Read south west gbaya Rome 8 Bible Online

Rome 8 - south west gbaya bible

Rome 8

¹Sising, Sɔ lɛm gɔn kita ba nɛ wi ndɔng ka de sɔy hinɛ Jésus-Christ, fin na.

²Hazu *mbonga ɛngɛ ka tɛ nɛ wal Nzɔy-Sɔtɛ, yo ha tunɔ ha wi ka de sɔy hinɛ Jésus-Christ. Mbonga ɛngɛ gbosasa mi ha si mbonga pɛ gdangamɔ, ka gde wi ha fio.

³Mbonga pɛ Moïse tɛ dung nɛ ngatɛ mɛ kpasisi ɔ na, hazu nɛ tɛ ɔ, ɔ lɛm mɛ pam yo na. Ma, mɔ ka mbonga lɛm mɛ de na, Sɔ dea yo nɛ wal Bewei pɛa ka wɛnɛ tomsa tɛ hakɛ ha nu. Bewei pɛa yola ngbak tɛ wi, ka dungɔ tuka pɛ ɔ, hio *wan-de gdangamɔ. Sɔ gdea wɛnɛ ha fio gɔn nɛ zu gdangamɔ pɛ ɔ. Nɛ wal dea mɛgi, Sɔ gɔna kita ha zu gdangamɔ, ka de tom ha tɛ ɔ.

⁴Sɔ dea mɛgi tuka nde, ɔ adung nɛ ngatɛ mɛ de mɔ lɛm nɛ mɔ ka mbonga ani mɛ de. Ɔ bo fin ha dea mɔ nɛ tɛ ɔ na, ma, ɔ de mɔ nɛ wal ngatɛ pɛ Nzɔy-Sɔtɛ.

⁵Hio wi ka de mɔ nɛ tɛ mbwa, mbwa ha takara swe fɛt hazu mɔ ka tɛ ɛngɛ ngoy. Ma, hio wi ndɔng ka de mɔ nɛ Nzɔy-Sɔtɛ, mbwa ha takara hazu mɔ ka Nzɔy-Sɔtɛ ngoy.

⁶Wi ka de mɔ nɛ tɛ wa, wɛnɛ befe. Ma, wi ka de mɔ nɛ Nzɔy-Sɔtɛ, wɛnɛ bekpa tunɔ nɛ gaamɔ.

⁷Hio wi ndɔng ka takiri swe fɛt hazu mɔ ka tɛ mbwa ngoy, mbwa nê hio ngana pɛ Sɔ. Mbwa kafa mɛ de mɔ lɛm nɛ mbonga pɛ Sɔ, nɛ mbwa bo fin nɛ ngatɛ mɛ de yo na.

⁸Hio wi ndɔng ka de mɔ nɛ tɛ mbwa, lɛm ha totɛ ha Sɔ na.

⁹Ka bo nê pɛ ɛnɛ, ka ɛnɛ ade mɔ nɛ tɛ ɛnɛ na, ma, ɛnɛ de mɔ nɛ Nzɔy-Sɔtɛ pɛ Sɔ, hazu Sɔtɛ ɛngɛ ha dea le ha tɛ ɛnɛ. Ka Sɔtɛ pɛ Christ de le ha sila ma wi na, wia bo nê pɛ Christ na.

¹⁰Ka Christ ang ha tɛ ɛnɛ, yo ngoy tɔ nde, ngase ka tɛ ɛnɛ befe hazu gdangamɔ ka ɛnɛ dea, Sɔtɛ pɛ Christ begde ɛnɛ nɛ zutunɔ hazu ɛnɛ tɛ bo nê *nzeng wi ha li Sɔ.

¹¹Nɛ wal Nzɔy-Sɔtɛ pɛa, Sɔ guo Jésus ha soko hio fiowi. Nɛ Sɔtɛ ɛngɛ ha dea le ha sila ɛnɛ. Yo ngoy tɔ nde, Sɔ ka guo Christ ha soko hio fiowi, a begde bin tɛ ɛnɛ ka befe, nɛ zutunɔ. A bede mɛgi nɛ wal Sɔtɛ pɛa ka de le ha sila ɛnɛ.

¹²Hazu ɛngi, hio ya mi, hio ma mɔ ang ka ɔ lɛma mɛ de. Ma, ma mɔ ndang ka lɛm nɔsisi ɔ mɛ de mɔ nɛ tɛ ɔ bona.

