Read south west gbaya 1 Korente 10 Bible Online

1 Korente 10 - south west gbaya bible

1 Korente 10

¹Hio ya mi, mi ngoy gba tazu ɛnɛ nɛ mɔ ka bahɔ se ha tɛ hio ngbabafa ɔ ha kpɛnu. Mbwa yala ha si buswe, nɛ mbwa fɛt kuo nana-litɔng nɛ nanga.

²Sɔ gdumso nɛ mbwa fɛt ha zang buswe nɛ ha nana-litɔng tuka nde, mbwa ade sɔy hinɛ Moïse.

³Mbwa fɛt yɔnga ndangtɛ yɔngamɔ ka tɛa nɛ wal Sɔtɛ pɛ Sɔ.

⁴Nɛ mbwa fɛt nɔa ndangtɛ li ka tɛa nɛ wal Sɔtɛ pɛ Sɔ. Mbwa nɔa li ha gogo ka naka pata mbwa nɛ wal Sɔtɛ pɛ Sɔ. Nɛ gogo ɛngɛ, yo nê Christ.

⁵Ma, ngase ɛngi, deamɔ pɛ hio sulo wi ha soko mbwa tɛ lɛm ha li Sɔ na. Yo nê ɛngi, ka mbwa fea ha kpɛnu.

⁶Hio mɔ ndɔng gba tazu ɔ nde, ka ɔ ade hɛl gdangamɔ tuka ka mbwa bade nɛ na.

⁷Hio ma ha soko mbwa balukisi hio gbele sɔ, lɛma nde, ka ɛnɛ ade mɛgi na. Yo gbesi tuka ɛ ngɛraka ha takarata pɛ Sɔ: «Hio wi dungɔnu hazu yɔng mɔ nɛ nɔ mɔ. Hapata mbwa guotɛ hazu de saka nɛ tum.»

⁸Hio ma ha soko mbwa bade hio mɔ nyɛl, ka ɔ ade mɛgi na. Hazu, hio wi tomay bhuze bwa gbala tar fea fɛt swe ndang.

⁹Ka ɔ awe sila Christ gbesi tuka ka hio ma ha soko mbwa bade nɛ na. Hazu, hio gɔk gɔma mbwa gbɛ.

¹⁰Nɛ fin, ka ɛnɛ atɔtɛ tuka ka hio ma ha soko mbwa bade nɛ na. Hazu, Sɔ tomsa nɛ *telenge mɔ fio tɛ tɛ gbɛ mbwa.

¹¹Mɔ ndɔng bahɔ ha tɛ hio ngbabafa ɔ hazu gba tazu hio olo wi. Nɛ ɛ ngɛraka yo ha zang takarata pɛ Sɔ hazu osi nɛ mɔ ha ɔ, ka dung sanga nɛ kpogio ngimɔ.

¹²Mɛgi, wi ka takiri pɛa nde, wɛnɛ ha yola ha ngɔn, wɛnɛ pangay yu nde, wɛnɛ betɛ tek ha nu.

¹³Mɔ ka sɛbhili ɛnɛ, yo nê ndangtɛ mɔ ka sɛbhili hio wi fɛt. Ma, Sɔ nɛ mboazu, wɛnɛ lɛm mɛkiri nde, mɔ asɛbhili ɛnɛ pen zu ngatɛ pɛ ɛnɛ na. Ma, wɛnɛ beha ɛnɛ ngatɛ mɛ yɔng yini ha zang *sɛbhalamɔ, nɛ wɛnɛ beosi ha ɛnɛ wal mɛ kpɔy ha yo.

¹⁴Hazu ɛngi, hio ndɔngsila mi, ɛnɛ akafi dea tom hio gbele sɔ.

¹⁵Mi tɔ wen ha ɛnɛ tuka ha hio wi nɛ tazu. Ɛnɛ nɛ tɛ ɛnɛ agba soko wen ka mi tɔ.

¹⁶Ha tabolo pɛ *Kongawan, ɔ wol dede wen ha zu kɔpɔ. Bo nê kɔpɔ ɛngɛ osi nde, ɔ ha dea sɔy hinɛ Christ nɛ wal tɔktɛ wa, na nde? Bo nê mampa ka ɔ gbin, osi nde, ɔ ha dea sɔy hinɛ Christ nɛ wal multɛ wa, na nde?

¹⁷Mampa ka nê ndang sɔna. Mɛgi, ɔ, dɔka wi fɛt, ɔ ka nê kilitɛ ndang hazu ɔ ha yɔnga ndangtɛ mampa ndang.

