Read south west gbaya 1 Korente 6 Bible Online

1 Korente 6 - south west gbaya bible

1 Korente 6

¹Ka ma wi ha soko ɛnɛ nɛ wen sungiri nɛ ma ya wa ha Christ, hazu ge wɛnɛ kuo wena nɛnɛ ha si wan-gɔn kita ka ing Sɔ na, ge nde? Lɛma nde, wɛnɛ aku wena nɛnɛ ha si hio wi pɛ Sɔ.

²Ɛnɛ tɛ ing nde, yo nê hio wi pɛ Sɔ ha begɔn bin kita ha zu hio wi mɔ nzan, na nde? Nɛ ka yo nê ɛnɛ ka begɔn bin kita ha zu hio wi mɔ nzan, hazu ge ɛnɛ lɛm gɔn kita ha zu hio bebe wen ndɔng na, ge nde?

³Nɛ ɛnɛ tɛ ing nde, yo nê ɔ hinɛ ɛnɛ ha begɔn bin kita ha zu hio *telenge pɛ Sɔ, na nde? Ey, ɛngi osi nde, ɔ lɛma gɔn kita ha zu hio wen mɔ nzan ɛngɛ nɛdedea.

⁴Tangere, pɛ ɛnɛ, ka ma tili wen mɛgi hɔa ha soko ɛnɛ, ɛnɛ kpala fin tɛ ku wena nɛnɛ ha si hio ngbundu wi ha li *giliwi mɔ eglize tuka nde, mbwa agɔn kitaa.

⁵Mi ha tɔa wen mɛgi hazu pi nɛ foy ha li ɛnɛ. Ma wan-mbarimɔ bo ha soko ɛnɛ ka lɛma gba soko wen ha soko hio gdiya ha Christ, na nde?

⁶Ma, pɛ ɛnɛ, ma ya ha Christ ha fundo ya wa, nɛ pen fɛt, wɛnɛ kuo wena nɛnɛ ha si wan-gɔn kita ka mɛkiri Sɔ na!

⁷Ɛnɛ tɛ bo ha fundo may, ɛngi osi nde, ɛnɛ yɔa wal pɛ Sɔ kari. Ka ma wi dea gdangamɔ ha tɛ ɛnɛ, mana ka wɛnɛ zuo nɛ ma mɔ pɛ ɛnɛ, hazu ge ɛnɛ lɛm ba sila ɛnɛ sɔna nɛ gdangamɔ ɛngɛ na, ge nde?

⁸Ma, ɛnɛ de mɛgi na. Pɛ ɛnɛ, yo nê ɛnɛ ka tɛ bo ha dea gdangamɔ ha tɛ hio ya ɛnɛ. Nɛ yo fin nê ɛnɛ ka tɛ bo ha zuo mɔ pɛ hio ya ɛnɛ.

⁹Ɛnɛ ingɔ nɛdedea nde, hio *wan-de gdangamɔ lɛm mɛ kpa bhandi ha *Kongakandɔ pɛ Sɔ na. Ka ɛnɛ aosili tɛ ɛnɛ na. Hio wi ka de mɔ nyɛl, ka de tom gbele sɔ, ka de wanza, ka ɔnu nɛ bhobem mana nɛ ma mbwa wei,

¹⁰ka zu mɔ, ka de hɛl kpaamɔ, ka fe dɔkɔ, ka tɔ gdanga lingtɛ wi, ka ba mɔ nɛ nga mbanzi, mbwa fɛt lɛm kpa bhandi ha Kongakandɔ pɛ Sɔ na.

¹¹Hio ma wi ha soko ɛnɛ bade tili gdangamɔ ndɔng sɔngsi. Ma, sising, Sɔ pɛ ɔ fala gdangamɔ pɛ ɛnɛ yunɛ fɛt kari, a dea ɛnɛ hio nzɔy wi pɛa, nɛ a gdea ɛnɛ nzeng ha li wa. Sɔ dea mɛgi nɛ wal ling *Kongawan, Jésus-Christ, nɛ fin nɛ wal *Nzɔy-Sɔtɛ pɛa.

¹²Hio ma wi ha tɔa: «Mi lɛma mɛ de mɔ fɛt tuka mi ngoya.» Kpasawen, ma, yo bo nê mɔ fɛt ka de dedemɔ ha tɛ wi na. Mi lɛma mɛ de mɔ fɛt, ma, mi kafa yu nde, ma mɔ betɛ ba mi tuka bala.

¹³Nɛ hio ma wi ha tɔa fin: «Yɔngamɔ hazu zang, nɛ zang hazu yɔngamɔ.» Kpasawen, ma, Sɔ beyangili bin zang hinɛ yɔngamɔ fɛt. Nɛ tɛ wi, yo bo hazu de nɛ mɔ nyɛl na. Ma, tɛ wi nê pɛ *Kongawan, ka dung fin nê wan hazu tɛ wi.

¹⁴Sɔ ka guo Kongawan ha soko hio fiowi, a begu bin ɔ nɛ wal ngatɛ pɛa.

¹⁵Ɛnɛ tɛ ing nde, tɛ ɛnɛ dung tuka gbakɔtɛ Christ, na nde? Mɛgi, mi beku ma gbakɔtɛ Christ gde tuka gbakɔtɛ bhoko-de wanza, nde?

¹⁶Ɛnɛ tɛ ing nde, ka ma wi ɔa hinɛ ma bhoko-de wanza, mbwa bwa tɛ bo nê tɛ ndang, na nde? Takarata pɛ Sɔ tɔa long: «Mbwa bwa fɛt bedung nê wi ndang.»

¹⁷Ma, wi ka doltɛ ha Kongawan, mbwa bwa tɛ bo nê wi ndang nɛ wal *Nzɔy-Sɔtɛ.

¹⁸Mɛgi, ɛnɛ ayu dea wanza. Hio mbing gdangamɔ fɛt ka wi de, yo gdangsi tɛ mbwa na. Ma, wi ka de wanza, a gdangsi nɛ tɛ wa nɛ pɛa tɛ.

¹⁹Ɛnɛ tɛ ing nde, tɛ ɛnɛ nê twa pɛ Nzɔy-Sɔtɛ, na nde? Sɔ haa ɛnɛ Nzɔy-Sɔtɛ kari, nɛ wɛnɛ de le ha sila ɛnɛ. Mɛgi, ɛnɛ bo nê wan hazu tɛ ɛnɛ nɛ pɛ ɛnɛ tɛ na.

²⁰Ey, Sɔ hɛa ɛnɛ nɛ ngagɛnɛ kari. Mɛgi, ɛnɛ lukisi wɛnɛ nɛ tɛ ɛnɛ fɛt!