Read south west gbaya Rome 2 Bible Online

Rome 2 - south west gbaya bible

Rome 2

¹Mɛ ka gɔn kita ha zu hio ma mɛ, ngase mɛ dung mɛng, mɛ bo nɛ ma wen hazu ngangi nɛ tɛ mɛ na. Hazu mɛ fɛt, mɛ ha dea ndangtɛ gdangamɔ tuka mbwa. Mɛgi, ka mɛ gɔn kita ha zu mbwa, mɛ gɔn nɛ kita ha zu mɛ nɛ pɛ mɛ tɛ.

²Ɔ fɛt, ɔ ingɔ nde, hio wi ndɔng ka de tili mɔ mɛgi, Sɔ begɔn kita ha zu mbwa lɛm nɛ tɛwen.

³Mɛ ha gɔna kita ha zu hio wi ka de gdangamɔ, ma, mɛ ha dea ndangtɛ mɔ fin gbesi. Mɛgi, mɛ takiri pɛ mɛ nde, mɛ bekpɔy ha li kita pɛ Sɔ?

⁴Sɔ nê gasa wan-de dedemɔ, wan-yikosila nɛ wan-ba sila nɛ kɔ. Mana mɛ bhɛsiri wɛnɛ ha wena nde? Wɛnɛ de dedemɔ ha tɛ mɛ tuka nde, mɛ akifiri sila mɛ. Mɛ ingɔ mɛgi, na nde?

⁵Ma, mɛ ha ngasasa sila mɛ, nɛ mɛ ngoy kifiri sila mɛ na. Yo nê ɛngi ka mɛ kay ngambi pɛ Sɔ gde ha zu mɛ keri nɛ swe kita pɛa, ka wɛnɛ begbasi ngambi pɛa, nɛ ka wɛnɛ begɔn kita nzeng.

⁶Ha swe ɛngi, Sɔ bekɛ wi ndang ndang fɛt lɛm nɛ mɔ ka mbwa dea.

⁷Hio wi ndɔng ka de dedemɔ nɛ yikosila tuka nde, mbwa akpa ha kɔ Sɔ lukosomɔ, *lɛkɛ-lɛkɛmɔ, nɛ tunɔ ka bebhɔn, Sɔ beha mbwa *tunɔ kpoo.

⁸Ma, ka bo nê pɛ wi ndɔng ka zɔk sɔna nɛ tɛ mbwa, ka kafi tɛwen, nɛ ka nak pata gdangamɔ, Sɔ bede ngambi sungiri nɛ mbwa, nɛ a bendulsi mbwa.

⁹Hio *wan-de gdangamɔ fɛt bekpa yeksamɔ nɛ ngɔtɛ nɛkpasa ha kɔ Sɔ. Hio *zuife bekpa yo sɔngsi, nɛ hio olo kandɔ bekpa yo fin hapata.

¹⁰Ma, Sɔ beha lɛkɛ-lɛkɛmɔ, lukosomɔ nɛ gaamɔ ha hio wi fɛt ka de dedemɔ. Hio zuife bekpa yo sɔngsi, nɛ hio olo kandɔ bekpa yo fin hapata.

¹¹Kpasawen, Sɔ gba soko hio wi na.

¹²Hio wi ang ka ing *mbonga pɛ Moïse na. Ngase ɛngi, ka mbwa de gdangamɔ, mbwa fɛt bebhondi. Ma, pɛ hio wi ka ing mbonga pɛ Moïse, nɛ ka de gdangamɔ, Sɔ begɔn kita ha zu mbwa lɛm nɛ wen mbonga ɛngɛ.

¹³Wi ka ze mbonga nɛ zala sɔna, Sɔ lɛm gde wia nzeng ha li wa na. Ma, yo nê wi ndɔng ka de mɔ lɛm nɛ wen mbonga, ka Sɔ begde mbwa nzeng ha li wa.

¹⁴Hio olo kandɔ, mbwa ing mbonga pɛ Moïse na. Ngase ɛngi, hio ma ha soko mbwa ha dea mɔ lɛm nɛ wen mbonga. Ɛngi osi nde, mbwa nɛ tɛ mbwa ingɔ gbaa soko dedemɔ nɛ gdangamɔ.

