Read south west gbaya Rome 11 Bible Online

Rome 11 - south west gbaya bible

Rome 11

¹Mɛgi, mi ani mɔ nde, Sɔ mulo nɛ kandɔ pɛa pi nde? Way! A tɛ de mɛgi na. Hazu mi fin, mi nê kandɔ *Israel, bezang pɛ Abraham. Ɛ bhɛa mi ha nugala pɛ Benjamin.

²Kandɔ pɛa ka wɛnɛ baweki sɔngsi bhee, Sɔ tɛ mul mbwa pi na. Takarata pɛ Sɔ tɔa wen hazu *wan-tɔkuliwen *Elie, ka taatɛ ha Sɔ hazu gdanga deamɔ pɛ kandɔ Israel. Bo nê ɛnɛ ingɔ wen ɛngɛ na nde? A tɔa:

³«*Kongawan, mbwa gbɛa hio wan-tɔkuliwen pɛ mɛ. Mbwa yangala hio bhandi ha sadaka pɛ mɛ. Wi ndang ka bhɔna, yo nê mi sɔna. Nɛ mbwa ha kio wal mɛ gbɛ mi.»

⁴Ma, Sɔ kiforo wen ha wɛnɛ: «Mi kuo hio wi tomay mɔrkɔ zanga bwa gde nɛtɛ hazu mi. Wi ndɔng tɛ ngbi zigolo ha si gbele sɔ Baal na.»

⁵Yo fin gbesi ha ngimɔ ɛngɛ sising. Hio ma zuife tikiring ang ka Sɔ weka mbwa gde nɛtɛ nɛ wal *dede sila pɛa.

⁶A weka mbwa bo hazu dede deamɔ pɛ mbwa na, ma, a weka mbwa nɛ wal dede sila pɛa. Ka bo se mɛgi na, ki dede sila pɛ Sɔ bo fin nê dede sila nɛkpasa na.

⁷Ɛngi tɔ nde ge? Yo tɔ nde, mɔ ka kandɔ Israel dungɔ ha kioa, mbwa tɛ kpa yo na. Yo sɔna nê ɛ ndɔng ha soko mbwa ka Sɔ weka, ha kpa yo. Ka bo nê pɛ hio oloa, sila mbwa tɛ bo nɛ ngaya.

⁸Yo gbesi tuka ɛ ngɛraka ha takarata pɛ Sɔ: «Sɔ gdɔka takaramɔ pɛ mbwa nde, ka mbwa aing mɔ na. A gdɔka li mbwa nde, ka mbwa azɔk mɔ na. A gdɔka zala mbwa nde, ka mbwa aze mɔ na. Nɛ gbo ha swe mɛsɛ, mbwa bhɔna ka mɛgi.»

⁹*Kongapora David tɔa fin: «Yɔngamɔ yenga pɛ mbwa, akpali tɛ dung yɔk nɛ sak ka ba mbwa. Yo adung mɔ kɔ nanga mbwa, nɛ mɔ ndulsi mbwa.

¹⁰Li mbwa agdɔki nde, mbwa azɔk fin mɔ ndang na. Yeksamɔ asusi gdong mbwa kpoo.»

¹¹Mɛgi, mi ani mɔ fin nde, hio zuife kɔa nanga tuka nde, mbwa atek tek bhɔn nde? Way! Mbwa tɛ tek bhɔn na. Ma, nɛ wal kafa nu Sɔ pɛ hio zuife, hio olo kandɔ kpaa wal nde, Sɔ akpasisi mbwa. Mɔ hɔa mɛgi tuka nde, hio zuife ade silamɔ tɛ hio olo kandɔ.

¹²Hio wi mɔ nzan kpaa dedemɔ hazu hio zuife kafa nu Sɔ. Hio olo kandɔ kpaa dedemɔ hazu hio zuife dea kpandele. Mɛgi, pen fin pet, hio wi ndɔng bekpa fin dedemɔ pen mɔ sɔngsi, ha ngimɔ ka hio zuife fɛt bekifiri sila mbwa.

