Read south west gbaya 1 Korente 7 Bible Online

1 Korente 7 - south west gbaya bible

1 Korente 7

¹Sising, mi bekifiri wen ha ɛnɛ hazu anamɔ ka ɛnɛ ngɛraka ha takarata tomsi ha mi. Mi tɔ ha ɛnɛ nde, dea nde, ka wei asi bhoko na.

²Ngase ka mɔ dung mɛgi, nɛ dedea nde, wei ndang ndang adung nɛ bhoko pɛa, nɛ bhoko ndang ndang adung nɛ wei pɛa tuka nde, dea wanza ayɛbhi na.

³Ka wei akafi ko ha li yala na, nɛ ka bhoko akafi wei ha li yala na.

⁴Bhoko bo nê wan hazu tɛ wa nɛ pɛa tɛ na. Tɛ wa nê pɛ wei pɛa. Nɛ wei fin bo nê wan hazu tɛ wa nɛ pɛa tɛ na. Tɛ wa nê pɛ ko pɛa.

⁵Ka ɛnɛ akafi may ha li yala na. Ma, ka ɛnɛ kpoa zuwen mɛ kafi baa yala ha ma ngimɔ hazu gɔ Sɔ, ɛnɛ lɛma de mɛgi. Nɛ hapata ngimɔ ɛngi, ɛnɛ akifiri tɛ dung hinɛ may yu nde, ngatɛ mɛ gan zu tɛ ɛnɛ betɛ kɔpi ɛnɛ, nɛ yu nde, *Satan betɛ osili ɛnɛ pi ha dea wanza.

⁶Wen ɛngɛ ka mi ha tɔa, mi tɔ yo tuka *mbonga na, ma, tuka mbɔla sɔna.

⁷Pɔm, mi takiri nɛ dedea nde, hio wi fɛt adung nê salo tuka mi. Ma, Sɔ haa hio tili ngatɛ nɛtɛ-nɛtɛ ha hio wi ndang ndang fɛt.

⁸Mɛgi, mi tɔ ha hio salo nɛ hio nagula nde, nɛdedea nde, mbwa abhɔn nê salo tuka mi.

⁹Ma, ka mbwa bo nɛ ngatɛ mɛ gan zu wɔ tɛ mbwa na, mbwa lɛma si may. Yo nɛ dedea mɛ si may pen nde, wɔ tɛ agan zu mbwa.

¹⁰Nɛ sising, yo bo nê mi ka wolmɔ na, ma, yo nê *Kongawan ka ha nu ha hio wi ka sio may kari nde, ka bhoko ayang wei pɛa na,

¹¹nɛ ka wɛnɛ yanga wei kari, ka wɛnɛ asi fin ma mbing wei na, mana wɛnɛ abhɔngiri wen hinɛ wei pɛa. Nɛ wei ayangsi ko pɛa na.

¹²Sising yo bo fin nê Kongawan ka wol mɔ na, ma, yo nê mi ka tɔ ha hio olo wi nde, ka ko pɛ ma ya tɛ mɛkiri Christ na, ma, wɛnɛ ngoy mɛ bhɔn hinɛ wei pɛa, lɛma nde, ka wei ayangsi wɛnɛ na.

¹³Yo dung fin gbesi hinɛ bhoko. Ka wei pɛa tɛ mɛkiri Christ na, ma, wɛnɛ ngoy mɛ bhɔn hinɛ ko pɛa, lɛma nde, ka ko ayang wei pɛa na.

¹⁴Kpasawen, wei ka tɛ mɛkiri Christ na, tɛ bo sanga nɛ Sɔ nɛ wal ko pɛa. Nɛ bhoko ka tɛ mɛkiri Christ na, tɛ bo sanga nɛ Sɔ nɛ wal wei pɛa. Ka bo mɛgi na, ki hio bem pɛ mbwa bo nê pɛ Sɔ na. Ma, hio bem pɛ mbwa tɛ bo sanga nɛ Sɔ kari.

