Read south west gbaya 1 Korente 2 Bible Online

1 Korente 2 - south west gbaya bible

1 Korente 2

¹Hio ya mi, ha ngimɔ ka mi banɛ ha pɛ ɛnɛ, hazu bul wen mɔ wuso ka Sɔ gbasa ha ɔ, mi tɛ ku nɛ zio wen nɛ mbaramɔ pɛ hio wi wol nɛ mɔ ha ɛnɛ na.

²Mi bagɔn nu sɔngsi nde, ka mi bedung ha soko ɛnɛ, mi aing ma mɔ na, kanɛ Jésus-Christ, wɛnɛ ka fea ha getakate.

³Yo nê ɛngi, ka mi badung nɛ mɔkaa ha soko ɛnɛ, nɛ tɛ mi yaka nɛ ke tututu.

⁴Mi osa mɔ nɛ mi bulo wen pɛ Sɔ ha ɛnɛ, bo nɛ wal mbaramɔ hazu nɔsisi sila ɛnɛ na, ma, yo nê *Nzɔy-Sɔtɛ pɛ Sɔ ka ha ngatɛ pɛa ha zang wen pɔm.

⁵Mɛgi, ɛnɛ mɛkara Christ, bo hazu ɛnɛ zɔka mbaramɔ pɛ wi na, ma, hazu ɛnɛ zɔka ngatɛ pɛ Sɔ.

⁶Tangere, mi ha osa ma mbaramɔ ha hio zɔma wi ha wal mɔ Sɔ. Mbaramɔ ɛngɛ tɛ tɛ nɛ wal nzan ɛngɛ, mana nɛ wal hio wan mɔ nzan ɛngɛ na. Hio wan ndɔng bebhondi fɛt.

⁷Mbaramɔ ɛngɛ ka mi tɔ wena, yo nê mbaramɔ ka tɛ nɛ wal Sɔ, nɛ yo dungɔ sɔngsi nɛ wuso. Sɔ babhɔngiri yo sɔngsi bhee tuka nde, ɔ akpa *lɛkɛ-lɛkɛmɔ nɛ wal yo.

⁸Ma wan ndang mɔ nzan ɛngɛ tɛ ing mbaramɔ ɛngɛ na. Hazu, ka bo se nde, mbwa aing yo, ki mbwa tɛ ngba lɛkɛ-lɛkɛ *Kongawan ha getakate na.

⁹Ma, mɔ hɔa tuka ɛ ngɛraka ha takarata pɛ Sɔ: «Mɔ ka Sɔ bhɔngara keri nɛ wi ndɔng ka ngoy wɛnɛ, gbali wi tɛ zɔk yo na, zala wi tɛ ze yo na, nɛ sila wi tɛ takiri ha yo na.»

¹⁰Ma, pɛ ɔ, Sɔ gbasa mɔ ndɔng ha ɔ long nɛ wal *Nzɔy-Sɔtɛ. Hazu Nzɔy-Sɔtɛ ingɔ goto mɔ fɛt, ngase zang gduko mɔ ka Sɔ takiri ang.

¹¹Nge wi ha ing mɔ ka dung ha sila wi, o nde? Yo ka nê sɔtɛ wi ka dung ha sila wa, ka ingɔ yo. Mɛgi, mɔ ka Sɔ takiri ha sila wa, ma wi lɛm ing yo na, yo ka nê Sɔtɛ pɛ Sɔ ha ing.

¹²Pɛ ɔ, sɔtɛ ka de le ha sila ɔ, yo bo nê nzan ha gde yo ang na. Ma, yo nê Sɔ nɛ pɛa tɛ ha gde yo ang, tuka nde, ɔ aing hio dedemɔ ka wɛnɛ haa ha ɔ.

¹³Mɛgi, ɔ ha bulo wen mɔ ndɔng bo nɛ wal mbaramɔ ka hio wi osi na. Ma, ɔ ha bulo yo nɛ wal mbaramɔ ka Sɔtɛ pɛ Sɔ osa ha ɔ. Mɛgi, ɔ ha bulo tɛwen pɛ Nzɔy-Sɔtɛ ha wi ndɔng ka Sɔtɛ ɛngɛ de le ha sila mbwa.

¹⁴Wi ka takaramɔ pɛa tɛ nɛ wal nzan, a lɛm mɛkiri hio mɔ ka tɛ nɛ wal Sɔtɛ pɛ Sɔ na. A zɔk yo tuka wen bili sɔna, a lɛm ing gotoa na. Hazu wi lɛma ing gotoa sɔna nɛ wal Sɔtɛ pɛ Sɔ.

¹⁵Wi ka Sɔtɛ pɛ Sɔ de le ha sila wa, a lɛma ing goto hio mɔ fɛt. Ma, ma wi ka lɛma ing goto takaramɔ pɛ wia bona.

¹⁶Yo gbesi tuka takarata pɛ Sɔ tɔa: «Nge wi ha ing goto takaramɔ pɛ Kongawan, o nde? Nge wi ka lɛma mbo wɛnɛ, o nde?» Ma, pɛ ɔ, goto takaramɔ pɛ ɔ gbesi tuka pɛ Christ.