¹³Sising, mi wolmɔ ha ɛnɛ, ka bo nê zuife na. Mi nê *wan-nɛtom ka Sɔ tomsa ha hio kandɔ ka bo nê zuife na. Nɛ mi nɛ totɛ hazu tom pɔm.

¹⁴Mi ngoya nde, hio zuife, kandɔ pɔm, ade silamɔ tɛ hio olo kandɔ. Mɛgi, ka wal ang, mi bekpasisi hio ma ha soko mbwa nɛ wal silamɔ pɛ mbwa.

¹⁵Ha ngimɔ ka Sɔ mulo nɛ hio zuife pi, a bhɔngara wen ha soko wa hinɛ hio olo wi mɔ nzan. Nɛ ngimɔ ka Sɔ beba hio zuife nɛ dede kɔ nɛ mbinga, yo bedung mɛng? Yo bedung tuka mbombe tunɔ hazu hio fiowi.

¹⁶Ka ma wi ku bosi yɔngamɔ ha Sɔ, yo tɔ nde, olo yɔngamɔa fɛt bedung ka fin nê pɛ Sɔ. Nɛ ka gunkute dung nê pɛ Sɔ, yo tɔ nde, hio gbakɔa bedung ka fin nê pɛ Sɔ.

¹⁷Kandɔ *Israel, hio zuife, dung tuka dede te olive ka ɛ gunɔ ha zang fɔ, nɛ ka ɛ gɔna hio ma gbakɔa yunɛ. Nɛ mɛ, ka bo nê zuife na, mɛ dung tuka ma gbakɔte ka dung ha zang bɛlɛ, nɛ ka ɛ gɔna ndari ha li bhandi dede gbakɔte ɛngɛ. Mɛgi, mɛ tɛ bo ha kpaa ndangtɛ li te ka gutɛ ha gunte ɛngɛ.

¹⁸Hazu ɛngi, ka mɛ abhɛsiri hio gbakɔte ka ɛ gɔna na. Mɛ sutɛ mɛ hazu ge? Mɛ nê gbakɔte sɔna. Yo bo nê mɛ ka toy hio olo gbakɔa na, ma, yo nê gunte ha toy hio gbakɔa.

¹⁹Mɛ bekifiri wen ha mi nde: «Zɔk! Sɔ gɔna hio gbakɔte ndɔng yunɛ tuka nde, mi aba bhandia.»

²⁰Ey, yo nê kpasawen. Sɔ gɔna mbwa yunɛ hazu mbwa tɛ mɛkiri wɛnɛ na. Ka bo nê pɛ mɛ, Sɔ ndara mɛ ha lia hazu mɛ mɛkara wɛnɛ. Mɛgi, ka mɛ sutɛ mɛ hazu ɛngi na. Ma, mɛ yu nɛ ke Sɔ.

²¹Pangay, ka Sɔ tɛ pam hio zuife ka dung nê hio tɛ kpasa gbakɔte na, a lɛma de gbesi nɛ mɛ, na nde?

²²Mɛ ing nde, Sɔ nê wan-de *dede sila, nɛ wɛnɛ fin nê wan-gɔn kita nɛngaya. A gɔn kita nɛngaya ha zu wi ndɔng ka lak wal pɛa gde. Pɛ mɛ, wɛnɛ ha dea dede sila ha tɛ mɛ. Ma, dea ka de nde, mɛ abhɔn ka ha gdea tazu mɛ ha dede sila pɛa. Ka bo mɛgi na, ki a begɔn mɛ yunɛ fin.

²³Ma, ha ngimɔ ka hio zuife bekifiri sila mbwa ha Sɔ, wɛnɛ bendari mbwa fin nɛ mbinga ha tɛ gunte ka mbwa badung ang sɔngsi. Kpasawen, wɛnɛ nɛ ngatɛ mɛ de yo.

