Read south west gbaya 2 Korente 12 Bible Online

2 Korente 12 - south west gbaya bible

2 Korente 12

¹Lɛma nde, mi alukisi tɛ mi, ngase ka dea mɔ mɛgi lɛm gbakiri wi ndang na. Ma, mi betɔ wen hio gbasamɔ ka Kongawan gbasi nɛ lisɔ.

²Mi ingɔ ma wi pɛ Christ ndang, ka Sɔ lesasa wɛnɛ ha zang kuso bhele-bhele ngɔn. Yo tɛ bo nê bɛlɛ bhukɔ gbala nar mɛsɛ. Mana yo dungɔ nê lisɔ ka wɛnɛ zɔka, mana a nɛa nɛ kilitɛ wa, mi ing sokoa na. Sɔ ndang ha ing yo.

³Ey, mi ingɔ nde, Sɔ kuo wi ɛngɛ nɛnɛ ha dede le pɛa. Mana yo dungɔ nê lisɔ ka wɛnɛ zɔka, mana a nɛa nɛ kilitɛ wa, mi ing sokoa na. Sɔ ndang ha ing yo. Haki, a zea hio mɔ ka wi lɛm ing mɛ tɔ yo na, nɛ ka Sɔ gdɔka fin wal ha wi mɛ tɔ yo.

⁵Mi belukisi tɛ mi hazu wi ɛngɛ. Ma, mi lɛm lukisi tɛ mi nɛ pɔm tɛ na. Mi lɛma lukisi tɛ sɔna hazu mɔ ka osi nde, mi nê mɔka wi.

⁶Ka bo se nde, mi ngoya mɛ lukisi tɛ mi, ki mi de mɔ tuka wan-bili na, hazu mi lɛma tɔ nɛ tɛwen sɔna. Ma, mi kara sɛm, hazu mi tɛ ngoy ngoy nde, hio wi aba mi tuka gasa wi pentɛ na. Mbwa aba mi lɛm nɛ mɔ ka mbwa zɔk mi ha dea, nɛ ka mbwa ze mi ha tɔa.

⁷Kongawan gdea ma mɔ tuka tɛn ha tɛ mi yu nde, mi betɛ sutɛ hazu hio zengem mɔ ka wɛnɛ gbasa ha mi. Tɛn ɛngɛ dung tuka wan-nɛkasara pɛ *Satan, ka sɔm mi tuka nde, mi asutɛ na.

⁸Mi gɔa Kongawan zetar nde, wɛnɛ aku mɔ ɛngɛ ha tɛ mi yunɛ.

⁹Ma, Kongawan kiforo wen ha mi: «*Dede sila ka mi de ha tɛ mɛ, yo lɛma nɛ mɛ. Hazu, ha ngimɔ ka wi nɛ mɔkaa, ngatɛ pɔm lɛma de mɔ fɛt.» Mɛgi, mi belukisi tɛ mi sɔna hazu hio mɔ ka osi nde, mi nê mɔka wi, tuka nde, ngatɛ pɛ Christ ade le ha tɛ mi.

¹⁰Mi nê mɔka wi, hio wi ha yaa mi, hio mɔ ha kɔpa mi, hio wi ha namala mi, nɛ hio yeksamɔ ha kpaa mi hazu mi nê pɛ Christ. Ma, mi nɛ totɛ ha zang mɔ ndɔng fɛt, hazu ka mi nɛ mɔkaa, mi nɛ ngatɛ.

¹¹Ɛnɛ ha nɔsasa mi mɛ wolmɔ tuka wan-bili, hazu ɛnɛ ka lɛma mɛ tɔ dede lingtɛ mi, ɛnɛ tɛ de yo na. Ngase ka mi bo nê ma wi na, hio gasa *wan-nɛtom pɛ ɛnɛ tɛ pen mi ha ma mɔ ndang na.

