Read south west gbaya 2 Korente 3 Bible Online

2 Korente 3 - south west gbaya bible

2 Korente 3

¹Ɛnɛ takiri pɛ ɛnɛ nde, ɔ angara fin nɛ mbinga mɛ tɔ dede lingtɛ ɔ nɛ pɛ ɔ tɛ, nde? Mana, lɛma nde, ɔ aosi ha ɛnɛ hio takarata ka tɔ dede lingtɛ ɔ, nde? Mana, lɛma nde, ɛnɛ angɛriki takarata mɛgi hazu ɔ, nde? Hio ma wi de mɛgi, ma, pɛ ɔ, ɔ de mɛgi na.

²Yo nê ɛnɛ nɛ tɛ ɛnɛ, ka dung tuka takarata pɛ ɔ. Christ ngɛraka yo ha zang sila ɔ tuka nde, wi fɛt atɔl nɛ ing yo.

³Ey, yo gboa long ha li wi fɛt nde, ɛnɛ dung tuka takarata ka Christ ngɛraka nde, ɔ anɛ nɛ yo ha bhandi fɛt. A tɛ ngɛriki yo nɛ li takarata na, ma, nɛ Sɔtɛ pɛ tunɔ Sɔ. Nɛ a tɛ ngɛriki yo ha li papota na, ma, ha zang sila hio wi.

⁴Ɔ tɔa wen ndɔng hazu ɔ gdea tazu ɔ fɛt ha tɛ Sɔ nɛ wal Christ.

⁵Ɔ tɛ takiri nde, ɔ nɛ pɛ ɔ tɛ lɛma de tom ɛngɛ, ndang na. Yo nê Sɔ ka ha ɔ ngatɛ mɛ de nɛ yo.

⁶A haa ɔ ngatɛ mɛ dung nê hio wan-tom ka bul wen mbombe nɔa mbon ha soko Sɔ nɛ wi. Nɔa mbon ɛngɛ tɛ tɛ nɛ wal *mbonga na, ma, yo tɛa nɛ wal *Nzɔy-Sɔtɛ. Hazu mbonga ka ɛ bangɛriki, gde wi ha fio, ma, Nzɔy-Sɔtɛ ha pɛa nɛ tunɔ.

⁷Ɛ bangɛriki wen mbonga ha zu hio papota. Nɛ Moïse bade se tom ha si mbonga ɛngɛ, ka gde wi ha fio. Nɛ wal tom pɛa, wɛnɛ kpaa lɛkɛ-lɛkɛmɔ pentɛ, nɛ yoloa baa ha zang li wa. Yoloa dolsa hio wi mɔ kandɔ *Israel mɛ zɔk zang li wa, ngase ka lɛkɛ-lɛkɛmɔ ɛngi tɛ bhɔn ngimɔ nɛzikoa na.

⁸Mɛgi lɛkɛ-lɛkɛmɔ pɛ tom ka Nzɔy-Sɔtɛ ha dea, yoloa beba pen fɛt, na nde?

⁹Tom pɛ mbonga dungɔ nɛ lɛkɛ-lɛkɛmɔ, ngase ka yo gde wi ha kita fio. Mɛgi, tom gdea wi nzeng ha li Sɔ bedung nɛ lɛkɛ-lɛkɛmɔ pentɛ pet.

¹⁰Mɔa lɛkɛ-lɛkɛmɔ tɛ bo nê gbelemɔ, hazu mbombe lɛkɛ-lɛkɛmɔ nɛ gasaa pen fɛt.

¹¹Kpasawen, mɔ ka beyɛmili dungɔ nɛ lɛkɛ-lɛkɛmɔ, ma, mɔ ka bebhɔn kpoo bedung nɛ lɛkɛ-lɛkɛmɔ pentɛ pet.

¹²Ɔ dona nɛ da, hazu ɔ gde tazu ɔ fɛt ha mɔ ndɔng.

¹³Ɔ de mɔ tuka Moïse na. Wɛnɛ goka zang li wa nɛ la, yu nde hio kandɔ Israel betɛ ing nde, lɛkɛ-lɛkɛmɔ pɛa ha yɛmala.

¹⁴Ma, takaramɔ pɛ mbwa tɛ bo nɛ ngaya. Hɔ ha swe mɛsɛ, la ɛngɛ ha goka takaramɔ pɛ mbwa ka mbwa tɔl takarata mɔ mɔa nɔa mbon. Yo sɔna nɛ wal dea sɔy hinɛ Christ, ka wi lɛma gu la ɛngɛ yunɛ.

¹⁵Kanɛ swe mɛsɛ, ngimɔ fɛt ka mbwa tɔl hio takarata pɛ Moïse, la ɛngɛ ha gdɔka takaramɔ pɛ mbwa.

¹⁶Ma, ka ma wi kiforo tɛ zɔk *Kongawan, ha ndangtɛ ngimɔ ɛngi la ɛngɛ beyu ha takaramɔ pɛa.

¹⁷Nɛ ka bo nê pɛ Kongawan, wɛnɛ nê Sɔtɛ. Nɛ ha bhandi fɛt ka Sɔtɛ pɛ Kongawan dung ang, wɛnɛ ha gdea hio wi sɛɛ.

¹⁸Mɛgi, zang li ɔ fɛt tɛ bo nɛ kpɛa, nɛ yolo lɛkɛ-lɛkɛmɔ pɛ Kongawan ha baa ha zanga. Nɛ wal Sɔtɛ pɛa, Kongawan ha kpalsa ɔ tuka nde, ɔ aba tɛ hinɛ wɛnɛ. Nɛ ɔ ha kpaa lɛkɛ-lɛkɛmɔ pɛa nɛnɛ pen mɔ sɔngsi.