²⁴Mɛ, ka bo nê zuife na, mɛ dung tuka gbakɔte ka ɛ gɔna ha ma te olive ha zang bɛlɛ. Sɔ ndara mɛ ha tɛ dede te olive ka ɛ gunɔ ha zang fɔ, ngase ka deamɔ mɛgi bo nɛ wala na. Tuka ɛngi, yo bedung nɛhasa hazu Sɔ mɛ ndari hio zuife nɛ mbinga ha tɛ dede te olive ɛngɛ, ka mbwa dung nê hio tɛ gbakɔa.

²⁵Hio ya mi, mi ngoya nde, ɛnɛ aing goto wen wuso ɛngɛ ka Sɔ gbasa sising, yu nde ɛnɛ betɛ sutɛ ɛnɛ tuka hio wan-mbarimɔ. Wena nde, sila hio ma bhalkɔ kandɔ *Israel nɛ ngaya, nɛ yo bebhɔn mɛgi hɔ ha ngimɔ ka li hio dɔka wi mɔ hio olo kandɔ ka Sɔ kpasasa dama may.

²⁶Ha ngimɔ ɛngi, Sɔ bekpasisi hio wi mɔ Israel fɛt mburr gbesi tuka wɛnɛ tɔa ha zang takarata pɛa: «*Wan-yangi wi begutɛ ha le *Sion tɛnɛ. A bekusi kpandele ka hio bezang pɛ Jacob dea sungiri nɛ Sɔ yunɛ.

²⁷Nɛ mi belɛmsiri *mbon ka mi nɔa hinɛ mbwa, ha ngimɔ ka mi bebisi *sɛmbɔ pɛ mbwa yunɛ.»

²⁸Hio zuife tɛ bo nê ngana pɛ Sɔ hazu mbwa kafa *Dede Wen. Mɔ hɔa mɛgi tuka nde, Sɔ akpasisi ɛnɛ ka bo nê zuife na. Ma, mbwa bhɔna nê hio ndɔngsila Sɔ, ka wɛnɛ weka gde tuka kandɔ pɛa, hazu a bagɔn nu mɛgi ha hio ngbabafa mbwa.

²⁹Kpasawen, ka Sɔ saa ma wi, nɛ ka wɛnɛ haa dedemɔ ha wia kari, a kpali yo fin na.

³⁰Ha ngimɔ sɔngsi, ɛnɛ bakafi nu Sɔ. Ma, sising Sɔ tɛ bo ha dea kobhe tɛ ɛnɛ hazu hio zuife kafa nu wa kari.

³¹Yo dung fin gbesi nê hio zuife, ha ngimɔ ɛngɛ sising yo nê mbwa ka kafi nu Sɔ. Mɛgi, Sɔ tɛ bo ha dea kobhe tɛ ɛnɛ. Ma, Sɔ bede bin kobhe tɛ mbwa fin.

³²Kpasawen, Sɔ gdea wal ha hio wi fɛt mɛ kafi nu wa tuka nde, wɛnɛ ade kobhe tɛ mbwa fɛt.

³³Woo! Hio dedemɔ ka Sɔ de nɛ gasaa pentɛ. Wɛnɛ nɛ mbaramɔ nɛ ingɔmɔ pen fɛt. Mɔ ka wɛnɛ takiri ha zang sila wa, gotoa pena zu ingɔmɔ pɛ wi. Nɛ ma wi ka being wal deamɔ pɛa ndang bona.

³⁴Yo gbesi tuka ɛ ngɛraka ha takarata pɛ Sɔ: «Ma wi ndang ing mɔ ka Sɔ takiri na. Ma wi ndang lɛm mbo wɛnɛ na.

³⁵Nge wi ka haa ma mɔ ha Sɔ ka nɔsisi Sɔ mɛ kpe yo, o nde?»

³⁶Kpasawen, yo nê Sɔ ka dea mɔ fɛt. Mɔ fɛt dung ang nɛ wal wɛnɛ, nɛ yo fɛt hazu wa. *Lɛkɛ-lɛkɛmɔ ha kɔ Sɔ kpoo nɛ kpoo. Amen.