¹²Ha ngimɔ ka mi dungɔ ha soko ɛnɛ, mi dea tom nɛ yikosila fɛt, nɛ Sɔ dea hio *mɔweka, *mɔkifi nɛ *mɔbhana nɛ wal mi. Mɔ ndɔng osa long nde, mi nê wan-nɛtom.

¹³Mi tɛ de ma mɔ ha hio olo *giliwi mɔ eglize lak ɛnɛ gde na, sɔna nde, mi tɛ dung tuka zio toy ha zu ɛnɛ na. Ma, ka ɛnɛ zɔka yo tuka gdanga deamɔ, mi ani *tiso ha kɔ ɛnɛ.

¹⁴Sising, mi tɛ bo sanga mɛ nɛ ha zetar yali pɔm ha pɛ ɛnɛ. Nɛ mi lɛm dung tuka zio toy ha zu ɛnɛ na. Mi ngoy kpa mɔ ha kɔ ɛnɛ na, mɔ ka mi ngoy, yo nê ɛnɛ. Kpasawen, yo bo nê hio bem ka lɛma mɛ pam gdibafa nɛ gdinana na, ma, yo nê hio gdibafa nɛ gdinana ka lɛma mɛ pam hio bem pɛ mbwa.

¹⁵Pɔm, mi nɛ totɛ mɛ gdangsi hio mɔ pɔm fɛt hazu ɛnɛ, ngase tɛ mi. Mi ngoya ɛnɛ pentɛ. Hazu ge ɛnɛ ngoy mi tikiring sɔna, ge nde?

¹⁶Kpasawen, mi tɛ dung tuka zio toy ha zu ɛnɛ na. Ma, hio ma wi tɔa nde, mi nê wan-likisi ka baa mɔ ha kɔ ɛnɛ nɛ wal dambari.

¹⁷Mana mi yɔnga ɛnɛ nɛ wal ma wi ndang ka mi tomsa ha pɛ ɛnɛ nde?

¹⁸Mi nɔsasa Tite hazu nɛ ha pɛ ɛnɛ, nɛ mi batomsi wɛnɛ hinɛ ya ɔ ɛngɛ ka mi tɔa wen pɛa sɔngsi. Mana Tite yɔnga ɛnɛ nde? Ɔ hinɛ Tite nɛ takaramɔ ndang gbesi, nɛ deamɔ pɛ ɔ fɛt gbesi.

¹⁹Mana ngimɔ nɛzikoa, ɛnɛ ha takara nde, ɔ ha nganga tɛ ɔ ha li ɛnɛ nde? Way! Ɔ ha dea sɔy hinɛ Christ, nɛ ɔ ha wolamɔ ha li Sɔ. Ɔ ha tɔa mɔ ndɔng fɛt ha ɛnɛ, hio ndɔngsila ɔ, hazu gbakiri ɛnɛ ha wal mɔ Sɔ.

²⁰Mi yu nde, ha ngimɔ ka mi behɔ ha pɛ ɛnɛ, mi betɛ kpa nde, deamɔ pɛ ɛnɛ bo tuka mi ngoya na, nɛ ɛnɛ betɛ kpa nde, deamɔ pɔm bo tuka ɛnɛ ngoya na. Mi yu nde, mi betɛ kpa ɛnɛ mana ha mɔya, mana ha dea silamɔ, mana ha dea ngambi, mana ha dea kpakpay, mana ha fɛngsa may, mana ha tɔa gdanga lingtɛ may, mana ha suotɛ, mana ha dea woto-wotomɔ.

²¹Mi yu fin nde, ha ngimɔ ka mi behɔ ha pɛ ɛnɛ, Sɔ pɔm betɛ pi foy ha li mi hazu ɛnɛ. Yo nde, mi yu mɛ kpa ngɔtɛ hazu hio dɔka wi ka bade gdangamɔ sɔngsi, nɛ ka tɛ kifiri sila mbwa lak dea mɔ nzing, dea wanza, nɛ dea mɔ tum gde na.