde nɛ wi nzeng ha li wa, na. Mbwa kimbolo mɛ weki wal pɛ mbwa nɛ tɛ mbwa. Mɛgi, mbwa kafa wal ka Sɔ gde nɛ wi nzeng ha li wa.

⁴Yo nê Christ ka lɛmsara goto mbonga pɛ Moïse. Hio wi fɛt ka mɛkiri Christ tɛ bo nê *nzeng wi ha li Sɔ.

⁵Moïse bangɛriki wen hazu wi ndɔng ka ngoy dung nzeng ha li Sɔ nɛ wal pama *mbonga. A bangɛriki mɛgɛ: «Wi ka de mɔ fɛt lɛm nɛ wen mbonga, a bedung nɛ zutunɔ ha wena.»

⁶Ma, wen hazu wi ndɔng ka dung nzeng ha li Sɔ nɛ wal mɛkara wɛnɛ, yo nde: «Mɛ akarsi anamɔ nde, o ha bedang si ha ngɔn, o nde?» Hazu, danga si ha ngɔn mɛ ku Christ zil nɛ, yo lɛm fin na.

⁷Nɛ mɛ akarsi fin anamɔ nde: «O ha bezil ha si nu ha bhandi ka hio fiowi dung ang, o nde?» Hazu, ziloa ha si nu mɛ ku Christ ha soko hio fiowi dang nɛ, yo lɛm fin na.

⁸Ey, wen hazu wi ndɔng ka mɛkiri Sɔ, yo nde: «Wen pɛ Sɔ sanga-sanga nɛ mɛ, yo ha zang nu mɛ, yo ha zang sila mɛ.» Ɛngɛ nê wen mɛkaramɔ ka ɔ bul ha hio wi.

⁹Ka mɛ gbasi nɛ nu mɛ long nde, Jésus nê *Kongawan, nɛ ka mɛ mɛkiri ha zang sila mɛ nde, Sɔ guo wɛnɛ ha soko hio fiowi, mɛgi Sɔ bekpasisi mɛ.

¹⁰Kpasawen, wi ka mɛkiri Sɔ nɛ sila wa fɛt, Sɔ begde wɛnɛ nzeng ha li wa. Nɛ wi ka gbasi mɛkaramɔ pɛa nɛ nu wa long, Sɔ bekpasisi wɛnɛ.

¹¹Yo gbesi tuka ɛ ngɛraka ha takarata pɛ Sɔ nde: «Wi ndang ndang fɛt ka mɛkiri wɛnɛ, foy lɛm de mbwa na.»

¹²Mɛgi, Sɔ gba soko hio *zuife nɛ hio olo kandɔ na. Hazu Kongawan pɛ mbwa fɛt ka nê ndang sɔna. Wɛnɛ ha kapana yɛbha kpaamɔ pɛa ha wi fɛt ka sa ling wa.

¹³Yo gbesi tuka ɛ ngɛraka ha takarata pɛ Sɔ: «Wi fɛt ka sa ling Kongawan, bekpasi.»

¹⁴Ma, mbwa besa ling wa mɛng, ka mbwa tɛ mɛkiri wɛnɛ na? Mbwa bemɛkiri wɛnɛ mɛng, ka mbwa tɛ ze wen tɛ wa na? Mbwa beze wen tɛ wa mɛng, ka ma wi tɛ bul wena na?

¹⁵Nɛ ɛ bebul wena mɛng, ka ɛ tɛ tomsi wan-bul wena na? Yo gbesi tuka ɛ ngɛraka ha takarata pɛ Sɔ: «Yo nê gasa totɛ mɛ zɔk wi ndɔng ka ku dede kasi tɛnɛ.»

¹⁶Ma, yo bo nê wi fɛt ka mɛkara *Dede Wen na. Yo nê ɛngi, ka *wan-tɔkuliwen Esaïe batɔ: «Kongawan, nge wi ha mɛkiri kasi wen ka ɔ tɔa, ge nde?»

¹⁷Mɛgi, wi bemɛkiri Christ nɛ wal zea kasi. Nɛ kasi ɛngɛ, yo nê wen tɛ Christ.

¹⁸Mɛgi, mi ani mɔ nde, hio zuife tɛ ze kasi na, kpasawen nde? Dalo, mbwa zea yo. Yo gbesi tuka ka ɛ ngɛraka ha takarata pɛ Sɔ: «Hio wi zea gɛl hio wan-nɛkasara dam zu nu fɛt, hio wen pɛ mbwa hɔa ha kpogio nzan.»

¹⁹Mi ani mɔ fin nde, hio zuife tɛ ze zang kasi ɛngɛ na, kpasawen nde? Dalo, mbwa zea. Hazu Sɔ batɔ nɛ wal nu Moïse: «Mi bede nde, ɛnɛ ade silamɔ sungiri nɛ kandɔ ka bo nê kpasa kandɔ na. Mi bede nde, ɛnɛ ade ngambi sungiri nɛ kandɔ ka bo nɛ mbaramɔ na.»

²⁰Nɛ wal nu Esaïe Sɔ batɔ nɛ da fin: «Hio wi ndɔng ka tɛ ki mi na, yo nê mbwa ha zɔk mi. Mi gbasa tɛ mi ha wi ndɔng ka tɛ ani mɛ zɔk mi na.»

²¹Ma, ka bo nê pɛ kandɔ *Israel, Sɔ batɔ: «Swe fɛt, nɛ sutole tee kanɛ mbolo, mi yafafa kɔ mi mɛ kpasisi kandɔ ɛngɛ. Ma, mbwa bhɔna ha dea kpandele, nɛ mbwa bhɔna ha sio kafɛ ha nu mi.»