Read south west gbaya Rome 12 Bible Online

Rome 12 - south west gbaya bible

Rome 12

¹Hio ya mi, Sɔ dea *dede sila ha tɛ ɔ, mɛgi mi mbo ɛnɛ nde, ɛnɛ aha tɛ ɛnɛ fɛt ha Sɔ tuka nzɔy sadaka ka dung nɛ tunɔ. Tili sadaka ɛngɛ ha totɛ ha wɛnɛ. Ɛngɛ nê tɛ kpasa wal pɛ ɛnɛ mɛ de tom Sɔ.

²Ka ɛnɛ azɔk nɛ ndɔki deamɔ pɛ wi mɔ nzan hazu de nɛ pɛ ɛnɛ na. Ma, ɛnɛ gde Sɔ aha ɛnɛ mbombe ndɔki takaramɔ hazu kpali ɛnɛ nɛ mbombe wi. Ka ɛnɛ de mɛgi, ɛnɛ being gbaa soko mɔ ka Sɔ ngoy. Wɛnɛ ngoy mɔ ka dung nɛ dedea, ka ha totɛ ha wɛnɛ, nɛ ka lɛm wɛɛ.

³Nɛ wal dede sila ka Sɔ dea ha tɛ mi, mi tɔ ha ɛnɛ ndang ndang fɛt nde, ka ɛnɛ aba tɛ ɛnɛ tuka gasa wi nɛ gbelea na. Ma, ɛnɛ atakiri mɔ nɛ mɛndi. Dea nde, ɛnɛ ndang ndang fɛt aweki tɛ ɛnɛ lɛm nɛ mɛkaramɔ ka Sɔ haa ha ɛnɛ.

⁴Kilitɛ wi nê ndang sɔna. Ma, hio gbakɔa ang nɛdɔka. Nɛ gbakɔtɛ ndang ndang fɛt nɛ li tom pɛ mbwa nɛtɛ-nɛtɛ.

⁵Yo fin gbesi nê ɔ. Ngase ɔ nɛ dɔkaa, ɔ tɛ bo nê kilitɛ ndang, hazu ɔ ha dea sɔy hinɛ Christ. Ɔ ha ndara ha tɛ may tuka hio gbakɔtɛ ndang.

⁶Nɛ wal dede sila pɛa, Sɔ haa ɔ hio tili ngatɛ nɛtɛ-nɛtɛ. Wi ka kpaa ngatɛ mɛ tɔ nɛ kuliwen, dea nde, wɛnɛ ade yo lɛm nɛ mɛkaramɔ pɛa.

⁷Wi ka kpaa ngatɛ mɛ gbakiri nɛ hio wi, dea nde, wɛnɛ agbakiri mbwa. Wi ka kpaa ngatɛ mɛ osi nɛ mɔ ha hio wi, dea nde, wɛnɛ aosi mɔ ha mbwa.

⁸Wi ka kpaa ngatɛ mɛ mbo nɛ hio wi, dea nde, wɛnɛ ambo mbwa. Wi ka kapini kpaamɔ pɛa, lɛma nde, wɛnɛ ade yo nɛ sila ndang. Wi ka dung ha zu wesara may, lɛma nde, wɛnɛ ade tom ɛngɛ nɛ sila wa fɛt. Wi ka de kobhe tɛ hio wan-ngɔtɛ, lɛma nde, wɛnɛ ade yo nɛ totɛ.

⁹Ɛnɛ ngoy hio wi nɛ ngoy ka bo nɛ sila bwa na. Ɛnɛ bhɛsiri dea gdangamɔ nɛkpasa. Nɛ ɛnɛ dolsi tɛ ɛnɛ ha mɔ ka dung nɛ dedea.

¹⁰Ɛnɛ ngoy may hɛrr tuka hio kpasa gdiya. Dea nde, ɛnɛ adung nɛ sila ɛnɛ fɛt ha tusoso tɛ may.

¹¹Ka ɛnɛ adung pɔsa wi na, ma ɛnɛ agbɛngsi tɛ ɛnɛ ha dea tom ha *Kongawan nɛ hafala tɛ.

¹²Ɛnɛ dung nɛ totɛ ha gdea tazu ɛnɛ ha tɛ Sɔ. Ɛnɛ dung nɛ yikosila ha zang yeksamɔ. Nɛ ɛnɛ dung nɛ nɔa nging ha gɔa Sɔ.

¹³Ɛnɛ gbakiri hio wi pɛ Sɔ ka mɔ kɔpa mbwa. Nɛ ɛnɛ ba hio gɛnɛ wi nɛ dede kɔ.

¹⁴Ɛnɛ wol dede wen ha zu wi ndɔng ka namili ɛnɛ. Lɛma nde, ɛnɛ awol dede wen, ka ɛnɛ afom wi na.

¹⁵Ka hio wi ha dea totɛ, ɛnɛ ade totɛ hinɛ mbwa. Nɛ ka hio ma wi ha hea kwa, ɛnɛ ahe kwa hinɛ mbwa.

¹⁶Ɛnɛ ze may ha soko ɛnɛ. Ka ɛnɛ asutɛ mɛ kafi ma bebe tom na. Ka ɛnɛ aba tɛ ɛnɛ tuka wi ka ing fɛt na.

¹⁷Ka ɛnɛ akifiri gdangamɔ ha wi ka dea gdangamɔ ha tɛ ɛnɛ na. Ɛnɛ ki wal mɛ de dedemɔ ha li hio wi fɛt.

¹⁸Pɛ ɛnɛ, ka wal ang, ɛnɛ adung nɛ gaamɔ hinɛ hio wi fɛt.

¹⁹Hio ndɔngsila mi, ka ɛnɛ nɛ pɛ ɛnɛ tɛ akundiki gdangamɔ ka ɛ dea ha tɛ ɛnɛ na. Ma, ɛnɛ gde ngambi pɛ Sɔ ade tom pɛa. Hazu Sɔ tɔa ha zang takarata pɛa: «Kongawan tɔa, mi bekundiki mɔ, mi bekpe mɔ.»

²⁰Ma, ɛnɛ de mɔ ka wɛnɛ tɔa fin: «Ka ngana pɛ mɛ nɛ wɔ, mɛ ha yɔngamɔ ha wɛnɛ ayɔng. Ka wɔ li dea wɛnɛ, mɛ ku li ha wɛnɛ anɔ. Hazu ka mɛ de dedemɔ mɛgi, foy bede wɛnɛ.»

²¹Ka ɛnɛ agde gdangamɔ agan zu ɛnɛ na. Ma, ɛnɛ gan zu gdangamɔ nɛ wal dea dedemɔ.