Read south west gbaya 1 Korente 3 Bible Online

1 Korente 3 - south west gbaya bible

1 Korente 3

¹Hio ya mi, ha ngimɔ ka mi dungɔ ha pɛ ɛnɛ, mi tɛ wol mɔ ha ɛnɛ tuka ha hio wi ka Sɔtɛ pɛ Sɔ de le ha sila mbwa, na. Ma, mi wola mɔ ha ɛnɛ tuka ha hio wi mɔ nzan. Hazu ɛnɛ dungɔ tuka hio nzɔri bem ha wal mɛkara Christ.

²Hio mɔ ka mi osa ha ɛnɛ, yo dungɔ tuka li bele. Yo tɛ dung nê tɛ yɔngamɔ na. Hazu ha ngimɔ ɛngi, ɛnɛ tɛ lɛm ka yɔnga nga yɔngamɔ na. Ey, ngase sising, ɛnɛ tɛ lɛm ka yɔnga yo na.

³Hazu ɛnɛ bhɔna ka ha dea mɔ tuka hio wi mɔ nzan. Ɛnɛ bhɔna ka ha dea silamɔ ha tɛ may nɛ ha kio wen ha soko may. Bo nê ɛngɛ osi nde, ɛnɛ nê hio wi mɔ nzan, nɛ ɛnɛ ha dea mɔ lɛm nɛ ndɔkitɛ wi, na nde?

⁴Ka ma wi ha soko ɛnɛ tɔ nde, wɛnɛ nê pɛ Paul, nɛ ma mbinga nde, wɛnɛ nê pɛ Apolos, bo nê ɛnɛ ha dea mɔ gbesi tuka hio wi mɔ nzan, na nde?

⁵Apolos nê o? Nɛ Paul nê o? Ɔ sɔna nê hio wan-tom pɛ Sɔ, ka dea tom tuka nde, ɛnɛ amɛkiri Christ. Ɔ de sɔna nɛ tom ka *Kongawan haa ha ɔ mɛ de.

⁶Ɔ dung tuka hio wan-tom ha fɔ. Pɔm, mi gunɔ nɛ kpalmɔ. Apolos aa pɛa nɛ li ha zua. Ma, yo nê Sɔ ha de nde, kpalmɔa asuti gbo.

⁷Mɛgi, wi ka gun mɔ, nɛ wi ka a li ang, mbwa bo nê ma mɔ na. Ma, gasa mɔ, yo nê Sɔ ka de nde, kpalmɔ asuti gbo.

⁸Wi ka gun mɔ nɛ wi ka a li ang, mbwa pen may na. Sɔ bekɛ mbwa bwa fɛt lɛm nɛ tom ka mbwa dea.

⁹Hazu, ɔ nê hio sɔy-tom ha tom pɛ Sɔ, nɛ ɛnɛ dung tuka fɔ pɛ Sɔ. Nɛ ɛnɛ dung fin tuka twa pɛ Sɔ.

¹⁰Pɔm, mi dung tuka zɔma wan-bɛ twa. Mi bɛa nanga twa nɛdedea lɛm nɛ ngatɛ ka Sɔ haa ha mi. Nɛ sising, ma mbing wi tɛa tɛ bɛ twa ha zu nanga twaa. Lɛma nde, wi ndang ndang fɛt ka tongiri tom bɛa twaa, mbwa aba zu mbwa.

¹¹Kpasawen, Sɔ gdea Jésus-Christ tuka nanga twa kari. Ma wi ndang lɛm bɛ fin ma mbing nanga twa na.

¹²Hio ma wi bɛa twa ha zu nanga twa ɛngɛ nɛ gbɛbolo, mana bubolo, mana nɛ hio lɔka ta. Hio ma mbinga bɛa pɛ mbwa nɛ te, mana nɛ nzɔ, mana nɛ panzɔ.

¹³Ha swe kita pɛ Sɔ, li tom pɛ wi ndang ndang fɛt begbasi tɛ long. Hazu ha swea, Sɔ bewe tom ndɔng fɛt nɛ we. Nɛ we ɛngɛ beosi li tom ndang ndang fɛt, mana yo nɛ dedea, mana yo nɛ gdangaa.

¹⁴Ka ma wi bɛa twa ha zu nanga twa ɛngɛ, nɛ ka yo be we na, Sɔ bekɛ wɛnɛ.

¹⁵Ma, wi ka twa pɛa bea we, Sɔ lɛm kɛ wɛnɛ na. Ma, ngase ɛngi, Sɔ bekpasisi wɛnɛ tuka wi ka kpɔya mɔ ha li we.

¹⁶Bo nê ɛnɛ ingɔ nde, ɛnɛ nê twa pɛ Sɔ, nɛ Sɔtɛ pɛ Sɔ ha dea le ha sila ɛnɛ, na nde?

¹⁷Ka ma wi gdangsi twa pɛ Sɔ, Sɔ begdangsi wɛnɛ fin. Hazu twa pɛ Sɔ nɛ nzɔya, nɛ yo nê ɛnɛ ka dung nê twa pɛ Sɔ.

¹⁸Ka ma wi ndang aosili tɛ wa nɛ pɛa tɛ na. Wi ka zɔk tɛ wa tuka wan-mbarimɔ ha wal mɔ nzan ɛngɛ, lɛma nde, wɛnɛ atɛ wan-bili tuka nde, Sɔ aha wɛnɛ kpasa mbaramɔ.

¹⁹Hazu mbaramɔ mɔ nzan ɛngɛ, yo nê wen bili ha li Sɔ. Yo gbesi tuka takarata pɛ Sɔ tɔa: «Sɔ kuo wen likisi pɛ hio wan-mbarimɔ tuka sak mɛ ba nɛ mbwa.»

²⁰Nɛ yo tɔa fin: «Kongawan ingɔ takaramɔ pɛ hio wan-mbarimɔ, nɛ wɛnɛ ingɔ nde, yo nê tum mɔ.»

²¹Hazu ɛngi, ka ma wi ndang alukisi tɛ hazu wɛnɛ nê pɛ ma wi na. Hazu mɔ fɛt nê pɛ ɛnɛ,

²²ngase Paul, ngase Apolos, ngase Pierre, ngase nzan, ngase tunɔ, ngase fio, ngase mɔ ngimɔ ɛngɛ, ngase mɔ ngimɔ ka betɛ bin, mɔ ndɔng fɛt nê pɛ ɛnɛ.

²³Ma, pɛ ɛnɛ, ɛnɛ nê pɛ Christ, nɛ Christ nê pɛ Sɔ.