Read south west gbaya 2 Korente 13 Bible Online

2 Korente 13 - south west gbaya bible

2 Korente 13

¹Yo bedung nê zetar yali pɔm ha pɛ ɛnɛ. Tuka takarata pɛ Sɔ tɔa: «Wan-kɛwen adung bwa mana tar mɛ gɔn soko wen fɛt.»

²Ha zebwa yali pɔm ha pɛ ɛnɛ, mi bagba tazu wi ndɔng ka dea gdangamɔ nɛ tazu hio olo wi fɛt. Nɛ sising ka mi tɛ hɔ ka ha soko ɛnɛ na, mi gba tazu mbwa bingiri ze ndang fin nde, ka mi hɔa nɛ mbinga, mi lɛm gde ma wi fin ndang na.

³Ɛnɛ ngoya ing nde, mana Christ ha wolamɔ nɛ wal nu mi. Ɛnɛ bezɔk yo ha hɔa pɔm! Christ bo nê mɔka wi hazu de mɔ ha soko ɛnɛ na, ma, a de tom ha soko ɛnɛ nɛ ngatɛ.

⁴Kpasawen, ha ngimɔ ka wɛnɛ fea ha getakate, a badung nê mɔka wi. Ma, sising, wɛnɛ nɛ zutunɔ nɛ wal ngatɛ pɛ Sɔ. Ɔ fin ka de sɔy hinɛ Christ, ɔ nê mɔka wi. Ma, ɔ bedung nɛ zutunɔ hinɛ wɛnɛ nɛ wal ngatɛ pɛ Sɔ hazu de tom ha soko ɛnɛ.

⁵Ɛnɛ awe sila ɛnɛ nɛdedea hazu ing nde, mana ɛnɛ mɛkara Christ nɛkpasa. Bo nê ɛnɛ ha zɔka tɛ ɛnɛ tuka hio wi ka Jésus-Christ ang ha tɛ mbwa, na nde? Ma, ɛnɛ nɛ ma mɔ ka gbasi yo nde?

⁶Pɛ ɔ, ɔ nɛ yo. Mi ngoya nde, ɛnɛ aing yo nɛdedea.

⁷Ɔ ha gɔa Sɔ nde, ɛnɛ ade ma gdangamɔ ndang na. Ɔ gɔa Sɔ mɛgi bo hazu osi nde, ɔ nê hio kpasa wi pɛ Christ, na. Ɔ ngoya sɔna nde, ɛnɛ ade dedemɔ. Ka hio ma wi takiri ha wena nde, ɔ bo nê hio kpasa wi pɛ Christ na, yo de mɔ na.

⁸Ɔ bo nɛ ngatɛ mɛ sungiri tɛwen pɛ Sɔ na, ma, ɔ lɛma de sɔna nɛ tom pɛ tɛwen.

⁹Ɔ nɛ totɛ ka ɔ dung nɛ mɔkaa, nɛ ka ɛnɛ dung nɛ ngaya. Mɛgi, ɔ gɔ Sɔ tuka nde, ɛnɛ alɛm fin wɛɛ nɛ mbinga.

¹⁰Sising, mi bo ha soko ɛnɛ na. Mɛgi, mi ngɛriki takarata ɛngɛ tomsi ha ɛnɛ yu nde, ha ngimɔ ka mi hinɛ ɛnɛ, mi betɛ sɛn wen nɛngaya ha ɛnɛ. Hazu, ziomɔ ka Sɔ haa ha mi, bo hazu bhondisi ɛnɛ na, ma, hazu gbakiri ɛnɛ.

¹¹Hazu karsi nɛ wen pɔm, hio ya mi, ɛnɛ adung nɛ totɛ! Ɛnɛ akpɔtɛ ha wal mɔ Sɔ, ɛnɛ ambo may, ɛnɛ adung nɛ ndanga takaramɔ ha soko may, nɛ ɛnɛ adung nɛ gaamɔ. Mɛgi, Sɔ ka gde ngoy nɛ gaamɔ ha sila ɔ, bedung hinɛ ɛnɛ.

¹²Ɛnɛ fan may nɛ duyo mbuku tuka hio nzɔy wi pɛ Sɔ. Hio nzɔy wi pɛ Sɔ hakɛ fɛt fana ɛnɛ.

¹³*Dede sila pɛ *Kongawan Jésus-Christ, ngoy pɛ Sɔ, nɛ ngatɛ pɛ *Nzɔy-Sɔtɛ ka wesiri ɔ, adung hinɛ ɛnɛ fɛt.