Read south west gbaya 2 Korente 8 Bible Online

2 Korente 8 - south west gbaya bible

2 Korente 8

¹Hio ya mi, ɔ ngoya nde, ɛnɛ aing mɔ ka Sɔ dea nɛ wal *dede sila pɛa ha giliwi mɔ hio eglize ha Masedoane.

²Dɔka yeksamɔ ka kpaa mbwa, wea sila mbwa nɛkpasa. Ma, mbwa dungɔ swe fɛt nɛ totɛ. Ngase mbwa nê hio fabha wi nɛkpasa, mbwa haa mɔ nɛdɔka pen fɛt.

³Mi tɔ ha ɛnɛ nde, mbwa haa mɔ nɛdɔka lɛm nɛ ngatɛ pɛ mbwa, nɛ fin pen zua. Ma wi ndang tɛ nɔsisi mbwa mɛ de mɛgi na.

⁴Mbwa nɛ pɛ mbwa tɛ alanu ha ɔ tuka nde, ɔ aha wal ha mbwa mɛ ha kɔ ha tom gbakara hio wi pɛ Sɔ ha Jérusalem.

⁵Mbwa tɛ ha sɔna nɛ mɔ ka ɔ batakiri hazua na, ma, sɔngsi mɔ fɛt mbwa haa tɛ mbwa ha *Kongawan. Nɛ hapata, mbwa haa tɛ mbwa ha ɔ fin tuka Sɔ ngoya.

⁶Tite angara tom wesara mbɔli ha pɛ ɛnɛ hazu hio wi pɛ Sɔ ha Jérusalem. Yo nê ɛngi ka ɔ mboa wɛnɛ mɛ kifiri nɛ ha pɛ ɛnɛ hazu lɛmsiri dede tom ɛngɛ.

⁷Ha pɛ ɛnɛ, mɔ fɛt ang nɛdɔka: Mɛkaramɔ, ngatɛ mɛ tɔ wen nɛdedea, hɛl mɛ gbɛngsi tɛ, ingɔmɔ, ngoy ka ɛnɛ ngoy nɛ ɔ. Mɛgi, ɔ ngoya nde, ɛnɛ ade fin dede tom ɛngɛ tuka hio wi ka mɔ fɛt ang nɛdɔka.

⁸Mi tɛ ha nu ha ɛnɛ mɛ de mɛgi na. Ma, mi osi ha ɛnɛ hɛl ka hio mbinga de nɛ tom, hazu zɔk nde, mana ɛnɛ ngoya hio ya ɛnɛ nɛkpasa.

⁹Ɛnɛ ingɔ nde, Kongawan pɛ ɔ, Jésus-Christ, ha dea dede sila pentɛ. Wɛnɛ ka badung nê wan-kpamɔ, tɛ bo nê fabha wi hazu ɛnɛ tuka nde, ɛnɛ atɛ hio wan-kpamɔ nɛ wal tɛa fabha wi pɛa.

¹⁰Ha bɛlɛ ka pena, ɛnɛ dungɔ nê hio bosi wi ka bheka mɛ ha mɔ, nɛ ka angara haa mɔ kari. Mɛgi, pɛ ɛnɛ, mi takiri nɛdedea nde,

¹¹ɛnɛ alɛmsiri haa mɔ ɛngɛ sising lɛm nɛ kpaamɔ pɛ ɛnɛ. Ɛnɛ alɛmsiri yo nɛ ndangtɛ dede sila ɛngɛ, ka ɛnɛ bheka mɛ de nɛ yo.

¹²Mana mɔ ha kɔ wi, mana mɔ bo ha kɔ wia na, ka wɛnɛ ha mɔ nɛ dede sila lɛm nɛ mɔa, Sɔ bezɔk haamɔ pɛa nɛ dede li.

¹³Mi tɛ ngoy mɛ ɔksi ɛnɛ hazu ngbangsi hio mbinga na. Ma, mi ngoya nde, ɛnɛ fɛt adung gbesi.

¹⁴Sising, ɛnɛ nɛ yɛbhɛ-yɛbhɛ kpaamɔ. Mɛgi ɛnɛ lɛma gbakiri hio wi ka mɔ kɔpi mbwa. Hapata, ka mbwa bedung bin nɛ yɛbhɛ-yɛbhɛ kpaamɔ, mbwa begbakiri ɛnɛ ha ngimɔ ka mɔ bekɔpi ɛnɛ. Tuka ɛngi, ɛnɛ fɛt bedung gbesi.

¹⁵Yo nê ɛngi, ka ɛ bangɛriki ha takarata pɛ Sɔ: «Wi ka kaya mɔ nɛdɔka, mɔ pɛa tɛ pen tɛ na, nɛ wi ka kaya tikiring, mɔ tɛ kɔpi wɛnɛ na.»

¹⁶Ɔ lukisi Sɔ hazu wɛnɛ gdea hɛl ha sila Tite mɛ gbakiri ɛnɛ fin tuka ɔ ha dea.

¹⁷Ka ɔ ana Tite mɛ nɛ ha pɛ ɛnɛ, a mɛkara. Pen fɛt, wɛnɛ nɛ pɛa tɛ ngoya mɛ nɛ ha pɛ ɛnɛ hazu sila wa dona nɛ hɛl mɛ gbakiri ɛnɛ.

¹⁸Ɔ tomsa ma ya ɔ ndang hinɛ wɛnɛ fin. Giliwi mɔ hio eglize fɛt ha lukoso tom bulo *Dede Wen ka wɛnɛ ha dea.

¹⁹Yo bo sɔna nê ɛngi na, ma, giliwi mɔ hio eglize weka wɛnɛ tuka sɔy-yali pɛ ɔ hazu nɛ nɛ kapini mbɔli ka mbwa wesara nɛ *dede sila. Ɔ bede tom ɛngɛ hazu lukisi nɛ *Kongawan, nɛ hazu osi fin nde, ɔ nɛ hɛl mɛ gbakiri hio ya ɔ.

²⁰Mbɔli ɛngɛ dɔka gdang, nɛ ɔ ngoya konzi yo nɛ mboazu, yu nde, hio wi betɛ fɛngsi tom pɛ ɔ.

²¹Ɔ ha kio wal mɛ de mɔ ka dung nzeng bo sɔna ha li Kongawan na, ma, ha li hio wi fin.

²²Ɔ tomsa fin ma ya ɔ ndang hinɛ hio wi ndɔng bwa. Ɔ wea sila wa ngimɔ nɛdɔka, nɛ ɔ kpaa nde, wɛnɛ nɛ hɛl dea tom pɛ Sɔ swe fɛt. Sising wɛnɛ nɛ hɛla pen mɔ sɔngsi, hazu a gdea tazu wa fɛt ha tɛ ɛnɛ.

²³Pɛ Tite, ɛnɛ ingɔ fɛt nde, wɛnɛ nê sɔy-tom pɔm ka de tom hinɛ mi hazu gbakiri nɛ ɛnɛ. Pɛ hio ya ndɔng bwa ka nɛ hinɛ wɛnɛ, yo nê giliwi mɔ hio eglize ha tomsi mbwa. Deamɔ pɛ mbwa fɛt ha haa lukosomɔ ha Christ.

²⁴Ɛnɛ aosi ha hio ya ndɔng nde, ɛnɛ ngoya mbwa nɛkpasa. Mɛgi, giliwi mɔ hio eglize being nde, ɔ lukisi tɛ hazu ɛnɛ ha li mbwa nɛ wala.