Read south west gbaya 2 Korente 2 Bible Online

2 Korente 2 - south west gbaya bible

2 Korente 2

¹Mɛgi mi bhɔngara wen ha sila mi nde, ka nɛa pɔm ha pɛ ɛnɛ beha ngɔtɛ ha ɛnɛ nɛ mbinga, mi lɛm fin nɛ ha pɛ ɛnɛ na.

²Ka mi haa ngɔtɛ ha ɛnɛ, ki mi kpa ma wi ka beha totɛ ha mi fin na. Wi ka mi ha ngɔtɛ ha wɛnɛ, beha fin totɛ ha mi mɛng?

³Yo nê ɛngi ka mi ngɛraka ma takarata tomsi ha ɛnɛ. Mi tɛ ngoy mɛ nɛ ha pɛ ɛnɛ na, yu nde, hio wi ka lɛma mɛ ha totɛ ha mi, betɛ ha ngɔtɛ ha mi. Pɛ ɛnɛ, mi ingɔ nɛdedea nde, ka mi nɛ totɛ, ɛnɛ fɛt bedung nɛ totɛ fin.

⁴Kpasawen, mi ngɛraka takarata ɛngi nɛ gasa ngɔtɛ nɛ ke ha sila mi, nɛ li mi dona nɛ milikwa. Mi ngɛraka yo bo hazu ha ngɔtɛ ha ɛnɛ na, ma, hazu osi ha ɛnɛ nde, mi ngoya ɛnɛ gdang.

⁵Ma wi ndang ha soko ɛnɛ ka dea mɔ ngɔtɛ, a tɛ de yo ha mi na, ma, ha ɛnɛ fɛt. Nɛ mi lɛm ngbangsi wen pentɛ na. Yo bo nê ha ɛnɛ fɛt gbi na, ma, ha hio ma wi ha soko ɛnɛ.

⁶Sulo ɛnɛ ndulso wɛnɛ, nɛ ndulsomɔ ɛngɛ lɛma kari.

⁷Sising, lɛma nde, ɛnɛ abisi *sɛmbɔ pɛa, nɛ ɛnɛ ayɔkili wɛnɛ yu nde, gasa ngɔtɛ pentɛ betɛ dak wɛnɛ ha laka wal mɔ Sɔ gde.

⁸Mɛgi, mi mbo ɛnɛ hazu gbasi ha wɛnɛ long nde, ɛnɛ bhɔna ha ngoya wɛnɛ.

⁹Mi ngɛraka takarata ɛngi ha ɛnɛ hazu ing, mana ɛnɛ nɛ mboazu mɛ ze nu mi ha mɔ fɛt.

¹⁰Nɛ ka ɛnɛ ha tiso ha ma wi, mi bede fin gbesi. Ka ma mɔ ang, ka mi lɛma mɛ ha tiso hazua, mi dea yo kari ha li Christ hazu wen pɛ ɛnɛ.

¹¹Mi dea mɛgi yu nde, *Satan betɛ osili ɔ nɛ gan zu ɔ. Ey, mɔ ka wɛnɛ ngoya mɛ de, ɔ ingɔ yo nɛdedea pentɛ.

¹²Ha ngimɔ ka mi hɔa ha le Troas hazu bul *Dede Wen pɛ Christ, mi zɔka nde, *Kongawan gbosasa wal ha mi long mɛ de tom pɛa.

¹³Tangere, sila mi dungɔ ha gɔna hazu mi tɛ kpa ya ɔ, Tite, haki na. Yo nê ɛngi, ka mi kɛatɛ nɛ hio wi mɛ Troas, nɛ mi pena nɛ ha kandɔnu Masedoane.

¹⁴Ɔ ha oeba ha Sɔ hazu wɛnɛ ha ngbɔsa ɔ swe fɛt ha zang nzɔng ka nak pata Christ, wan-gan zu mɔ fɛt. Mɛgi, ha bhandi fɛt ka ɔ nɛ ang, ɔ ha gbasa ingɔmɔ hazu Christ tuka dede pɛl kulomɔ.

¹⁵Ey, ɔ nɛ pɛ ɔ tɛ dung tuka dede pɛl kulomɔ ka Christ ha nɛ sadaka ha Sɔ. Pɛla ha lea zɔ hio wi ka Sɔ ngoya mɛ kpasisi mbwa, nɛ yo ha lea fin zɔ wi ndɔng ka yɔ mɔ.

¹⁶Pɛlmɔ ɛngɛ beha fio ha wi ndɔng ka dung ha wal fio. Ma, yo beha tunɔ ha wi ndɔng ka Sɔ ngoy ha tunɔ. Mɛgi, yo nê nge wi ka lɛma mɛ de tom bulo wen tɛ Christ, o nde?

¹⁷Dɔka wi ku Wen pɛ Sɔ de nɛ gɛnɛ, ma, pɛ ɔ, ɔ de mɛgi na. Yo nê Sɔ ha tomsi ɔ, nɛ ɔ ha dea sɔy hinɛ Christ. Mɛgi ɔ bul wen nɛ saa sila ha li Sɔ.