Read south west gbaya 1 Korente 14 Bible Online

1 Korente 14 - south west gbaya bible

1 Korente 14

¹Ɛnɛ ade mɔ fɛt hazu ngoy hio wi. Nɛ fin, ɛnɛ agbɛngsi tɛ ɛnɛ hazu kpa hio ngatɛ ka tɛ nɛ wal Nzɔy-Sɔtɛ, pen fɛt, ngatɛ mɛ tɔ kuliwen pɛ Sɔ.

²Wi ka wol mɔ nɛ hio nu pɛ Nzɔy-Sɔtɛ, wɛnɛ wol mɔ ha wi na, ma, a wol mɔ ha Sɔ. Wi ndang ze longoa na. Nɛ wal ngatɛ pɛ Nzɔy-Sɔtɛ, wɛnɛ ha tɔa wen ka gotoa bhɔn nɛ wuso.

³Ma, wi ka tɔ kuliwen pɛ Sɔ, a wol mɔ ha wi. Wen pɛa gbakiri hio wi, yo mbo mbwa, nɛ yo yɔkili mbwa.

⁴Wi ka wol mɔ nɛ hio nu pɛ Nzɔy-Sɔtɛ, wɛnɛ gbakiri tɛ wa nɛ pɛa tɛ. Ma, wi ka tɔ kuliwen pɛ Sɔ, wɛnɛ gbakiri pɛa nɛ *giliwi mɔ eglize fɛt.

⁵Mi ngoya nɛkpasa nde, ɛnɛ fɛt awol mɔ nɛ hio nu pɛ Nzɔy-Sɔtɛ. Ma, pen ɛngɛ, mi ngoya nde, ɛnɛ atɔ kuliwen pɛ Sɔ. Ka ma wi wol mɔ nɛ hio nu pɛ Nzɔy-Sɔtɛ, dea nde, ɛ abul longoa hazu nde, yo agbakiri giliwi mɔ eglize fɛt. Ka bo mɛgi na, tɔa kuliwen nɛ gasaa pen wolamɔ nɛ hio nu pɛ Nzɔy-Sɔtɛ.

⁶Mɛgi, hio ya mi, ka mi hɔ ha pɛ ɛnɛ nɛ wol mɔ nɛ hio nu pɛ Nzɔy-Sɔtɛ, mi bede dedemɔ ha tɛ ɛnɛ mɛng? Hazu de dedemɔ ha tɛ ɛnɛ lɛma nde, wen pɔm agbasi ha ɛnɛ mana ma wen pɛ Sɔ, mana ma ingɔmɔ, mana ma kuliwen, mana ma osamɔ.

⁷Yo gbesi nɛ hio mɔ-be gima tuka kpoto nɛ kunde. Ka gɛl mbwa gbo long na, ɛ being mɔ ka ɛ dɔma ha kpoto mana ka ɛ mɛla ha kunde mɛng?

⁸Nɛ ka gɛl mbia ka sa hio wi ha bulo, gbo long na, yo nê nge wi ka bebhɔngiri tɛ wa, o nde?

⁹Yo gbesi nɛ ɛnɛ fin, ka ɛnɛ wol mɔ nɛ hio nu pɛ Nzɔy-Sɔtɛ, wen pɛ ɛnɛ bo nɛ saa na. Mɛgi, ɛ being gotoa mɛng? Wen pɛ ɛnɛ tɛ bo nê tum wen.

¹⁰Hio tili nu le ang nɛdɔka ha nzan. Nɛ hio nu le ndɔng ndang ndang fɛt nɛ longoa.

¹¹Ma, ka mi ing nu le pɛ wi ka wol mɔ ha mi na, wɛnɛ dung tuka tombɔ ha li mi, nɛ mi fin tuka tombɔ ha li wa.

¹²Ɛnɛ ka gbɛngsi tɛ ɛnɛ hazu kpa hio ngatɛ ka tɛ nɛ wal Nzɔy-Sɔtɛ, lɛma nde, ɛnɛ aki wal mɛ don nɛ hio ngatɛ ndɔng ka gbakiri giliwi mɔ eglize.

