Read south west gbaya 1 Korente 5 Bible Online

1 Korente 5 - south west gbaya bible

1 Korente 5

¹Hio wi ha tɔa nde, wanza ang ha soko ɛnɛ. Pen fɛt, tili wanza ka dung ang, ngase hio *bhilo lɛm de yo na. Yo nde, ma wei ha soko ɛnɛ ha ɔanu hinɛ ko pɛ bafa wa.

²Nɛ ngase ɛngi, ɛnɛ ha suotɛ. Dea nde, ɛnɛ ade ngɔtɛ, nɛ ɛnɛ ayin wi ka dea mɔ mɛgi, yunɛ ha soko ɛnɛ.

³Ma, ngase ka mi nɛ tɛ mi bo haki ha soko ɛnɛ na, mi ha soko ɛnɛ nɛ wal takaramɔ pɔm. Nɛ mi gɔna kita ha zu wia kari tuka mi ha soko ɛnɛ.

⁴Ka ɛnɛ wesara may nɛ ling *Kongawan pɛ ɔ, Jésus, mi bedung hinɛ ɛnɛ nɛ wal takaramɔ pɔm. Mɛgi, nɛ wal ngatɛ pɛ Kongawan pɛ ɔ, Jésus,

⁵lɛma nde, ɛnɛ agde wei ɛngɛ ha kɔ *Satan tuka nde, wɛnɛ ayukiti multɛ wa. Mɛgi, Sɔ bekpasisi sɔtɛ wa ha ngimɔ ka Kongawan bekifiri.

⁶Ma mɔ ka ɛnɛ lɛma sutɛ hazua bona. Ɛnɛ ingɔ zɛngwen ka tɔ nde: «Yina hasisi mampa tikiring lɛma hasisi gasa mbɔrɔa fɛt.»

⁷Hazu ɛngi, ɛnɛ ku mɔa yina ɛngɛ yunɛ ha soko ɛnɛ, tuka nde, ɛnɛ adung nɛ saa tuka mbombe mbɔrɔ mampa ka yina ɛngɛ bo ang na. Kpasawen, Christ tɛ bo nê sami sadaka mɔ yenga *Pake, ka fea gɔn nɛ zu ɔ kari.

⁸Mɛgi, ɔ ade yenga ɛngɛ nɛ mampa ka mɔa yina ɛngɛ bo ang na. Yina ɛngɛ, yo nê dea gdangamɔ nɛ tum mɔ. Ɔ ade yenga nɛ mampa ka yina ɛngɛ bo ang na, ka dung nɛ saa, nɛ ka don nɛ tɛwen.

⁹Ha zang takarata ka mi batomsi ha ɛnɛ, mi tɔa nde, ka ɛnɛ ade sɔy hinɛ hio wan-de wanza na.

¹⁰Kpasawen, ha nzan hio wi ang ka de wanza, ka de hɛl kpaamɔ, ka zu mɔ, ka de tom gbele sɔ. Ma, mi tɛ tɔ wen zɔk nɛ mbwa na. Hazu ka ɛnɛ ngoya sɔsi mbwa fɛt, lɛma nde, ɛnɛ alak nzan gde.

¹¹Mi ngɛraka wen ɛngɛ hazu hio wi ndɔng ka zɔk tɛ mbwa tuka wi pɛ Christ, ma, ka de wanza, ka de hɛl kpaamɔ, ka de tom gbele sɔ, ka tɔ gdanga lingtɛ wi, ka fe dɔkɔ, nɛ ka zu mɔ. Ka ɛnɛ ayɔng mɔ hinɛ kpal wi ndɔng na.

¹²Mi lɛm gɔn kita ha zu hio wi ndɔng ka dung ha dɛl na. Yo nê Sɔ ka begɔn kita ha zu mbwa. Ma, lɛma nde, ɛnɛ agɔn kita ha zu hio wi ka dung ha soko ɛnɛ. Yo gbesi tuka takarata pɛ Sɔ tɔa: «Ɛnɛ yin gdanga wi ha soko ɛnɛ yunɛ.»