¹⁵Tangere, wi ka tɛ mɛkiri Christ na, ka wɛnɛ ngoy mɛ yang may, wɛnɛ ayang. Ma mɔ ka hɛl ya ha Christ ha tɛ wi ɛngɛ bo fin na, hazu Sɔ saa ɔ mɛ dung sɛɛ ha zang gaamɔ.

¹⁶Pɛ mɛ, bhoko, mɛ being mɛng nde, mɛ bekpasisi wei pɛ mɛ? Nɛ pɛ mɛ, wei, mɛ being mɛng nde, mɛ bekpasisi ko pɛ mɛ?

¹⁷Ha ngimɔ ka Sɔ saa ɛnɛ, ɛnɛ ndang ndang dungɔ nɛ wal mɔ ka *Kongawan weka ha ɛnɛ. Lɛma nde, ɛnɛ fɛt abhɔn ha wal dungɔ mɛgi. Ɛngɛ nê haanu, ka mi haa ha hio giliwi mɔ hio eglize fɛt.

¹⁸Ka ma wi nê wan-gɔn sɔru ha ngimɔ ka Sɔ saa wɛnɛ, lɛma nde, wɛnɛ abhɔn nê wan-gɔn sɔru. Ka ma wi nê wan-sɔru ha ngimɔ ka Sɔ saa wɛnɛ, lɛma nde, wɛnɛ abhɔn nê wan-sɔru.

¹⁹Wan-gɔn sɔru mana wan-sɔru, yo de mɔ na. Gasa mɔ sɔna nde, ɔ apam hio wen *mbonga pɛ Sɔ.

²⁰Dea nde, wi ndang ndang fɛt abhɔn ha ndangtɛ dungɔ tuka ha ngimɔ ka Sɔ saa nɛ wɛnɛ.

²¹Ka mɛ nê bala ha ngimɔ ka Sɔ saa nɛ mɛ, ka mɛ atakiri mɔ na. Ma, ka mɛ bekpa wal mɛ gbo ha tom bala, ka mɛ andekiri fin na.

²²Hazu, bala ka Kongawan saa wɛnɛ kari, a tɛ bo nê wi ka Kongawan gdea wɛnɛ sɛɛ. Yo fin gbesi nɛ wi ka dung sɛɛ. Ka Kongawan saa wɛnɛ kari, a tɛ bo nê bala pɛ Christ.

²³Sɔ hɛa ɛnɛ nɛ ngagɛnɛ kari. Ka ɛnɛ akifiri fin tɛ dung bala ha si hio wi na.

²⁴Mɛgi, hio ya mi, dea nde, wi ndang ndang fɛt abhɔn ha li Sɔ ha ndangtɛ dungɔ tuka ha ngimɔ ka Sɔ saa nɛ wɛnɛ.

²⁵*Kongawan tɛ ha nu ha mi ha wen zu hio salo na. Ma, mi betɔ wen mɔ ka mi takara hazua. Ɛnɛ lɛma mɛkiri wen pɔm hazu mi tɛ bo nɛ mboazu nɛ wal kobhe tɛ mi ka Kongawan dea.

²⁶Mɛgi, ka mi zɔk dɔka yeksamɔ ka kpa ɔ ha ngimɔ sising, mi takara pɔm nde, wi abhɔn ka tuka ka wɛnɛ dung nɛ.

²⁷Ka mɛ sio bhoko kari, ka mɛ ayangsi wɛnɛ na. Nɛ ka mɛ tɛ si ka bhoko na, mɛ abhɔn nê salo.

²⁸Ma, ngase ka mɛ si bhoko, yo bo nê gdangamɔ na. Nɛ ka ma bezunga si wei, yo bo fin nê gdangamɔ na. Ma, ɛnɛ aing nde, hio wi ndɔng ka si may, mbwa bekpa yeksamɔ nɛdɔka ha nzan ɛngɛ. Nɛ mi ngoya nde, ɛnɛ akpɔy ha yeksamɔ ndɔng.