¹³Ka ɛnɛ de mɔ nɛ tɛ ɛnɛ, ɛnɛ befe. Ma, ka ɛnɛ gbɛ hio gdanga ndɔkitɛ ɛnɛ nɛ wal ngatɛ pɛ Nzɔy-Sɔtɛ, ɛnɛ bedung nɛ zutunɔ.

¹⁴Wi ndɔng fɛt ka ndari wal ka Nzɔy-Sɔtɛ osi ha mbwa, mbwa nê hio bem pɛ Sɔ.

¹⁵Ɛnɛ kpaa Nzɔy-Sɔtɛ bo hazu gde ɛnɛ bala ka dung fin nɛ ke na, ma, hazu gde ɛnɛ hio bem pɛ Sɔ. Yo nê Nzɔy-Sɔtɛ ka ha ɔ wal mɛ sa Sɔ nde, Abba, Bafa ɔ.

¹⁶Sɔtɛ ɛngɛ ha gbasa ha sɔtɛ ɔ nde, ɔ nê hio bem pɛ Sɔ.

¹⁷Tuka ɔ tɛ bo nê hio bem pɛ Sɔ, ɔ tɛ bo fin nê hio wan-ba likɔ pɛa. A beha ɔ likɔ ɛngɛ hinɛ Christ gbesi, hazu ɔ ha kpaa yeksamɔ gbesi tuka wɛnɛ. Mɛgi, ɔ bedung fin hinɛ wɛnɛ ha lɛkɛ-lɛkɛ bhandi pɛa.

¹⁸Mi ingɔ nde, yeksamɔ ka ɔ kpa ha ngimɔ ɛngɛ, yo tuka gbelemɔ, hazu yo lɛm may nɛ *lɛkɛ-lɛkɛmɔ ka Sɔ beha ɔ bin na.

¹⁹Hio mɔ nzan fɛt ha dea gasa hɛl mɛ zɔk swe ka Sɔ begbasi hio bem pɛa long.

²⁰Hazu hio mɔ nzan ndɔng tɛ bo ha si ngatɛ ka yɛmili mɔ fɛt. Hio mɔ nzan tɛ ngoy mɛgi na, ma, yo nê Sɔ ha de mɛgi. Ngase ɛngi, ma mɔ ang ka ɛ lɛma mɛ gde tazu ang.

²¹Yo nde, ma swe ndang, Sɔ begbosisi mɔ nzan fɛt ha si bala pɛ ngatɛ ka bhondisi yo. Sɔ beku hio mɔ nzan fɛt gde sɛɛ ha lɛkɛ-lɛkɛ bhandi gbesi hinɛ hio bem pɛa.

²²Ɔ ingɔ nde, angiri ha kudom mɔ hɔ ha swe mɛsɛ, nzan fɛt ha gɔfa nɛ ha kpaa yeksamɔ tuka bhoko ha bio bhɛ.

²³Yo bo sɔna nê nzan na. Ma, ɔ, ka kpaa *Nzɔy-Sɔtɛ tuka bosi dedemɔ ha kɔ Sɔ, ɔ fin ha gɔfa ha zang tɛ ɔ. Hazu, ɔ ha kera mɔ nde, Sɔ agde ɔ tuka bem pɛa nɛ kpasisi ɔ nɛ kilitɛ ɔ fɛt mburr.

²⁴Sɔ kpasasa ɔ kari. Mɛgi ɔ ha gdea tazu ɔ nde, ɔ bekpa bin *mɔkpasi fɛt wɛɛ. Ka bo se nde, ɔ kpaa mɔ ka ɔ gde tazu ɔ ang kari, ki ɔ lɛm keri yo fin na. Hazu, yo nê nge wi ha keri mɔ ka wɛnɛ kpaa kari, o nde?

²⁵Ma, mɔ ka ɔ tɛ kpa ka yo na, nɛ ka ɔ gde tazu ɔ ang, ɔ bekeri yo nɛ yikosila.

²⁶Tuka ɛngi, Nzɔy-Sɔtɛ fin ha gbakara ɔ, hazu ɔ nê hio mɔka wi ha wal mɔ Sɔ. Ɔ ing gɔa Sɔ nɛ wala na. Ma, yo nê Nzɔy-Sɔtɛ ha gɔ Sɔ ha olo nu ɔ nɛ gɔfi, ka wi ndang lɛm mɛ tɔ longoa na.