¹³Mɛgi, wi ka wol mɔ nɛ hio nu pɛ Nzɔy-Sɔtɛ, lɛma nde, wɛnɛ agɔ Sɔ tuka nde, Nzɔy-Sɔtɛ aha wɛnɛ fin ngatɛ mɛ bul longowen nu ndɔng.

¹⁴Hazu ka mi gɔ Sɔ nɛ hio nu ndɔng, yo nê Nzɔy-Sɔtɛ ha zang sila mi ka gɔ mɔ, ma, ingɔmɔ pɔm bo ha dea tom na.

¹⁵Mɛgi, mi bede mɛng nde? Mi begɔ Sɔ nɛ wal Nzɔy-Sɔtɛ, nɛ mi begɔ fin nɛ ingɔmɔ pɔm. Mi bebe gima nɛ wal Nzɔy-Sɔtɛ, nɛ mi bebe fin nɛ ingɔmɔ pɔm.

¹⁶Hazu, ka mɛ lukisi Sɔ nɛ wal Nzɔy-Sɔtɛ sɔna, ma wi ha wesara may lɛm ing longoa na. Mɛgi, a betɔ «Amen» ha mɔ ka mɛ tɔ oeba hazua, mɛng? Hazu a ze goto wolamɔ pɛ mɛ na.

¹⁷Ngase ka mɛ tɔa oeba ha Sɔ nɛdedea, yo lɛm gbakiri hio olo wi ha wal mɔ Sɔ na.

¹⁸Mi ha oeba ha Sɔ hazu mi wol mɔ nɛ hio nu pɛ Nzɔy-Sɔtɛ nɛdɔka pen ɛnɛ fɛt.

¹⁹Ma, ha soko giliwi mɔ eglize, mi ngoy osi mɔ ha hio wi. Mɛgi, mi ngoy tɔ wen mɔrkɔ nɛ wal ingɔmɔ pɔm, pen wolamɔ ndɛng-ndɛng nɛ hio nu pɛ Nzɔy-Sɔtɛ.

²⁰Hio ya mi, ka ɛnɛ adung bhobem nɛ wal takaramɔ pɛ ɛnɛ na, ɛnɛ atakiri mɔ tuka zɔma wi. Ma, ɛnɛ adung nzɔri bem nɛ wal deamɔ pɛ ɛnɛ, hazu wɛnɛ tɛ ing ka dea gdangamɔ na.

²¹Ha zang *mbonga, *Kongawan tɔa: «Mi bewol mɔ ha kandɔ pɔm nɛ wal wi ka nu le pɛ mbwa nɛtɛ, nɛ wal nu hio gɔn-gɛnɛ wi. Ma, ngase ɛngi, mbwa lɛm ze mi na.»

²²Mɛgi, wolamɔ nɛ hio nu pɛ Nzɔy-Sɔtɛ, yo nê wekamɔ ka gba tazu wi ndɔng ka tɛ mɛkiri Christ na, hio wi ka mɛkara wɛnɛ kari, kpa ma mɔ ang na. Ma, tɔa kuliwen pɛ Sɔ, yo nê hazu hio wi ka mɛkara Christ kari, hio wi ka tɛ mɛkiri wɛnɛ na, kpa ma mɔ ang na.

²³Ka ɛnɛ fɛt wol mɔ nɛ hio nu pɛ Nzɔy-Sɔtɛ ha wesara may mɔ eglize, ɛngi bo nɛ dedea na. Hazu hio wi ka ing goto wolamɔ ɛngɛ na, mana ka tɛ mɛkiri Christ na, ka mbwa le ha soko ɛnɛ, bo nê mbwa betakiri nde, ɛnɛ nɛ bili, na nde?

²⁴Ma, ka ɛnɛ fɛt tɔ kuliwen pɛ Sɔ, ɛngi nɛ dedea. Hazu, ma wi ka tɛ mɛkiri Christ na, mana ka ing goto wolamɔ nɛ hio nu pɛ Nzɔy-Sɔtɛ na, ka wɛnɛ le ha soko ɛnɛ, bo nê kuliwen ndɔng begbasi *sɛmbɔ pɛa ha wɛnɛ na nde? Bo nê mɔ fɛt ka wɛnɛ ha zea begɔn kita ha zu wa, na nde?