²⁹Hio ya mi, goto wen ka mi ngoy mɛ tɔ ha ɛnɛ, yo nde, ngimɔ ngbɔla tikiring sɔna. Mɛgi, hio wei ndɔng ka sio bhoko, lɛma nde, wena ahɛl sila mbwa na.

³⁰Hio wi ka dung nɛ ngɔtɛ, lɛma nde, ngɔtɛ ɛngɛ ahɛl sila mbwa na. Hio wi ka de totɛ, lɛma nde, totɛ ɛngɛ ahɛl sila mbwa na. Hio wi ndɔng ka hɛa mɔ, lɛma nde, mɔ ndɔng ahɛl sila mbwa na.

³¹Nɛ hio wi ndɔng ka kpa dedemɔ nzan ɛngɛ, lɛma nde, ka mbwa agde sila mbwa ha mɔ nzan ɛngɛ na. Hazu mɔ nzan fɛt bekari.

³²Mi ngoy nde, ɛnɛ adung nɛ nɔzang hazu mɔ nzan na. Wei ka tɛ si bhoko na, mɔ ka hɛl sila wa, yo sɔna nê tom ka wɛnɛ de ha Kongawan. A ki nɛ wal mɛ ha totɛ ha Kongawan.

³³Ma, wei ka sio bhoko, mɔ ka hɛl sila wa, yo nê hio mɔ nzan hazu a ngoy mɛ ha totɛ ha ko pɛa.

³⁴Mɛgi, takaramɔ pɛa hazu mɔ bwa. Yo gbesi fin nɛ salo bhoko hinɛ bezunga, mɔ ka hɛl sila mbwa, yo nê tom ka mbwa de ha Kongawan. Mbwa ngoy mɛ dung nê pɛ Sɔ nɛ sila mbwa nɛ takaramɔ pɛ mbwa fɛt. Ma, bhoko ka sio wei, mɔ ka hɛl sila wa, yo nê hio mɔ nzan hazu a ngoy mɛ ha totɛ ha wei pɛa.

³⁵Mi tɔa wen ndɔng hazu gbakiri nɛ ɛnɛ. Ma, mi tɛ tɔ yo hazu dolsi nɛ ɛnɛ na. Mi tɔ tɔ nde, ɛnɛ ade mɔ ka lɛma nɛ wala, nɛ ɛnɛ aha tɛ ɛnɛ ha Kongawan nɛ nɔa nging.

³⁶Sising mi betɔ wen hazu hio bengali ka hala ma bezunga ka bɛlɛ pɛa lɛma nɛ sio wei. Ka bengali ɛngɛ zɔka nɛ dedea nde, mbwa asi may yu nde, wɔ tɛ bezunga betɛ dak wɛnɛ pi ha dea gdangamɔ, mɛgi lɛma nde, mbwa asi may tuka sila wa ngoya. Ɛngi bo nê gdangamɔ na.

³⁷Ngase ɛngi, ka ma bengali gɔna nu ha zang sila wa nde, a lɛm si bezunga ka wɛnɛ hala na, ɛngi nɛ dedea fin. Ma, lɛma nde, wɛnɛ adung nɛ ngatɛ mɛ gan zu wɔ tɛ wa, nɛ ma mɔ adolsi wɛnɛ mɛ si bhoko na, ma, wɛnɛ nɛ pɛa tɛ abhɔngiri wen mɛgi.

³⁸Mɛgi, wei ka si bhoko ka wɛnɛ hala, wia dea dedemɔ. Nɛ wei ka si bhoko na, wia dea dedemɔ pentɛ.

³⁹Lɛma nde, bhoko abhɔn hinɛ wei pɛa ha ngimɔ tunɔ pɛ wei fɛt. Ka wei fea kari, ko pɛa lɛma mɛ si ma mbing wei tuka sila wa ngoya. Lɛma sɔna nde, wei ɛngɛ adung nê pɛ Christ.

⁴⁰Tangere, mi takiri pɔm nɛ wal *Nzɔy-Sɔtɛ pɛ Sɔ ka de le ha sila mi fin nde, ka wɛnɛ bhɔn nê nagula, wɛnɛ bedung nɛ totɛ pentɛ.