²⁷Nɛ Sɔ ka ing mɔ ka dung ha zang sila hio wi, wɛnɛ ingɔ fin mɔ ka Nzɔy-Sɔtɛ ngoy mɛ tɔ. Hazu Nzɔy-Sɔtɛ ha gɔa wɛnɛ ha olo nu hio wi pɛ Sɔ gbesi tuka Sɔ ngoya.

²⁸Hio wi ndɔng ka ngoy Sɔ, nɛ ka Sɔ saa mbwa tuka sila wa bheka, ɔ ingɔ nde, Sɔ ha bhɔngara mɔ fɛt ka kpa may hinɛ mbwa, tuka nde, mɔ ndɔng adung nê dedemɔ hazu mbwa.

²⁹Kpasawen, hio wi ndɔng ka Sɔ baweki sɔngsi bingiri, a babhɔngiri wen ha sila wa nde, mbwa adung gbesi tuka Bewei pɛa. A dea mɛgi nde, Bewei pɛa adung nê kay bem ha soko hio gili ya wa.

³⁰Tuka Sɔ babhɔngiri wen hazu mbwa mɛgi, a basa fin mbwa nde, ka mbwa adung nê hio wi pɛa. Tuka wɛnɛ saa mbwa kari, a gdea mbwa nzeng ha li wa fin. Nɛ tuka wɛnɛ gdea mbwa nzeng kari, a kapana fin lɛkɛ-lɛkɛmɔ pɛa hinɛ mbwa.

³¹Ɔ betɔ fin nde ge? Tuka Sɔ nê pɛ ɔ, yo nê nge wi ge ka besungiri ɔ, o nde?

³²Sɔ tɛ kafi nde, ngbak Bewei pɛa afe gɔn zu ɔ, na. A haa Bewei pɛa ha ɔ, yo osi long nde, a beha ɔ fin hio mbing mɔ fɛt.

³³Ma wi ndang lɛm fundi wi ndɔng ka Sɔ weka na. Hazu, yo nê Sɔ ka gdea mbwa nzeng ha li wa.

³⁴Mɛgi, ma wi ndang ka lɛma mɛ gɔn kita ba nɛ mbwa bona. Hazu Jésus-Christ fea gɔn zu mbwa kari. Nɛ pen mɔ fɛt, Sɔ guo wɛnɛ ha soko hio fiowi yunɛ. Wɛnɛ ha dungɔnu ha lɛkɛ-lɛkɛ bhandi ha wekɔ Sɔ, nɛ wɛnɛ ha gɔa Sɔ ha olo nu ɔ.

³⁵Nge mɔ ge ka bekɛtini soko ɔ hinɛ ngoy ka Christ ngoya nɛ ɔ, ge nde? Mana yeksamɔ? Mana ke? Mana hio wi ka namili ɔ? Mana ginga foto? Mana mɔ ka kɔpi ɔ? Mana ngamɔ? Mana fio nde? Way!

³⁶Yo gbesi tuka ɛ ngɛraka ha takarata pɛ Sɔ: «Ngimɔ fɛt, hio wi ha ngoya mɛ gbɛ ɔ hazu mɛ. Ɔ dung ha li mbwa tuka hio sami ka ɛ ba nɛnɛ ha gɔna gɛl mbwa.»

³⁷Ma, ha zang mɔ ndɔng ki fɛt, ɔ nê hio wan-gan bulo nɛ wal Christ ka ngoya ɔ.

³⁸Hazu mi ingɔ nɛdedea nde, ngase fio, ngase tunɔ, ngase hio *telenge, ngase hio sɔtɛ gan zu mɔ, ngase hio mɔ ngimɔ ɛngɛ sising, ngasɛ hio mɔ ngimɔ ka betɛ bin, ngase hio nga sɔtɛ,

³⁹ngase hio mɔ ha kuso ngɔn, ngase hio mɔ ha si nu fɛt lɛm kɛtini soko ɔ hinɛ ngoy pɛ Sɔ na. A gbasa ngoy ɛngɛ nɛ wal *Kongawan pɛ ɔ, Jésus-Christ.