¹⁸Ɛnɛ zɔk hio wi mɔ kandɔ *Israel. Mbwa fɛt ka yɔng sari sadaka, mbwa ha dea sɔy hinɛ Sɔ.

¹⁹Mi ngoy tɔ nde ge? Mana gbele sɔ nê ma mɔ nde? Mana sari sadaka pɛa nê ma mɔ nde?

²⁰Way! Mi ngoy tɔ nde, mɔ ka hio *bhilo ha nɛ sadaka, mbwa ha yo ha Sɔ na, ma, mbwa ha yo ha hio gdanga sɔtɛ. Nɛ mi ngoy nde, ɛnɛ ade sɔy hinɛ hio gdanga sɔtɛ na.

²¹Ɛnɛ lɛm nɔ mɔ ha kɔpɔ pɛ Kongawan, nɛ nɔ fin mɔ ha kɔpɔ pɛ hio gdanga sɔtɛ na. Nɛ ɛnɛ lɛm yɔng mɔ ha tabolo pɛ Kongawan, nɛ yɔng fin mɔ ha tabolo pɛ hio gdanga sɔtɛ na.

²²Mana ɔ ngoy mikiri nɛ ngambi pɛ Kongawan ha zu ɔ, nde? Mana ɛnɛ takiri pɛ ɛnɛ nde, ɔ nɛ ngaya pen wɛnɛ nde?

²³Hio ma wi ha tɔa: «Mi lɛma mɛ de mɔ fɛt tuka mi ngoya.» Ma, yo bo nê mɔ fɛt ka de dedemɔ ha tɛ wi na. Mi lɛma mɛ de mɔ fɛt, ma, yo bo nê mɔ fɛt ka gbakiri *giliwi mɔ eglize na.

²⁴Ka ma wi aki dedemɔ hazu wa na, ma, wɛnɛ aki dedemɔ hazu hio olo wi.

²⁵Ɛnɛ lɛma mɛ yɔng hio sari fɛt ka hio wi gdongi ha zando. Ka ɛnɛ a-ani nde, mana ɛ haa yo nɛ sadaka ha gbele sɔ, na. Mɛgi ingɔmɔ sila pɛ ɛnɛ bedung nɛ gaa.

²⁶Hazu, takarata pɛ Sɔ tɔa: «Nu nɛ mɔ fɛt ka dung ha zua, yo nê pɛ *Kongawan.»

²⁷Ka ma wi ka tɛ mɛkiri Sɔ na, sa ɛnɛ ha twa pɛa hazu yɔng mɔ, nɛ ɛnɛ mɛkara nɛa, ɛnɛ yɔng mɔ fɛt ka wɛnɛ begde ha si ɛnɛ. Ka ɛnɛ a-ani nde, mana ɛ haa yo nɛ sadaka ha gbele sɔ, na. Mɛgi ingɔmɔ sila pɛ ɛnɛ bedung nɛ gaa.

²⁸Ma, ka ma wi tɔ ha ɛnɛ nde, ɛ haa sari ɛngɛ nɛ sadaka ha gbele sɔ, lɛma nde, ɛnɛ ayɔng fin na. Ɛnɛ ade mɛgi hazu wi ka tɔa wena, nɛ hazu wen ingɔmɔ sila.

²⁹Mi tɛ tɔ nɛ wen ingɔmɔ sila pɛ ɛnɛ na, ma, nɛ wen ingɔmɔ sila pɛ olo wi. Mi dung sɛɛ. Mɛgi, ingɔmɔ sila pɛ ma wi lɛma mɛ gɔn kita hazu deamɔ pɔm, mɛng?

³⁰Mi tɔ oeba ha Sɔ hazu yɔngamɔ ka mi yɔng. Mɛgi, ma wi lɛma mɛ tɔ gdanga lingtɛ mi hazu mɔ ka mi tɔa oeba hazua, mɛng?

³¹Mɛgi, ka ɛnɛ yɔng ma mɔ, mana ɛnɛ nɔ ma mɔ, mana ɛnɛ de ma mɔ, lɛma nde, deamɔ pɛ ɛnɛ fɛt alukisi Sɔ.

³²Ka ɛnɛ adung nê mɔ-kɔ nanga ha li ma wi na, ngase ha li hio *zuife na, ngase ha li hio olo kandɔ na, ngase ha li hio wi mɔ eglize pɛ Sɔ na.

³³Ɛnɛ de mɔ tuka mi ha dea. Mi ha kio wal tuka nde, hio deamɔ pɔm fɛt aha totɛ ha hio wi fɛt. Mi ki dedemɔ hazu mi na, ma, mi ki dedemɔ hazu hio wi fɛt tuka nde, mbwa akpasi.