²⁵Mɛgi, hio mɔ ka dung nɛ wuso ha zang sila wa begbo long. A betek gɔk li ha nu, nɛ a belukisi Sɔ nɛ gbasi nde, kpasawen, Sɔ ha soko ɛnɛ.

²⁶Mɛgi, hio ya mi, mi betɔ nɛ ge nde? Ka ɛnɛ wesiri may, wi ndang ndang nɛ ma mɔ mɛ de: Ma wi be gima, ma osi mɔ, ma tɔ wen mɔ ka Sɔ gbasa ha wɛnɛ, ma wol mɔ nɛ hio nu pɛ *Nzɔy-Sɔtɛ, nɛ ma mbinga fin bul longowen nu ndɔng. Dea nde, mɔ ndɔng fɛt agbakiri *giliwi mɔ eglize.

²⁷Ka hio wi wol mɔ nɛ hio nu pɛ Nzɔy-Sɔtɛ, lɛma nde, dɔka mbwa apen bwa mana tar na, nɛ mbwa awol mɔ ndang ndang ha pata may. Nɛ yo lɛma fin nde, ma wi abul longowen nu ndɔng.

²⁸Ka ma wi mɛ bul longoa bona, mbwa adung sɛm ha wesara may mɔ eglize. Lɛma nde, mbwa awol mɔ ha sila mbwa hinɛ Sɔ.

²⁹Ka bo nê pɛ wi ka tɔ kuliwen pɛ Sɔ, wi bwa mana tar lɛma tɔ wen. Nɛ hio mbinga agba soko mɔ ka mbwa tɔa.

³⁰Ma, ka ma wi ha wolamɔ, nɛ ka Sɔ gbasa ma mɔ ha ma mbinga mɛ tɔ ha wesara may, dea nde, wi ka wol mɔ akari sɛm.

³¹Ɛnɛ fɛt lɛma tɔ kuliwen pɛ Sɔ, ma, wi ndang ndang ha pata may tuka nde, wi fɛt ayambi ma mɔ nɛ ba da ha yo.

³²Wi ka dung nɛ ngatɛ mɛ tɔ kuliwen pɛ Sɔ, lɛma nde, wɛnɛ adung nê wan hazu ngatɛ ɛngɛ.

³³Hazu Sɔ bo nê Sɔ ka ngoy woto-wotomɔ na, ma, wɛnɛ nê Sɔ ka ngoy gaamɔ. Gbesi tuka ha soko hio nzɔy giliwi mɔ hio eglize fɛt,

³⁴lɛma nde, hio bhoko adung sɛm ha ngimɔ wesara may. Ka mbwa awol mɔ haki na, ma, mbwa ahil nɛ mɛndi tuka ka *mbonga pɛ Sɔ tɔa.

³⁵Ka mbwa ngoy ing ma mɔ, lɛma nde, mbwa a-ani wei pɛ mbwa ha twa. Hazu, ka hio bhoko wol mɔ ha soko wesara may pɛ giliwi mɔ eglize, ɛngi bo nɛ wala na.

³⁶Ɛnɛ takiri pɛ ɛnɛ nde, Wen pɛ Sɔ gboa ha soko ɛnɛ nde? Mana yo hɔa ha pɛ ɛnɛ sɔna nde?

³⁷Ka ma wi takiri nde, wɛnɛ nê *wan-tɔkuliwen pɛ Sɔ, mana wɛnɛ dona nɛ Nzɔy-Sɔtɛ, wɛnɛ aing nde, mɔ ka mi ngɛriki ha ɛnɛ, yo nê mbonga pɛ *Kongawan.

³⁸Nɛ ka ma wi mɛkiri wen ɛngɛ na, ka ɛnɛ aze wen pɛa na.

³⁹Mɛgi, hio ya mi, ɛnɛ gbɛngsi tɛ ɛnɛ hazu kpa ngatɛ mɛ tɔ nɛ kuliwen pɛ Sɔ, nɛ ka ɛnɛ agdɔki wal ha hio wi mɛ wol mɔ nɛ hio nu pɛ Nzɔy-Sɔtɛ na.

⁴⁰Ma, ɛnɛ ade mɔ fɛt nɛdedea nɛ wala.