Read south west gbaya Efeze 2 Bible Online

Efeze 2 - south west gbaya bible

Efeze 2

¹Sɔngsi, ɛnɛ badung tuka hio fiowi ha li Sɔ, hazu ɛnɛ dungɔ ha dea kpandele nɛ gdangamɔ.

²Ɛnɛ dungɔ ha dea mɔ gbesi tuka wi mɔ nzan ɛngɛ. Ɛnɛ dungɔ ha zea nu *Satan, wan hazu hio gdanga sɔtɛ ka dung ha soko ngɔn nɛ nu, sɔtɛ ɛngɛ ka de tom ha tɛ wi ndɔng ka ze nu Sɔ na.

³Ɔ fɛt, ɔ badung fin gbesi tuka mbwa. Ɔ badung ka fin ha dea mɔ ka multɛ ɔ ngoya. Ɔ badung ha gdea tɛ ɔ ha hio mɔ ka multɛ nɛ sila ɔ gola. Hazu ndɔkitɛ ɔ dungɔ mɛgi, ɔ lɛma nɛ ngambi pɛ Sɔ tuka hio olo wi fɛt.

⁴Ma, Sɔ nê gasa wan-de kobhe tɛ wi, mɛgi a ngoya ɔ nɛ gasa ngoy pentɛ.

⁵Yo nê ɛngi, ka wɛnɛ tunso ɔ nɛ mbinga hinɛ Christ gbesi, ɔ ka badung tuka hio fiowi hazu gdangamɔ ka ɔ dea. Sɔ kpasasa ɛnɛ nɛ gangtɛ nɛ wal *dede sila pɛa.

⁶A tunso ɔ ha fio gbesi hinɛ Jésus-Christ. Nɛ a gdea ɔ ha zang ngɔn hinɛ Jésus-Christ, hazu ɔ ha dea sɔy hinɛ wɛnɛ.

⁷Sɔ dea dedemɔ ha tɛ ɔ mɛgi nɛ wal Jésus-Christ hazu osi ha hio wi ha ngimɔ ka betɛ bin nde, wɛnɛ nê gasa wan-de dede sila pentɛ pet.

⁸A kpasasa ɛnɛ nɛ wal dede sila pɛa ha ngimɔ ka ɛnɛ mɛkara Christ. A kpasasa ɛnɛ, bo hazu ɛnɛ dea dedemɔ na, ma, a kpasasa ɛnɛ nɛ gangtɛ.

⁹A dea mɛgi bo hazu dede tom pɛ ɛnɛ na, yu nde, ma wi betɛ sutɛ wa.

¹⁰Hazu ɔ fɛt, ɔ nê mɔ ka Sɔ dea. A dea ɔ nɛ wal Jésus-Christ tuka nde, ɔ ade hio dedemɔ, ka wɛnɛ babhɔngiri sɔngsi gde nde, ɔ ade yo.

¹¹Tazu ɛnɛ agba nɛ dungɔ ka ɛnɛ dungɔ nɛ sɔngsi. Ɛnɛ bo nê hio *zuife na. Ɛ bhɛa ɛnɛ ha zang hio mbing kandɔ. Hio zuife ha saa ɛnɛ nde, hio wan-sɔru. Mbwa zɔk tɛ mbwa tuka hio wan-gɔn sɔru, ma, gɔna sɔru pɛ mbwa yo ka nê sali dalɛ ka mbwa gde ha tɛ mbwa.

¹²Ha ngimɔ ɛngi, ɛnɛ tɛ ing ka Christ na. Ɛnɛ dungɔ tuka hio gɔn-gɛnɛ wi, ɛnɛ bo nê hio wi mɛ kandɔ *Israel, kandɔ pɛ Sɔ na. Hio mɔ ka Sɔ gɔna nua ha mbwa nɛ wal nɔa *mbon hinɛ mbwa, mɔ ndɔng tɛ dung hazu ɛnɛ na. Ɛnɛ tɛ dung nɛ ma mɔ hazu gde tazu ɛnɛ ang na. Ɛnɛ dungɔ ha zang nzan, nɛ ɛnɛ tɛ ing Sɔ na.

¹³Sɔngsi, ɛnɛ badung nɛ yɛa nɛ Sɔ. Ma, sising, ɛnɛ tɛ bo ha dea sɔy hinɛ Jésus-Christ. Tɔktɛ wa sɛa gɔn zu ɛnɛ, mɛgi, ɛnɛ tɛ bo sanga nɛ Sɔ.

¹⁴Ɔ dung nɛ gaamɔ ha soko may hazu Christ. A wesara kandɔ zuife nɛ hio mbing kandɔ gde tuka ndanga kandɔ kari. Sɛna may dungɔ sɔngsi tuka ngeng ka kɛtana soko ɔ, ma, Christ gbinɔ yo yunɛ ha ngimɔ ka wɛnɛ gdea tɛ wa ha fio.

¹⁵A tukolo hio haanu nɛ hio mbɔla pɛ *mbonga pɛ hio zuife yunɛ. A dea mɛgi hazu wesiri hio zuife nɛ ɛ ndɔng ka bo nê zuife na, gde tuka mbombe wi ndang, ka de sɔy hinɛ wɛnɛ. Nɛ wal dea mɛgi a gdea gaamɔ ha soko mbwa.

¹⁶Nɛ wal fio pɛa ha getakate, Christ kuo sɛna may yunɛ, nɛ a dea nde, mbwa bwa tɛ bo kilitɛ ndang. A lɛmsara mɔ ha soko mbwa hinɛ Sɔ kari.

¹⁷Christ tɛa ha nzan ha tɔa *Dede Wen ha ɛnɛ ka badung nɛ yɛa nɛ Sɔ, nɛ ha hio zuife ka dung sanga nɛ Sɔ nde, a gdea gaamɔ ha soko ɔ kari.

¹⁸Yo nê hazu Christ ka ɔ fɛt, hio zuife nɛ hio olo kandɔ, lɛma mɛ tiki nɛ hapɛtɛ Sɔ, Bafa ɔ, nɛ wal ndanga *Nzɔy-Sɔtɛ.

¹⁹Hazu ɛngi, ɛnɛ bo fin nê tombɔ mana gɔn-gɛnɛ wi na. Ɛnɛ tɛ bo nê hio bele mɔ nzɔy kandɔ pɛ Sɔ. Nɛ ɛnɛ tɛ bo nê hio wi mɛ zang twa pɛ Sɔ.

²⁰Ɛnɛ dung tuka ngeng twa. Hio *wan-nɛtom nɛ hio *wan-tɔkuliwen dung pɛ mbwa tuka nanga twa ɛngɛ. Nɛ Jésus-Christ dung pɛa tuka ta tɔn ngbili twaa.

²¹Yo nê wɛnɛ, ka tɔn twaa gde ha ngɔn nɛ nɔa ngi-ngi-ngi, mɛ tɔ nde, twaa atongiri si sɔngsi ka yo adung nɛ nzɔy twa ka *Kongawan de le ang.

²²Ha dea sɔy hinɛ Jésus-Christ, ɛnɛ fin, ɛnɛ tɛ bo nê ma bhalkɔ twa ɛngɛ ka Sɔ de le ang nɛ wal Nzɔy-Sɔtɛ pɛa.