Read south west gbaya 1 Korente 4 Bible Online

1 Korente 4 - south west gbaya bible

1 Korente 4

¹Lɛma nde, ɛ azɔk ɔ tuka hio wan-tom pɛ Christ, ka wɛnɛ gdea tom ha kɔ ɔ nde, ɔ agbasi tɛwen pɛ Sɔ ka badung nɛ wuso.

²Mɛgi, lɛma nde, wi ka wan pɛa gdea tom ha kɔ wa, adung nɛ mboazu ha toma.

³Pɔm, ka ɛnɛ ngoy gɔn kita ha zu mi, mana hio ma wi ngoy gɔn kita ha zu mi, yo de ma mɔ ha tɛ mi na. Nɛ mi fin, mi gɔn kita ha zu mi nɛ pɔm tɛ na.

⁴Mi tɛ ing ma wen ka dung ha zu mi na. Ma, yo bo nê ɛngi ka gde mi nzeng ha li Sɔ na. Yo sɔna nê *Kongawan ka begɔn kita ha zu mi.

⁵Hazu ɛngi, ka ɛnɛ agɔn kita ha zu wi na. Ɛnɛ keri kanɛ ngimɔ ka Kongawan behɔ. Hazu ka wɛnɛ hɔa, hio mɔ ka wusi tɛ ha tutum sising, a begbosisi yo ha saamɔ. A begbasi fin long hio mɔ ka hio wi takiri ha zang sila mbwa. Mɛgi, Sɔ belukisi wi ndang ndang fɛt lɛm nɛ tom ka mbwa dea.

⁶Hio ya mi, wen ka mi tɔa, yo nê wen hazu ɔ hinɛ Apolos. Mi ngoya nde, ɛnɛ ayambi mɔ ha zanga. Nɛ wal wen ɛngɛ, ɛnɛ lɛma mɛ ing goto zɛngwen, ka tɔ nde, «Ka mɔ ndang apen mɔ zang takarata na.» Mɛgi, ka ɛnɛ asutɛ hazu le nɛ gdong zu ma wi sungiri nɛ mbinga na.

⁷Yo nê nge wi ka gdea mɛ nɛ gasaa pen hio mbinga, o nde? Mɔ ka dung ha kɔ mɛ, bo nê Sɔ haa yo ha mɛ nɛgbelea, na nde? Mɛgi, hazu ge mɛ ha suotɛ hazua ge nde? Hazu ge mɛ zɔka yo tuka mɔ ka mɛ tɛ kpa nɛgbelea na, ge nde?

⁸Pɛ ɛnɛ, ɛnɛ ha takara nde, ɛnɛ kpaa mɔ fɛt kari. Nɛ nde, ɛnɛ tɛ bo nê hio gasa wan-kpamɔ. Nɛ fin nde, ɛnɛ tɛ bo nê hio *kongapora lak ɔ gde. Ey, mi ngoya nde, ɛnɛ atɛ hio kpasa kongapora, ka ɔ adung kongapora hinɛ ɛnɛ gbesi.

⁹Ha takaramɔ pɔm, mi zɔka nde, ɔ ka dung nê hio wan-nɛtom, Sɔ gdea ɔ ha kpogio bhandi. Ɔ dung tuka wi ndɔng ka kita fio baa mbwa kari, nɛ ka keri mɛ fe ha li giliwi. Mɛgi, ɔ tɛ bo nê mɔ mami ha li hio wi mɔ nzan fɛt, nɛ ngase ha li hio *telenge fin.

¹⁰Hio wi mɔ nzan zɔk ɔ tuka hio wan-bili hazu Christ. Ma, ɛnɛ takiri pɛ ɛnɛ nde, ɛnɛ nê hio wan-mbarimɔ hazu ɛnɛ ha dea sɔy hinɛ Christ. Ɔ nê hio mɔka wi, ma, ɛnɛ takiri nde, ɛnɛ nê hio ngawi. Hio wi ha bhɛsara ɔ, ma, mbwa ha lukoso ɛnɛ.

¹¹Hɔ ha ngimɔ sising, ɔ ha fea wɔ yɔngamɔ nɛ wɔ li, latɛ pɛ ɔ bona, hio wi ha mɛla ɔ, nɛ ɔ ha yambala nɛ ngɔn nɛnɛ.

¹²Ɔ ha fea dea tom nɛ kɔ ɔ. Hio wi ha yaa ɔ, nɛ ɔ ha wola dede wen ha zu mbwa. Ɔ ha kpaa yeksamɔ ha kɔ hio wi. Ma, ɔ ha yɔnga yini.

¹³Ka hio wi ha tɔa gdanga lingtɛ ɔ, ɔ kifiri pɛ ɔ nɛ dede wen. Hɔ ha ngimɔ sising, mbwa ha zɔka ɔ tuka sara mɔ, nɛ tuka gdɔl pɛ wi mɔ nzan fɛt.

¹⁴Mi ngɛriki takarata ɛngɛ bo hazu pi foy ha li ɛnɛ na. Ma, mi ngɛriki yo hazu mbo nɛ ɛnɛ tuka ka gdibafa dung mɛ mbo nɛ bem pɛa ka wɛnɛ ngoya gdang.

¹⁵Hazu, ngase ka hio dɔka wi hebhe ha daya ɛnɛ ha wal mɔ Christ, bafa ɛnɛ ka nê ndang sɔna. Yo nê mi ka bhɛa ɛnɛ ha wal mɔ Jésus-Christ nɛ wal bulo *Dede Wen ha ɛnɛ.

¹⁶Hazu ɛngi, mi mbo ɛnɛ nde, ɛnɛ azɔk deamɔ pɔm de nɛ pɛ ɛnɛ.

¹⁷Yo nê ɛngi ka mi tomsa Timothée ha pɛ ɛnɛ. Wɛnɛ nê bem pɔm ha wal mɔ Christ. Mi ngoya wɛnɛ pentɛ, nɛ wɛnɛ nɛ mboazu fɛt. A begba tazu ɛnɛ nɛ wal ka mi ndari nɛ Jésus-Christ. Yo nê ndangtɛ wal ka mi osi ha hio wi mɔ hio eglize ha bhandi fɛt.

¹⁸Hio ma wi ha soko ɛnɛ tɛ bo ha suotɛ, hazu mbwa ha takara nde, mi lɛm mɛ kifiri fin nɛ ha zɔka ɛnɛ na.

¹⁹Ma, ka Sɔ ngoya, mi benɛ ha zɔka ɛnɛ nɛhasa. Ka mi hɔa ha pɛ ɛnɛ, mi ngoy fin ze wen pɛ hio wan-sutɛ ndɔng na, ma, mi ngoya zɔk mana mbwa nɛ ngatɛ mɛ de tom.

²⁰Kpasawen, gasamɔ ha *Kongakandɔ pɛ Sɔ yo bo nê hio wen na, ma, yo nê ngatɛ mɛ de tom.

²¹Ɛnɛ ngoya nɛ ge? Ɛnɛ ngoya nde, mi aba nɛ zambala ha kɔ nɛnɛ ha pɛ ɛnɛ nde? Mana ɛnɛ ngoya nde, mi anɛ ha pɛ ɛnɛ nɛ ngoy nɛ gaa sila nde?