Read south west gbaya Rome 6 Bible Online

Rome 6 - south west gbaya bible

Rome 6

¹Mɛgi, ɔ betɔ nde ge? Ɔ bebhɔn ka ha dea gdangamɔ nde, ka Sɔ ade *dede sila ha tɛ ɔ pen mɔ sɔngsi nde?

²Way! Yo bo mɛgi na. Ɔ tɛ bo nê hio fiowi ka bo fin nê bala ha si gdangamɔ na. Ɔ bede fin mɛng mɛ bhɔn ha dea gdangamɔ, ge nde?

³Ɛnɛ zɔk, ka ɛ gdumso ɔ ha li kari, ɔ tɛ bo ha dea sɔy hinɛ Jésus-Christ. Ɛngi ngoy mɛ tɔ nde, ɔ fea hinɛ wɛnɛ gbesi. Ɛnɛ tɛ ing mɛgi, na nde?

⁴Nɛ wal gdumso ɔ ha li, ɔ tɛ bo nê hio fiowi ka ɛ gunɔ hinɛ Jésus-Christ gbesi. Sɔ, Bafa ɔ, guo wɛnɛ ha soko hio fiowi nɛ wal lɛkɛ-lɛkɛ ziomɔ pɛa tuka nde, ɔ fin, ɔ akpa mbombe tunɔ nɛ ɔ ade mɔ lɛm nɛ yo.

⁵Ɔ tɛ bo ha dea sɔy hinɛ wɛnɛ ha zang fio pɛa. Mɛgi, Sɔ begu ɔ bin ha soko hio fiowi gbesi tuka ka wɛnɛ guo nɛ Christ.

⁶Ɔ ingɔ nde, mɔa wi ka ɔ badung sɔngsi, fea hinɛ Christ gbesi ha getakate. Kilitɛ ɔ ka ngoy de gdangamɔ, bhonda kari, ɔ bo fin nê bala ha si gdangamɔ na.

⁷Hazu, wi ka fea kari, a bo fin nɛ hɛl dea gdangamɔ na.

⁸Tuka ɔ fea hinɛ Christ gbesi, ɔ gde tazu ɔ nɛkpasa nde, ɔ bedung fin nɛ zutunɔ hinɛ wɛnɛ gbesi.

⁹Ɔ ingɔ fin nde, Christ lɛm fe fin na, hazu Sɔ guo wɛnɛ ha soko hio fiowi kari. Fio bo fin nɛ ziomɔ ha zu wa na.

¹⁰Ha fio pɛa, a fea ka ze ndang hireng hazu gdangamɔ pɛ hio wi. Ha tunɔ pɛa, sising wɛnɛ dung nɛ zutunɔ hazu Sɔ.

¹¹Yo gbesi fin nɛ ɛnɛ. Ɛnɛ zɔk tɛ ɛnɛ tuka hio fiowi ka bo fin nê bala ha si gdangamɔ na, nɛ tuka hio tunɔ wi hazu Sɔ nɛ wal dea sɔy hinɛ Jésus-Christ.

¹²Ɛnɛ agdɔki wal ha gdangamɔ mɛ gan zu kilitɛ ɛnɛ ka befe bin, yu nde, ɛnɛ betɛ de mɔ tuka wɔ kilitɛ ɛnɛ ngoya.

¹³Ka ɛnɛ agde hio gbakɔtɛ ɛnɛ ha gdangamɔ tuka mɔ-de kpandele na. Ma, ɛnɛ aha tɛ ɛnɛ ha Sɔ tuka tunɔ wi ka guotɛ ha soko hio fiowi kari. Ɛnɛ agde hio gbakɔtɛ ɛnɛ ha Sɔ tuka mɔ-de nzengmɔ.

¹⁴Lɛma nde, gdangamɔ adung fin nɛ wan hazu ɛnɛ na, hazu ɛnɛ dung ha si dede sila pɛ Sɔ, bo fin ha si *mbonga na.

¹⁵Ɔ bo fin ha si *mbonga na, ɔ dung ha si *dede sila pɛ Sɔ. Mana ɛngi ngoy mɛ tɔ nde, ɔ ade gdangamɔ, nde? Way! Yo bo mɛgi na.

¹⁶Ɛnɛ ingɔ nɛdedea nde, wi ka ɛnɛ mɛkiri mɛ ze nu wa tuka wan pɛ ɛnɛ, ɛnɛ tɛ bo nê bala pɛa. Ɛngɛ tɔ nde, ka ɛnɛ mɛkiri mɛ dung ha si gdangamɔ, yo bedak ɛnɛ pi ha fio. Ma, ka ɛnɛ mɛkiri mɛ ze nu Sɔ, wɛnɛ begde ɛnɛ nzeng ha li wa.

¹⁷Sɔngsi, ɛnɛ badung nê hio bala ha si gdangamɔ. Ma, sising, ɔ tɔ oeba ha Sɔ hazu ɛnɛ tɛ bo ha pama nɛ sila ɛnɛ fɛt mbombe osamɔ, ka Sɔ osa ha ɛnɛ.

¹⁸Ɛnɛ bo fin nê bala ha si gdangamɔ na, ma, ɛnɛ tɛ bo nê bala pɛ Sɔ hazu de nzengmɔ.

¹⁹Mi ku wen tom bala tɔ nɛ wen pɔm tuka nde, ɛnɛ aze zanga nɛhasa. Sɔngsi ɛnɛ bagde hio gbakɔtɛ ɛnɛ tuka bala hazu de nɛ mɔ nzing nɛ tili kpandele nɛtɛ-nɛtɛ. Ma, sising dea nde, ɛnɛ agde hio gbakɔtɛ ɛnɛ fɛt tuka bala ha kɔ Sɔ hazu de nɛ nzengmɔ tuka nde, ɛnɛ atɛ nê hio nzɔy wi pɛa.

²⁰Ha ngimɔ ka ɛnɛ badung nê bala ha si gdangamɔ, hɛl dea nzengmɔ tɛ dung ha sila ɛnɛ na.

²¹Ɛnɛ dungɔ ha dea hio mɔ ka pi foy ha li ɛnɛ sising. Mɛgi, ɛnɛ kpaa nɛ nge tɛ mɔ ha lia ge? Mɔ ndɔng ki dak nɛ fio pi ha zu ɛnɛ.

²²Sising, ɛnɛ bo fin nê bala ha si gdangamɔ na, ma, ɛnɛ tɛ bo nê bala pɛ Sɔ. Mɔ ka ɛnɛ kpaa ha lia, yo nde, ɛnɛ tɛ bo ha dea mɔ nɛ nzɔya, nɛ ɛnɛ bekpa *tunɔ kpoo ha kpogioa.

²³Kpasawen, mɔ-kɛ *wan-de gdangamɔ, yo nê fio. Ma, dede haamɔ ka Sɔ ha nɛ gangtɛ, yo nê tunɔ kpoo ha dea sɔy hinɛ Jésus-Christ, *Kongawan pɛ ɔ.