Read south west gbaya 2 Korente 10 Bible Online

2 Korente 10 - south west gbaya bible

2 Korente 10

¹Mi, Paul, mi mbo ɛnɛ nɛ wal gaa sila nɛ *dede sila pɛ Christ. Hio ma wi ha tɔa wen ha tɛ mi nde, ha ngimɔ ka mi dung hinɛ ɛnɛ haki, mi nɛ mɛndi, nɛ ka mi bo hinɛ ɛnɛ na, mi ha fuo da ha ɛnɛ.

²Mɛgi, mi gɔ ɛnɛ nde, ka ɛnɛ anɔsisi mi mɛ fu da ka mi behɔ ha pɛ ɛnɛ na. Ma, mi being wal mɛ osi da pɔm ha hio wi ndɔng ka tɔ nde, deamɔ pɛ ɔ lɛma nɛ ndɔki deamɔ pɛ hio wi mɔ nzan.

³Ey, kpasawen, ɔ fin, ɔ nê wi, ma, bulo ka ɔ bi, yo lɛm nɛ ndɔkitɛ wi na.

⁴Nɛ mɔ-bibulo pɛ ɔ tɛ nɛ wal wi na, ma, yo tɛ nɛ wal Sɔ. Mɔ-bibulo pɛ ɔ nɛ ngatɛ mɛ yangili hio gasa ngatɛ fɛt ka sungiri Sɔ. Ɔ ha yangala hio takaramɔ hazu Sɔ ka bo nɛ wala na.

⁵Ɔ ha yangala hio wen fɛt ka hio wan-sutɛ tɔ hazu gdɔki wal mɛ ing Sɔ. Nɛ hio takaramɔ fɛt ka hio wi takiri ha sila mbwa, ɔ ha gana zua tuka nde, mbwa aze nu Christ.

⁶Ha ngimɔ ka ɔ zɔka nde, ɛnɛ ha zea nu Christ nɛ wala, ɔ bedung gdungɛ-gdungɛ mɛ ndulsi ɛ ndɔng ka bhɔna ha kafa zea nu wa.

⁷Pɛ ɛnɛ, ɛnɛ ingɔ kanɛ gbaa soko mɔ ka dung ha li wi long. Ka ma wi ha soko ɛnɛ zɔk tɛ wa tuka wi pɛ Christ nɛkpasa, lɛma nde, tazu wa agba nde, ɔ nê hio wi pɛ Christ fin tuka wɛnɛ.

⁸Christ gdea ɔ ha zu ɛnɛ bo hazu gdangsi mɛkaramɔ pɛ ɛnɛ na, ma, hazu ngasisi yo. Hio ma wi lɛma takiri mɔ nde, mi ha suotɛ hazua gdang, ma, mi bo nɛ foy hazua na.

⁹Mi ngoy nde, ɛnɛ azɔk mi tuka wi ka gde ke ha sila ɛnɛ nɛ wal hio takarata pɛa na.

¹⁰Hio ma wi ha tɔa nde, ha zang hio takarata pɛa, Paul ha tɔa wen nɛ ngaya nɛ zioa, ma, ka wɛnɛ dung ha soko ɔ, wɛnɛ nê mɔka wi, nɛ hio wen nu wa dung tuka gbelemɔ.

¹¹Kpal wi mɛgi aing nde, mɔ ka ɔ ngɛriki ha zang takarata ha ngimɔ ka ɔ bo hinɛ ɛnɛ na, nɛ mɔ ka ɔ de ha ngimɔ ka ɔ dung hinɛ ɛnɛ, yo nê ndangtɛ mɔ ndang.

¹²Hio ma wi ha tɔa dede lingtɛ mbwa nɛ pɛ mbwa tɛ. Ɔ bo nɛ da mɛ weki tɛ ɔ hinɛ mbwa na. Ɔ lɛm zɔk tɛ ɔ tuka mbwa zɔk nɛ tɛ mbwa na. Mbwa nê hio yerawi. Mbwa ku ndɔki deamɔ pɛ mbwa gde tuka mɔwekimɔ nde, hio wi aweki tɛ mbwa nɛ yo. Mbwa weki tɛ mbwa nɛ pɛ mbwa tɛ.

¹³Pɛ ɔ, yo nê Sɔ ha weki tom ha ɔ nde, ɔ anɛ nɛ bul wen ha pɛ ɛnɛ. Mɛgi ɔ sutɛ sɔna hazu tom ka Sɔ weka ha ɔ. Ɔ lɛm sutɛ pen ɛngi na.

¹⁴Ha ngimɔ ka ɔ hɔa ha pɛ ɛnɛ, ɔ tɛ de ma tom pen tom ka Sɔ weka ha ɔ na. Kpasawen, yo nê ɔ ka hɔa ha pɛ ɛnɛ nɛ bosia mɛ bul *Dede Wen pɛ Christ.

¹⁵Ɔ tɛ sutɛ pentɛ na. Yo nde, tom ka hio mbing wi dea, ɔ sutɛ hazua na. Ma, ɔ gdea tazu ɔ ha tɛ Sɔ nde, mɛkaramɔ pɛ ɛnɛ akpɔtɛ nɛ ha sɔngsi. Ɛngi beha ɔ wal mɛ de ma gasa tom pen mɔ sɔngsi ha soko ɛnɛ, tuka Sɔ weka ha ɔ mɛ de.

¹⁶Hapata, ɔ benɛ nɛ bul Dede Wen ha hio wi ka le pɛ mbwa nɛ yɛa nɛ ɛnɛ. Hazu, tom ka Sɔ weka ha hio mbing wan-bul Dede Wen, ɔ ngoy de yo na. Nɛ tom ka hio mbinga dea, ɔ ngoy sutɛ hazua na.

¹⁷Takarata pɛ Sɔ tɔa: «Wi ka ngoy mɛ sutɛ, wɛnɛ asutɛ hazu mɔ ka *Kongawan dea.»

¹⁸Kpasa dede wan-tom, yo bo nê wi ɛngɛ ka tɔ dede lingtɛ wa nɛ pɛa tɛ na, ma, yo nê wi ɛngɛ ka Kongawan tɔ dede lingtɛ wa.