¹⁵Deamɔ pɛ hio wi ndɔng gbasi nde, Sɔ ngɛraka mbonga pɛa gde ha zang sila mbwa. Ingɔmɔ sila nɛ takaramɔ pɛ mbwa gbasi mɛgi fin. Hazu, ma ngimɔ, mɔ ndɔng ha osa ha mbwa nde, mbwa dea dedemɔ, nɛ ma ngimɔ nde, mbwa dea gdangamɔ.

¹⁶Mɔ ndɔng ki fɛt begbo long ha swe ka Sɔ begɔn kita nɛ wal Jésus-Christ ha zu hio takaramɔ ka wusi tɛ ha sila wi. *Dede Wen ka mi bul, yo tɔ ka mɛgi fin.

¹⁷Pɛ mɛ ka osi tɛ tuka kpasa zuife, mɛ gde tazu mɛ nde, mbonga pɛ Moïse bekpasisi mɛ ha li Sɔ, nɛ mɛ ha suotɛ nde, ɛnɛ nê hio wi pɛ Sɔ.

¹⁸Mɛ ingɔ mɔ ka Sɔ ngoy nde, ɛ ade yo. Nɛ mbonga osa ha mɛ wal mɛ gba soko dedemɔ nɛ gdangamɔ.

¹⁹Mɛ ha takara nde, mɛ beosi liwal ha hio wan-gdɔka li, nɛ nde, mɛ dung tuka saamɔ hazu hio wi ndɔng ka dung ha zang tutum.

²⁰Mɛ ha takara nde, mɛ lɛma mɛ mbo wi ndɔng ka zu mbwa bona, nɛ nde, mɛ lɛma mɛ osi mɔ ha hio pɔlɔmbɔ wi. Mɛ ha tɔa nde, mɛ lɛma de mɔ ndɔng ki hazu mɛ kpaa tɛwen nɛ tili ingɔmɔ fɛt nɛ wal mbonga pɛ Moïse.

²¹Woo! Mɛ ka osi mɔ ha hio mbingwi, hazu ge mɛ osi mɔ ha tɛ mɛ nɛ pɛ mɛ tɛ na, ge nde? Nɛ mɛ ka bul wen ha hio wi nde, ka mbwa azu mɔ na, hazu ge mɛ zu fin mɔ, ge nde?

²²Mɛ ka mbo hio wi nde, ka mbwa ade wanza na, hazu ge mɛ de fin wanza, ge nde? Mɛ ka bhɛsiri hio gbele sɔ, hazu ge mɛ zu mɔ ha zang hio twa gbele sɔ, ge nde?

²³Mɛ ha suotɛ mɛ nɛdɔka nde, mɛ ingɔ mbonga pɛ Moïse. Ma, mɛ ha tukolo mbonga ɛngɛ pi nɛ foy ha li Sɔ.

²⁴Yo nê gbesi tuka ɛ ngɛraka ha takarata pɛ Sɔ: «Hio mbing kandɔ ha tɔa gdanga lingtɛ Sɔ pi nɛ mɔ ha zu ɛnɛ, hio zuife.»

²⁵Mɛ ka dung nê zuife, mɛ gɔna sɔru mɛ hazu osi nde, mɛ nê wi pɛ Sɔ. Ma, dea mɛgi begbakiri mɛ sɔna, ka mɛ pam wen mbonga nɛdedea. Ma, ka mɛ pam yo na, mɛ dung tuka wan-sɔru.

²⁶Ka ma wan-sɔru pam wen mbonga nɛdedea, Sɔ bezɔk wɛnɛ tuka wan-gɔn sɔru, na nde?

²⁷Kpasawen, mɛ ka dung nê zuife, Sɔ haa ɛnɛ takarata mbonga pɛa, nɛ mɛ gɔna sɔru mɛ. Ma, ngase ɛngi mɛ tukolo mbonga ɛngɛ. Yo nê hazu ɛngi ka hio wan-sɔru ndɔng, ka pam mbonga, begɔn kita ha zu mɛ.

²⁸Mɛgi, kpasa zuife bo ha peali na. Nɛ kpasa gɔna sɔru bo nê sali dalɛ ha tɛ wi na.

²⁹Ma, kpasa zuife, yo nê wɛnɛ ka gɔn sɔru ha zang sila wa. Yo nê *Nzɔy-Sɔtɛ pɛ Sɔ ka gɔn sɔru ha zang sila wi, yo bo nɛ wal takarata mbonga na. Kpal zuife mɛgi, yo nê Sɔ ka lukisi wɛnɛ, bo nê hio wi na.